روايه موده ورحمه الفصل الاول بقلم موروو مصطفي
البارت الأول 🌹
روايه موده ورحمه بقلم موروو مصطفي
روايه موده ورحمة
في منزل متوسط في حي لا هو بالشعبي ولا هو بالراقي تجلس فتاه تدعي دنيا تبلغ من العمر ٢٤ عام في منزل أهلها وحولها الكثير من الجيران تتلقى مواساتهم في وفاة جدتها تلك المرأه المحبه التي قامت بتربيتها بعد وفاة والدتها ووالدها وهي بعمر العاشرة بعد ان وافاتهم المنية أثر حادث أليم وعاشت مع جدتها حتى تزوجت فور انتهاءها من دراستها الجامعية بزميل لها في الجامعة كانت بينهم قصة حب
تجلس بجوارها فتاه تماثلها في العمر هادئة تدعي رحيق كانت حامل بشهرها الثامن
- يا دنيا مش كده حبيبتي اطلبي لها الرحمة ياقلبي
- الله يرحمها ويسكنها الجنه يارب كانت هي اللي فاضلة لي يا رحيق ماكانش ليا حد غيرها كانت كل دنيتي
- ياحبيبتي جوزك معاكي ربنا يحفظة لك وبكره ربنا يرزقك بالاولاد اللي ينوروا حياتك
- يارب يارحيق يارب المهم طمنيني عليكي انتي عاملة ايه
- الحمدلله يا دنيا بس الحمل تعبني قوي ربنا يهون الايام الباقية
- يارب ان شاء الله حبيبتي انتي في الكام
- في أول الثامن
- ربنا يقومك بالسلامة ياقلبي يالا قومي روحي بقى كفاية عليكي قعدة كده انتي محتاجة ترتاحي واديكي معايا بقى لك اسبوع قومي يالا يا رحيق وانا ياسر ح يجي ياخدني النهاردة ارجع معاه وح ابقى معاكي بالتليفون ماشي
- ماشي حبيبتي بس خليني معاكي لغاية ماجوزك يجي والناس تمشي
- اسمعي الكلام وامشي انتي شكلك تعبان ومحتاجة ترتاحي واهو طنط هناء معايا
- ماشي يا دنيا بس ابقى طمنيني عليكي بالتليفون دائما
- حاضر حبيبتي وانتي كمان طمنيني عليكي دائما
- حاضر ياقلبي سلام عليكم انا
- وعليكم السلام حبيبتي
انصرفت رحيق الي شقتها الموجودة أمام شقة جدة دنيا وظلت دنيا جالسة مع هناء تلك الجارة الكبيرة في السن حتى انصراف اخر السيدات وتبقت هناء فقط مع دنيا حتى حضور زوجها
حضر ياسر وقام بتحية هناء وبعدها اخذ زوجته وانصرفوا عائدين الي منزلهم دون التحدث باي كلمة وشعرت دنيا ان به شيئاً فنظرت له بحنان
- مالك يا ياسر فيك ايه حبيبي
- مافيش يا دنيا
- ح تضحك عليا حبيبي كنت فين النهارده اتأخرت عليا ليه
نظر لها بتوتر
- كنت عند امي وابويا يا دنيا
ابتسمت بحزن وهي تنظر له
- عرفت ايه اللي مضايقك طبعا موضوع الخلفة مش كده سبحان الله حتى في الوقت ده دي حتى ماكلفتش نفسها تيجي تعزيني عموما كتر خيرها وبعدين ما انا قلت لك يا ياسر تعال نروح لدكتور وانت رفضت
- خلاص يا دنيا ماشي خلينا نروح لدكتور ونشوف في ايه
- ماشي حبيبي ابقى قولي بس قبلها علشان استعد
- اعملي حسابك نروح بكره
نظرت له باستغراب وذهول
- يااااااه ليه مستعجل كده ما انا ياما اتحايلت عليك قبل كده وكنت يتأجل شوية وترفض شوية
نظر لها ياسر وتحدث بغضب
- خلاص بقى خلصنا بكره وخلاص
- ماشي يا ياسر حاضر تحت امرك
صمتت دنيا بحزن حتى وصلوا الي منزلهم وصعدت للأعلى متجهة الي غرفتهم وقامت بتبديل ملابسها ودخلت الي الفراش وبعد قليل دخل ياسر فنظر لها ووجدها نائمة متخذه وضع الجنين ودموعها تغرق وجهها في صمت فاستغفر ربه واتجه لها وجلس بجوارها وهو يضع يده على كتفها
- ماتزعليش مني يا دنيا انا اسف حبيبتي بس زهقت من كتر الزن على وداني
اعتدلت دنيا وجلست تنظر له ودموعها على وجنتيها
- انا اتحايلت عليك كتير يا ياسر لكن انت مامتك معرفش ليه مش طايقاني معرفش ليه عندي احساس انها عايزه تخلص مني مع إني يعلم ربنا بعاملها زي امي وانت عارف وشاهد وبالرغم من كده حتى ماجتش ولا رفعت سماعة التليفون تعزيني اللي عمل كده باباك كلمني وجالي وبعد ده كله جاية تكلم في الموضوع ده وانا جدتي اللي ربتني اتوفت ماكملتش اسبوع
احتضنها ياسر وظل يربت على ظهرها وهو يقبل رأسها ويشعر بتأنيب ضميره على مافعله
- معلش حبيبتي حقك عليا انا، خلاص ولا يهمك نروح وقت ما ترتاحي وتفوقي
- خلاص يا ياسر نروح بكره علشان مامتك وانت ترتاحوا وانا كمان
- حبيبتي خلاص قلنا لما تهدي
- انا هادية الحمدلله بكره لما ترجع من شغلك نبقى ننزل انا تعبانة وح انام تصبح على خير
- وانتي من اهل الخير حبيبتي انا كمان ح اغير هدومي وانام
ابتعد ياسر وهو يشعر بالغضب من نفسه وذهب لتبديل ملابسه وبعدها عاد ونام بجوارها وسحبها الي احضانه وظل يربت عليها وهو يشعر بدموعها على صدره حتى ذهبوا في النوم
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
بعد أن ذهبت رحيق الي شقتها قامت بتغير ملابسها وارتدت قميص بيتي خفيف وانتظرت زوجها بهاء حتى يعود من عمله وبعد قليل وجدت الباب يفتح ويدخل منه زوجها الذي فور ان وجدها أمامه ابتسم لها واقترب منها مقبلاً اياه
- حبيبتي عامله ايه دلوقتي
- الحمدلله يا بهاء ربنا يهون حاسة اني خلاص مش قادرة
- ربنا يهونها عليكي حبيبتي خلاص دنيا مشيت
- اه ياقلبي مشيت مع ياسر صعبانة عليا قوي مابقاش لها حد خلاص
- ليه ياحبيبتي واحنا روحنا فين احنا جيرانها من سنين واكتر عمرها متربيه معانا لو احتاجت حاجة ح تلاقينا جانبها اكيد المهم انتي بلاش تتعبي نفسك ماشي خلي الايام الفاضلة تعدي على خير ياقلبي
- حاضر ياحبيبي ربنا يهون يالا بقى علشان تاكل زمانك جعان قوي نظر لها بهاء بمشاكسة وابتسم
- انا فعلا جعان قوي بس أوامر بقى اعمل ايه يامهوووووووون
ضحكت رحيق بقوة وهي تضع يدها خلف رأسه وتقترب منه بدلال ومناغشة
- معلش بقى يا هيبا اصبر و ربنا يسهل حبيبي
- ماشي ياستي اديني صابر ح اعمل ايه يعني ادامي ياختي وانتي حلوة كده
اخذ الاثنان يضحكان وهما يسيران بجوار بعضهما يحتضن بهاء كتف رحيق حتى ذهبوا الي غرفتهم وقام لتبديل ثيابه ثم ذهبوا لتناول الطعام وبعد أن انتهوا جلس الاثنان اما التلفاز يشاهدونه سويا وبهاء يحتضن رحيق ويسند رأسها على صدره
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
استيقظت دنيا من النوم باكراً وقامت لتحضير الإفطار لزوجها كما حضرت له ملابسه وبعدها ذهبت لإيقاظه
- ياسر قوم يا حبيبي علشان تلحق يالا بطل كسل انا حضرت لك الفطار والهدوم كمان
التفت ياسر لها وهو يفتح عيونه بنعاس شديد وسحبها بين احضانه ولف بها حتى أصبحت تجاوره تماماً
- طيب ابه رايك خلينا شوية ضحكت دنيا وحركت يدها على وجهه برقه
- بطل كسل يا روحي يالا قوم ابتسم لها ياسر
- حاضر ياستي قايم اهو
نهض من النوم ذاهباً الي الحمام ووجد ملابسه موضوعه بطريقة منسقة ومرتبه فالتفت لها والقى إليها قبلة في الهواء واتجه للحمام وقامت دنيا بترتيب الفراش وخرجت حتى تصنع له قهوته التي تعود ان يشربها من يدها بعد الإفطار دائماً
خرج ياسر من الغرفة بعد أن ارتدي ملابسه وذهب الي مائدة الطعام وجلس وبعدها أتت دنيا وجلست معه بعد أن وضعت القهوة بجواره وأخذت تضع له الطعام في طبقه حتى انتهى واحتسي قهوته ووقف يبتسم لها
- عايزة حاجة ياروحي
- لا حبيبي تسلم لي ح استناك علشان نروح للدكتور سوا
- مصممة يعني مش قلنا لما تفوقي شوية
- كده احسن يا ياسر خلينا نشوف في ايه
- ماشي حبيبتي اسيبك بقى سلام عليكم
- وعليكم السلام حبيبي
انصرف ياسر الي عمله فهو كان يعمل مهندس بشركة كبيرة وكان معه بعض من الزملاء الرجال والفتيات وكانت منهم فتاة متزوجة من قبل وانفصلت عن زوجها وكانت معجبة بياسر وحاولت كثيرا ان تتجاذب معه دائما الحديث وكان هو شخص اجتماعي فكان يضحك ويتحدث مع الجميع وشعر ياسر بها فحاول ان يفهمها انه يحب زوجته كثيرا فكانت تبعد احيانا وتقترب احيانا
اما دنيا قامت بعد انصراف زوجها بتنظيف بيتها وترتيبه بشكل رائع وقامت بصنع الطعام الذي يحبه زوجها وبعدها دخلت الي الحمام وأخذت حمامها وتعطرت وارتدت تي، شيرت وشورت قصير وبعد أن انتهت أمسكت اللاب الخاص بها ومارست هوايتها في تصميم بعض الأشياء الخاصة بالديكور وبعد مرور بعض الوقت وجدت زوجها يفتح الباب ويدخل فنهضت واتجهت له فاحتضنها بقوة مقبلاً اياها وهي تنظر له بحب
- حمدلله على السلامه حبيبي
- الله يسلمك ياقلبي ايه الروايح الحلوة دي وآية الحلاوة بتاعتك دي
- ميرسي ياحبيبي انا عملت لك الاكل اللي بتحبه عقبال ماتغير هدومك وتغسل وشك يكون الاكل جاهز
- ماشي حبيبتي ثواني وراجع لك
انصرف ياسر لتبديل ثيابه ودخلت دنيا لتحضير الطعام واخراجه على مائدة الطعام وبعدها حضر زوجها وجلسوا الاثنان يتناولون الطعام وهم يتحدثون عن يومهم وكانت دائما دنيا هي الناصح الأمين له في عمله وبعد أن انتهوا قامت بصنع القهوة المحببه لزوجها وتناولوها سويا وبعدها نظرت له
- يالا نلبس يا ياسر علشان ميعاد الدكتور
- ماشي حبيبتي يالا بينا
ارتدي الاثنان ملابسهم وذهبوا الي عيادة الطبيب الذي قام بالكشف على دنيا وبعدها نظر لهم وهو يبتسم
- طيب لغاية دلوقتي مافيش حاجة ادامي بس مطلوب منكم التحاليل دي والأشعة دي من حضرتك يا مدام واول مايجهزوا هاتوهم وتعالوا ومافيش داعي للقلق كل حاجة بأمر الله رد الاثنان
- ونعم بالله يادكتور ثم اكمل ياسر ح نعمل المطلوب ونيجي لحضرتك
- وانا في انتظاركم ان شاء الله
انصرف الاثنان متجهين الي معمل التحاليل وفور ان دخلوا الي المعمل تذكر ياسر شيئاً فارتبك قليلا وحاول الانصراف ولكن سبق السيف العزل فقد لمحه احد العاملين بالمعمل وتوجه له
- اهلا وسهلا يافندم اتفضلوا
شعرت دنيا بالاستغراب قليلا من ترحابه وكأنه يعلم ياسر ولكن لم تعطي للأمر اهمية وامسكت الروشتات ونظرت للرجل
- اتفضل حضرتك عايزين نعمل التحاليل دي
نظر بها الرجل ثم عاد بنظره لياسر
- يا استاذ ياسر ماحضرتك عملت التحاليل دي لسه من يومين وكانت كويسة جدا عايز تعملها تاني ليه
هنا نزل كلام الرجل كالصاعقة على دنيا ونظرت لزوجها والدموع تترقرق في عيناها وارتبك ياسر ونظر للرجل وتحدث بتوتر
- مش مشكلة نعملهم تاني وحاول التحدث مع دنيا التي نظرت له نظرة جعلته يصمت وبعدها قام الاختصاصي بسحب العينات منهم ثم نظر إلى ياسر وتحدث بعفوية
- استاذ ياسر وديت الست الوالده للدكتور اللي قلت لحضرتك عليه لما جت معاك اول امبارح ولا طنشت
هنا شعر ياسر كأن احد اغرقه بدلو مياه باردة وقبل ان يتحدث وجد دنيا تنظر للطبيب
- من فضلك يادكتور لما تطلع نتيجة التحاليل ياريت تخليهم يبلغوني على رقمي علشان اجي استلمها عن اذنكم ح استني في العربية يا ياسر
وانصرفت سريعا من أمامهم ولم يستطع ياسر ان يفعل شيئا سوا انه رد سريعا على الطبيب وجرى خلفها فوجدها تقف عند السيارة والدموع في عيناها تهدد بالنزول ففتح السيارة ودخلوا وكانت دنيا ملتزمة الصمت تماما وعندما حاول ياسر ان يمسك يدها سحبت يدها بقوة وهي تنظر له والدموع تنهمر من عيونها
- يااااااااه ماكنتش أتصور اني رخيصة كده يا ياسر
- ماتقوليش كده يا حبيبتي
- ماتقولش حبيبتي انت عارف انت عملت ايه انت رفضت نروح للدكتور الفترة اللي فاتت ولما عملت التحاليل واطمنت انك صاغ سليم قلت نروح بقى يعني كل الموضوع انك كنت خايف يطلع منك العيب وطبعا الست الوالدة هي اللي طلبت منك ده يعني لا قدر الله لو كان طلع فيك حاجة كنت ح تفضل ترفض نروح لدكتور صح علشان كده اصريت نروح للدكتور يااااااااااه هو ده الحب يا ياسر
- دنيا حبيبتي والله ما كده والله لوكان طلع عندي حاجة كنت ح اقولك اكيد انا بس تعبت من زن ماما عليا علشان كده عملتهم وهي كانت معايا علشان كانت بتعمل هي كمان تحاليل لها
نظرت له دنيا بابتسامة سخرية
- كانت بتعمل معاك تحاليل فعلا علشان كده دكتور التحاليل كان لسه بيقولك توديها لمين عموما خلاص يا ياسر اللي حصل حصل وطبعا لو طلع عندي حاجة ح تطلب منك تطلقني ماهو مش معقول تكون سليم وتفضل على زمتك واحدة مابتخلفش
- اوعي تقولي كده سامعة اوعي انا مقدرش استغني عنك حبيبتي ولو لا قدر الله في حاجة مش مهم انا لو عايز أطفال عايزهم منك حبيبتي علشان خاطري يا دنيا بلاش تفكري كده وبلاش كلامك ده وحياتي عندك حبيبتي
نظرت له بحزن وهي تبتسم بوجع والتفتت بوجهها الناحية الأخرى وهي تضع رأسها على زجاج النافذة
- تمام يا ياسر خلاص ربنا يعمل اللي فيه الخير ممكن بقى نروح نعمل الأشعة بالمره
- مش مهم حبيبتي مش مهم النهاردة بعدين خليها بعدين التفتت له بالم
- لا بالمره يا ياسر لو سمحت احنا بره طبيعي
- حاضر يا دنيا
ذهب الاثنان وقاموا بعمل الأشعة وانصرفوا بعد أن أبلغهم المختص باستلامها في الغد وطلب ياسر ان يذهبوا ليتناولوا الطعام بالخارج ولكن رفضت دنيا لأنها متالمة من إجراء الأشعة وبالفعل انصرفوا عائدين الي المنزل في صمت
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
في شقة اخرى تجلس الهام والدة ياسر تنظر إلى حسين والده الذي يشاهد الاخبار على التلفاز
- تفتكر خدها وراح بيها للدكتور يا حسين ولا عصلجت ورفضت الهانم نظر لها حسين بانفعال
- انا مش فاهم حطاها في دماغك ليه مش بلعاها ليه عايزة تخربي على ابنك ليه مالك ومالهم سيبيهم يعيشوا حياتهم زي ماهما عايزين انفعلت الهام بشدة
- يعني ايه ح تمشي كلامها عليا انا امه ولازم يسمع كلامي مش كفاية خدته مني
- انتي مريضة اكيد ما كل ابن او بنت مسيرهم يسيبوا أهلهم ويبنوا لنفسهم حياة تانية ولا انتي عايزاه يقعد جانبك
- لا مش كده بس ماعرفش مالها حطه نفسها في برج عاجي وفاكرة نفسها ياما هنا ياما هناك ايش حال مالهاش ام ولا اب ولا عيلة مش كفاية قابلين بيها
هنا نظر لها الاب ونهض من مكانه مقترباً منها بغضب
- حرام عليكي ياشيخه بتعيري البنت ان امها وابوها ميتين امال لو كان محلتهاش حاجة وكان ابنها جهزها من الاول للآخر زي ناس ولا نسيتي يا الهام دي البنت مجهزة بيتها اكتر ما ابنك دافع وجدتها الله يرحمها اللي انتي مرحتيش حتى تعزي فيها كانت بتساعده من وراء حفيدتها كمان يعني من الاخر ابنك ماتكلفش ربع اللي هي دفعته له البنت من اول جوازها وهي بتتعامل معاكي بحسن نيه ورضا وتديها كلام زي السم وتعمل نفسها ماسمعتش ودائما بتراعينا وتاخد بالها منا اكتر حتى من ابنك اتقي الله يا الهام
- انت بتعايرني ياحسين بعد العمر ده كله وعلشانها كمان ماشي يا حسين ماشي
- انا سايب لك المكان وماشي اشبعي بدماغك السم دي لغاية ماتخربيها وتقعدي على تلها
تركها زوجها ودخل الي غرفته وهي تجلس بالخارج تغلى وتزيد فهي لا تحبها رغم طاعتها دائما لها وسؤالها دائما عنها الا انها تشعر ناحيتها بالحقد فهي يتيمة مثلها ولكن تختلف عنها أن والدها ترك لها اموالاً كثيرة فجهزت نفسها مثلما قال زوجها اكثر حتى من ولدها اما هي فكانت يتيمة وفقيرة ورغم ذلك اغرم بها حسين وتزوجها وتحمل هو كل شئ بنفس راضية
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
صعد ياسر ودنيا الي منزلهم ودخلت دنيا فورا الي غرفتها وابدلت ثيابها وذهبت الي المطبخ وقامت بصنع فنجان من القهوة لها وخرجت الي الفراندة وجلست بها رغم برودة الجو فهي كانت تشعر انها تشتعل من داخلها اما ياسر فكان حزين لكل ماحدث ولا يعرف كيف يراضيها فهو قد جرحها اكثر من مرة منذ الأمس فذهب الي غرفته وابدل ملابسه ودخل لها وجلس بجوارها
- اول مرة تعملي حاجة تشربيها لوحدك من غير ماتقولي لي يا حبيبتي التفتت دنيا تنظر له نظرة لو تقتل لقتلته
- معلش انا عارفة انك مش بتشرب حاجة بالليل يا ياسر يعني ماعملتش حاجة عايزها من وراك
علم ياسر انها ترمي كلام على مافعله فنكس رأسه للأسفل فلولا تدخل والدته في حياته ماحدث معه ماحدث فأقترب منها
- سامحيني حبيبتي عارف اني ضايقتك باللي حصل حقك عليا ماتزعليش بقى معقولة تزعلي من حبيبك برضه
- مستكتر عليا ازعل من حبيبي اللي جرحني اللي خاف مني وحب يطمن على نفسه الأول قبل أي حاجة ولما اطمن جه واتنرفز وزعق وبالرغم من كده كبرت دماغي وقلت معلش كتر الزن لكن كنت قولي ماكنتش تخبي واهو ربنا أراد تنكشف ادامي كان ممكن نروح معمل تاني بس زي ماتقول ربنا نزل الغشاوة على عيونك علشان تنسى وتروح واعرف تفتكر لو طلع عندي عيب يا ياسر مامتك ح تسكت انت ح ترضى وتقبل
- حبيبتي قلت لك انا مش عايز عيال الا منك انتي وبس وبعدين أن شاء الله مايطلعش عندك حاجة ويطلع الموضوع كله شوية وقت وبس
- ياريت يا ياسر ياريت يالا الحمد لله علي كل حال اللي يجيبه ربنا كله كويس
- طيب يالا ندخل ننام انتي عارفة عندي شغل بدري
- ادخل انت يا ياسر انا لما يجي لي نوم ح ادخل انام نظر لها ياسر
- هو انا ينفع انام بعيد عنك تفتكري عيني ح تغفل وانتي مش في حضني يالا حبيبتي بقى حبيبك تعبان قوي تنهدت دنيا بخفه ونهضت معه
- ماشي حبيبي يالا بينا فأبتسم لها ياسر وهو يقبل جبينها
- يسلم لي حبيبي ابو قلب ابيض
دخل الاثنان الي غرفتهم وهم لا يعلمون ماذا يخبئ لهم القدر
لقراءة أو تحميل رواية مودة ورحمة الفصل الثاني من هنا 👇
لقراءه وتحميل الرواية كامله هنا 👇👇
للتواصل 👇👇👇😘
يُمكنك الانضمام لقناتنا على التليجرام
تعليقات
إرسال تعليق