القائمة الرئيسية

الصفحات

رواية جماره الجزء الثاني الفصل الرابع والخامس بقلم ريناد يوسف

رواية جماره الجزء الثاني الفصل الرابع والخامس بقلم ريناد يوسف

رواية جماره الفصل الرابع والخامس بقلم ريناد يوسف

 

رواية جماره الفصل الرابع 

جماره الجزء الثاني بارت 4

رواية جماره بقلم ريناد يوسف 

بكر عاود على بيتهم وهو مواعيش قدامه من العصبيه، وبكل غضب طلع على اوضته فوق، حتى مردش على امه اللي فضلت تنادم عليه وهي بصاله بشفقه من كتر ماشايفاه معاود مقهور ومنتهي من الزعل..

تمره سالت امها باستغراب من حالة بكر : هو ماله بكر يمه؟ 

جماره ردت عليها وهي طالعه علي السلم ورا بكر : بكر مال حاله يابنيتي وابوكي والعيله اللي واخدها تحت باطه هيخلو عقل اخوكي يشت منيه..قالتها وكانت وصلت لأخر السلم.. 

تمره بصت لزينه وقالتلها : اني مفهماشى حاجه!! فاهمه حاجه انتي يازينه؟ 

زينه : ولاااا شي بشرفك بس اكيد شي بخصوص العروس يعني شي بديهي كتير. 

تمره هزت كتافها باستغراب: الله اعلم قالتها ودخلت اوضتها وخدت سلسبيل معاها، وزينه دخلت المطبخ تكمل شغلها وكل وحده عتسال حالها ياتري عروسة بكر عفشه لدرجة الحاله اللي هو فيها دي؟ 

اما فوق عند بكر.. جماره امه دخلت عليه الاوضه وشافته فاتح شنطته وعيلم فخلجاته بغل وعيرميهم جوا الشنطه بمنتهى العصبيه ..

جماره : عتعمل ايه ياولدى؟

بكر بعصبيه : امااااه.. همليني لحالي دلوك الله يرضي عليكاااي..

جماره : ايه بس حوصول لديه كله فهمني!! 

بكر : اللي حوصول اني اتكتب عليا اني اتجوز مسخ..

 اعيش مع وحده استغفر الله العظيم لو حطتوها لقرد وقلتوله اتجوزها مهيرضاش، هيقول عليها عفشه ويشوف قردته جارها ملكة جمال.. 

اللي حوصول ان فيه لعنه اتربطت فرقبتي اسمها بت الزمارتي وللأسف مهقدرشي اتحرر منيها ابدا.. 

وكل ديه عشان العيب والميصحش والعار وسمعة الولايا وكلام الناس..

 ملعون ابو الناس ياشيخه اللي الواحد يدوس علي نفسه عشانها.. ملعونه المشيخه واحكامها.. ملعونه الشهامه واللي عياجي من وراها.. 

يعني دلوك اني لو رفضت مش كان عواد ديه زمانه مجوز بته ولا مولع فيها بعيد عني!! 

وقعد علي السرير وفرك وشه وهمس من بين سنانه وهو عيضروب بيده عالشنطه ضربه ورا ضربه.. غبي.. اني غبي.. اني اللي عملت اكده فحالي واني اللي استاهل..

جماره : الامور مش كيف مانتا مفكرها ياولدي.. اهدي وحكم عقلك يابكر واتصرف بعقل.. ساعات كتير عنكونو فاهمين الحاجه غلط ومعارفينش الصح فين..

 كتير عنفكرو العفش زين والزين عفش ونقعدو سنين مغشوشين ومعمين ولما نفتحو نقولو ياريت اللي جرا ماكان..

بكر : امه.. امه.. اماااااه.. انتي عتتكلمي فايه انتي! زين ايه وشين مين؟ 

عقولك البت متتشافش تقوليلي زين!

فين الزين اللي فوحده هاربه من العالم السفلي واتحبست فدنيتنا معارفاشي تعاود موطرحها تاني!!

فين الزين فوحده لو قعدت الف سنه معمره فالارض محدش كان هيهوب لمها ولا يقل ديلها.. 

له والنصيبه السوده يقوم حظها الضارب بت الكلب يوقعها فزوري اني، 

اني بكر حكيم جاهين سليل الشيوخ واد الحسب والنسب، اللي بنتة الدنيا كلها تتمنى اشاره بس من صباعه عشان تركع تحت رجليه وتقدم فروض الولاء والطاعه..

 بكر اللي بنات كلية الطب تِما هيموتو عشان بس يعبر وحده فيهم ببصه ولا كلمه وهو غاضض بصره وسايق التقل ومشايفشي حد قدامه ولا عاطي حد معاه.. 

يقوم يقع الوقعه داي يوحصول فيه اكده قالها وخبط اديه فبعض بحسره ؟!! 

جماره : هدي حالك يابكر وخلي دايما ايمانك بربك كبير وخليك متوكد انه شايلك الحلو كله..

بكر بضحكه : الحلو كله ايوه.. شفته الحلو المتشالي ديه اني.. شفته وكتر حلاوته طممت نفسي..

جماره : يابكر ياولدي اصبر وعلي قول ابوك لعل الخير يكمن فالشر..

بكر بعصبيه : متقوليش الجمله داي قدامي تاني واصل يمااااه سايق عليكي الن.... استغفر الله العظيم يارب.. 

محدش ينطوقها تاني لاانتي ولا ابوي عشان من كتر ماصدقتها وتوسمت فيها الفرج كرهتها لما شوفت بت عواد الكلب.. 

الشر معيتدسش فالخير ولا الخير عيتلفلف بالشر، الشر شر والخير خير.. وهمليني دلوك الم خلجاتي عشان معاود علي القاهره ومحدش يكلمني فيوم يقولي عاود البلد عشان اني كرهت البلد باللي فيها ومهعاودشي غير لما اخلص جامعتي واخد شهادتي.. 

جماره : اكده يابكر ياولدي!!  واهون عليك؟ وتقدر تقعد من غير ماتشوف امك سنين بحالها؟ 

بكر : اني معاوزشي اشوف حد واصل ولا حد يشوفني ولو اطول اطم نفسي دلوك تحت التراب واخلص من الدنيا اعملها، بس كل خوفي من اني اموت كافر.. لكن ربك قادر يجيبها من حداه وياخدني ويريحني.. 

جماره وهي عتضروب علي صدرها بخوف :  اسم الله الشر بره وبعيد.. يامري يابكر عتدعي علي حالك بالموت كيف!! وعشان ايه؟ ياحبيبي والله نصيبك زين بس اصبر هبابه.. اني على عيني شوفتك اكده بس والله غصب عني.. اني الود ودي اريحك بس لساني متلجم بالطاعه والوعد ومعارفاشي اعمل ايه؟ 

بكر : متعمليش يمه عشان مفيش حاجه فالدنيا هتريحني غير انكم تفكوني من ورطة بت عواد.. هتقدري تعملي اكده انتي ولا ابوي؟ 

جماره خدت نفس وغمضت عنيها ومردتش 

بكر : يبقي مفيش راحه لولدك يمه.. قالها وكان كمل لم خلجاته وابتدا يقفل فالشنطه  وشالها واتحرك على بره بعد مااتوكد ان بطاقته ومفاتيحه فجيبه.. 

جماره ماشيه وراه : ياولدي استهدي بالله بس واقعد دانت ملحقتش واني لساتني مشبعتش منيك.. 

بكر : سامحيني يمه غصب عني مقادرش 

بكر وصل لنص السلم وبطأ فالنزول وهو واعي ابوه وتميم داخلين من باب السرايا وابوه عيبصله بعيون ماليها الغضب ومره وحده رفع عكازته وشاور بيها على بكر :

ايه اللي فيدك ديه ورايح وين.. وقبل ديه كله ايه اللي عميلته ديه يواد الشيخ، كيف تمشي وتهمل بيوت الناس من غير ماتستأذن ولا تستني الناس اللي رايح معاها ياقليل الحيا ياعديم الربايه ؟

بكر : ابوووي!!

حكيم : اكتم خالص ماسمعش حسك.. تقدر تقولي ايه معناته اللي عميلته ديه؟  حتي لو فيه حد كلمك وطلبك علي وجه السرعه فيه حاجه اسمها اداب البيت اللي قاعد فيه، واحترام صحابه واستأذانهم قبل المغادره.

خليت وشي ووش اخوك فالارض من عملتك.. صحابك ومشاكلهم مش اهم من الاصول يارباية المشايخ. 

بكر باستغراب : صحاب مين يابوي ومشاكل ايه اللي عتتحدت عليها؟

*********************ا

اما فى وقت سابق ..

عواد وحكيم والكل قاعدين فالمندره وفجاه سمعو اصوات وحركه مش طبيعيه عواد بسرعه ميل علي ولده :

قوم شوف فيه ايه كنهم حريم ابوك مسكو فبعض تاني، حجزهم وقولهم الربايه النوبادي غير والحساب كبير علي كد مقام الضيوف اللي معملتولهاش اعتبار بس اصبرو الناس تمشي. 

خليل هز دماغه وقام بسرعه يشوف خبر ايه.. 

مليكه طالعه من المندره بعد مابكر مشي وعتفرك فكتفها وهي متألمه وقابلت خليل اخوها فوشها طالع من الموطبخ وعيتلفت حواليه 

مليكه بسرعه بعدت يدها عن كتفها : مالك ياخليل عتدور علي ايه؟

خليل : سمعنا صوت خبط ورزع قولنا اكيد حريم ابوكي شبطو فبعض كالعاده قمت اشوفهم ملقتش حد منهم فالموطبخ، وامك عتقول انهم فاوضهم هما التنين بعد ماخلصو طبخ وغرف!

مليكه : بس اني مسمعتش حاجه؟

مختار : لازمن انتي لا تسمعي ولا تشوفي وانتي فحضره الداكتور ياعمي..الا انتي هملتيه وطلعتي ليه؟ وراح ناحية المندره اللي فيها بكر يشوفه 

مليكه وهي ماشيه : الداكتور بتاعك مشي مقاعدشي.. 

خليل باستغراب : مشي كيف!!! وليه؟

مليكه : جاله تلافون من واحد صاحبه واقع فديقه وطلبه ففزعه طلع عليه رامح..

 قالتها وراحت علي الموطبخ ولما وعيت خليل عاود للمندره حدا الشيخ وولده رجعت وطلعت جمالات من المندره علي فوق بسرعه وفالخفا زي مانزلتها فالخفا..

خليل عاود للمندره وقعد جار ابوه اللي ميل عليه وهمسله : فضيتها؟

خليل : ملقتش حاجه كل وحده فأوضتها محدش بيتعارك. 

عواد : غريبه!!  طليت علي اختك وخطيبها وشفت اخوك جارهم ولا مشي وهملهم لحالهم؟

 خليل : بكر هو اللي مشي..

عواد  بصوت عالي : مشي كيف! ؟

 حكيم : مين اللي مشي؟ 

 خليل : الداكتور بكر ياشيخ مليكه عتقول جاتله مكالمه من واحد صاحبه وطلع طوالي. 

حكيم بص لتميم اللي نكس عنيه للارض باحراج وبعدها بص لعواد وقاله بخجل : معلهش ياعواد امسحها فيا اني اكيد الامر مستعجل والا مكنش بكر طلع طوالي اكده من غير مايستاذن منكم، ولا يقولنا احنا حتى انه ماشي.. 

عواد بسرعه : له يابوي امسح ايه داني فرحان بيه ومقامه علي فعيني، 

بكر شهم وصاحب فزعه ومش غريبه علي واد الشيخ حكيم انه يلبي الندا فالتو والحال ويهمل خطيبته، وكمل بضحكه.. اللي متوكد زين انه هملها علي عينه..

تسلم ربياتك ياشيخ يازين ماربيت والله.. 

منعم كان باصص لعمه بغضب وهو عيتكلم عن بكر اكده وعمال ينفخ ويفش ومن ساعة مابكر راح يشوف مليكه وهو لا علي حامي ولا علي بارد ونفسه يقوم يجيب بكر من قفاه من جار بت عمه.. 

حكيم : تسلم وتعيش ياعواد.. وهم بالوقفه.. هه طيب نستأذنو احنا..

عواد وهو عيوقف : تستاذنو ايه لسه بدري ياشيخ ملحقناش نقعدو معاكم؟ 

تميم : معلش نقعدو وكت تاني يابو مختار  انتا خابر ورانا مصالح والديوان تلاقيه عيملا ويفرغ من ساعة ماجينا اهنه.. الجيات كتير والقعاد اكتر، مااحنا مهنقطعوش من بعض عاد احنا بقينا اهل.. يجعله عامر ياحج ويدوم العز والكرم 

عواد : يدوم اصلك ياولدي.. طيب خلاص مش هندقو فيكم ونعطلوكم عن المصالح عشان متتكومش فوق راسكم.. 

حكيم : يجعله عامر ياعواد 

عواد :عامر بحسك ياشيخ 

حكيم ابتسم واتحرك وتميم وراه وعواد وراهم ووصلهم لحد العربيه، وفضل واقف لحدت ماركبو واتحرك تميم بالعربيه وهو عيودع فيهم : مع السلامه.. شرفتونا ونورتونا.. في رعاية الله وحفظه يامشايخ.. سلام يابوي مع السلامه. 

حكيم بس بعد بالعربيه هو وتميم عن بيت عواد وملامحه اتحولت لنار قايده من الغضب وبص لتميم وهمس من بين سنانه : 

واعي اخوك وعمايله الرعنه ياتميم!!؟ 

 تميم : يمكن صاحبه عايزه صوح يابوي متظلمهوش بكر عيفهم فالاصول زين تلاقيه غصب عنه امر مستعجل.. 

حكيم : تميييييم انت هتدافع عن العيبه وتديها مبرر ولا ايه؟ 

تميم : اني علتمس لبكر واحد من سبعين عذر يابوي.. 

حكيم : الاعذار داي تلتمسهاله لما يغلط فحقك انت، لكن انه يغلط فالاصول ويهين  تربيتي ليه ويحط عيني فالارض خشي من الناس يبقي ملوش اي عذر ياتميم.. 

تميم اتنهد : طيب هو عيمل اكده ليه مش انت وامي عتقولو البت زينه يبقي ليه خد فوشه وزعط فدنية ربنا؟ 

حكيم : عشان بت عواد مش هينه ومورتهوش نفسها جابتله بت عمتها العفشه ورتهاله بدالها عشان تردله الكيد اللي كادهولها قبل سابق لما سمعها سم حديته عنها وعن ابوها بودنها.. 

تميم :بس ديه غلط يابوي كيف تعمل اكده وانت كيف توافقها! وشايفك عتتحدت وانت مرتاح للي عيملته؟ 

حكيم : وافقتها عشان اخوك يستاهل بصراحه.. جرح القلوب مش هين واخوك جرح وهان وكاد وكل ديه ليه قصاص وصاحبته قررت تاخد قصاصها بيدها وديه حقها واني مهتصداش للحق.. 

 بالك انت لو بعد ماشافها جاني وقلي معجبتنيش يابوي شوفلي حل واني اللي هتقوله هعمله وكتها اني كنت هوريه مليكه واريح قلبه.. بس شوف هو عيميل ايه.. هرب للمره التانيه.. هرب من غير مايواجه.. هرب من غير مايحاول يغير اللي اتفرض عليه.. وزي مارضي فالاول وكان المقابل شرط اهبل منيه.. اهو رضي تاني مره.. 

تميم : طيب بس هي بت عمة بت عواد  عفشه قوي للدرجه داي؟ 

حكيم سكت شويه ومردش 

تميم : توبقي عفشه قوي وهنعاودو نلاقو بكر عمل فحاله حاجه. 

حكيم :  وحتي لو عفشه ديه مش مبرر لعملته.. 

تميم : يابوي بكر الحته داي مبرر حداه انه يعمل اي حاجه فالدنيا داي عقدة حياته اصلا.. 

حكيم : اهوج ومتسرع ويستاهل كل اللي يجراله.. 

وصل تميم وابوه ودخلو من بوابة السرايا الخارجيه  ومع دخولهم جوا السرايا شافو بكر نازل بشنطة هدومه فيده وامه نازله وراه تترجي فيه يعدل عن اللي بيعمله وهو مراضيشي يرد عليها  ومستمر بالنزول وحكيم النار شبت بين ضلوعه وفعنيه وهو واعي بكر بشنطة هروبه فيده

عوده للوقت الحالي.. 

بكر باستغراب : صحاب مين يابوي ومشاكل ايه اللي عتتحدت عليها؟

حكيم ابتسم بسخريه وهو باصصله : داي الحجه اللي حطتهالك بت عواد  عشان تبرر عملتك السوده اللي سودت وشنا، قالت انك. جالك تلافون من واحد صاحبك حداه مشكله وطلعت بسرعه عشان تنجده.. 

بكر بضحكه : له اصيله وعتعرف تكدب كدب زين  والله.. ونعم التربيه والاخلاق! 

حكيم : بلاش انت بالذات يابكر تتكلم عن التربيه والاخلاق عشان اني كل مادا واكتشف انك متعرفهمش ولا هما عرفولك طريق فيوم.. 

بكر وهو مكمل نزول : طيب شكرا يابوي 

فالاثناء داي كانت تمره طلعت من اوضتها شايله سلسبيل علي حس ابوها، وزينه طلعت من الموطبخ ووقفو الاتنين وهما مش فاهمين ايه اللي بيجرا وعمالين يبصو لبعض وللي حواليهم باستفسار.. 

حكيم : تقدر تقولي رايح فين دلوك؟ 

بكر : معاود القاهره 

حكيم : من غير ماتقولي ولا تستأذني؟ 

بكر : قولت قدام امي وهي كانت هتبلغك. 

حكيم : له فيك بركه والله.. طيب واختك مش هتستني تاخدها معاك؟ ولا وكت الهروب عتهمل كل حاجه وترمي كله ورا ضهرك ومعتشوفش غير حالك وبس!!! 

بكر : تمره تميم يبقي يجيبها او خالي سخاوي.. قالها واتحرك واتخطي الكل وماشي لغاية ماوصل باب السرايا 

حكيم بحزم : بكر وقف.. اخر حاجه هقولهالك واطلبها منك وبعد اكده اعمل اللي تعمله.. خليك متسافرش وتعالي معاي بكره لبيت عواد واني هوريك بعينك اللي يسر خاطرك ويريح قلبك.. 

بكر بص لابوه بطرف عينه ورد عليه : آسف يابوي اني شفت من عواد وبيته كفايتي خلاص.. 

ومهخطيش هناك تاني.. واتحرك خطوه ووقف وكمل حديته.. ويكون فمعلوم الجميع اني مهعاودش من القاهره غير واني منقي وحده واكون جاي عشان اخدكم تخطبوهالي.. اظن ديه حقي عاد ومحدش يقدر ينكره عليا. 

حكيم : اعقل يابكر ومتتهورش ولا توعد بت ناس بحاجه قبل ماتتجوز مليكه وبعدها اعمل اللي يلد عليك. 

بكر : متخافش يابوي بت عواد هتجوزها هتجوزها.. بس هتجوزها مؤقت وهطلقها تاني عشان بس الكل يحط الحته داي فباله..

 بت عواد لا هتكونلي مره ولا هقرب لمها، ولا هتقعد علي ذمتي غير كام شهر او سنه بالكتير لحد مااطلقها وتروح لحال سبيلها واخلص منيها ومن ابوها ومعرفتهم للابد.. 

بس مع ذلك مش هوقف حياتي وهدور علي الزوجه المناسبه وهتجوزها سواء قبل مااتجوز بت عواد او بعد.. داي حاجه ترجعلي  عاد ومش من حق حد يقررها غيري.. 

عن اذنك يابوي واشوف وشكم بخير.. قالها واتحرك بالخطوه السريعه تحت انظار الكل وحكيم اتنهد وبص لجماره وهمس :

مفيش فايده فبكر ولدك واصل ياجماره. 

جماره بصت لحكيم بلوم والدموع اتجمعت فعنيها : 

ومادام عرفت ديه، واتوكدت خلاص انه مفيش فايده من بكر ومهيتغيرش ليه مريحتش قلبه!! ليه تخليه يمشى مقهور! خايفش عليه تجراله حاجه وهو ماشي بكل احساس الظلم اللي جواه ديه ومواعيش قدامه! كيف هان عليك ولدك تعذبه اكده ياشيخ؟ 

حكيم : عايزه ي.... وقبل مايكمل قاطعته جماره :

اوعك تقول يتعلم ولا يعقل ولا كل الكلام اللي مداخلش ذمتي ببصله ديه..

 اني وحده شايفه ولدي عليل ودواه فيدي اديهوله واطيبه مش اقول خليه عيان اكتر وكت ممكن لغاية مايعرف قيمة الصحه والعافيه، ولما حد يسالني عتعمل اكده ليه اقول ععلمه درس واني شايفه عيتعذب قدام عيني وممكن يموت!! 

وكملت بدموع.. ولدك النهارده دعا علي حاله بالموت ياحكيم من قهر قلبه.. افرض باب العرش كان مفتوح والدعوه الطالعه محمله بقهر داي راحت لربه واتحققت هينفعني بايه وكتها عواد وبته ولا الدنيا بحالها ولا الدروس والعبر؟!!

كان هيجرا ايه لو قلتله خطيبتك حلوه ياولدي هدي بالك؟ 

حكيم مردش لكنه بص لجماره ولثواني حس انه ممكن يكون داس علي بكر اكتر من اللازم صوح، وشفق عليه بعد ماسمع كلام جماره وشاف خوفها علي ولدها فعنيها عيقوله مش هسامحك لو ولدي جرتله حاجه بسببك.. 

حكيم همل السرايا وطلع عالمندره وهو فطريقه طلع تلفونه وحاول يتصل ببكر لكن بكر مردش عليه وبعد رنه تلفون بكر اتقفل وحكيم عرف ان بكر قفل تلفونه ومعاوزش يكلم حد حتي ابوه.. 

اما فالسرايا 

جماره : روح ورا ابوك ياتميم واقعد جاره ولين قلبه على اخوك وقله بزياده علي بكر اكده ياشيخ..

 تميم هز دماغه لامه بموافقه وهيتحرك لكن وقفه صوت سلسبيل بته : ابوي استني بدي روح معك حدا جدي.. 

تميم ابتسملها وراح علي تمره خد سلسبيل وحبها وطلع بيها علي المندره. 

تمره بصت لامها : جماره اني معحبش احساس اني اكون اطرش الزفه ديه واصل.. تفهميني ايه اللي عيحصل بدال ما الم عليكم الناس واعملكم فصل واقول محاسبنيش بتهم ياناس ياخلق.. 

جماره : افهمك ايه يابنيتي وابوكي ملجم خشمي ومانعني اتكلم ولا ابوح باللي لو اتعرف يحل كل اللي احنا فيه ديه، ويريح اخوكي. 

 اقول ايه وابوكي حالف عليا الحديت ميوصلش لبكر عن طريقي ولا طريق مرسال من تلاي ومأمني امانه!! 

تمره : قولي وليكي وعد مني اللي هسمعه هبلعه جوا بطني وميطلعش لصنف مخلوق حتي لبكر ذات نفسه.. وتخافيش اني بطني عتشيل السر وتبلعه وانتي خابراني زين.. اتكلمي وسدك امين يام تمره.. 

جماره اتنهدت وراحت قعدت علي الكنبه وتمره راحت وراها وقعدت جارها : قوليلي فالاول خطيبة بكر حلوه ولا عفشه؟ 

جماره : كيف البدر فليلة تمامه يابتي، احلي مني ومنك ومن زينه كمان.. 

تمره : اااحبك.. امال ايه اللي هاوس بكر اكده؟ 

جماره : عشان بكر فاكرها عفشه من لاول كيف مانتو خابرين ولما راح وشافها البت ورتله وحده غيرها عفشه صوح.. 

تمره : يالعبك يابت عواد يالعبك.. طب داي عناوين الاخبار والموجز، خشي عالتفاصيل عاد.. هاه اديني مسكت طرف خيط الحديت كري البكره ياجمرمر.. 

جماره اتنهدت وهتحكي لكنه وقفت واتخضت هي وجماره من صوت زينه اللي زعقت فيهم وهي عتجري علي الموطبخ : 

لااا وئفي مرت عمي ماتحكى راح جيب كرزات واجي لنتسلي فيهن ونحن عم نسمع.. الئصه باينها حلوه كتير ومشوئه وبيها اكشن ومكشن 

جماره هزت دماغها وهي متابعاها وهمست : شوفو البطرانه داي كمان رايحه تجيب تسالي!! 

 تمره : همليها يمه واحكي سيبك منها. 

زينه  من جوه : له ياتمره ياخاينه بدك تسمعي لحالك.. 

ليكني اجيت مرت عمي ليكني هون.. قالتها وجات جري عليهم وماسكه فأيدها كيس وقعدت فالارض علي السجاده قدام جماره واتربعت : 

يلا فيكي تبلشي مرت عمي جو اون.. 

جماره بصت بعيد ورجعت بالذاكره لورا فاليوم اللي حكيم عاود فيه من بره وشافته طول ماهو قاعد ياكل عيتبسم وسرحان كنه عيتفكر فحاجه حوصلت وباسطاه.. 

جماره بعد ماخلص وقام قعد عالكنبه قربت منيه وقعدت جاره وميلت عليه ووشوشته : ياتري ايه اللي واخد عقلك ومضحك سنك؟ 

حكيم : تعالي فوق فأوضتنا هحكيلك.. وخدها وطلعو فوق وابتدا يحكيلها اللي حوصول معاه فاليوم ديه.. 

فلااااااااش باااااااك 

حكيم طالع الصبح كيف عادته يشَوط عالارض وكان رايح مشي عشان ينشط رجليه ويشم هوا الصبح العليل وفجأه صبيه قطعت عليه الطريق. 

مليكه : اصباح الخير عليك.. انت الشيخ حكيم شيخ البلد مش اكده؟ 

حكيم باستغراب : وصلتي يابتي... خير ليكي حاجه عايزاها تنقضي؟ 

مليكه : ليا مظلمه ياشيخ وواقعه فعرضك تحلهالي وتنصفني.. 

حكيم باستغراب : من عيوني لو اقدر!! 

مليكه : اني ابوي حاكم عليا اتجوز واحد مش عايزاه ولا طايقاه.. ولا هو ياشيخ عايزني ولا طايقني.. بس كل اللي فيها ان ابوي من كتر حبه فابو العريس ديه ومن كتر مامتمني نسبه هاداه بيا من غير مايسألني ولا حتي ياخد شوري.. 

مش هو شرع ربنا ياشيخ عيقول ان البت لازمن تنسأل قبل ماتنخطب؟ ولا هو الدين والشرع ديه فحاجات حجات يتطبق، وحجات تانيه يتنسي لو فموصلحتنا اننا نتجاهله؟ 

حكيم ابتسم وهو باصصلها وفهم زين هي مين وعتتكلم عن ايه والعجب طول الوكت واخده من جمالها ومن الكلام اللي قالته عليها جماره ومعارفش جابته من وين  ورد عليها : 

له يابتي الشرع شرع ولازمن يتطبق فكل امور حياتنا مش فحاجات وحجات ، بالعكس دا فيه حجات لو متطبقش فيها شرع ربنا عتبطل واللي عيتبني عليها بعد اكده عيبقي باطل، وعتبك علي ابوكي فيها داي عشان هو اللي اتعدي علي حقوقك، 

مليكه : وعشان اكده جيتلك عشان عارفه انك عترجع الحقوق لاصحابها وعايزه منك تجيبلي حقي من ابوي.. 

حكيم : تعرفي يا.. الا انتي اسمك ايه؟ 

مليكه : اسمي مليكه.. 

حكيم : بصي يامليكه.. اني لو وحده غيرك كنت خدتلها حقها من ابوها تالت ومتلت وحقيته قدام كل الخلايق..

 لكن فحالتك انتي لو اتدخلت عواقب تدخلي هتكون وخيمه وكلها هتاجي فوق راسك انتي..

 ابوكي كيف ماانتي قولتي عيحبني ومن محبته ليا قرا فاتحتك علي ولدي حتي من غير مايسألك.. لما اروح اني واقوله بتك استنجدت بيا منك وجاتني من وراك تخيلي هيعمل ايه فيكي؟ 

مليكه : يعمل كيف مايعمل مخايفاشي.. 

حكيم : طب ومنظر ابوكي وكسفته قدامي لما يحس انه خجلان مني وعينه فالارض بسبب بته اللي صغرته قدام حبيبه؟ 

مليكه بصت بعيد : مش مشكلتي اللي عيغلط ويتسرع يتحمل نتيجة غلطه حتي لو كان ابوي.. 

اصل فيه حاجات وقرارات لو اصحابها مااتحملوش نتايجها غيرهم اللي هيتحملها واني مهتحملش نتايج غلط حد حتي لو كان الحد ديه ابوي بذات نفسه. 

حكيم فضل باصصلها شويه باعجاب ومبتسم على جرأتها وطلاقة لسانها واخيرا رد عليها  : طب قوليلي انتي ايه مشكلتك..زعلانه ومتكدره عشان ابوكي مخدش رأيك ولا فيه سبب تاني.. ومتقوليش انك مطايقاش عريسك ولا هو طايقك عشان لا هو شافك لحد دلوك ولا انتي شوفيه.. يبقي ايه العباراااه؟ 

مليكه : بسبب ان ابوي مخدش رايي ديه واحد من السببين اللي مش عايزه اتجوز ولدك عشانهم  اما السبب التاني انه فعلا لا اني عايزه ولدك ولا طايقاه ولا هو عايزني جايز ياشيخ هو مشافنيش بس اني شفته وسمعت منيه اللي يخليني اكرهه من كل قلبي واسد انفاسي عشان متنفسش الهوا اللي مر عليه.. 

حكيم رفع حواجبه بدهشه : واه.. للدرجه داي.. سمعتي ايه منيه خلاكي تقولي اكده وسماعتيه كيف وفين؟ 

مليكه ابتدت تحكيله الكلام اللي سمعته من بكر فاليوم اللي جه فيه حدا بيتهم وتوصفله فشكله كان عامل كيف وكيف كان متعصب زي مايكون رايح يهجم علي بيت واحد قاتله قتيل عزيز عليه.. 

كانت تحكي وهو مقهوره ودمعتها علي طرف عينها.. 

حكيم اتنهد : طب ولو قولتلك عالسبب اللي خلي بكر يقول اكده واديكي مبرر ليه وتعرفي ان كله سوء فهم ديه يغير موقفك ديه من تلاه ويغفرله حداكي اللي عمله وقاله وسمعتيه وشوفتيه ؟ 

مليكه : مفيش حاجه فالدنيا هتغفرله انه مغصوب عليا ومطايقنيش ولا عايزني.. ولا فيه حاجه تغفرله حداي شتيمته علي ابوي واهانته ليه مهما كانت اسبابه.. 

وخد دول ياشيخ وياريت متحاولش تدافع عن ولدك فحاجه سمعتها بودني وشفتها بعيني.. ومدت يدها فجيبها طلعت فلوس ملفوفه علي بعضها وملفوف حواليها استك وحكيم عرف ان دول ال ٥ تلاف اللي كان يبعتهملها مع ابوها.. 

حكيم : طيب عاودي الفلوس لجيبك واسمعيني فلاول كيف مااني سمعتك للاخر وبعدها اللي هتقوليه وتريديه يجرالك انتي باين عليكي عقلك كبير اكبر من سنك بكتير وهتفهميني 

بكر يابنيتي اطيب واحن قلب ممكن تقابليه فحياتك.. بكر راجل بمعني الكلمه يقدر يتحمل اي مسئوليه مهما كانت فوق طاقته وميكلش ولا يشتكي منيها.. بكر ممكن يدوس علي نفسه عشان حبايبه ويبعلهم الغالي رخيص عشان يفرحهم.. وعليم الله اني ماكدبت عليكي فأي كلمه قولتهالك.. هو بس فيه عيب واحد هو اللي مضيعه ومرمر عليه عيشته.. العيب ديه هو التسرع والاندفاع بدون تفكير او تروي.. واكبر دليل ان كل الكلام اللي سمعهولك وحتي همل البلد وفات المشيخه وهج، انه كان فاكرك عفشه وحس انه اتورط فيكي.. عشان اكده يابتي هو عيمل اكده وقال اللي سمعتيه 

مليكه باستغراب : وليه يفترض فيا اكده؟ 

حكيم : اسباب كتير ومنهم البت اللي شافتها ام بكر مع امك ففرح تميم وكانت مفكراها انتي وهي اللي قالتله انها شافتك وانك عفشه.. 

مليكه ديقت جواجبها وديقت عنيها تفتكر وفجاه فتحت عنيها علي وسعهم وهمست وهي مبتسمه : جمالات!!  يعني بكر عيعمل كل ديه عشان مفكرني جمالات؟ 

حكيم : بالظبط اكده. 

مليكه : طيب ومرفضشي انه يتجوزني ليه؟  هو بت عشان يتغصب علي حاجه مش عايزها؟! 

حكيم : مرضيش يقل بيا ولا بابوكي قدام الناس يابتي..

مليكه :يعني ابوي ورطه صوح كيف ماقال 

حكيم : مش بالظبط ابوكي كان حابب نسبنا يابتي وحابب يريحك عشان خابر زين ان بكر الف من تتمناه.. 

مليكه بصت لحكيم وابتسمت وهو ابتسم لما فهم ابتسامتها ورد عليها : مش عصبغ لولدي اني عقول الحق حتي اسالي اي حد علي بكر وهو يقولك.. بصي يامليكه انتي عجبتيني ودخلتي دماغي.. وهديكي وعد انك مع بكر هتكوني ست الناس كلها وست قلبه كمان بس لو عرفتي تدخليله صح واتعاملتي معاه بالطريقه المناسبه. 

مليكه : وكرامتي اللي اتجرحت واهانته ليا ؟ 

حكيم :هساعدك تخلصي منيه كل ديه واني وانتي نحطو ادينا فيد بعض عشان نخلصو علي الصفه الوحيده العفشه فبكر وميبقاش فيه غير الصفات الحلوه بس.. 

مليكه : واللي متقبلتهوش بعد اكده؟ 

حكيم : هحلك منيه  وبنفسي هخلصك من فاتحتك عليه وحتي لو اتجوزتيه لو حبيتي تطلقي اني هطلقك منيه.. مع اني متوكد ان ديه عمره ماهيوحصول.. هاه قولتي ايه اتفقنا؟ 

مليكه بعد تفكير شويه : موافقه.. مليكه وافقت لما شافت انها فرصتها عشان تاخد بتارها من بكر بمساعدة ابوه وبعدها هي اللي تقول مش عايزاه وتردله الضربه اللي ضربهالها فنص قلبها.... 

جماره : يعني اتفقت علي ولدك مع بت عواد ياحكيم ؟ 

حكيم : عشان تديله درس وبعدها تكونله السكن والسكينه وصدقيني بت عواد هي الوحيده اللي تنفع بكر ولدك.. بس امانه عليكي وفرقبتك اوعي تقولي لبكر ان بت عواد طلعت غير اللي انتي شوفتيها وخلي وخليه بناره لحد مايعقل ويقول تعالا يابوي وريني خطيبتي ادور فيها علي حاجه زينه غير الشكل يمكن الاقي اللي يغنيني عن شكلها.. 

جماره : والله بكر مايعملها ولدي وخابراه زين 

حكيم : همليه عليا انتي بس وليكيش صالح.. 

باااااااااك

ومن يومها واني مهملاهم يعذبو فيه كيف مانتو واعيين اكده. 

تمره نطت علي امها ومسكت دراع : امه خديني اشوف مليكه دلوك.. زينه قامت ومسكت الدراع التاني.. وانا كمان بدي روح شوف هالمليكه هلا هلا 

جمره بغيظ : واني لو مهملتوش دراعاتي وبعدتو عني دلوك هقوم اطلع كيدي علي ولدي فيكم انتو الجوز عشان الواحد فيه اللي مكفيه وانتو حداكمش دم.. 

زينه : ياباطل.. تمره انتي طلع ماعندك دم؟ 

تمره : ولا اعرف لونه ايه حتي 

زينه : ياالله مو معئول هالصدفه اصلا حتي انا ماعندي! 

تمره بصت لامها : بصي يمه اذا كان اعترافنا بأننا معندناش دم هيخليكي  تودينا نشوفو مليكه.. وبصت لزينه ونطقو الاتنين فصوت واحد.. 

فاحنا معندنااااش 

جماره وهي عتفلت من بين اديهم وتوطي علي شبشبها : له ياحبايبي اعترافكم مش هيخليني اعمل فيكم غير اكده.. وهمت تتلافي الشبشب والاتنين تمره وزينه صرخو وجريو من قدامها وهما عيضحكو.. 

اما فالمندره حكيم قاعد مهموم وتميم قاعد علي جمب عيراجع فحسابات الارض  وسلسبيل بت ولده قاعده جاره وكل شويه تكلم فيه وتناغشه وهو غصب عنه من وكت للتاني يبتسم على كلامها ويرد عليها لكن فكره برضه مشغول ببكر.. 

شويه ودخل عليهم سخاوي شايل يوسف ولده على كتافه ورمي عليهم السلام ونزل يوسف اللي جري علي سلسبيل، وهو قعد جار الشيخ حكيم وحس ان فيه حاجه مش طبيعيه حوصلت من شكل التنين.. 

سخاوي : حد فيكم يقولي فيه ايه حاصل مخلي وشوشكم متتفسرش اكده؟ 

الاتنين ساكتين وسخاوي كمل : فيه ايه حصل فبيت عواد النهارده.. وبكر فين؟ 

ماحد فيكم يتكلم وينطوق وبص لحكيم  زعل لما عرف اللي داسينه عليه انت واختي صوح؟ 

تميم رفع دماغه من وسط الورق وبص لسخاوي بتعجب وقاله : لا هو انت كنت خابر الحكايه وراسي عالفوله ولا ايه؟  

 امال يعني اني محدش قالي حاجه ليه!!!

سخاوي : اني ولا حد قالي ولا حد عادلي اني عرفت بالصدفه من مرتي اللي سبقلها وراحت بيت عواد مع امها فطهور ولده الصغير ينقطو ام الواد، وشافت بنات عواد كلهم وحده وحده، وقالتلي ان الصغيره  احلي وحده فيهم دا ان مكانتش احلي وحده فزمام البلد كلها.. 

اني جيت يومها عشان ابشر بكر باللي عرفته بس ابوك لاقاني ونبه عليا مقولش حاجه لبكر عن اللي عرفته، ولما سالته ليه قاللي ان البت قابلته وكلمته وقالي عاللي قالتهوله وانها سمعت يومها كلام اخوك اللي يخزي عنها وعن ابوها وبصراحه اني البت صعبت عليا واستحليت للي قالي ابوك انه ناوي يعمله فيه هو وبت الزمارتي.. 

هاه اديني حكيتلك احكي انت 

تميم : احكي ايه؟ 

سخاوي : يييييه 

حكيم : احكيلك اني ياسخاوي اسمع.. الحكايه ان...... 

وحكاله كل حاجه 

سخاوي ضحك بعلو صوته لما شرق من الضحك وقعد يكح وعلي ضحكه حتي تميم وحكيم ضحكو معاه.. 

حكيم : ياد بطل ضحك محكيناش نكته ياقزين انت وقولي ايه العمل دلوك.. اقوله واقهره بذياده لما يعرف اني ضحكت عليه وغشيته ولا اهمله دلوك مقولهوش؟ 

سخاوي بطل ضحك وخد نفس وسيطر علي روحه وبص لحكيم وقاله : له متقولهوش اي حاجه همله اكده بناره.. 

حكيم : بس ديه قال انه هيخطب من هناك ويتجوز ولو عيمل اكده البت القهر ممكن يموتها ياسخاوي!! 

. سخاوي : مهيلحقش  لانه هيتجوز مليكه بعد كام شهر. 

حكيم : كيف بس وهو حالف مايتجوزها غير بعد مايخلص كليته خالص؟ 

سخاوي: هملها عليا اني داي.. انت بس تمم كل حاجه وقول لابوها يجهز فيها لحدت مايخلص الترم التاني والتنين يمتحنو وتبان النتيجه وبعدها كل حاجه هتمشي علي هواك.. 

تميم : طيب ماترسينا يااديسون عاللي فدماغك! 

سخاوي : اللي فدماغي معتمد علي حاجتين هستني اشوف انهي منهم اللي هتحصل وبعدها هقولكم علي كل حاجه.. بص بس قدامك انت وشوف كنت عتعمل ايه.. 

تميم هز دماغه ورجع لحساباته تاني وسخاوي وحكيم انتبهو علي صوت سلسبيل وهي عتبكي وعتقول ليوسف : انت نوتي وانا مابحبك.. ابوي يوسف اخد الشيكوته حقي كلها.. 

سخاوي : عيب يايوسف يابوي خد وحده وسيب لبت عمك الباقي. 

يوسف : له هي اللي تاخد وحده بس ولو اتحدتت ولا فتحت خشمها هاجبلها النشو البعها بيه.. ومدلها وحدة شيكولاته.. اخدي يابارده ياشحاته خدي شقلاطه اهي مش هتموتي لو مدوقتيهاش.. قالها ورمالها الشيكولاتايه ودس الباقي تحت رجله كيف ماجده بشندي عيعمل بالظبط. 

سخاوي بص لحكيم اللي كان باصص ليوسف وعيضحك وقاله : عتضحك على اييييه شوف ابوي عمل ايه فالواد خلاه بارد وبجح وهيكبر وتكبر معاه اللسلسه ويجرسني!

حكيم بابتسامه : عيل وبكره يعرف اصبر عليه وهمله خليه يتعابت لحد مايطلع ويكبر.. 

سخاوي : اديني مهمله لما اشوف اخرتها  وبعدين اني يعني فيدي حاجه غير الصبر علي بشندي ولد ولده اعملها!! 

حكيم : علي سيرة بشندي كيفه النهارده؟ 

سخاوي : متفكرك النهارده وطول النهار يردح عايز يجيلك وبالعافيه اتفلتت منيه وطلعت. 

حكيم وهو عيقوم.. اخص عليك ياسخاوي بشندي متفكرني النهارده وطالب يشوفني ومتجيبهوليش ولا تقلي؟اقول ايه عليك يعني وانت خابر اني عستني اليوم ديه استنايه!! 

سخاوي : اني قولت انكم معزومين النهارده وهتقضو اليوم فبيت عواد وبكر لما هيشوف البت مهيتعتعش من اهناك.. كنتش اعرف افلام جمس بوند اللي عملاها عليه بت الزمارتي اللي خلته همل البلد وخد فوشه وهج خالص! 

حكيم وهو ماشي : اللي هججه قلة عقله وخفيته بت الزمارتي ولا غيرها عاملين كيف نسمة الهوا معتطيرش وتاخد فوشها غير كل خفيف وملوش وزن.. 

خلص كلامه وطلع علي طول علي بيت حبيبه اللي متفكره وهيقعد معاه ويحكي ويرجع معاه لايام زمان وحلاوتها.. 

تميم : مش حرام عليك تقسي قلب ابوي علي بكر تاني بعد ماابتدا يلين وكان هيقوله ان البت زينه ويريحه ياأذوه انت! 

سخاوي : اسكت ياد انت اسمعش نفسك لاقوم اوكلك الورق اللي قدامك ديه واوريك الاذوه عيعمل ايه.. 

تميم بصله وهز دماغه وسكت وعاود يحسب فاللي قدامه.. 

سخاوي بضحكه : بس والله براوه عليها بت عواد لعبته كيف القرداتي ماعيلعب القرود... اموت واشوف شكله كان عامل كيف لما شاف البت اللي ورتهاله بت الكلب داي يابووووي عالمسخره اللي كنت فيها يابكر  هههههه. 

***************ا

حكيم وصل لبيت بشندي وخبط وخديجه فتحتله ورحبت بيه ودخل مبتسم اول ماشاف بشندي قاعد عالدكه وضحكله بفرحه لما وعيه كيف عيل صغير عيستقبل ابوه. 

بشندي : حبيبي وولدي وولد قلبي وبكري روحي.. قرب ياد تعالا فباطي متوحشك ياردي ياللي نسيت بشندي والدنيا لهتك عنيه.. 

حكيم قرب من بشندي وخده فباطه وحب علي راسه وقعد جاره يتطلعله بابتسامة حب وهمسله : سامحني ياكهل حقك عليا اعذر تقصيري.. 

بشندي : عاذرك يابوي ومسامحك الدنيا تلاهي... وسكت شويه وهز راسه برفض وكمل.. بس له مش الدنيا السبب، دا الغازيه الصغيره اللي حداك بت الغازيه الكبيره اللي معاي جوا هي اللي لاهيتك عني ولفت راسك ونستك الدنيا.. اني عارفهم فواجر الوحده منهم عتتلولو علي جوزها كيف العليق متخليهوش يعرف يتنفس ولا يتحرك من جارها 

ولما يكبر ويبقي لا حول ليه ولا قوه عتستعكر بيه وحتي نايبه عتاكله منه..سعرانين يابوي سعرانييين.. بس يلا هما شافوها فين اللحمه والديوك غير فبيوتنا المحرومين اللي كانو عايشين عالجبنه الخضرا دول! 

حكيم بضحكه : اسكت ياواكلهم احسن عيشه تسمعك.. والله انت حلال فيك الشندله اللي عتشندلهالك.. 

بشندي كشر وشه وبص حواليه ونتر بيده بحركه خلت حكيم ضحك اكتر وبعدها مد يده فجيبه وطلع سفندتين واداهم لبشندي.. خد قشر دول وكلهم عارفك عتحبه .. 

بشندي وهو عياخدهم منه وهو مكشر : امال زرعت شجرتهم فماجور ومطرحتش غير دول ياك؟ 

حكيم : ياقزين مش عيشه مانعاك منيه عشان عيخليك تبهدل الدنيا فالليل؟ 

بشندي ميل عليه وشاورله بيده وحكيم قرب وبشندي وشوشه :

اسكت انت مخابرش اصل اني دلوك كلت سفندي ماكلتش عشخ علي روحي كل يوم.. ومش بس بالليل ديه حتى بالنهار قبل مااوصل دورة الميه جلدة الحنفيه عتسيب وابص الاقيني ارتحت وعيشه تقعد تصرخ عليا هبابه وتسكت.هههههههع هع، يعني هات سفندي كتير هات ميهمكش  

حكيم ضحك علي بشندي من قلبه بعد ماهمسله : والله عيشه ليها الجنه عليك ياواكلهم.. 

بشندي قشر سفنديه وقسمها كل نصها ومد نصها علي خشم حكيم.. خد كل مسكره والله تستاهل حنكك

حكيم : له يابشندي اني واكل كلها انت بالهنا والشفا 

بشندي بزعل : قرفت مني اكمني عشخ علي روحي؟ 

تخافش يابوي معحفش حاجه بيدي عيشه هي اللي عتغير وتمسك الخلجات المبلوله بيدها المره المعفنه داي.. هي اللي تقرف منيها مش اني اني نضيف.. 

حكيم وهو عياخد من يد بشندي حتتة السفنديه وياكلها : هات يابوي اقرف منيك ايه بس اني كان كل غرضي انك تاكلها انت كلها. 

بشندي : لما تنزل فبطنك ياواد قلبي كنها نزلت فبطني اني وشبعتني.. 

حكيم مد يده طبطب علي رجل بشندي وابتسمله وبعدها عيشه جات سلمت علي حكيم وسالته علي اهل بيته واحوالهم ودخلت عملتلهم شاي وجابتهولهم وهملتهم لحالهم لما لقيتهم عيتحدتو مع بعض ويضحكو وناسيين الدنيا باللي فيها ودخلت هي قعدت فالموطبخ  مع خديجه اللي كانت عتقمع باميه وتعملها عقود عشان تنشفها وتخزنها للشتا ومسكت سكينه وقعدت تقمع معاها.. 

****************

عدو يوم واتنين وتلاته واسبوع وعشر ايام عدو علي سفر بكر ومن يومها وهو قافل تليفونه ومراضيشي يرد علي حد لغاية ماجه ميعاد سفر تمره وتميم قرر ان هو اللي يوديها وبالمره يطمن علي بكر ويشوف احواله.. 

تميم وتمره وهما فالقطر.. 

تمره بحماس :تميم ايه رأيك هتقول لبكر؟ اني لولا ماوعدت امي كنت قولت طوالي  

تميم : لو لقيت حالته صعبه هقوله مع ان سخاوي وابوكي قالولي متقلهوش.. له لقيته زين مهقولهوش.. 

تمره بضحكه : اني رايي نسيبو بكر يتربي هبابه .. بس تعرف اني الحماس قاتلني  وهموت واشوف منظره وهو عيشوف مليكه ويشوف جمالها.. يابوي ياتميم قمر البت قمرررر 

تميم : طيب بس خلاص اقطمي واوعاكي توصفي مرت اخوكي لحد حتي لو وحده من صحباتك فاهمه.. 

تمره : فاهمه يابوي فاهمه. 

تميم بحزم: ومش هوصيكي ياتمره تاخدي بالك من روحك وتبعدي عن اي شاب واي اختلاط حتي لو بدافع الدراسه.. اللي هتعرفيه من شاب ممكن تعرفيه من بت عادي. 

تمره : مقولتلي الحديت ديه كتير قبل اكده ياتميم! 

تميم : وهقوله تاني وتالت ومليون ومشايفش فيها حاجه لما اوصيكي وافكرك بالاصول.. 

تمره :لا توصي حريص اخي لا توصي حريص. 

تميم ابتسم علي تمره وهي عتقلد زينه مرته وبص بعيد وهي كملت : اي هيك بدي ياك هادي ولطيف ولك يؤبشني الحلو 

تميم بصوت واطي وابتسامه  : مخلاص يابه بطلي جلع ماصخ. 

تمره : اي سكتت تؤبر ألبي.. هو مفيش غيره الشامي اللي عيجيبك ارض ارض ويخدر اعصابك.. 

تميم برفعة حاجب : فشرتي الشيخ تميم مفيش حاجه علي وش الدنيا تجيبه ارض واصل. 

تمره بضحكه : ايوه منا عارفه.. وهمست بصوت مسموع خلاه ابتسم زياده ومعقبش : غير زينه طبعا. 

وصلو الاتنين علي القاهره ووصلو علي باب الشقه بتاعة بكر وتمره طلعت مفتاحها وفتحت والاتنين اتفاجئو من اللي شافوه اول مادخلو علب البيتزا مرمايه فكل حته ومفتوحه وكل علبه فيها بواقي بايظه غير علب الكنتاكي الفاضيه وعلب الكانز وبواقي الاكل الحمضان.. 

تمره  شالت النقاب وهي داخله وضربت علي صدرها وهي عتتلفت حواليها بقهر.. يامري ايه دا يابكر دا اللي عامله فالشقه ربنا يسامحك ياشيخ!! 

تميم وهو عيشيل علب البيتزا من علي الكنبه ويقعد.. مش بعقله ربنا يهديه.. 

بكر كان طالع من الحمام ينشف فدماغه بعد ما خد شاور وسمع كلامهم كله واتقدم ومسك علبة بيتزا من فوق الكنبه رماها عالارض وقعد : 

مالكم عتنوحو ليه وتدعولي بالهدايه علي ايه؟

تمره : من الي شايفينه وشامينه ياحظي 

بكر : احمدو ربنا انكم شامين وشايفين وكل بس واحد غيري وعيمر باللي عمر بيه كنتو دخلتو شقته لقتيوها كلها قزايز خمره وبيره وغرقان وسط اعقاب السجاير بس الواحد ايمانه قوي الحمد لله وصبره عالنصايب فاق صبر الجمال.. 

تميم : ليه كل ديه يابوي خسرت اموالك فالبرصه ولا حبيبتك خانتك؟ 

بكر : ياخي والله لو قعدت مع بت عواد هتمني من كل قلبي اني اجرب احساس ان مرتي تكون حلوه لدرجة ان غيري يتمناها وتخوني معاه.. ولا احساسي وانا غيران عليها لما الناس تبص عليها بأعجاب.. وكمل بيمثل البكا.. اني مع بت عواد الكلب هتمني جرح الحبيب مهطولهوش ياحزني.. 

تمره : عفشه قوي اكده يانن عيني؟ 

بكر : حرام تظلمي العفشين وتحطيها وسطهم يابت ابوي وعهد الله كيف العفاريت. 

تمره ضحكت وهي عتلم علب الوكل والبواقي : معلهش ياقلب اختك نصيبك اكده. 

بكر : نصيب مقندل.. اه لو اعرف بس الذنب اللي عملته فحياتي اتعاقبت عليه ببنت عواد كنت استغفرت عنه ليل نهار.. اني اصلا مع كل صلاه عقول يارب اصرف عني شر ماقضيت  يمكن دعوتي تستجاب ويصرف عني بت الزمارتيه..

وبص لتميم.. بقى آني بكر بيه باشا عين اعيان الصعيد يحصول فيا اكده اني؟!! 

تميم بص لتمره وابتسم ورجع بص لبكر : بطل بس عديد وانتبه لحالك ودراستك وسيبك من اي حاجه تشغل بالك وارمي ورا ضهرك قدامك ٣ شهور وتخلص سنه علي خير من كليتك متخليش حاجه فالدنيا تأثر علي دراست.. 

بكر هز دماغه وخد نفس وزفره : هو ديه اللي هيحصل.. قولي اخبار امي وابوي ايه وكيف صحة مرتك وسلسبيل؟ 

تميم : تهمك اخبارهم قوي وتهمك صحتهم وانت قافل تلفونك ومخليهم ميتين من القلق عليك لولا ماابوك كلم محسن مدير المعمل جه سأل عليك وعرف انك بخير واطمن وطمنه لولا ماارتاح وامك قلبها هدي هبابه! 

بكر وهو عيقوم يبص من الشباك : غصب عني ياخي متحملش اكلم حد ولا حد يكلمني كل ما هكلم حد من البلد هتفكر بلوتي السوده اللي فيها.. وكمل بنرفزه اذا كان انتو دلوك قلبتو عليا المواجع لما جيتو يحرقكم  خلتوني رجعت اتفكرت ملامح وشكل عفركوشه تاني جاكم الهم جيتو ليه؟ 

وميل مسك علبة بيتزا فاضيه وضرب تميم بيها خلاه قام وفضل ينفض فخلجاته من البيتزا اللي وقعت عليه 

تميم بص لتمره والاتنين ضحكو علي بكر وتميم اطمن ان اخوه واخد الموضوع شويه جد وشويه هزار ومفيش اي خوف عليه وقرر انه يسيبه الكام شهر دول زي ماسخاوي اقترح عليه.. 

*****************ا

عدي شهر ورا شهر وجات امتحانات اخر السنه والكل امتحن ونجح وبكر وتمره نجحو زي كل سنه بامتياز لكن فرحة حكيم بنجاح مليكه ومجموعها اللي كان ٩٨.٨ كانت اكبر من فرحته بنجاح بكر وتمره .. 

حكيم تلفونه رن  ورد عليه بسرعه ولهفه : هاه يامليكه طمنيني عملتي ايه؟ 

مليكه بفرحه : وعد الحر دين يابوي، طب عين شمس الحمد لله وفيتلك بوعدي.. 

حكيم بفرحه : عفارم عليكي يامليكه عفارم.. رفعتي راس ابوكي ياحبيبة قلب ابوكي.. 

مليكه : كله بفضلك ياغالي ربنا يخليك ليا ويديمك سندي وقوتي يارب.. 

حكيم : طب ادينا اطمنا عاللي كان قالقنا والحمد لله جيتي فنفس الكليه.. جاهزه يامليكه يابتي؟ 

مليكه خدت نفس وزفرته وبعدها ردت عليه : جاهزه يابوي وتحت امرك فكل اللي تقول عليه.. 

حكيم : علي خيرة الله اجهزي عشان الاسبوع الجاي فرحك علي بكر.. 

وللحكايه بقيه... 

بقلم صاحبة السعادة / ريناد يوسف 


جماره الجزء الثاني بارت 5

جماره
الجزء الثانى البارت الخامس 5

حكيم قفل مع مليكه ورن علي سخاوي :
سخاوي : شيخنا
حكيم : اللي متمنينه حوصول ياسخاوي، خطيبة بكر طلعلها طب عين شمس، جهز نفسك عشان نعملو اللي عليه النيه معقوده.. 
سخاوي بضحكه : يابوووي، خلاص ان الاوان للبو يرتاح ويهَدي بوشه!

حكيم : لو مفكر ان جواز بكر ومليكه فيه راحه ليه ولا ليها فالوكت الحالي توبقي غشيم ياواد بشندي.
سخاوى : ليه يابوي مش بكر متشندل عالحلاوه.. اهو هياخد قالب الحلاوه كله.

حكيم : القالب لساه ملفوف بألف غطى ومعقود بالف عقده، وبكر عشان يوصله ويدوق حلاه، لازمن يقشر غلاف القهر اللي متلفلف بيه، ويحل العقد وحده وحده وكل ديه يتعمل بالصبر واللين والراحه، وانت خابر عاد طبع بكر فاللين والراحه والصبر وعليه قيس هيوصل لقالب الحلاوه ميته وبعد كد ايه! 

سخاوي بجديه : بص ياشيخ عايز انبهك لحاجه.. بكر نظرته للحريم انهم اتخلقو للطاعه وخدمة الراجل وبس، يعنى لو مليكه حبت تسوق عليه الدلال وتتمنع بكر هيعمل حاجه من تنين..
 يأما هيبعد عنيها ويزهدها وديه احتمال ضعيف شويه قدام عند بكر وعناده، يأما هيعمل فيها اللي يكسر عينها، بكر ماهيرضاش بمره تشيخ عليه وهو شايخ عالدنيا كلها وعامل حاله فوق راس كل الخلايق تاج.. 

حكيم : والله عاد الحته داي بتاعة مليكه واني متوكد ان بكر مهيعرفش يمشي عليها عنده ولا عناده..
سخاوي : باينه تاه طبع بكر عنك ياشيخ ونسيت ان بكر يده أسرع واطول من لسانه ولو امر مهيتقبلش عصيان، وخصوصي فاللي ليه ومن حقه

 اذا كان اللي مش ليه عيتلتح فيه فما بالك انت فاللي من حقه؟ 
لما كان يضروب تمره كنت توقفه بحجة انه ملهش حكم عليها طول مانت قاعد لكن مرته اللي فعصمته تقوله ايه عليها لو اتعامل معاها بالشده؟ 

حكيم : لو اذاها اكسر راسه. 
سخاوي : هتخسر ولدك وتشتري عداوته ويغلطك ويحقك ياشيخ، وخصوصا ان اللي بكر هيشد علي مليكه عشانه حقه اللي محدش يقدر ينكره عليه، 
ويقدر يحق بيه اي واحد يقف قصاده ويعارضه حتي لو انت بذات نفسك.

حكيم : يعني ايه اسيبله بت الناس اللي وعدتها بالحمايه ووعدتها ان كرامتها فبيتي هتفضل متصانه ياسخاوي؟ 

سخاوي :ياشيخنا.. موضوع كرامة مليكه ديه والمحافظه عليها فيدها هي.. تطيع بكر تتحط عالعين والراس، 

تتعامل معاه بالحسني تلاقي الف من يوقفلها فوش بكر لو جه عليها.. 
انما تقل ادبها وتعرعر قصاده وتقل منيه يبقي متلومش غير حالها وتتحمل العفاريت اللي هتحضرها علي بكر عاد ومهتعرفش تصرفها.. 
واسمع كمان والله ياشيخ لو مليكه عابت فبكر وهي متحاميه فيك لاجيبها لابوي واديه نشو واقفل عليهم اوضه، ومفتحلها غير لما تقول لبكر شبيك لبيك عبدتك وملك اديك. 
ولو عالربايه لبكر والادب بكر مهيجيش بلوي الدراع واصل وانت ادري بولدك مني.

 كفايه جزات عنده انه قعد فوق ٤ سنين نفسه مكسوره وحاسس بظلم واظن  العقاب اكده كد الغلط وخلصنا.. 

حكيم خد نفس : هقولها كل ديه من غير ماتقول ياسخاوي ماني مهرضاش لولدي تهينه مرته وتعيب فيه. 
سخاوي : وحاجه كمان تنبه عليها متقولش لبكر انك كنت علي علم باللي عيملته معاه والبت اللي ورتهاله بدالها وكل المسخره اللي حوصلت داي..

 بكر هيعدي للغريبه العيله ويعذر، لكن انت وامه ولا حتي اني ملناش اي عذر حداه لو شم خبر اننا كلنا كنا خابرين انه بينضحك عليه وساكتين، وهيتهمنا اننا اتأمرنا عليه وعملنا جريمه وزعله مننا كلنا كوم وزعله منك انت كوم لحاله، وكتها لا هيعترف بدروس ولا عبر ولا خرابيط وهيهد المعبد فوق روسنا كلنا.. 
وان كان ولا بد يعرف محدش يجيب سيرتي معاكم عالاقل سيبو واحد يحفر عليكم ويطلعكم من تحت انقاض المعبد  
حكيم : ايا جبان 
سخاوي : من خاف من نجي يابوي

 المهم دلوك اقفل معاي ورن علي بكر ياجيلك من القاهره واوعاك تقوله علي خبر جوازه غير بعد ماياجي، واني وتميم هنجهزو كل حاجه ولما يعاود ناخدوه علي مشمه منخلوهش يعرف راسه من رجليه حتي.. 

حكيم : ماشي.. الله المستعان يلا مع السلامه سلملي علي بشندي. 

قفل حكيم مع سخاوي ورن علي بكر :
بكر : ايوه يابوي 
حكيم : زين والله النوبادي رديت من اول رنه!
بكر : سمعت التلفون يابوي ماني عقولك ععمله صامت لما اكون مشغول.. 

حكيم : طيب هات اختك واندلي عشان عايزكم فحاجه مهمه ومستعجله 
بكر : خير؟ 
حكيم: كل خير.. جواز 
بكر : جواز! تمره لساتها قدامها سنتين  يابوي جواز ايه دلوك؟ 
حكيم : هات اختك واندلي فاول قطر ولما توصلو نتحدتو.. سلام.. 

حكيم قفل مع بكر وبكر شال التليفون من علي ودنه وهمس : ايه ديه ماله ابوي؟ وهز دماغه وراح لتمره قالها انهم مسافرين النهارده ولحسن الحظ كان اخر يوم فالتدريب اخدها وروحو بس مقالهاش حاجه من الكلام اللي قالهوله ابوه.. 
جهزو شنطهم ولملمو كل حاجه وادو الوكل اللي فالتلاجه للبواب وقفلو النور عن الشقه  عشان النوبادي سفرية اخر السنه وهتطول شويه.. 

بكر وصل البلد هو وتمره  واول ماوصل دخل السرايا سلم علي امه وسألها علي ابوه وتميم، وقالتله فالمندره وهو راح عليهم طوالي عشان يشوف ايه حكاية الفرح اللي ابوه قاله عليه ديه! 

دخل بكر وسلم علي ابوه وتميم وقعد جارهم وحكيم رن علي سخاوي قاله ان بكر جه عشان ياجي يسلم عليه لكنه فالحقيقه كان عايزه يساعدهم فالسيطره علي بكر لما يعرف الخبر.. 

وصل سخاوي بسرعة البرق وسلم علي بكر سلام حار وكاتم ضحكته وبكر مستغرب عليه عشان واعيه من اول ماجه باصصله ومبتسم كنه عيحاول يكتم فرحته بحاجه بس مقادرش.. 

بكر سأل ابوه وعينه لساتها علي خاله سخاوي : ايه العباره يابوي جواز ايه ديه اللي جبتنا عشانه علي ملى وشنا؟ 

حكيم بجديه وتكشيره : جوازك من بت عواد، اتحدد بعد اسبوع 
بكر فط من موطرحه وقف علي حيله وهو  مبرق عنيه : جواز مين اللي اتحدد وكيف ديه ومين اللي حدده.. اني قولت مهتجوزش غير بعد مااخلص دراستي هما مستعجلين وعايزين يجوزو بتهم يشوفولهم عريس غيري معطلهمش.. 

حكيم : اني اديت كلمه وحددت والامر منتهي. 
بكر بعصبيه : علي اي اساس تحدد وتدي كلام يابوي احنا فانهي عصر وفانهي زمن كيف تحدد مواعيد وتقرر حاجات عني فموضوع كيف ديه اني الوحيد اللي ليا الكلمه الاولى والاخيره فيه؟ باي حق يابوي! 

سخاوي : يابكر اسمع ابوك فالاول وافهم هو عيمل اكده ليه قبل ماتتعصب وتقول كلام مايصحش يتقال. 
حكيم : ميبقاش بكر لو فهم قبل مايقوم زعابيبه.. اوعى فسحله الطريق خليه يلفح خلجاته ويجري فالدنيا وسعله وسع.. طول عمرك هتفضل اكده يابكر عمرك مهتسمع كلامي ولا تطاوعني واني كل اللي عتمناه من الدنيا راحتك ومععملش غير لموصلحتك. 

بكر : الحديت ممحتاجش فهم ولا شرح شارح نفسه.. اني مقاعدش ومعنديش خبر ولا علم وابوي حدد معاد فرحي وجاي يقولي فرحك فاليوم الفلاني ويحطني قدام الامر الواقع كأني عيل صغير معارفش حاجه ومليش اي حكم علي حياتي الخاصه!! اسمحلي يابوي ديه قمة. الظلم واني معهدتكش ظالم. 

تميم : بزياداك يابكر ابوك عمره ماعيظلم وكل اللي عيعمله لموصلحتك.. بت عواد جالها طب عين شمس وابوها مراضيش يخليها تروح لحالها ولا تكمل وهي وقعت فعرض ابوك يساعدها ولما كلم ابوها رفض فملقيش حل غير انك تتج..

بكر بعصبيه ملقيش حل غير انه يعلقها فرقبة بكر قلاده ويقوله يلا يابكر شيل.. 

سخاوي : ابوك عيمل الصح يابكر وبت عواد دلوك او بعدين هتتجوزها هتتجوزها.. يبقي حرام عليك تأجل عشان العند وتضيع مستقبل البت وتضيع فرصتها فالتعليم.. 
بكر : تعلييييم ايه وداكتورة ايه يابوي دي مهتنفعش تدخل طب من اصله دي مهتداويش حد دا العيان لو دخلها رايق يموت بالسكته وهي عتكشف عليه.. ياناس داي اخرها الحريم يقعدوها فمزار واللي عايزه تخلف تروح تبص عليها وتزورها بدال الكحريته اللي عيروحوها فاولاد طوق داي! 

حكيم : احتشم يابكر وبسك غيبه فبت الناس وجيب فسيرتها بالسوء.. الفرح اني حددته واديت كلمه والجوازه داي فالاول وفالاخر ورطتك اللي حطيت نفسك فيها وشيلتك وهتشيلها.. هشوفك هتسمع كلامي وتكبر بيا ولا تصغرني وتقل بيا.. 

بكر بعصبيه : حاضر يابوي.. حاضر.. دوس عليا كمان وكمان.. دوس علي بكر مهيقولكش غير حاضر.. وكمل بتهكم.. مانتا ابوي وادري بموصلحتي حتي اكتر مني اني شخصيا 
حكيم : اخ بس لو حديتك ديه كنت عملت بيه من لاول كنت وفرت علي نفسك تعب كتير قوي 
بكر : ملحوقه اهو اللي عايزه يتقال اتقال فالاخر يابوي.. بالرضي بالغصب اتقال.. خلص وخد فوشه وطلع وحكيم بص لتميم.. ورا اخوك متهملهوش.. 
تميم بعصبيه : بابوي مقلتلهوش ليه وريحته بذياده عليه اكده اني اخوي صعبان عليا وانت سامعلي كلام سخاوي البو ديه وعمالين تعملو خطط خايبه عليه هتموتوه قهر.. فيها ايه لو قلتوله الحقيقه كان برد هبابه وهو اكده اكده كلها كام يوم وهيعرف هيعرف.. 
حكيم : والله وبالله كنت ناوي اقله بس بعد حديته ديه معاي واتهامه ليا اني ظلمته لهخليه لحد مالصدفه هي اللي تريحه ولو قلتله ياتميم اني خصيمك.

 روح وراه وشوفه راح فين وقوله الحاجه اللي علي الواحد وعارف انها ان طال الزمن ولا قصر فوق راسه ميماطلش فيها.. 
قوله الباينه مفهاش جدال ولا زعل ياواد الشيخ.. 

تميم وهو عيهم عشان يطلع  :  والله قهر اخوي ديه فرقابيكم وعمر العلام مايكون بالقسوه والا التلميذ يكره استاذه. 

تميم طلع وسخاوي قرب علي حكيم اللي باصص ورا عياله ومديق حواجبه والتكشيره علي وشه :
هملك منيهم ياشيخ واللي ابتديته كمله للاخر.. انت احكم من الكل وادري باللي فيه الصالح.. تخليش قلبك يغلب عقلك واديك شفت بكر واسلوبه وحديته واني لو كنت اتعاطفت معاه فلحظه ندمت عليها اللحظه داي.. 
بكر عايز مش قرصة ودن بكر عايز قرصة لسان عشان يتلم وضربه جامده فوق دماغه عشان يفوق.. 
سيب عليه بت الزمارتي خليها تربيه بطريقتها كيف ماعتقول حلال فيه وشويه... 

تميم راح ورا بكر ولحقه فأخر الطريق وفضل ماشي وراه لحد مابكر وقف قدام المدافن  وفتح الباب ودخل 

تميم دخل وفضل يمشي وراه بالراحه لحد ما راح قدام قبر سته تماضر وتميم وقف بعيد عنه يراقبه وبكر ابتدا يتكلم بصوت عالي ويشهد سته علي ابوه ويشكيلها من عمايله فيه 

تميم قلبه اتعصر علي اخوه بس همله لحاله يفضفض ويشكي اللي فقلبه عشان يرتاح ويهدي وبعد ماحس ان بكر هدي راحله وطبطب علي كتفه وقومه من الارض وخده معاه وراحو عالارض وقعدو مع بعض مده طويله تميم حاول فيها كل جهده مع اخوه عشان يهديه ويطمن قلبه ومعاودوش للبيت غير بعد ماخفف عن بكر وهون عليه شويه 
اما حكيم فالاثناء دي اتصل بغاليه وبلغها بميعاد جواز بكر وعزمها هي واسامه جوزها وعيالهم واسامه اعتذر عشان مش هيقدر يسيب الشغل فالوقت دا وقاله انه هيحجز لغاليه والولاد وينزلهم فاقرب وقت .. وبعدها كلم ابو زينه وامها وعزمهم هما كمان..

بكر رجع علي السرايه وقعد والكل اتلم حواليه امه واخواته وسخاوي والكل فضل يضحك فيه ويهزر معاه وهو مش متفاعل معاهم خالص مفيش بس غير سلسبيل هي اللي كانت تقدر تنتزع منه كلمه او ابتسامه اما الباقيين فكان كلامهم معاه والعدم واحد.. 

طلع بكر اوضته بعد قعده طويله وفرد جسمه عالسرير وحط ايده تحت دماغه وغمض عنيه بتعب وهرب من اللي هو فيه بخيال اتجسد قدام عنيه للعفريته اللي طلعت قدامه مره وحده اعترضت طريقه وبعدها انشقت الارض وبلعتها.. 
*************م

بعد يومين.. 

حكيم واقف تحت علي اول السلم وباصص لفوق وعيزعق  : يلا ياتميم هم عمتك وعيالها زمان طيارتهم وصلت ياولدي. 
تميم وهو نازل يعدل فخلجاته : ايوه حاضر يابوي جيت اهه 
-يلا ياولدي يلا.. رن علي سخاوي هو كمان متعود ياجي بسرعة البرق ايه اللي اخره اكده؟ 
تميم : رنيت عليه واني فوق يابوي وقال انه فعيادة الدكتور بمرته وولده الصغير ودخلو يكشفو علي مااوصله يكون طلع يشيع ام يوسف عالبيت فتكتك وهو ياجي معاي.. 
حكيم : طيب زين يلا همو وخلو بالكم من الطريق ربنا يستر طريقكم 
تميم : تخافش يابوي مستوره بأذن الله.. قالها وطلع علي بره طوالي. 

حكيم  وهو واعي جماره طالعه من الموطبخ : هاه يام تميم كل حاجه تمام؟ 
جماره : كله تمام ياشيخي والوكل جاهز وزي الفل. 
حكيم وهو عيهز دماغه :زين زين.. 
طلعت زينه من الموطبخ تمسح اديها فجوانب جلابيتها : خلصت مرت عمي وبدي روح غير اواعيه بدك شيي تاني أبل لاروح؟ 
حكيم : روحي يابتي روحي غيري خلجاتك وكوني فاستقبال امك ولو فيه حاجه ناقصه تكملها جماره وتمره. 
زينه وهي ماشيه : اي يابي ليكني رايحه.. 
تمره وهي طالعه من اوضتها شايله سلسبيل : ايه يابوي لسه عمتي وعيالها ماجوش؟ 
حكيم : اهو تميم راح يجيبهم هملي سلسبيل لامها عشان يستقبلو ستهم وانتي اقفي علي يد امك وتممي معاها كل حاجه.. 

تمره : حاضر يابوي.. 
فالاثناء دي دخل بكر من الباب وراح علطول علي تمره وخد منها سلسبيل من سكات وطلع بيها علي السلم عشان يلعب معاها كيف كل يوم لانها الحاجه الوحيده اللي عتهون عليه وتسليه وتنسيه يحسب فالدقايق علي اليوم المشئوم اللي جاي بسرعة البرق ممتاخرش. 
جماره بصت لحكيم بعتب بعد ماراقبت ولدها لحد ما غاب عن عنيها : عاجبك حال ولدي ديه ياحكيم؟ 
حكيم :خلاص ياجماره كلها يومين والحال يتبدل ، بس والله اني معارف اعمل ايه فمخه اليابس ديه.. الواد لحد الساعه الراهنه مراضيش يروح برضك يشوف خطيبته لما عواد كل وشي! 

جماره وهي عتتحرك من قدام حكيم : قله هود هبابه ياعواد بتك وهناخدوها عايز ايه تاني خليه يحل عننا عاد من يوم ماشفناه ماشفنا خير.. 
حكيم بغضب : برضك ديه كلام تقوليه يامرت الشيخ حكيم؟ عتنكري فضل ربنا عليكي فلحظه!! يعني ليكي اربع سنين  مشفتيش صحه ولا راحه ولا نجاح عيالك ولا اي حاجه حلوه تعتبريها خير من عند ربنا؟ 

جماره بضيق : يووه ماكنتش كلمه ياحكيم مالك؟ 
حكيم : حرصي من كلامك ياجماره ومتستهونيش باللي عيطلع من خاشمك عشان الدنيا دي كلها قايمه علي كلمه.. الجواز بكلمه والطلاق بكلمه.. المحبه بكلمه والكره عيتولد من كلمه..والكفر بنعم ربنا كمان بكلمه.. ان العبد ليتكلم بكلمه من سخط الله مايتبين فيها يكتب الله له بها سخطه الي يوم يلقاه. 
جماره خدت نفس وغمضت عنيها وزفرته وهمست : استغفر الله العظيم يارب 
حكيم : حكمي عقلك حتي قبل ماتنطقي الكلمه يام تميم مش عنعلمو فبكر التروي واستفتاء العقل واتاريكي زيه نفس العقل والتفكير! 
جماره : ماقلنا خلاص ياشيخ غلطنا ومهنكرروهاش عاد!
تمره : خلاص يابوي امي اعترفت بغلطها واللي يعترف بغلطه يسقط ذنبه ويبطل حسابه ! 
حكيم: اني عوعيها ياتمره مش عحاسبها وهي عارفه اكده زين..  اني طالع اشوف الغفر راحو نضفو سراية غاليه ولا لسه عشان لو حبت  تشوط عليها تلقاها نضيفه وجاهزه.. وكمان هاشيع لعواد اشوفه لو محتاج حاجه. يلا السلام عليكم 

جماره وتمره فنفس واحد  : وعليكم السلام.. 
تمره : بعد اذنك هبقي اروح لمليكه بعد ماتاجي عمتي وعيالها واسلم عليهم يابوي كلمتني وقالتلي عايزه تاخد رايي فحاجات عايزه تشتريها 
حكيم : ابقي خلي سخاوي ولا تميم يوصلك وروحي وحتي لو حبت تاخدك وتنزلو تشترو اللي ناقصها سوا روحو بالعربيه بس متعوقوش لليل.. 

تمره : حاضر يابوي 
حكيم حط يده فجيبه وطلع فلوس مدهالها
 تمره: معاي يابوي فلوس اني 
حكيم : خابر معاكي بس برضك خدي دول  خليهم معاكي واللي تعوزه مليكه هاتيهولها وادفعي عنها انتي.. 
تمره : والله يابختها بيك مليكه امها باين عليها داعيالها فساعة رضي من قلب صافي.. 
حكيم بابتسامه : ايه الغيره هتشتغل من دلوك من مرت اخوكي ولا ايه! مليكه ياتمره عشان يكون فمعلومك انتي وامك. احتمت بيا من ظلم وقع عليها وانا مقدرتش ارفعه عنها بس عحاول اعوضها بحنيتي عن عجزي. . مليكه خدتني اب ليها وسند واني لازمن اكون ليها كيف مااتوسمت فيا واكتر، مليكه سلمتني اللي جاي من حياتها واني حريص اني اخليهولها كيف ماتتمني..
جماره : طب وايه دخل امها فالحديت دلوك؟ 
حكيم : عشان سبق وسمعت نفس الكلمه منك وحبيت اعيد عليكي جوابها مع بتك وافكرك يمكن تكوني نسيتي. 
جماره : له منسيتش حاجه ويلا اتوكل علي مصالحك متعطلناش احنا كمان عن مصالحنا.. وانتي ياتمره روحي ولعي المباخر وحطي فيهم بخور ضيعي ريحة الطبخ اللي مالي السرايا ديه همي. 

تمره اتلافت الفلوس من يد ابوها واتحركت : حاضر يمه رايحه اهه 

حكيم بعد ما مشت تمره بص لجماره وابتسم وهو عيقرب منيها :  يعني اكده عتطيري وراي  وتقوليلي روح شوف مصالحك! 
جماره : واه مش انت اللي لساك عتقول هروح اعمل واسوي واني عفكرك باللي وراك لتكون نسيت، مش جايز برضك تكون نسيت ولا هو النسيان والتوهه من نصيبي اني لحالي؟ 
حكيم بضحكه : ارتحتي لما ردتيها يعني! عموما ياستي الكل معرض للنسيان والتوهه جل من لا يسهو وطالع اديني اشوف مصالحي ونبقو نشوفو الزعل وعرقيص الوش ديه بعدين ونلاقو فيه حل. 
جماره : بس لما تفضيك ست مليكه تشوف الزعلان ولا تلاقي حلول.. روح يابوي روح شوف حالك الله يصلح حالنا وحالك روح 
حكيم : اباااااي عالغيره وعمايلها حتي المره الكبيره العاقله حاطه عقلها بعقل عيله صغيره!
جماره بصتله ومتكلمتش 
حكيم همسلها : له دا الموضوع كبير ومهيتحلش غير تحت جناح الليل بطريقة الشيخ حكيم.!
جماره : حضر حالك ياشيخ  لفصل النهارده عشان قولتلي كلمتين اوعر من بعض وكل كلمه فيهم عايزه قعدة صلح لحالها. 
حكيم : شيخك جاهز للفصول ومعاه الحجه والبرهان والدوا لاي زعل يام بكر.. قالها وتبعها بغمزه ولف واتحرك من قدامها لبره وفاتها مراقباه ومبتسمه علي حديته وعنيها عتحرس خطاويه وقلبها يسمي ويدعيله بالحفظ حتي وهي قلبها زعلان منه وغضبان عليه بسبب قهرته لولدها.. 

اما حدا بكر فالاوضه مقعد سلسبيل جاره عالسرير وعتلعب بتلفونه.. 
بكر : قوليلي يابت اخوي امك لما عتاجي تخوفك عشان تنامي عتخوفك بايه؟ 
سلسبيك : عم تئولي نامي مشان البزونه راح تجي تاكل ادانك اذا لئتك فايئه لدلوكيت. 

بكر : وانتي عتخافي لما عتقولك اكده وتنامي؟ 
سلسبيل : اي لاني كتير عخاف من البزون انا.. 
بكر : يعني معتخوفكيش بامنا الغوله ولا العفاريت ولا حاجه من داي؟ 
سلسبيك هزت دماغها برفض :لا مين امنا الغوله ياعمو؟ 
بكر : تعرفيش امنا الغوله؟ 
سلسبيل : لا مابعرفها بتشبه شو 
بكر : ملهاش وصف.. بس اصبري هجيبهالك بعد يومين اهنه وهتشوفيها بنفسك.. 
سلسبيل : ليش راح تجيبها اهنه؟ 
بكر : هتجوزها.. هتوبقي امنا الغوله مرت عمك.. عشان لو حد من العيال خوفك ولا يوسف رزل عليكي تقوليه هجيبلك مرت عمي تاكلك 
سلسبيل بخوف :  بتخوف كتير ياعمو؟ 
بكر بأسي  : عتخوف اخر حاجه.. 
سلسبيل : طيب ليه راح تتزوجها مش خايف منيها انته. 
بكر : اني اكتر واحد فالدنيا خايف منيها يابت اخوي. 
سلسبيل : طيب وليه بدك تتزوجها الغوله هاي اتزوج انسانه عمو متلنا بتكون حلوه متلي وما بتخوف. 
بكر : مينفعش عشان امنا الغوله لازم تتجوز ومحدش هيرضي يتجوزها غيري 
سلسبيل : خلاص اتجوزها اذا هيك..بس الله يرضي عليك عمو اولها سلسبيل بنت حلوه كتير ومؤدبه وعم تسمع الكلام ليكيش دعوه بيها متخوفيهاشي وانا راح اعمولها يلي بدها ياه حتي لو بعتتني للدكان راح روح اشتريلها ماراح أولها لأ متل ماعم أول لماما. 
بكر ضحك وهو عيميل وياخد سلسبيل فحضنه ويضمها بقرقطه: يابوي عالناس الخوافه الحلوه داي اللي الواحد ماعارفها عتتكلم شامي ولا صعيدي ولا ايه..  هتشتري لامنا الغوله وتعمليها اي حاجه من الخوف ياجبانه؟ 
سلسبيل : اي لكان تاكل اداني متل البزون؟ لا عمي راح اشتريلها. 
بكر ضحك وفضل يزغزغ سلسبيل وهي تضحك واثناء ماهما كده الباب اتفتح مره وحده خضهم  وطلت منه زينه : ليكها هوون الفاره صارلي زمن عم دور عليهاااا.. يلا تعي ماما لاغيرلك اواعيكي تيته ورد زمانتها علي وصول خليها تشوفك متل العروس بفسطانك لجديد الحلو.. 
بكر : يامرت اخوي عليكي دخله كيف كبسة البوليص مش تخبطي ولا تتنحنحي قبل ماتدخلي! 
 زينه وهي عتدخل الاوضه : اذا لحالك مابعملها ولا بفوت من دون استاذان بنوب مابعملها الا وسلسبيل معك لاني بكون متاكده انك وهي معك لا بتكون بتغير اواعيك او بتعمل شي يعني طول مابنتي معك ماالك عندي استئذان هههه.. هاه يلا بيلا حياتي لنلبس ونكون متل الاميرااات 

سلسبيل وهي بتدي التليفون لعمها : اوكي ماما اجيت.. هاك عمو لا تخرج من اللعبه راح ارجعلك بعد مااتحمم والبس ضن. 
بكر : ضن 
سلسبيل وهي بتقف علي السرير وتمد اديها لمامتها عشان تشيلها : يلا ماما بسرعه بدي ارجع لاكمل الجيم واقفل اللعبه ابل لا تيجي امنا الغوله لهون ماراح احسن اجي لهون والعب مع عمو واصل.. 

زينه بصت لبكر وهي بترد علي سلسبيل: يي شو امنا الغوله مين وكيف بدها تيجي لهون؟ 
سلسبيل: عمو بكر راح يتجوزها ويجيبها علي هون مشان ياحرام ماراح تلائي حدا يتزوجها وانا قولت لعمو راح جيبلها كل شي بدها ياه بس لا تخوفني وهو حكي اوكي.. 
زينه برقت عنيها : ولك يبعتلكن حمي  علي هيك حكي شو بتعمل بكر اذا بيلا حكيت هيك للمخلوئه بس تيجي لهون؟
بكر : يبعتلها حمي هي وابوها بعد الشر علينا اني وبت اخوي، وبعدين متقولها فيها ايه يعني هي هتقول حاجه كدب! 
زينه : لا بكر هيك راح تخليني مااترك زينه معك راح تعلمها تكون وقحه وانا مابرضي بهيك اسلوب.. 

بكر : استني بس شوفي مرتي واخليها تطلع عليكي مره فالضلمه واشوف وكتها اسلوبك هيكون عامل كيف.. خدي بتك واطلعو  وردو الباب وراكم وهملوني مع احزاني روحو... 

ساعات ووصلت العربيات محمله بالحبايب وكان حكيم واقف فاستقبالهم اخته وعيالها وورد ام زينه اللي لما سالها علي جوزها وعيالها قالته مقدروش يجو بسبب ظروف الشغل، وان الوقت دا عندهم  موسم ضغط شغل ولو جوزها سابه هيخسر خساره كبيره وحكيم عذرهم وسامحه هو واسامه ومعتبش عليهم.. 

الكل دخل السرايا وعيال غاليه جريو  علي فوق لما سالو علي بكر وعرفو انه فأوضته وسلمو عليه وحضنوه وكان بالهم انهم هيلاقو بكر بتاع زمان اللي كان دايما يضحك وكان يخلي ضحكتهم تطلع من القلب لكنهم لقو بكر تاني خالص حزين ومطفي وطول الوقت قاعد ساكت.. 

حكيم خد سخاوي وتميم وطلعو عالمندره عشان ناس جاتلهم وغاليه قعدت مع جماره وتمره.. اما ورد فسلمت عليهم وخدت بتها وبت بتها وراحو اوضة زينه عشان الاتنين يشبعو ويطفو الشوق من بعض وكل وحده تحكي للتانيه اخبارها.. 

بعد كلام وحديت غاليه  لما شافت الوضع مش تمام وحتي اخوها حكيم لما شافته كان باين عليه الهم وديه خلاها مستغربه واتأكدت ان فيه حاجه حصلانه لما بكر فضل فاوضته منزلش حتي يسلم عليها مسكت جماره وفضلت تقرر فيها وتعصرها عشان تطلع منيها بكلمه لكن مقدرتش ابدا.. 
جماره كانت ذكيه مقالتش حاجه عشان عارفه لو قالت لغاليه كان السر اللي مخبيه حكيم ومحرص عليه هيتكشف وقالتلها اسالي اخوكي ايه اللي معكننه وهو لو عايز يقولك هيقولك. 

غاليه بغيظ : ايييي هيك لكان.. والله طلعتي مانك هينه ياجماره.. اي شو عليه بسأل اخي ماني بحاجتك لتئوليلي شي.. يلا فلي من ابالي بدي ارتاح شوي اطلعي بره.. 
جماره قامت وهي عتضحك علي عصبية غاليه وطلعت بره الاوضه وقفلت الباب على غاليه وفاتتها ترتاحلها هبابه من تعب السفر.. 
عدي النهار وغاليه طلعت لولد اخوها لما منزلش طول النهار ولا سلم عليها حتي لما عيالها نزلو واكلو هو قالهم هنام مش هنزل متخلوش حد يصحيني.. 
غاليه فتحت عليه الباب شافته نايم علي بطنه ولعت النور وقعدت جاره.. 
غاليه وهي عتمشي يدها علي ضهره بحنان : لهالدرجه مابدك تشوف عمتك يابكر! مااشتأتلي معئول؟ 

بكر وهو عيتعدل بالراحه وخد نفس وابتسم وهو عيبص لعمته : حمداله عالسلامه ياعمتي نورتي بلدك وبيتك.. معلش اعذريني مقدرتش انزلك تعبان شويه.. 
غاليه : شو يلي تاعبك ياروحي ريتو بيا ولا بيك ياعمري. 
بكر خد نفس وزفره : شوية. صداع وهيروحو لحالهم متقلقيش 
غاليه : ربي يسعد البك وروحك ياروحي.. أوم ابني أوم ما عئلبك شر  انت عريس والمفروض تكون اسعد حدا بالدني 
بكر : حاضر ياعمتي هقوم دلوك بس افوق هبابه والصداع يخف من دماغي. 
غاليه : ربي يشفيك ابني مع ان الئصه مانها ئصة صداع أنا بعرف بس يلا اذا ماحدا بده يحكي ومعتبريني غريبه عنكن متل مابدكن. 
بكر : كلام ايه ديه ياعمتي كيف معتبرينك غريبه بس ماغريب الا الشيطان! 
غاليه : طيب اذا هيك يلا ئوم معي لنطرد الشيطان الغريب هاد وننزل نئعد مع العالم مشتائتلكن انا وبدي نئعد سوا متل زمان ونرجع اللمه الحلوه يلي جايه مخصوص منشانها.. 
بكر وهو عيقوم : حاضر ياعمتي  انزلي انتي واني هاخد دش افوق ونازل وراكي.. 

غاليه : اي ابني هيك بدي ياك ئوم تؤبر عضامى انشاله.. خلصت كلامها وقامت طلعت وبكر قام طلعله غيار وحطه عالسرير وخد فوطه ودخل الحمام خدله دش وطلع غير ونزل قعد وسطهم ووكت العشا قعد ياكل معاهم من غير نفس وامه بصاله وكل تنهيده تطلع منها علي حاله تحرق فقلب حكيم اللي قاعد يبص عليهم طول الوقت بس من تحت لتحت ممخليش حد ملاحظ انه واخد باله من حاجه.. 
عدو يومين كمان والكل انشغل فتحضيرات الفرح وبكر لساته على سكوته 
وكلامه مع الكل قليل ويكاد يكون معدوم مع ابوه... 

حكيم وعيال اخته وعياله وسخاوي الكل متجمع علي السفره  والحريم كلهم متجمعين فالموطبخ علي سفره تانيه عياكلو لحالهم.. 

حكيم جلي صوته : احمم سخاوي ابقي خد بكر اقطعله كام توب منهم توب ابيض للفرح وروحو للخياط ياخد مقاساته وقوله يقعد فوقهم ميهملهمش ويجهزهم فيومين بكتيره.. وشوفه لو عايز حاجه تانيه اشتريهاله.. 
سخاوي : امرك ياشيخ نخلصو غدانا واخده  ونروحو طوالي.. 
حكيم : وانت ياتميم ابعت لدمشقي العطار شوفه جاب الحنه اللي موصيه عليها ولا له.. 
تميم : جابها يابوي وبعت الشوال  الصبح عالمندره واني حاسبته بس نسيت اجيبه هخلي واحد من الغفر يجيبه للسرايا دلوك.. 
حكيم : زين.. ابعت نصه علي بيت عواد وهات نصه لامك اهنه.. سخاوي كلمت حد من الجزارين علي عجل كيف ماقولتلك توديه علي بيت عواد؟ 
سخاوي : له ياشيخ وكنت لسه هشور عليك تديه فلوس العجل فيده بدال ماتوديله عجل اصل عواد حداه زريبه مربي فيها عجول فانت اديه فلوس وهو يدبح من حداه بدال مانجيبو احنا ونودو.. 
حكيم : حديت زين.. طيب شوف العجل العفي اللي يرميله كد ٤٠٠ او٥٠٠كيلو يعمل كام وخد من تميم وودهمله فلوس.. 
سخاوي : حاضر ياشيخ من عيوني 
حكيم : تسلملي ياواد الغالي وتسلم عيونك اني مخابرش من غيرك كنت هعمل ايه ياولدي والله.. 

بكر قام من علي السفره والكل بصله وطلع من السرايا من غير كلام وراح عالاسطبل خد بشاير وطلع بيها علي الطريق اللي شاف فيها البت اياها وفضل مستني كتير عشان تظهر مع انها مش ايام مدارس بس كان متامل يشوفها ولو صدفه تكون فيها رايحه تشتري حاجه او طالعه من بيتهم لأي سبب
 وكالعاده وكيف كل مره عاود خايب الرجي مكسور الخاطر عاللي شافها مره وحده وفص ملح ودابت بعد ماسابت صورتها فخياله وعنيه مطبوعه معتروحش وحتي لو راحت  وانشغل هبابه عتعاود من تاني كنها عتعاتبه عشان انشغل عنها.. 
عاود بكر السرايا بعد ماهدي شويه ورجع بشاير عالاسطبل ودخل السرايا وشاف عمال عيجهزو فالمشتمل ويغيرو لون صبغه وفهم انهم عيجهزهوله يتجوز فيه كيف تميم وهمس لحاله وهو معدي من جارهم : بطرانين والله عامليني هقعد معاها لحالي بعيد عن الناس! 
ودخل السرايا وبص لابوه القاعد علي الكنبه وقاله : 
ياشيخ لو عتجهز المشتمل لبت عواد حط فبالك هتقعد فيه لحالها اني مههملش اوضتي عايزه تاجي تترزع فيها اهلا وسهلا مش عايزه خليها فالمشتمل بكيفها وديه اخر كلام حداي وممنوش رجعه.. قالها وطلع السلم وحكيم بص لجماره ولسه هيتكلم قاطعته : 
ايه مالي اني كمان هتلومني علي حديت ولدك ولا ايه اني ليش صالح بيكم اتخالصو مع بعض.. وهملته وقامت.. 

غاليه ميلت علي اخوها : ايش اللي عم يصير معك اخي بكر عم يعطي اوامر ووجهه مايقصه السيف وعم يتعصب عليك ليش هيك! 

حكيم بضحكه : ماهو الاسد لما عيعجز ياغاليه عتتنطط عليه القرود عشان مبقاش يخوف.. 
غاليه : فشر.. ايش هالحكي هاد، انا اخي مابيعجز ولا حدا بيتنطط عليه بنوب.. اذا بدك ارفعلك هالبكر فلقه لاعلمه الادب. 

حكيم بضحكه: له متقلقيش ممستهلاش فلقه، اخوكي مهمله يتنطط براحته بس سلسلته فيدي وكت مااشوف تنطيطه زاد عن حده اشد السلسله اكفيه علي بوزه. 

حكيم خد قعدته جار اخته وطلع للجنينه وقال لجماره تحصله بكباية شاي وقعد تحت شجرة التوت وطلع تلفونه المحمول ورن على مليكه وهي كالعاده ردت عليه بسرعه بس شافت الاسم :

 ايوه يابوي اخبارك عامل ايه وامي جماره وتمره وزينه والكل عاملين ايه؟
حكيم : كله بخير.. طمنيني عنك انتي جهزتي كل حاجه خلاص ولا ناقصك حاجه تاني؟ 
مليكه : خلاص مش فاضل غير شوية رفايع اجيبهم ويبقي خلاص اكده.. 
حكيم : طيب فضي عشان مبقيش غير يومين غير النهارده خلصي نفسك معايزينش عطله من تلاكي عاد !
مليكه : له مفيش عطله ولا حاجه باذن الله... 
فترة. سكوت.. 
مليكه : حاساك عايز تقول حاجه يابوي صوح؟ 
حكيم : ايوه يامليكه يابنتي اني كنت جايلك النهارده اقولك الحديت ديه وش لوش واكد عليكي لكن الظاهر مهفضاش اجيلك حدانا فصل النهارده، فهقولك فالتلفون وخلاص.. 

عايز اقولك يامليكه  ان خلاص علي اكده انا سبتك تعملي اللي يريحك بس ديه طول مانتي فبيت ابوكي.. تاجي بيتي تحترمي ولدي قدام الناس مره وبينك وبينه الف مره.. 

مليكه : قولتلك. يابوي قبل سابق وهقولك تاني.. اني خابره حدودي زين مع ولدك ومهتخطهاش ومش عشانه له.. 

عشانك انت فالمقام الاول ولخاطر ابوي اللي رباني فالمقام التاني وان كان بكر غلط فيه قبل اكده مره مهخليهوش يكررها تاني بسببى. وفالاخر عشان خاطر نفسي برضك عشان مهسمحش لحد يهيني ولا يهين تربيتي. 

حكيم :  عين العقل يابنيتي ربنا يكملك بعقلك .. 
يبقي خلاص علي اكده ابتدو حياتكم مع بعض علي الاحترام والود واني متوكد ان المحبه هتنولد مابينكم وتكبر شويه شويه.. 

مليكه : له يابوي استني.. اني مهمنعش  عن ولدك  حقوقه ولا هغلط فيه صوح، لكن ديه مش معناه اني هرفعله راية استسلامي ورضوخي واخفضله جناح الذل. 

حكيم : طاعة المره لجوزها مش ذل يامليكه.. 
مليكه : لو معرفش قيمتها وسعي عشان يكسبها توبقي ذل يابوي. 
حكيم :يبقي عتلعبي بالنار وكل الكلام اللي قولتيه قبل اكده كان ضحك عالدقون.. عتلفي عالشيخ حكيم يامليكه ياك؟
مليكه بسرعه : حاشا لله وحاشاك من ان وحده زيي ولا اي حد فالدنيا يلف عليك يابوي..
حكيم : امال معناته ايه تقولي كلام وتغيريه فالتو واللحظه.. بصي يامليكه اني عتعامل مع عقلك كنه عقل وحده كبيره وناضجه .. متخلينيش اغير فكرتي عنك واسلوبي معاكي وانزل من قيمتك ومقامك فقلبي متخليش الندم ياكل قلبي لو اكتشفت انك مش كد المكان اللي حطيتك فيه بمساعدتي ليكي فحياة ولدي. 

مليكه : ربنا يسامحك يابوي.. عموما اصبر بس انت وهملني اني اعمل اللي شايفاه فصالح الكل، وليك عليا كل اللي نبهت عليا فيه احطه بين عيوني، وميكونش خاطرك غير طيب.. ولو غلطت غلطه اتحاسب عليها حساب مطاوق هاه قولت ايييه.. 

حكيم : مهقولش دلوك يامليكه هسكت واستني اشوف اللي هيحصول ومن بعديه القول يتقال فموضعه ومكانه.. وخدي بالك كتر العناد عينفر واني عايز بكر يقرب مش يبعد، عايزه يحب مش يكره..
فاهماني؟ 
مليكه : فهماك يابوي.. 

مليكه قفلت السكه مع الشيخ حكيم ورمت التلفون علي السرير جارها ونامت علي جمبها وبصت قدامها علي نقطه فالفراغ وهمست : مش مليكه اللي تسلم لولدك ياشيخ وتكتفي بهذا القدر من اللعب.. ومش بت الزمارتيه اللي تخلي حد يمسك عليها غلطه، سامحني يابوي بس ولدك ربايته علي يدي هديها وكتها لحد ماتم علي اكمل وجه مهما خدت وكت اني بالي طويل والايام طويله وكل حاجه مع ولدك هتمشي علي طوعي.. 
خلصت كلامها وقامت جابت شنطه وفتحتها ومره وحده الباب اتفتح ودخلت امها وهي عتغني.. 

ويابو اللبايش ياقاصاب عندينا فرح واتنصاااب ويابو اللبايش ياقصب 
مليكه وهي عتلم فالاقلام بتاعتها وادواتها ولاب توبها وكل متعلقات دراستها  وتجيب وتحط فالشنطه.. 

-يجعل فرحتك انتي وابوي عافيه فبدنا، طايرين من الفرحه كيف ماتكونو انتو اللي هتتجوزو! 
احسان : ومفرحش ليه يابومه وبتي هتتجوز احسن جيزه دونا عن بنات ضرايري ورايحه بيت شيخ البلد وهتاخد داكتور كيف البدر فتمامه وفوق دول ودول علت شأني حدا ابوها عشان بتي اني اللي ربطته بنسب الشيخ حكيم.. 

مليكه بضحكه : كلُ يغني علي ليلاه. 
احسان : كيف يعني 
مليكه : يعني ابوي فرحان بنسب الشيخ وانتي فرحانه بفرحة ابوي وكل واحد باصص لحاله ومفيش حد باصص لسبب فرحتكم داي ومستهم من حالها. 
احسان : ماله حالك ياخايبه يبت الخايبه اطلعي شوفي الناس مستكتره حالك ديه عليكي  كيف والبنات هتجيب رجلك من الحسد داكتوره وهتاخدي داكتور اصل وفصل وحسب ونسب وجمال سبحان من صور.. 
مليكه : اصل صوح.. ديه من كتر الاصل والاصول بتاعته مسلمش عليكي لما جه بيتك ولا سأل ولا طلب يشوفك حتي! 
احسان : مسامحاه.. كان هيسأل ويسلم بس غصب عنيه طلع رامح يشوف اللي محتاجله.. داي ناس وراها مشاغل مفاضياش للحديت الفاضي ديه. 

مليكه : ايوه صوح، يابوي عتحدت مع مين اني.. غني يمه غني كنتي عتقولي ايه؟ 
احسان بفرحه : يابو اللبايش ياقصب عندينا فرح واتنصب 
مليكه : ايوه هو ديه كملي كملي.. و بالفعل  طلعت احسان تغني وتعلي فصوتها عشان تكيد ضرايرها وابتدت تنقل ساجات البسكويت مع الحريم من جمب المكن ناحية الفران وهما عيغنو ويزغرتو، ومليكه ردها الوحيد علي كل اللي بيحصول ديه ابتسامه بارده مرسومه طول الوكت على وشها اللي يشوفها يقول صاحبتها حاسه بفرحة العرس ميقولش ابدا انها بسمة وجع مدفون.. 
*****************ا
شويه وجات تمره لمليكه بالعربيه وخدتها وراحو عالسوق واشترو كل اللي ناقص مليكه وزياده عليه كمان حاجات اشترتهالها تمره علي زوقها وفستانين احلي من بعض وكله دفعت حقه تمره من الفلوس اللي عطهالها ابوها واللي فضل  عطته لمليكه وقالتلها خليهم معاكي لو احتجتي حاجه عشان ابوي مديهمني على ذمتك وبعد الحاح مليكه خدتهم.. 
****************ا

عدي اليوم واليوم اللي بعده وجه يوم كتب الكتاب والحنه
 والشيخ حكيم سرايته بقت عامله كيف المولد من كتر الناس الداخله وطالعه والدبايح اتدبحت، والطباخين شغالين، والناس فوج يقعد وفوج يقوم، وتميم وسخاوي واقفين وقافى للناس وبكر طول الوكت قاعد فالمندره مليهش صالح باي حاجه عتحصل حواليه وكل مهمته انه يسلم عالناس اللي عتاجي تباركله وبس.. 

اذن العصر وسخاوي راح جاب المأذون وراح بيه على بيت عواد، وتميم خد بكر وابوه فعربيته، 
والحبايب جات وراهم وراحو لبيت عواد عشان يكتبو الكتاب ومليكه وكلت ابوها عنها وتم كتب الكتاب وعلي رغم انها لبست واتزوقت عشان الناس لكنها راهنت نفسها ان بكر لا يمكن هيهوب ناحية بيتهم ولا يجيلها وبالفعل كسبت الرهان وبكر مجاش ولا هوب ..
مفيش بس غير ابوه الشيخ حكيم هو اللي جالها مع ابوها وباركلها وفرحته بيها وبجوازها من ولده كانت باينه فعنيه.

عدت الساعات ودخل الليل وساعاته كانت عتجري كيف الرهوان يمكن اسرع ليل يعدي فتاريخ حياة بكر ومليكه وهما التنين مستنيين بكره واللي هيجرا فيه!

النهارده الفرح وتمره وزينه وخديجه والكل عيستعدو فالسرايا بالزواق واللبس وحتي تمره جابت نقاب وعبايه جداد بلون كشمير ونسقتهم مع بوت مناسب وبرغم النقاب الا انها كانت جميله جمال من نوع خاص متلفلفه بتوب الحشمه والوقار. 

بكر كمان تميم وسخاوي وولاد عمته  كانو معاه من اول النهار، يحلقوله ويجهزوه وهو ساكت بين اديهم ومستسلم ومسلم امره لله، وهما طول الوقت يبصوله ويبصو لبعض ويتغمزو ويتلمزو، وعيال عمتهم قاعدين معاهم مفاهمينش اي حاجه من اللي عتجرا بينهم وكل فهمهم انهم عيضحكو علي بكر عشان هيتجوز عروسه عفشه وقاعدين متحمسين يشوفو عروسة بكر اللي حضرو يوم فاتحته عليها وشافو اللي عمله واهم هيحضرو جوازه وشايفينه قاعد كأنه فجنازه ومحدش منهم مستجري من الخوف يسال بكر عنها ولا يجيب سيرتها وهما شايفينه قاعد طول الوقت عامل زي القنبله الموقوته اللي هتنفجر فأي لحظه.. 

اما بكر فاطول وقت سكوته وهو هيسال نفسه سؤال واحد مفيش غيره : ياترى هو يستاهل اللي بيجراله ديه؟  طب ياترى دا ابتلاء من ربه ولا سخط بسبب حاجه عفشه عملها فحياته وعمال يراجع كل افعاله من يوم ماوعي عالدنيا ملاقيش نفسه عمل حاجه تستاهل اللعنه دي! 

بكر جهز ولبس الجلابيه وتميم لفله العمه بنفسه ووقف يبص لنفسه فالمرايه وهي ثواني بس شاف فيها ملامحه وبعدها اتحولت الملامح لملامح الجنيه بتاعته الي خلته ابتسم وهو عيتخيلها واقفه قدامه النهارده بحسنها وجمالها لابساله الفستان الابيض ومستنياه عروسه.. 
ثواني والابتسامه اختفت وحل مكانها تكشيرة اشمئزاز لما الملامح الجميله اتبدلت بملامح بت عواد وخلت بكر يدور وشه من المرايه بخوف كنه شاف جني. 

نزل حكيم متحاوط بعيال عمته واخوه وخاله وابوه كان واقف تحت علي اول السلم واول ماشافه نازل عنيه اتعلقت عليه وابتسم بفرحه علي ولده اللي برغم التكشيره اللي علي وشه الا انه كيف البدر فتمامه.. 

بكر اول ماشاف ابوه خد نفس وطلعه بالراحه وكمل نزول لحد ما وقف قصاد ابوه والاتنين فضلو ساكتين ثواني وبعدها حكيم فتح دراعاته لبكر اللي دخل مابينهم بسرعه ودفن دماغه فحضن ابوه كنه عيل صغير عيدور عالحنان اللي بقاله فتره عيدور عليه من ابوه ملاقيهوش.. 

حكيم بعد بكر عن حضنه ومسك وشه بين اديه وعنيه جالت فملامحه وهمسله.. اه بسلو كنت رحت مره وحده بيت عواد وسمعت كلامي مكنش ديه كله حصلك وكان زمانك عتتنطط من الفرحه كيف القرد دلوك.. بس عندك ونشفان راسك جايبلك.. وهتشوف النهارده ياواد جماره وتتاكد زين ان الخير ساعات كتير عيكمن فالشر.. 
بكر بص لابوه بحيره وسأله : تقصد ايه يابوي؟ 
حكيم : مقصدش حاجه بس ابقي افتكر ان غبائك وتسرعك هو سبب عذابك.. روح يابكر اطلع واحضر فرحك ياولدي وافرح وطمن بالك مش هتنام النهارده غير مجبور الخاطر.. قالها وبعد اديه عن وش بكر اللي راح علي امه اللي كانت واقفه بعيد عتبصله والدمعه على طرف عينها حطنها وباس دماغها وهي قربت من ودنه وهمستله :
سامحني ياولدي غصب عني مقدرتش اريح قلبك حكم القوي، بس ارجع واقول لو سمعت كلام ابوك مكنش كل ديه حوصول.. يارب يكون ادب ماانه غضب وتتعلم من عند ونشوفية دماغ عيشك فمرار فوق ٤ سنين.. 
بكر : هي ايه الحكايه يمه عمالين تقولو الغاز مره انتي مره ابوي! عند ايه ونشفان دماغ ايه، عتتكلمو عن ايه انتو؟ 

سخاوي وهو عيشد بكر من قدام امه : هملهم يابوي دا عيخربطو خرابيط فرحه يلا بينا الناس مستنيه العريس والتحطيب للصبح النهارده داحنا هنعنعو عضمك ونكسروك كسير.. 
جماره : اللي يحف ولدي العريس هقطع فرطه ياسخاوي اديني قولتلكم اهه.. 
سخاوي : والله اللي معاوزش ينضرب يدافع عن حاله.. وشده وطلع بيه علي بره 
ولقو الشباب كلها مستنياه علي بوابة السرايه المفتوحه عالضرفتين واول ماشافو بكر الصفافير والهلاهل وضرب النار حرق الجو حرق.. 

طلع بكر وسطهم وسلم عالناس وبعد مالكل باركله بدأ التحطيب ونزل بكر فالساحه بالنبوت وشمر كمه ورفع نبوته واستعد لاول مبارزه ودخل عليه واحد مخدش فيده غير دقايق وكان مجرده من نبوته وصوت الهلاهل علي ودخل اللي بعده واللي بعده وبكر كان يبارز بغيظ كنه عيحارب ومتمني ان نهاية الحرب تكون تحرير روحه من اللعنه اللي اترمي بيها.. 

حكيم قاعد جار سخاوي وتميم وميل عليهم : مش هتقومو تاخدو دوركم فالتحطيب مع بكر ولا ايه؟ 
سخاوي : دور ايه يابوي مع التور الهايج ديه داني خايف عالناس منيه اقوم اروحله اني عشان يضروبني! له يفتح الله معاي اطفال عايز اربيها قومله تميم.. 

تميم : يعني انت معاك اطفال واني معاي اصنام له يابوي مقايمش داني واعي حمار عنيه من اهنه.. 
شويه وكله اتضرع لما شاف بكر ادي اللي قدامه ضربه فوسطه كومه عالارض وبعدها قومه والراجل قام مسك جمبه وبالعافيه ماشي من الالم ومن بعد منيه محدش دخل علي بكر واعلنو فوزه والشباب شالوه وفضلو يحدفو فيه لفوق 
سخاوي وهو باصص عالراجل اللي ضربه بكر وهو قاعد عالكرسي ولساته ماسك جمبته : 
اهو ديه تلاقي كلويته اتقسمت نصين من نبوت ولدك ياقسمته السوده! 
الحمد لله اللي الهمني العقل وماتهورتش ورحت بارزته كان زماني موطرح الحزين ديه.. 
حكيم بضحكه : صوح من جبن سلم علي قولك ياسخاوي  تاريك  عتقول حكم. 
سخاوي : ايوه امال ايه 
تميم : عمر ناس زمان ماعيكدبو مش قالولك خد الحكمه من افواه ال.... وضحك ضحكه مكتومه.. 
سخاوي كشرله ورد عليه : بص ياتميم انت مش شيخ وكل حاجه.. بس عيل مسنبط اقسم بالله.. واصبر عليا يخلص الفرح بس وهظبطك ظبطه زينه ارجعك عالوضع الحامي.. 
حكيم بصلهم و عض علي شفته عشان يسكتو ويبطلو مناقره قدام الناس وهما بالفعل سكتو وبص لسخاوي بعتب وقاله :
يعني ينفع اكده متجيبش ابوك والله حاسس ان فيه حاجه ناقصاني والفرح ناقص من غيره.. 
سخاوي : يابوي اسكت ياشيخ ابوي متجليه معاه خالص النهارده وناسي الكل كليله ولوجه كان قلب الفرح وهو من شقه وبكر من شقه مكناش عرفنا نحادو مين ونحلقو على مين خلينا علي بال واحد، داني والله قاعد وبالي مشغول على امي يبرك فيها بالنشو يقطع خبرها وهو من اول ماصحي النهارده يقولها حاسك قطاطه! 
حكيم ضحك ورجع يبص لبكر وتميم وسخاوي قامو جابولو بشاير عشان يزفوه بيها وركبوه وخده تميم هو والشباب يلفو بيه البلد ويحودو على بيت عواد بعدها يجيبو مليكه.. 
اما سخاوي فخد الكارته اللي زوقوها بالورود وراح بيها عشان يجيب مليكه 

مليكه لابسه فستانها وقاعده واول ماسمعت صوت الزفه اتنفضت من التوتر قوام نزلت طرحتها على وشها ووقفت علي حيلها.. 
ابوها دخلها هو واخواتها وعمها وعياله عشان ياخدوها يطلعوها لعريسها وابوها وقف قبالها وبنبره محذره ممزوجه بحنيه قالها : مليكه يابتي عايزك ترفعي راسي وتشرفيني وتكونيلي سبب دعوه مش سخط وحسبنة. 
مليكه : اطمن يابوي. 
عواد : يطمن قلبك يابنيتي ويريح بالك.. همي يلا عشان تروحي بيت جوزك. 
قالها واتحرك من قدامها وهي رفعت فستانها وخطت وراه خطوه لكنها وقفت لما منعم وقف قصادها وهمسلها بصوت مخنوق : النصيب غلاب يابت العم تبقي فقلبك صوح وتقسم لغيرك.. يلا ربنا يسعدك ويكتبلك الفرح كله.. 
مليكه : تسلم يامنعم ربنا يرزقك بالاحسن والاصلح يارب ويعوض قلبك عن خسارته بكل خير.. 
قالتها واتحركت وهو اتنحي عن طريقها ووقف يراقبها وهي عتروح قدام عينه وخالعه حته من قلبه واخداها معاها.. 

مليكه ركبت الكارته وسخاوي اتحرك بيها وقدام الكارته كان ماشي بكر بفرسته المتزوقه وكان كيف الفارس اللي عتحلم بيه البنته اللي لابس ابيض فابيض وياجي يخطفها علي فرسه لكن اهنه فارس مليكه لا خطفها علي فرسه ولا اتطلع عليها حتي وطول الطريق كان ماشي كنه ماشي قدام جنازه وديه خلي مليكه انتشت من الفرحه وهي واعيه الحسره مهدله كتافه... 

لقراءة باقي حلقات الرواية الجز الاول اضغط على 

 روايه جماره ابنه بائعه الجبن بقلم ريناد يوسف

لقراءه وتحميل الرواية كامله هنا 👇👇

تحميل وقراءه رواية جماره

لقراءه وتحميل روايه جماره الجزء الثاني كامله هنا

جماره الجزء الثاني 

لقراءه وتحميل روايه جماره الجزء الثاني الفصل السادس من هنا 👇

قراءه السادس  


للتواصل 👇👇👇😘

يُمكنك الانضمام لقناتنا على التليجرام

    الانضمام

يمكنك الانضمام لجروب علي التلجرام 

او الانضمام علي جروب الفيس بوك 

     الانضمام

وللحكايه بقيه... 
بقلم / ريناد يوسف

تعليقات

التنقل السريع