قصيدة لحظة ادراك، مهزوم، هتموت من الحرمان للشاعرة صباح محمد

قصيدة لحظة ادراك، مهزوم، هتموت من الحرمان للشاعرة صباح محمد

"لحظة إدراك" 

الناس مش دايمه ومش بيضه ولكنك خام

متجيش تبكي ساعة ادراك ان انت وحيد

حطيت ثقتك ف الناس و اتباعت بإيد خمّام

حسيت نفسك وسط العزوة بس انت بعيد

ف اوعاك تزعل على ناس بعدت دا بعادهم خير 

ارسم ضحكه تخليك هادي ف عيون الغير 

ماهو كله مجرّح من جوا مش قلبك بس

كل اللي بتفهم تفاصيله بيك عمره ما حس 

خلّي لسانك طيب يكتب للكل علاج

خلّي عيونك تلمع حبك و الكون معتوم

خلّي شفايفك وقت كلامك ترسملك تاج 

وقت التخفيف عن حد جريح كان طير محروم 

كسروا جناحه بجنازير قسوة وقت التكبيل 

و الإسم صحاب و اخوات لكن جوفهم معدوم 

تحلى الجمعه وقت اللمة ساعة تحفيل 

على همي و همك ف بنضحك ونعدي اليوم

عدت ايام و سنين واحنا بالاسم اصحاب

وف يوم شدة اتجرّح قلبي و اتعبّى هموم

بصيت جنبي فَ لقيت قسوة وما لقيت احباب 

واقف مصدوم وانا بستوعب ان انتوا سراب 

وعرفت ان انا كنت ساعتها ف " لحظة ادراك "

لحظة ادراك ان الصحبه عكس الأفلام

وان الاخوات مكانوش اخوات 

والحلم اللى رسمته ف ورقه مدبوح دلوقتي بدون تخدير

فتعيش وحداني بتتوجع وقتيل إحباط

مسمعتش والدك طنشتوا ساعة تحذير 

ماهو قالك حِب الكل وخاف ليغيب خلّك

بس اتعشمت و روحتلهم و بدون تفكير 

ف اوعاك تبكي ساعة ادراك ان انت وحيد

وارسم ضحكه تبين للكل إن انت سعيد

لو فيلمك حتمي نهايتُه تكون أحزان و عياط

إنهيه و عيط و انت بتعلن عن فيلم جديد.! 

#صباح_محمد 🖤

قصيدة لحظة ادراك، مهزوم، هتموت من الحرمان للشاعرة صباح محمد

 (مهزوم)

ببدأ حكايتي و مشهدي البائس

عن أهل كانوا السند و الضل و المأوى

عن طفل وسط الكُل مش حاسس

إن القريب من دمعتُه أقوى 

شايف باباه فِ جهازُه طول الوقت

طب تيجي نلعب لعبة فِـ الاوضه! 

روح يا حبيبي بشتغل دلوقت 

و ياريت ياهانم تتركي الموضه

و مجلة المشاهير وكلامك الفاضي

قومي عشان إبنك، بيزن مش هادي

ف اتعصبِّت، زعّقت (مش كل ليلة هموم) 

و اِشتغلت العركه و الطفل راح أوضته 

و دموعه كات سبقاه لكن بُكاه مكتوم

بيغطي ف ودانه، يعلَى البُكى فَ يعوم

فيروح لأحلامه و يودّع الحاله 

كان يوم فـ بيت صاحبه بيذاكرو فالصاله

شايف حنان أمه و الود و الطيبه

بيشغلوا القرآن، كان نظرته غريبة

شافها موّطيه ع الارض، مَطفي النور

ببراءه بص لصاحبُه و بيسأله

مامتك بتعمل إيه؟ 

"ساجدة لرب غفور"

علشان تروح الجنه و تنور

لكن بتسال ليه؟ 

سكت الولد سرحان، كان الفؤاد مكسور

مصعب سؤال في القلب بيعوّر

وف أمه بيفكر، كل اللي عدى يعيد 

حفلاتها و الميكاب و خروجها و المانكير

عصبيه و نظامها دايم بدون تجديد 

روّح ملازمه فِـ رحلته التفكير 

على ورقُه راسم قصه قبل النوم

أمنية مصدوده، مبقيتش عيّل، قوم

قصاد شباكه طاير سرب من الحمام بيحوم

طايرين بدون حاكم ولا عرفوا معنى اللوم

بيشوفها يحسدها، بيشوف بعين محروم

عيون تعبت من القسوة و من تنميلة الوحدة 

جفون حبست دموع و هموم

عيون تتمنى تنطق مِ الحروف واحدة 

فتصرخ مِـ الوجع صرخه

تهز القلب في ضلوعه يقف مصدوم

و شاف عصفورة بتعلم ولدها يطير 

بيضحك مالفرْح و الحزن كان مكتوم

وراح على ورقُه يشكيله وقاله (بغير) 

من الطير اللى فوق بيلف مش محبوس

صحيح هي الطيور زي السمك بتعوم!

يعني السحاب زي البحور الموج مطر بيقوم!

على كل حال انا همشي و ارجعلك

يومين بالظبط و اسمعلَك

و تسمعلي و انا مهزوم.! 

#صباح_محمد 🖤

قصيدة لحظة ادراك، مهزوم، هتموت من الحرمان للشاعرة صباح محمد

 (هتموت مِن الحرمان) 

بسم اللى زرع الحُب فينا بلاد

و هَدينا ناس زيّ المداس "روحنا"

رَسموا المحبّه و أخدو مِنَّا مُراد

و احنا الغلابه بسِرّنا بوحنا

صَبّو الوجع جوّا كاسات الغِش 

و عبّوا قلبي اللى وقِع مَسطول

عَرضوا الصداقه بآلف وِش و وِش

و سابوني بنزف أو نقول مَقتول 

فَـ دخلت إوضتي، ظَهرت كِتماني 

موجوعه بكتِب شِعر موجُه يِطول

اول ما سال الحِبر في الحرمان

هاج المطر جوّا العيون أُسطول 

فَ قطَعت ورقي، تركت أقلامي 

ما الشِعر فتَّح كل باب مقفول

فَ لمحت ذكرى لكل أيامي 

ساعة ما يملى الحلم أحلامي

و الحزن كبِّل عُمر قدّامي

لما فِـ قلبي أويت، "أناني مريض"

كنت الأمان بتحِسُّوا مِن يَمّي

و معايا عشِت الوقت أجمَع عيد

بنيت لروحَك كون و كوني هدَّمتُه

إديت لقلبَك حُب و قلبي ندَّمتُه 

رميت حنيني بقسى و الجرّح علَّمته

و حياة عيوني الدفى هتموت مِن الحرمان

ترجع تقول آسف، و لضمِّتك مُشتاق

و مريض، بتتوجَّع، سِم الليالي فراق

الوقت ده هرميك مع رُزمة الأوراق

كُل اللي زرع الآلم، هيمُر من فوقه

كُل اللي سوّى الشَر هيدوقُه

كُل اللي حابب قلبُه بيسوقه

و الحادثة دايمًا تتلِف التفكير

و الذكريات عند الخيال طوابير

هِنا كُل حَرف يروح لونّاسُه

هِنا حَد ناسُه بتعشََق التكسير

و الجرح حوِّل مِ الضعيف شاعر

يقدر يدمر كُل شيء ع الورق

يقدر يرجّع كُل شِبر اِتسرق

يقدر يواسي الكُل لو ميت

يقدر يقشِّش كُل قارب غرَق

كان نفسي هذا النص يوصلّكم

لكن لسوء الحظ ورقُه اِتحرَق.!

# صباح _ محمد 🖤