سلسلة من مسميات الحب، قصة هنا ويوسف بقلم ريم عبدالعال
هنا
من مُسميات الحُب
هنا ويوسف
22/9/2017
سن مراهقه..مشاعر زياده هتطلع لأول حد هيدخل حياتنا ..أي خراب هنعمله هنحط مضمونه تحت اسم الحب متهيألي ده ال هيحصل .
……………
كل بنت في السن ده بتحلم يكونلها فارس أحلام بحصانه الأبيض هيجي يخطفها ، سنهم مش مُدرك ان الشخص الي قدامهم ممكن ميكونش الصح او الأختيار الأخير ،بنات في اعدادي قاعدين بيسمعوا لبعض وبيبصوا لحياة بعض وحلمهم يجربوا الي بيقولوا عليه حب..
شذا:"بصو يوسف شكله حلو ازاي بجد قمر انا شايفه انه احسن حد قابلته في حياتي هو فيه شويه عيوب بس اكيد هتتغير يعني"
من ضمن فعاليات السن ده ونظرتهم للحب أن يكون شريك حياتهم "شكله حلو"
بطلة قصتنا كانت العاقله الوحيده فيهم رغم ان كلهم نفس السن لحد ما شافته..يوسف.
********************
مجرد ما الشاب بيوصل لسن ال ١٨ بياخد شخصيه الشاب الناضج المُتخلي عن بيته وشايل مسئولياته بنفسه ده كان يوسف او زي ما كنا فاكرين كده..وصل قدام مدرسه بنات اعداديه علي حسب ما يُقال حبيبته وسط مجموعه البنات ال واقفين دول لفت انتباهه وسط جنان وطيش شذا وصحابها واحده بس هاديه بينهم .
………..
شذا: "يوسف هناك اهو يبنات"
بصت عليه من بعيد او حاولت اصلا متبصش بس كان شكله عادى لا هو حلو اوي وقمر زي ما صاحبتها قالت ولا هو اصلا فيه شئ من الجاذبيه، ينفع يكون صاحب لكن حبيب مستحيل!
عُذراً بس إحنا بنحب نحقق المستحيل..
"يوسف"
مش من السهل بنت تتاخد عقل ولد بس هنا قدرت تعمل ده حتي في وسط وجوده مع شذا لقى نفسه مره واحده بيقولها..
يوسف: شذا هي مين الي كانت لابسه رصاصي دي وواقفه علي جنب كده.
شذا:دى هنا ياقلبى لسه منقوله المدرسه جديد وكده.
يوسف: ايوه باين عليها مش شبه جنانك انتى الكام بنت ال حواليكي دول
شذا بشك:قصدك ايه بقى؟
يوسف: مقصدش يلا علشان أروحك.
شذا: إيه رأيك تدورلها علي واحد صاحبك ونبقي صحاب كلنا وكده؟
يوسف: بس ياماما مفيش الكلام ده لو عايزه تعرفيني عليها ونبقي صحاب ماشى بس انا مبحبش الشغل ده..
شذا: هعرفك عليها بس استأذنها الأول.
………………………………………………
سلسلة من مسميات الحب، قصة هنا ويوسف بقلم ريم عبدالعال
تانى يوم نفس قاعده البنات ونفس الحكاوى الطايشه بعد المدرسه ..الفرق بس ان هنا سرحانه شويه ناحيه باب المدرسه قطع سكوتها صوت شذا.
شذا: محكتلكيش بقي يا ست هنا يوسف امبارح طول ما كنا سوا بيحكي عنك وبيسألنى.
هنا بشئ من الصدمة: يسأل عنى؟!
شذا بتأكيد : اه والله فضل يسأل شكيت أنه عاوز يرتبط بيكي.
الى حواليها كلهم ضحكوا الا هي هزار بايخ وسخيف حست نفسها مش فى مكانها.
هنا: انا قايمه اروح إنتو ناس فاضيه .
سابتهم وقامت قلبها بيقولها انها هتشوفه هي ليه مستنياه؟!!
على بُعد شارعين من شارع مدرستها واقف مع صاحبه حاولت تبعد علشان ميشوفهاش بس بعد ايه؟!
يوسف: هنا مش كده؟
هنا لفت بصتله:اه يوسف مش كده؟!
*************************
عدى اكتر من شهر وهنا ويوسف وشذا صحاب أكتر ويوسف إبتدى يشارك هنا مشاكله مع شذا الى زادت بسبب فهمه ان هى مش بتحبه وهو كان معجب بس…
يوسف : طيب ياستي اشهدى انتى ينفع تكلم صاحبي من ورايا وتهزر.
شذا:انت دايما مشغول عنى ده لو كنت مهتم أصلا.
هنا: إستهدوا بالله يا جماعه شذا غلطت ويوسف كمان غلط المفروض تدوا وقت لنفسكو انتو ايه فى حياه بعض وهتكملو ولا لا وسننا مش مناسب لأختيار الارتباط الى هنبقي فيه ..
كلام هنا كان فى الصميم وده غير نظرة يوسف ليها وكمان شذا يوسف أختار ان دي المناسبه تكون صاحبته وأقرب حد يشاركه مشاكله خصوصا فى فتراته الجاية وشذا شافت أن عقل هنا مش هيناسب طيشها..
*********************
3/7/2021
بعد خمس سنين متواصلين من تجارب فاشله خاضها الطرفين وحروب خسرانه بيحكو هزايمهم لبعض فيها ومكملين محافظين علي صحوبيتهم فى كل شهر من كل سنه وكل يوم من كل اسبوع بيقربوا أكتر وأكتر كلام الناس من كتر قربهم بقى مسبب مشاكل للطرفين من حيث إن..
"أنتو لايقين أوي علي بعض"
"إنتو مرتبطين ومخبين صح؟"
"ليه مترتبطوش؟"
"ياريت كنتي مرتبطه بيه بدل ما سبتيه للغريبه"
"أنتَ أولى بيها من غيرك"
عدي شهور من كل الكلام ده وهما ثابتين على مبدأهم وفكره الأرتباط بينهم مرفوضه علشان علاقتهم تدوم…
بس مع هزيمه هنا الأخيره من أقرب حد ليها هو مسمحش أنه يتخلي عنها وفضل جنبها وكل يوم بيحاول بكل الطرق يخرجها من إكتئابها …
هنا:سيبني يا يوسف مش نازله إمشي واقفتك تحت ملهاش لازمه..
يوسف:وانا مش همشي من تحت غير وانتى معايا..
هنا:أنا مش هقدر أنزل ولا قادره أشوف حد ..
يوسف: هطلع أجيبك وساعتها هتبقي عركه مع صحابك ومع أهلك ..
هنا: لا وخلاص علي ايه هلبس نازلالك ..
نزلت هنا بس لقت في عين يوسف نظره مختلفه أول مره تشوفها..
نظره فيها حنية، فيها خوف، فيها راحة أكتر والأهم مش نظره صحاب.
************************************
8/5/2022
عشر شهور من التلميحات الكامله بينه وبينها لحد ما صادف عندهم فرح صاحبتها موجود جنبها كصاحب ليها نزلت تحت علشان سابته مستنيها كتير ردت على تليفونها:
"يوسف أنا وراك"
يوسف فضل متنح لهنا لحد ما وصلت قدامه..
يوسف:إنتى زي القمر أنهارده..
هنا بإستغراب:أول مره تكون صريح في شكلي
يوسف:ياريت يكون فرحنا
هنا :لا وهزارك تقيل كمان بعد الشر علينا
بس يوسف مكانش بيهزر..
******************
سلسلة من مسميات الحب، قصة هنا ويوسف بقلم ريم عبدالعال
هنا اتلهت مع صحبتها العروسه بس كل كام دقيقه بتخطف نظره ليوسف !!
طب ليه هنا بتعمل كدا بس الغريب اكتر أن يوسف كان برضو مش شايل عينه من عليها تقريبا اول مره يعرفو ال اسمه eye contact نظره فيها كميه احتياج للطرفين ، الاتنين استغربوها!
خلصوا الفرح ويوسف روح هنا واستناها تطلع واول ما طلعت اتصل بيها ..
يوسف:هنا انتى جميله اوي .
هنا:انت بتغازل صح ؟؟
يوسف:ينفع تطلعي البلكونه انا واقف تحت ؟
هنا بتوتر:حاضر دقيقه!
يوسف:هنا انتى كنتي حلوه اوي انا حسيت بحاجات كتير اول مره أحسها..
هنا بنبره هاديه:قول حاجه من ال حستها؟
يوسف بتنهيده: انا حبيتك، حبيت ضحكتك، عينك وحركاتك العشوائيه انا حبيت كل شخصياتك ال شوفتها فيكي انا حبيت صحبتي واختي وبنتي ومؤخرا حبيبتي انا بتمني نعيش عمرنا الجاي مع بعض
هنا:نتقابل بكره؟
يوسف:اكيد اه ، هستني اشوفك!
هنا كانت مستنيه تسمع منه الاعتراف دا هنا متاكده أن هى هتعيش قصه حب الناس كلها تكتب عنها بس الايام ليها رأي تاني...
**************************************
هنا ويوسف اتاقبلو اول يوم ليهم وهما المفروض مرتبطين بس لسه هنا مقالتش ردها علي يوسف او علي مشاعره !
يوسف:الو هنا اانا واقف مستنيكي يلا بسرعه عايز احكيلك حاجه مهمه جدا لسه حاصله
هنا:انا جايه خمس دقايق وابقي عندك
هنا راحت ليوسف الچيم وهو بيتمرن شايفين حجم القرب بينهم قد ايه العلاقه بينهم حلوه لحد اللحظه الي هنا وصلت فيها قدام يوسف!
هنا:اي يا عم عايز اى اتوترت!
يوسف:بسنت كلمتني يا بنتي وفضلت تعيط علي الى حصل بيننا وتحسسني انى وحش فقررت ادي فرصه تانيه.
هنا باستغراب وخوف :بسنت مش دي كنت مرتبط بيها؟! انتو رجعتو!!
يوسف:لا مرجعناش بس انا هخليها عندي لحد ما اعرفها اني مغلطتش وتبعد بقا .
هنا اول مره تجرب شعور أن ودنك تبطل تسمع ال حواليك هنا عادت اعتراف يوسف ليها وهو بيقولها بحبك واللحظه ال هى واقفه فيها دلوقتي انو رجع بسنت لحياته
هنا اعتبرت انو نسي أو تراجع عن كلامه فمحبتش تهين كرامتها وتحرج نفسها وكملت معاه كلام لحد ما خلص تمرين وعيونها كلها دموع لحد ما روحت بسرعه وعادت حساباتها وقررت متفتحش موضوع بعد ما كانت ناويه تعترفله بحبها ليه من شهور
**********************
سلسلة من مسميات الحب، قصة هنا ويوسف بقلم ريم عبدالعال
عدا ايام كتير ويوسف ساب بسنت وإختار هنا..
يوسف اهتم بهنا اوي وهنا كانت مغفله او قبلت تكون مغفله سمحت لدا واخيرا اعترفوا لبعض وارتبطوا....
علاقه من اولها مؤذيه بس فيه مثل بيقول القرد فى عين امه غزال
ويوسف كان غزال فى عينها لحد ما بدأ يبان قدام هنا على حقيقته..
لحد ما جه يوم ونزلت هنا ويوسف لفوا اسكندريه زى ما متعودين بس المرادي هنا عايزه تقعد مع يوسف فى مكان تتكلم معاه بصراحه وارتياح اكتر..
راحوا مكان على بحر صوت ام كلثوم جذبهم ودخلوه والطبيعي اكيد هيشربو قهوه تليق مع حالتهم..
يوسف :بتحبي قهوه هنجيب ٢ قهوه
هنا:مش مهم اشرب اي مهم أنى ادام عيونك العسليه دي
هنا كانت ساذجه اوي فى حبها هنا ضحت بكل ال جواها ليوسف ..
يوسف:تعالى نتصور عشان لما نكبر نفتكر ايامنا الجميله دي
وبعد حوار كبير ومناقشات أكبر
هنا بتتفاجأ بدماغ يوسف لاول مره يوسف انه هيسمح وعايز يشغل مراته عافيه عشان تصرف معاه على بيت!فين الرجوله!!
يوسف مطلعش الراجل ال هنا بتحلم بيه....
يوسف :يلا بينا نتمشي واروحك البيت
هنا:يلا بينا ونجيب حلويات فى سكه
يوسف :هنااا انا نسيت محفظتي ينفع تحاسبي معلش انا اسف
هنا :حطت فلوس على ترابيزه ودماغها عماله تفكر هو نسي فعلا ولا دا طبع جديد هنا لسه بتعرفه فى يوسف !!!!
عدا ايام هنا مش قادره تقول لصحابها عشان مش هتحب انه يبان وحش قدامهم هنا فضلت كاتمه الحوار دا وبتفكر لوحدها
يوسف كرر أفعال زي دى كتير مره انا نسيت المحفظه مره انا معيش فكه والغربيه أن يوسف عايز يخلي هنا تحوش معاه عشان يتجوزو ومره هنا ما تجيبي فلوس لعيد ميلادي بدل ما تجيبي هديه بمناسبه عيد ميلادي ومره علي مره هنا بتتقفل..
هنا عملت عيد ميلاد ليوسف ومجاش اه والله زى ما بقول كدا
يوسف مجاش عشان مش عايز يحط نفسه انو لازم يردلها هديه ويرد كل الحاجات دي ف استسهل ومراحش وسابها مستنياه في الشارع وسط الناس بالبلالين والزينه والهديه وانهيارها!!
هنا حبت يوسف ومش هتقدر تبعد ،
هنا شافت عيوبه وطباعه ومش قادره تمنع نفسها عنه،
هنا قررت تحكي لأختها الكبيره ولصحابها،
هنا عايزه تتعلق فى اى كلمه تقسي قلبها عليه بس تقريبا مفيش حاجه قادره على حبها ليه.
اصل يوسف دا كان بنسبالها الدنيا!!!!
اه والله كان كل يوم لازم يتقابلو حتي لو من بعيد؛ عايز يجيب هدوم يخدها ؛ عنده مشوار يخدها وهى كذالك دى ظبطت نومها على معاد شغله عشان تعرف تبقي معاه هو وبس
هنا كانت بتتصل بيوسف وهو نايم عشان تحس بنفسه وتطمن بس من وجوده عذراً الحب بيخلي مشاعرنا فياضه شويتين تلاته
هنا حبته بجد كانت بتحسه ابنها إنما يوسف حبها بس حب نفسه اكتر يوسف كان لازم يبقي صاحب وبس...
قررت تكمل بس هيتغير او هي بيتهيألها اصل مستحيل حبيبها وعشره ٥ سنين يكون فيه عيوب هي متعرفهاش بس للحظه ادركت ان احنا بنكتشف عيوب جديده بعد الارتباط معقول دي عيوب يوسف!!لا مستحيل..
********************
14/8/2022
سلسلة من مسميات الحب، قصة هنا ويوسف بقلم ريم عبدالعال
فى اجواء رومانسيه مع كوبايتين قهوه مظبوط مع منظر البحر
يوسف: موافقه تتخطبي بفضه لو جالك عريس؟
هنا:متهزرش انت هتيجي يا يوسف؟
يوسف:موافقه؟
هنا:انا ميمهنيش فضه أو دهب هو انت جاى بجد!!
يوسف:مش قادر استني لحد ما اكون نفسي واتقدملك انا عايز الناس كلها تعرف دلوقتي أننا بنحب بعض انا عايز ادخل بيتك وتعمليلي اكل من ايدك زى الاكل ال بتجيبهولي فى الدري انا هجيلك اول الشهر أن شاء الله البسي فستان احمر بيليق عليكي..
نسيت اقول ان هنا كانت بتعمل أكل ليوسف ساعات وتروح توديهوله الشغل ،يوسف كان بيحب يحس انو بياكل من ايد هنا..
هنا:انا هتصل بصحابي حالا
يوسف بعصبيه:لا محدش هيعرف دلوقتي استني اسبوع وقوليلهم انا عايزك تروحي تقولي لاهلك وتخليني اكلمها .
هنا فعلا كانت مغيبه سمعت كلام يوسف وفضلت صابره كام يوم وحكت لمامتها وكانت فرحانه بيه اوي لحد ما قاطعهم صوت أختها كبيره..
سهام:هو انتى عارفه يا ماما بيعمل اى معاها دا خلاها تحاسب كذا مره دا أجبرها تحوش فلوس علشان يخرجها بعد امتحانات ثانوي لا يا ماما انا مش موافقه عليه..
اقولكوا سر يوسف فعلا اخد من هنا فلوس بس صحابها قابلوها قبل ما تروحله واخدو منها كل فلوسها سابو مصروف ايديها بس
عشان كانو خايفين ياخد كل فلوسها وفعلا اخد ال معاها عافيه..
ماما هنا: كنتي مستنيه تقوليلي الكلام دا امتي بعد ما يجي البيت والناس كلها تعرف انه خطيبيك!؟انا مش موافقه عليه وبلغيه انى مش عايزه اكلمه وانتى مش هتكلميه تاني ..
هنا مش عارفه اختها ال عملته دا صح ولا غلط بس هو اكيد صح ربنا مش بيعملنا حاجه شر .
****************************************
22/8/2022
عيد ميلاد صاحبه هنا الأقرب لقلبها العادي إن هنا مشغوله بعيد ميلاد صاحبتها هنا معترفتش ليوسف أن هى حكت لوالدتها ورفضت، هنا قررت تقابل يوسف خمس دقايق عشان عيد ميلاد صاحبتها فتعوضه عن الانشغال بصاحبتها طول اليوم!!
هنا بتعرف توازن جدا فى اهتمامها بالناس وهو كان اكتر حد شاغل هنا
هنا كانت محتاجه تشوفه هنا لمست ايده وهى عارفه انها هتبقي تقريبا اخر مره هنا واقفه قدامه وحاسه بنفسه وبتقول جواها أن دى اخر مره هتحس الشعور دا!! هنا كانت هتحاول تغيروا،هنا كانت عايزه تعيش معاه باقي حياتها ..هنا كانت موجوعه اوي بس قدرت متبينش غير لما تخلص احتفالها بصاحبتها الانتيم
العيد ميلاد خلص وهنا روحت بيتها فى اوضتها..
ماما هنا: عملتى اى مع الشاب دا
هنا:معملتش حاجه لسه
ماما هنا: مش قولتلك تخلصي الحوار دا من اسبوع ايه كل دا
هنا: هكلمه حاضر بس انا مش هسيبه
ماما هنا باستغراب: انتى مش بتسمعي كلامي!؟
هنا: لا انا بسمع كلامك بس سبيني المرادي احاول !
سابتها مامتها وخرجت رافضه فكره حتي المحاوله!
هنا عماله تفكر تقول اى ليوسف أو تقوله ازاي؟
١١ بليل يوسف اخد بريك من شغله
هنا: يوسف انا حكيت لماما
يوسف: وانا كلمت اهلى الاسبوع الجاى هجيلك أن شاء الله يلا قولي لصحابك وفهمي الناس هنحتفل الاول فى البيت بعدين هنروح القاعه عشان تكفي الناس ال بيحبونا .
هنا: يوسف ماما مش موافقه!
يوسف:ليه ؟
هنا: انا حكتلها كل حاجه حكتلها الفلوس ال بتاخدها مني حكتلها انى بصرف كتير انا حكيت كل حاجه بس غصب عني يا يوسف... متمشيش.. حتى لو دا طبع فيك هجازف وهنغيره بس متمشيش!!
يوسف بعصبيه أنكر كل حاجه قالتها هو أصلا مش مقتنع بكل ال هي قالته او اتهمته بيه من وجهه نظره..
يوسف طلع هنا قد ايه قاسيه ووحشه يوسف قال ان ربنا لحقه من هنا
يوسف انتهز الفرصه ومشي وبعد وخلاها تشوف وش قسوه وجفاء جديد علي هنا
يوسف عمل بلوك مش بس من سوشيال ميديا لا يوسف عمل بلوك من حياته
هنا:"انا كنت لسه عندي طاقه احاول معاه هو مشي ليه!!!!"
*******************
انتهت قصه مبدأتش !
هنا خسرت صاحبها وابنها وأخوها وحبيبها !
الحب فعلا طلع ببيخسرنا بعض ياريتهم فضلوا صحاب!
هنا شافت يوسف جديد يوسف ال شافها فى الشارع مره دير وشه عنها !!
هنا تاهت من بعده وهو عاش حياته!
هنا لسه رافضه فكره ان يبقى فى حياتها حد غيره!
هنا لسه عايشه بالحاجات الحلوه ال بتفتكرها بينهم!
نقدر كده نقول 1-0 ليوسف..
*************************************
تمت..
قصه هنا ويوسف
من مُسميات الحُب..
ريم عبدالعال
تعليقات
إرسال تعليق