سلسلة من مسميات الحب قصة ملك وآدم بقلم ريم عبدالعال
من مُسميات الحُب
ملك وآدم
علاقات السوشيال مش دايما بتنجح بس ليه لا ما يمكن المره دي تنفع ؟!
طب لو علاقه السوشيال نجحت المسافه الى بينا هتقوى العلاقه ولا هتضعفها؟
طيب فرق السن هيعمل بينا مشكله ولا هنكون فاهمين بعض اكتر؟!!
…………………
15/10/2022
صوره ورا صوره..متابعين بعض من فتره مش فاكرين مين الى بدأ بس على ما أتذكر جمعهم فريقهم المفضل وإهتمامهم بالكوره او يمكن دي حجه مش عارفه؟
دايما الخطوه الأولى بتيجى من الشاب بس ملك عملت العكس!
ملك:شوفت نتيجه أخر ماتش؟
فضلت قاعده فى الشات تلت ساعه كامله مستنيه الرد أيعقل مش هيرد؟ تمسح الرساله؟!دقيقه، التانيه، التالته..
آدم: كان ماتش عالمى بجد الحمدلله كسبناه..
ترد تقول ايه تفتح كلام ازاي مفيش اي سبيل ليها معاه غير الكلام فى الكوره حفاظًا علي كرامتها هتسكت بس هو مش هيسكت موبايلها جاتله ماسدچ منه..على ما أظن بيفتح كلام!
آدم: منين يا ملك؟
ملك:أسكندريه وإنت؟
آدم :القاهره..أحسن ناس أهل اسكندريه دول ..
ملك : وأهل القاهره كمان.
آدم : بتشجعي كوره من إمتي بقي؟
ملك:من يوم ما أتولدت عندى انتماء ..
آدم بإبتسامه:وانتى عندك كام سنه اصلا علي الانتماء ده كله؟
ملك: 18 وانت؟
آدم: 24 الفرق بينا ٦ سنين!!
سكتت..خافت يمكن أكبر منها بكتير بس هي بتعرف تتصرف بس لا هتسكت!وكأنه سمع افكارها..
آدم: متخافيش منى مش هأذيكي ولا هسرق صورك ولا الكلام ده أنا زى أخوكى فى أى وقت هتلاقيني..
ملك:شكرًا
وهتقول ايه غير كده!!
……………….
شهر والتانى والكلام بين ملك وآدم متقفلش بيزيد تقريبا بيتعلقو ببعض! فون وڤيديو كول وڤويس نوتس كتير كل حاجه بينهم زادت الوضع أكبر من إنها أخته الصغيره؟؟
أدم: لو قلتلك بحبك بجد اول مره هتبقي طالعه وحاسس اني بحبك بجد كل مره بقنع نفسي إن شعوري تجاهك أخوى بس لأ دماغك وتفكيرك أكبر من كده انا فعلا حبيتك.
ملك: أنا كمان حبيتك اوي يا آدم بجد.
آدم :تعالي نتكلم زي كل يوم بس المره دي مختلفه..
ملك : طب خليها لما اصحي عندي أمتحان الصبح.
آدم بتصميم: هرن عليكي نتكلم خمس دقايق وبعدين نامي
وقدام تصميمه مستحيل ترفض وفعلا بدأو يتكلمو والخمس دقايق بقو ساعه وأكتر للأسف اتعودو ينامو علي صوت بعض بس ملك هتعرف تتعامل مع أدم كـ حبيب؟ طيب آدم هيقتنع بـ حياة ملك الى عيشاها وطريقتها وصحابها الكتير؟ بصراحه!! مش واثقه..
**************************************
في كل مره بتتكلم معاه بتلاقى ان هو ده الشخص الي هي بتحلم بيه..
هو ده المناسب ليها في كل أحلامها، بس معلش هي عرفت منين مش يمكن بيكدب؟اوقات كلام الحب بيخلينا نصدق الكداب حتى لو الدليل قصاد مننا..
قالت لينا ملك..
"كنت شايفه فيه كل حاجه انا محتاجاها لقيته بيحتويني ويقرب مني في وقت انا فاقده فيه الشغف ومنطفيه..مشكتش للحظه انه ممكن يبعد كنت برسم معاه حياتي في المستقبل وحاطه وجوده شئ اساسي.."
************************
آدم:ملك لو سمحتي شيلى كل الى عندك في الاكونت دول وهاتي باسوردات خليهم معايا..
ملك: هو انت مش واثق فيا؟
آدم: انا واثق فيكي بس خايف عليكي من الي حواليكي..
ملك: متخافش عليا انا بعرف اتصرف كويس بس معتقدش اني لو طلبت منك باسورداتك انت هتوافق لانك هتقول ان دي خصوصيه وانا بقولك نفس الشئ..
كل مره آدم بيتفاجئ من ذكاء ملك وتفكيرها الي سابق سنها بكتير ، في مخيلته أنه هيضحك عليها او مفكر انه هيقدر يستغل سنها بس لأ الوضع مش كده ..
****************
سلسلة من مسميات الحب قصة ملك وآدم بقلم ريم عبدالعال
آدم: كل مره بحتار فيها يا عمر كأنها بتجبرني اتعلق بيها وانا مش عايز.
عمر: ليه مش عايز يا آدم لو علي إرتباطك القديم خلاص عدي ، ودي صغيره وتعرف تشكلها علي ايديك يعني.
آدم: صغيره مين ده انت الي صغير، دي دماغها توزن بلد ،كنت مفكر اني هتسلي بيها شويه وازهق بس معرفتش لقيت نفسي بغرز اكتر واكتر.
عمر: خلاص اخلع، اتلكك بأي حاجه وابعد بدل ما انت متعلق لا عارف تحبها وتقرب ولا عايز تبعد ومش عارف.
آدم فكر فى كلام صاحبه هيبعد ازاي هيعمل ايه!! يعني ايه اصلا يبعد!طب وهي هو بيفكر فيها ليه!حبها؟؟
***********************
ملك:اسفه انى رنيت عليك مكنتش اعرف ان جنبك حد.
آدم: تتأسفي ايه يبنتي دي كانت اختي ومش مهم كده كده ناوى اقولهم عنك .
ملك: تقولهم عنى ايه!انت بتهزر؟
ادم قرر يتكلم ويرمي كلام صاحبه ورا ضهره قرر يدي لقلبه فرصه..يدي لملك فرصه.
آدم: هقولهم اني بحب واحده خطفتني بعقلها وقلبها الي مفيش زيهم.
ملك: ادم متهزرش، انت ناوي تقولهم بجد، هتقول ايه اصلا!
آدم: هستنى ملوكة الشطوره تخلص ثانوي واجي اخطفها من بيت أهلها.
كانت اسعد لحظه لملك طلع بيحبها بجد مش هننكر بس ملك كانت شاكه في حبه ليها.. بس بعد تصريحه انه هيقول لاهله مستحيل تشك ده كده فعلا وقع في حبها، كانت فاكره ان المسافات بينهم أزمه، بس يا على الضحك هي أزمه فعلا!
**********
سلسلة من مسميات الحب قصة ملك وآدم بقلم ريم عبدالعال
كل مره ملك تكلم ادم يكون جنبه حد من اهله او عمر صاحبه الى مكانش مقتنع نهائي بال صاحبه بيعمله مكانش بيضايق ولا بيزعل بالعكس كان ساعات هو الي بيتصل بيها جنب أهله ..
الوقت بينهم عدي وهما بيخططوا لحياتهم سوا وانهم لازم يتقابلو..
بس ازاي والمسافات؟طيب واهلها؟ هتقولهم ايه؟؟
هي بتحبه بس هي خايفه.. آدم كويس مش هتنكر بس لأ برده.
آدم: يعني ايه اقولك جايلك تقوليلي لا؟
ملك: ممكن متتعصبش انا بس عايزه ناخد وقتنا اكتر.
آدم: وقت ايه يا ملك احنا بقالنا ٤ شهور كل يوم وكل ساعه بنتكلم!
ملك: في ال ٤ شهور دول اتعاركنا ٤٠٠ عركه ومليون شد وجذب في الكلام يا آدم.
آدم: دي حجج فارغه شوفي مش عايزه تنزلي ليه!
ملك: حجج فارغه!؟انا لو مش عايزه انزل مكنتش فتحت معاك موضوع اني اشوفك اصلا لكن اول حاجه هقول ايه لاهلي! انت ليه مش بتفكر من وجهه نظري!
آدم: خلاص انتي قفلتيني اصلا مش جاي .
قفل في وشها..صدمه ردوده وطريقته خليتها تعيد حساباتها هي صح لو كملت ولا تسيبه ومتهتمش وتستني يصالحها ..هتستني.
بس ياريتها ما استنت عدى ٤ ايام مهتمش يعرف هي عملت ايه ولا راحت فين لحد ما صحيت من النوم اليوم الخامس وقررت تكلمه..وإذ فجأه معمولها بلوك!
اتصلت بيه..دي الحاجه الوحيده ال لسه متعملهاش فيها بلوك..
ملك: انت قررت تنهي العلاقه يعني؟
آدم: اه ،وكفايه لحد هنا .
ملك: انت مش ملاحظ انك كبرت الموضوع!؟
آدم انا شايف انك عيله ومبتسمعيش الكلام ، مهتمه بصحابك الولاد ووجودهم عندك ،مهتمه بشكلك ومنظرك ومش عايزه تشوفيني مش مهتمه غير بنفسك وتفكيرك.
ملك: انا كل ده؟حبيتني ليه؟
آدم :كنت مغفل ، اقولك انا محبتكيش ،انا أعجبت بيكي بس.
ملك: لا تمام ربنا يوفقك في حياتك.
قفلت ملك واشترت كرامتها مش ده الى تحاول علشانه رغم ان قلبها بيقولها ان علاقتهم مخلصتش لحد هنا.
راجعت نفسها وحست انها كانت غلطانه لما اختارت تحب مسافات
اختارت تحب شاشه..
العقل الكبير طلع اصغر من عقلها بمراحل ..طلع هو ال عيل وهي العاقله .
تجربه هي مش ندمانه عليها وعلمتها ان عمرها ما هتحب مسافات او فرق سن كبير او حتي تختار الشكل والهيئه عن التفكير والمنطق..
*********************
تمت
قصه ملك وآدم
من مُسميات الحُب
ريم عبدالعال
تعليقات
إرسال تعليق