رسائل من مذكراتي ٤ بقلم مريم طارق

رسائل من مذكراتي ٤ بقلم مريم طارق 

وانتوا بتسعوا انكم تردوا الوجع افتكروا ان الحياه مش مضمونه ومش دايمه.....وانت بتفكر توجع غيرك افتكرله انه ف يوم طبطب على قلبك وقت حزنك.....وانت بتدور على نقط ضعف اللي قصادك عشان تضغط عليه بيها افتكر ان انت كمان عندك نقط ضعف ويمكن اسوء .....وانت مستني الناس هي اللي تبادر وتكلمك افتكر ان ممكن يكون فلان(ه) قاعد مستني تليفونك عشان يطمن عليك ......افتكروا ان حياتنا رحله وزي ما بدأت هتخلص افتكر ان اللي انت محتاجه غيرك برضه محتاجه زي ما انت مش عايز تكون لوحدك غيرك مستني انك تقرب منه اخرج من دائرة التفكير في نفسك وبس وجرب تحط نفسك مكان الناس لو معرفناش نهون على بعض بلاش اصلا نتواجد بالاسم بسس مع بعض 

رسائل من مذكراتي ٤ بقلم مريم طارق 

لو بطلت تفرض نفسك هتعرف انت مرغوب فيك ولا لا 

لو بطلت تبادر هتعرف هما كانوا بيكلموك ولا بيردوا عليك  

لو بطلت تمشي مشاوير هتعرف في حد مستعد يعدي عشانك الشارع ولا مستخسر  

لو بطلت تتعشم مش هتتوجع اللي عايزك دايما هيعرف طريق ويجيلك منه مهما اتقفلت قصاده الطرق بطل تتغاضى عن حاجات وجعاك وتصرفات مضيقاك وواجه واللي باقي عليك وقتها هيبان

كلنا عندنا التجربه اللي خليتنا ننضج اللي كبرتنا من جوا رغم اننا من بره وقصاد الناس زي ما احنا الشخص الي بيضحك وبيهزر وعايش لكنك من حوا كبرت اوي اوي محدش هيحس بالنضج اللي جواك نتيجة تجربه ارهقتك وجابت اخرك غيرك ودي بيكون ليها اثر كبير على كل قرار وكل شخص من بعدها يدخل حياتك ف اللي قال كتر الحزن يعلم البكا كان عنده حق ويوم ما هتبكي هتكون دي اللحظه اللي هتدرك فيها انك كبرت

رسائل من مذكراتي ٤ بقلم مريم طارق 

في عالم يبحث عن المثاليه والكمال في كل شيء ....وسط عقول مش بتدور غير على الكمال وسط ناس بتيجي على نفسها وعلى صحتها وعلى قدراتها عشان توصل للكمال والمثاليه عشان تواكب المجتمع في طلباته وعشان يكونوا مقبولين في عيون الناس ......بين علاقات بتخرب لانك بتدور على شخص كامل .....في نفسيه بتدمر لما تعرف انها ناقصه حاجه ......

وسط كل ده احب اقول اننا بني ادمين مش منيكان احنا بشر مش عرايس لعبه .....احنا بشر يعني مستحيل هتكون كامل لا ف شكلك ولا ف طباعك ولا شخصيتك وده مش عيب فيك لاننا اتخقلنا كده ربنا مخلقش انسان كامل فكر كده لو كلنا كاملين بنحتاج بعض ليه!؟ احنا بنكمل بعض اذا كان في علاقات الاهل او الصداقه او الحب بنختار الناس اللي تكمل الجزء اللي مش عندنا ولكن في الشكل بقا معظمنا لو مش كلنا عنده عقدة المثاليه ان كان راجل او بنت عايزن نطلع في احسن صوره تحت اي ظرف او اي عواقب مش مهم وده اكبر غلط انعدام الثقه بالنفس وانعدام الحب لذاتي هو ده اللي بيخلي اللي حواليا شايفين عيوبي لانها باينه في عيني محدش هيشوفك متقبل نفسك وحاببها وهيتعامل معاك بعكس كده الناس مرايا بتوريك انت شايف نفسك ازاي لكن مش بتوريك حقيقتك ف معظم مشاكلنا اننا حولنا نفسنا لاداه مش بني ادمين .....

حب نفسك

حب عيوبك

حب شكلك 

Mariam tarek