اسكريبت ليله العيد بقلم دنيا سعيد
سكريبت ليلة العيد بقلم دينا سعيد
_ أعدل وشك بقا خليني أعرف أحطلك الماسك.
= ي بنتي بقا سيبي وشي ف حاله.. حاسبي دقني ي ماما.
_ ولما أسيبك ف حالك أتصور مع مين وأقول أص.
= تقولي أي يختى؟
_ أصصصص.
= لا حول ولا قوة إلا بالله ودا من أي دا؟
_ الماسك دا بقا بيشيل الجلد الميت.
= قصدك بيشيل الشعر الميت دا أنتِ غرقتي دقني ي شيخه منك لله كنتِ قوليلي أحلقها بكرامتي بدل وجع القلب دا... أنا خايف أشيله.
_ تحلق مين ي بابا دا أنا أتجوزتك عشانها.
= عشان دقني!! أنا كنت حاسس إنك طمعانه فيا.
_ متضحكنيش بقا خليني أركز.
= تركزي أي أنتِ ليه محسساني إنك بتعملي عملية تجميل؟!
_ يوغتي أنتِ مش محتاجه عملية تجميل ي بيضه ي قمر أنت.
= ي بيضه ي قمر وأنتِ!!! قومي ي بت من هنا قومي مش ناقصه عبط ع المسا.
_ اه صحيح ألا فين عيديتي.
= طب يلا ي حبيبتي تعالي كملي بقيت وشي.
_ عيديتي؟؟؟
= عدتك!! أنتِ ناوية ع طلاق ولا أي؟؟
_ أستعبط أستعبط خد بالك أنا اللي هشيلك الماسك ودا جيلاتين هااا.
= أنتِ وليه قادره ومفتريه قولي بقا إن بتحطيه عشان تطلعي غيظك فيا وأنتِ بتشيليه.
_ حصل قلب نفسك كده وطلعلي ٥٠٠٠ جنيه.
لقيته فتح بؤه وبص قدامه وبعدين رجع بصلي تاني وكأنه لسه بيحاول يستوعب الرقم اللي أنا قولته: أيوا برضو مقولتيش أنتِ عايزه كام...؟! .
_ خمسة آلاف چُنيه.
= دا ع أساس لما تشكليها كده الرقم هيقل مثلاً.!!
_ شوف ي حسن يبني أنا عايزاك تقدرني وتشوف مقامي كام وتديهولي.
= أنتِ بترمي الكوره ف ملعبي يعني.؟؟
_ نبيه ماشاء الله.
حط أيده ع وشه واستغرب كده وقال: هو أنا وشي بيتشد كده ليه.
= دا الچلاتين ي حبيبي بدأ يشتغل.
_ وأنا هفضل متقمص دور البطاطسايه المكرمشه دا كتير.
= أدي أخرة اللي يزعل جوزته منه.
_ جوزته!!! تصدقي كنت شاكك إنك شيشيه فعلاً.
= أشمعنى؟؟
رد عليا بغمزه : أصلك بتعدلي مزاجي لما بشوفك.
_ وه!! عشرة من عشرة ونجمه وإجازة م النكد طول أسبوع العيد وادي بوسه كمان اهيه.
= أحم طب والعيديه مفيش أجازة منها هي كمان؟؟
_ ااااه أقول كده بقااا كل شيء أنكشفن وبان.
= أنكشفن وجوزته!! دا أنتِ ضايعه.
_ كفاية إنك ف كل مرة بتلاقيني وبتصلح ورايا.
بصلي كتير وحاول يبتسم يقلب أمه بس معرفش م الماسك اللي كان ع وشه لكن عيونه حكت كتير وللأسف مقدرتش أمسك نفسي أكتر من كده بسبب شكله ضحكت ضحكه خضته وقطعت علينا اللحظة اللي كانت هتبقى رومانسية : حد يخض حد كده.
_ شكلك...اااه ي بطني..مش قادره ي حسن لازم تشوف نفسك.
= جربي يختي شويه م اللي أنا بشوفه بقالي سنتين مقطعولي الخلف بسبب مسكاتك دي.
_ قصدك أي ي حسن هااا.
= هاتي هاتي الطبق دا أما أحطلك أنا كمان...ألا أي صوت الخانكه اللي أنا فيه دا؟
_ دا تأثير الچلاتين ي سونه.
= برضو!! ماشاء دا متعدد المواهب بقا.
ضحكت لقيته مسك وشي ف أيديه وقال: لا اثبتي بقا خليني أحطلك الماسك ي بيضه ي قمر أنتِ.
مسك الفرشه وبدأ يحطلي.
_ يححح دا ساقع أوي.
= يحح!! بنات أخر زمن.
كنت مبسوطة أوي وهو بيشاركني حاجه حلمت بيها من زمان، قد تكون تافهه ف نظر البعض إلا أنها كانت كبيره أوي ف نظري، كان باين ف عيوني إني بموت فيه مش بس بحبه كانت بتطلع قلوب كتير كده، خد باله من نظراتي وقف دهن ع وشي وبصلي.
_ حسن.
= عيون حسن وقلبه من جوه وحياة وربنا.
_ دا بجد ولا بتهرب م العيديه.
قرب من وشي وقال: عايزه الصراحه؟
حركت راسي لقيته قال: بتهرب م العيديه طبعاً.
خبطته ف كتفه: بطل رخامه.
= أصل دي مش عيديه ي حبيبتي دي محتاجه قرض عشان أقدمهالك.
_ جاوبني بصراحه أنت مبقتش تحبني؟؟
= كان نفسي أجاوبك بس حاسس إني اتشليت بسبب البتاع اللي ع وشي دا عاملني زي المتحنطين.
_ أنت بتتهرب م السؤال صح؟
= م أنتِ بتسألي أسئله أنتِ واثقه م إجابتها ي مي أوعي تحطي نفسك ف مقارنه أو تشككي ف أي حاجه صدرت مني تجاهك لأنها بتكون صادره بدافع الحب قبل من تكون صادره بدافع واجب أو فضيله.
= أقولك حاجه ومتقولش عني عبيطة؟
_ لا متخافيش أنا عارف إنك عبيطة.
= أنا أنسحب لأنك بتقل مني ف ليلة العيد وهذا غير لائق.
_ دا اللي فرق معاكِ إنها ليلة العيد يعني لو كانت ليله عاديه كنتِ هتقتنعي !!
= كنت هفكر.
_ طب قولي كنتِ عايزه تقولي أي؟
= استرجرجني شوية؟
_ اس أي.؟؟؟؟؟؟
= استرجرجني.
_ يخربيت الثقه اللي بتتكلمي بيها انتِ معاكِ إعداديه ي بت أنتِ هربانه من محو أمية صح؟
= العبايه لسه متكوتش مش كده؟ شكلها هتركن جمب أخواتها المحروقين.
_ لا ي شيخه حرام عليكِ أنا شوية وهعمل عرض أزياء مخصوص للعبيان المحروقه اللى بتطلع من تحت أيدك سيبي دي عشان جديده وهبقى أعوضهالك أنا ف عبياني القديمة.
= لا مدام هتعوضهالي كنت هتعوضهاني ف معلش.
_ كنتِ عايزة تقولي أي؟
= ف أي؟
_ ياربي متجوز سمكه.
= اه اه افتكرت.
_ طب الحمد لله يلا سامعك.
= زمان قبل م أشوفك كانت أمنيه من ضمن أمنياتي اللي أحنا بنعمله دلوقتِ دا أول م أنت جيت وأنا شوفتك قولت لا ازاي أستحاله مش حاسه إن دا اللي يعمل معايا مسكات.
_ عشان كده رفضتيني فعلاً كان سبب مقنع للرفض.
ضحكت: لا لا مش عشان كده عشان كنت غبيه مكنتش أعرف إن رفضي كان وراه خير كتير ليا كان وراه حب لو أجتمع الشعرا كلهم عشان يتغنوا بيه لكام سنة قدام كان هيكفي ويزيد.
_ طب أي رأيك بقا عشان الكلمتين الحلوين دول حلال عليكِ ال ٥٠ جنيه.
= أنا قولت ٥٠٠٠ ع فكرة.
_ ٥٠٠ وأسألي برا.
= كفاية إنك معايا ي حسن.
_ ي بنتي هتفلسيني بكلامك الحلو دا.
= م تخلي عندك دم بقا وقولي كلمة حلوه.
_ الأهتمام مبيطلبش ع فكره.
_ أنا بطلبه عادي جداً.
ضحك وبص ف عيوني: أقولك حاجه؟
_ هيييح حمد الله ع السلامه.
ضحكته يجدعاااان لا الواد يستحق الضجه اللي كان عاملها قلبي عشانه خلص ضحك وقال: أنتِ كل عيد تقولي نفس الجملة اللي قولتيها من شوية إنها كانت أمنيتك عشان كده ببقى منتظر اليوم دا كل عيد عشان أحققهالك وببقى واثق إنك هتحكيها زي كل مره عشان كده ببقى مجهز نفسي أني أسمعك وبحاول أجدد من رد فعلي عشان محسسكيش أنك قولتيها قبل كده وشغفك وأنتِ بتحكي يختفي.
_ وأنت بسمع وبتجاريني كأنك بتسمعها لأول مرة!
= مش بقولك متجوز سمكه بس الفرق إن السمكة بتموت برا الماية لكن أنا بموت فيكِ أنتِ.
_ لا دا أحنا نتصور ونقول أص بقا.
= دي برضو بتقوليها كل سنه.
_ م خلاص بقا ي لوجي.
لقيته ضحك طلع الفون بتاعه سحبته منه:
_ يلا قول أص.
= أقول اي؟؟
_ اصصص
= أمسكِ الكاميرا أنتِ بس كويس. كده وملكيش دعوه هقول أي.
لسه راحه أقول أص، لقيته بصلي وقالي بحبك، والصورة اتلقطت ع المنظر القمر دا، أينعم الكلمة متلقطش بس عيونه حكتها ويمكن قالت أكتر كمان، ما العاشق تفضحه عيناه.
" تهون الحياة طالما هناك من يستمع لحديثك المتكرر والمستمر دون أن يكل أو يمل بل يجادلك به كأنه يسمعه لأول مرة... هكذا تمر صعوبات الحياة دون الشعور بها" ♥️
#ليلة_العيد
#دنيا_سعيد_فوزي
تعليقات
إرسال تعليق