روايه موده ورحمه الفصل الثالث عشر بقلم موروو مصطفي 
رواية مودة ورحمة البارت الثالث عشر
روايه موده ورحمه الفصل الثالث عشر
مر أربعون يوما على وفاة رحيق واليوم كان الأربعين وقامت دنيا بترتيب الشقق كلها لإستقبال من يأتي لحضور الأربعين شقة بهاء وشقة هناء وشقتها وجعلت الاولاد كلهم ماعدا رحيق بصحبة يمني في شقة جدتها والتي تقيم بها يمني بعض الوقت فهي احيانا تبيت مع دنيا وأحيانا اخرى مع ابوها وزوجته وقامت بتشغيل آيات الذكر الحكيم وكانوا يجلسون كلهم معا حسين وبهاء وهناء ودنيا وأتى والد رحيق ووالدتها وأخواتها كما اتي والد بهاء ووالدته واخواته وبدء توافد الجيران والأهل والأقارب ومضى اليوم ودنيا بين الضيوف وبين الاولاد بالأسفل فهي لا تستطيع مفارقتهم وبعد أن انصرف الجميع وتبقى فقط الاهل سواء اهل رحيق او اهل بهاء نهضت هناء ودخلت غرفتها وخرجت تحمل في يدها الخطابات الثلاثة ونظرت لهم
- رحيق الله يرحمها ادتني الجوابات دي يوم... يوم... يوم اللي حصل ووصتني اديلكم الجوابات لو ربنا استرد وديعته والنهارده لقيت ان لازم تاخدوها دلوقتي انا ماعرفش في ايه فيهم وعلشان كده قلت الأمانة لازم توصل لكم بسرعة
خطفت والدتها الجواب وظلت تقبله وهي تبكي وبعدها فتحته وأخذت تقراءه هي وزوجها ويقف خلفهم اولادهم
امي الحبيبة ابي الحبيب اخواتي حبايبي
لو الجواب ده معاكم تعرفوا ان خلاص ربنا استرد وديعته انا مش زعلانة اني ماشية انا عشت طول عمري معاكم مبسوطة ولما اتجوزت بهاء عشت معاه أجمل أيام عمري يعني الحمد لله عشت عمري احسن من اي حد انا بحبكم قوي وعارفة انكم ح تزعلوا وتحزنوا وح تكونوا مقهورين على فراقي انا بس ح اقولكم تزعلوا شوية واحزنوا لكن بلاش الحزن يكسركم
ماما حبيبتي عارفة انك دلوقتي نفسك تاخدي ولادي علشان يعوضوكي عني لكن برجوكي يا امي اوعي تعملي كده اوعي تحرميهم من ابوهم زي ما اتحرموا مني انا عارفة ان دنيا ح ترعاهم وح تاخد بالها منهم كويس قوي ويمكن اكتر مني لو كنت لسه موجوده سيبيهم يا ماما مع ابوهم ودنيا وكل ماتحبي تشوفيهم تعالي وهما عمرهم ما ح يمانعوا حتى لو حبيتي تباتي انتي وبابا عمر ما بهاء او دنيا ح يمانعوا
انا عارفة ان دنيا ح تصمم تسمي البنت رحيق علشان يفضل اسمي موجود وانا موافقة بحبكم كلكم يا اجمل واحسن ام وأب واخوات في الدنيا ليا طلب عندكم اعتبروه رجاء عايزة دنيا تتجوز بهاء ارجوكم اقنعوهم لو بتحبوني لأن الاتنين عمرهم ما ح يوافقوا قولوا لهم دي وصيتي لو عايزني ابقى مرتاحة ومطمنه استودعكم الله حتى نلتقي بعد عمر طويل
كانوا جميعا دموعهم تهبط بغزارة وفي نفس الوقت كان بهاء يمسك خطاب رحيق وكأنه يمسك بجزء منها ودموعه تسيل على وجنتيه وبدء يفتح الخطاب ويده ترتعش ونظر الي خط زوجته وابتسم
زوجي الحبيب
بهاء انت عارف وواثق انا بحبك قد ايه عشت معاك أجمل أيام عمري عمرك ما زعلتني ولا خلتني انام وانا مضايقة من اي حاجة ايامنا كلها كانت حلوة فاكرة كل حاجة عملناها سوا وانت بتدلعني بحُبَك وحنيتك وانت بتزعل مني علشان اكل كويس وانا حامل في باهر حنيتك ورعايتك ليا وانا حامل في رحيق عارفة ان انت ح تبقى عايز تسميها دنيا زي ما كنت انا عايزة لكن دنيا ح تصمم تسميها رحيق علشان اسمي يفضل موجود وانا موافقة على رحيق علشان افضل دائما موجودة معاكم عايزة اقولك اني كنت اسعد زوجة في الدنيا انتي حسستني اني مراتك وبنتك واختك الحمدلله عشت معاك فعلا كل السعادة اللي يتمناها اي حد حبيبي خد بالك من باهر ورحيق رغم اني واثقة ان دنيا عمرها ما ح تسيبهم ولا ح تسمح لحد يعملهم اي حاجة غيرها حبيبي وحياتي عندك ليا عندك طلب ورجاء مش عايزة ولادي يعيشوا طول عمرهم محرومين من وجود ام في حياتهم لو بتحبني عايزاك تتجوز دنيا وحياتي عندك عايزاها تكون ام ولادي يا بهاء هي الوحيدة اللي ح اقدر آأمانها عليهم عارفة ان الموضوع ح يكون صعب عليك دنيا طول عمرها صديقتك واختك لكن صدقني لما ح تتجوزوا العشرة ح تخليكم تقربوا من بعض ماتفتكرش اني زعلانة بالعكس صدقني انا ح ابقى مبسوطة قوي لاني ح ابقى واثقة ان دنيا ح تشيلهم في عيونها هيبا علشان خاطري اتجوز دنيا اعتبرها وصيتي بس مع الوقت حاول تحبها وتعتبرها مراتك بجد دنيا تستحق تعيش معاك حياة مريحة وحلوة زي ما انا واثقة انها برضه ح تحاول تحبك وتعيش معاك وصدقني دنيا جميلة قوي ح توحشني قوي وبعد عمر طويل ح نتقابل في الجنة ونبقى احنا التلاته سوا
كان بهاء يقرء الجواب في نفس الوقت الذي تقرء فيها دنيا خطابها
كانت دنيا تقرء خطابها وهي تبكي بأنهيار
حبيبة قلبي يادودو
أغلى واحن اخت في الدنيا انتي عارفة وواثقة من انك تؤام روحي يا دنيا انا بحبك قوي ياغالية... دنيا ح توحشيني قوي حبيبتي ح توحشني قعدتنا وضحكنا وهزارنا ولا تخططنا اللي بنعمله ونفذه سوا دنيا هلي باهر ورحيق جوه عيونك عارفة انك ح تسمى البنت رحيق مش دنيا زي ماكنت عايزة وعارفة كمان انك مش محتاجة توصيه عليهم دودو عارفة اني غالية عندك قوي وانك بتحبيني اكتر من نفسك كمان وعلشان كده ح اطلب منك طلب عارفة وواثقة انك ح ترفضيه بس وحياتي عندك وافقي علشان خاطر رورو حبيبتك عايزاك تتجوزي بهاء اوعي ترفضي عارفة انك مش ح تقدري تتخيلي نفسك مكاني بس معلش حاولي يادنيا مش عايزة ولادي يعيشوا من غير ام وبلاش تقولي انك ح تبقى امهم من بعيد مش ح ينفع صدقيني لا انتي كبيرة ولا بهاء كبير يعني ممكن تتجوزي وتسيبيهم وحياتي عندك انا عارفة ان بهاء بالنسبة لك اخ وصديق لكن مع العشرة بينكم ومحاولتك ومحاولته ح تقدروا عايزة الاولاد يعتبروكي امهم بجد بس برضه ابقى كلميهم عني يادودو انا مش ح أمن على عيالي غير معاكي ده رجاء مني ليكي ارجوكي وافقي اعتبريها وصيتي ح توحشيني قوي مانتقابل بعد عمر طويل ان شاء الله
كانوا جميعا يبكون وهناء وحسين ينظرون لهم وهم لا يعرفون ماذا يحدث فأقترب حسين بحذر من دنيا التي كادت تزهق روحها من كثرة البكاء وفور ان وضع يده عليها ارتمت في احضانه وهي تبكي وهمست له
- بابا وديني شقتي ارجوك مش قادرة أقف ارتبك حسين وهمس لها
- مالك ياقلب بابا في ايه
- مافيش يابابا بس وديني شقتي
- حاضر حبيبتي حاضر
وفور ان اسندها حسين لتقف نظرت لها والدة رحيق وهي تبكي ووقفت واتجهت لها ونظرت لها والاثنان دموعهم تغرق وجههم وظلت تنظر لها وهي تراها تستند على صدر ابيها ففتحت لها ذراعها فأرتمت دنيا بين يديها وظلت تبكي بصوت يقطع نياط القلب وهي تهمس
- مش ح اقدر مش ح اقدر اعمل اللي بتقول عليه مش ح اقدر اكون مكانها ياريتني مت انا وهي لا ياريتني مت انا
وظلت تبكي والام تحتضنها بقوة والكل ينظر لهم ولا يستطيعون الاقتراب فقط اقترب والد رحيق من بهاء الذي كان يبكي فقط دون صوت وضمه لصدره وهمس له
- وصتك صح فهز بهاء رأسه وهو لازال يبكي وهمس
- مش ح اقدر يا بابا مش ح اقدر اشوف حد مكانها ازاي تطلب ده ازاي فهمس والدها وهو يضمه بقوه ويبكي معه
- الوصية واجبة النفاذ يابني هي طلبت ده منك ومن دنيا اللي منهارة ومني انا وامها وأخواتها
وابتعد قليلا عنه وهو يربت على كتفه واقترب من زوجته التي لازالت تحتضن دنيا والاثنان يبكون ولكن بكاء دنيا جعل الكل يبكي عليها اقترب منها والد رحيق ووضع يده على كتفها
- دنيا يابنتي عارف ان الموضوع صعب بس اقعدي ونتكلم كلنا سوا
جلست دنيا وبجوارها والدة رحيق من ناحية وحسين وهناء من الجانب الاخر واقترب والد رحيق وجلس بجوار بهاء وبجواره اخوات رحيق وهمس الاب
- بصوا ياولاد عارف ان الكلام صعب عليكم زي ما انتم اكيد عارفين انه صعب علينا احنا كمان قوي بس رحيق الله يرحمها حططنا كلنا أدام بعض وطلبت تنفيذ ده باعتباره وصية عارف انه صعب عليكي يادنيا تتخيلي نفسك مكانها زي ماهو صعب عليك يابهاء تحس ان في حد مكانها زي برضه ماهو صعب علينا حد ياخد مكان بنتنا مع العلم بحب دنيا لها وحبها لدنيا لكن الوصية واجبة النفاذ انا عندي اقتراح
نظر الجميع له في انتظار طوق نجاه
- انتم التلاتة كنتم اصدقاء طول عمركم واكتر كمان كنتم بتفهموا بعض من نظرة عيونكم لبعض كنا كلنا بنستغربكم لكن دايما كانت الست هناء تقول التلاته دول بيحبوا بعض جدا وروحهم في بعض كنا ساعات وانتم صغيرين نتريق عليكم ونقول نجوز بهاء لهم الاتنين ويبقى هارون الرشيد واهو كأن قلبنا كان حاسس المهم انا عندي أقتراح فكروا فيه رغم صعوبته دنيا انتي لسه على عدتك تقريبا اسبوعين في الوقت الحالي كلنا موجوعين على فراقها خليكم اهدوا كده وفكري يابنتي اولا لو في نيه ترجعي لجوزك يبقى وصيتها ماتنفعش لان جوزك أولى بيكي بس الي عارفة من رحيق انك استحالة ح ترجعي له انا حاسس اني ممكن اكون بلخبط في الكلام فاعذروني الموقف قوي لكن الخلاصة نفذوا وصية بنتي علشان ترتاح في تربتها لو بجد بتحبوها وعيشوا مع بعض واحده واحده ح تقربوا وكفاية ان الاولاد ح تكون وسطكم ونبقى ريحنا رحيق في نومتها وان شاء الله تقدروا تكملوا المسيرة مع بعض ده رأي
نظرت والدة رحيق لدنيا وقبلت وجنتها بحب ودموع
- لو بتحبي بنتي وافقي يادنيا بلاش تخليها مش مرتاحة انا عارفة ان علاقتك بياسر منتهية ومافيش منها امل وعارفة ان علاقتك ببهاء قوية وبتفهموا بعض كويس وباهر متعلق بيكي قوي وكمان رحيق..... ورحمة بنتي يا دنيا توافقي واحنا كلنا جانبك نظرت لها دنيا
- يا طنط انا
- ماما يا دنيا ماما يابنتي خليني احس ان بنتي لسه عايشة
- ماما ممكن تيجي تباتي معايا النهاردة انا محتاجاكي قوي
- حاضر ياحبيبتي حاضر والتفتت الي زوجها وأولادها روحوا انتم ياولاد كل واحد على بيته وانت ياحاج بات النهاردة مع بهاء انا ح ابات مع دنيا والاولاد
- حاضر ياحاجة
التفتت دنيا الي هناء وحسين ويمني ومدت يدها بالخطاب الي حسين
- بابا شوفوا الجواب وح استنى نتكلم سوا انا دلوقتي عايزة انام قوي ماما شيلي رحيق مش ح اقدر جسمي كله سايب
- هاتيها ياحبيبتي ويالا بينا يالا يا باهر معانا حبيبي
وقفت دنيا وتحركت خطوتان وفجاءة وقعت مغم عليها فوقف الجميع في ذهول وجرت يمني عليها
- دنيا دنيا حبيبتي فوقي ياقلب اختك فوقي يا دنيا ماتوجعيش قلبنا عليكي حد يجي يساعدني نشيلها تدخلها جوا
اقترب اخوات رحيق ليحملوها فوقف ابوهم ونظر لهم
- ماينفعش ياولاد ووضع يده على بهاء ودفعه للأمام شيلها يا بهاء ندخلها شقتها لا انا ولا حسين ولا أبوك نقدر نشيلها فأقترب بهاء وحملها فاسندت رأسها على صدره وهي تهمس باسم رحيق فتنهد بهاء بقوة وذهب بها إلى غرفتها وجعلته يمني يضعها على الفراش ودثرتها وذهب هو واقتربت منها والدة رحيق ونظرت ليمني
- يمني يابنتي خليكي معانا النهاردة هنا
- حاضر ياطنط انا كنت ح اعمل كده فعلا بس هي تفوق وعاد بهاء مره اخرى وهو يحمل كوب من الماء به بعض الدواء فهي عندما تقع تحت ضغط تنخفض دورتها الدموية ويجب أن تأخذ هذا الدواء لتعود لوعيها مرة أخرى وبالفعل اقترب منها وطلب من يمني ان تسندها على صدرها وبدء في جعلها تشرب الدواء بالقوة حتى شعر انها بدءت تفيق وعندها ابتعد ونظر الي حماته
- ماما انا صاحي في الشقة هناك لو احتاجت حاجة رني لي بس وانا ح اجي لكم على طول
- ماشي حبيبي
ابدلت يمني ثياب دنيا التي كانت تتحرك معها بأليه وكذلك أعطت بعض الملابس لوالدة رحيق وابدلت هي الأخرى ثيابها وثياب الأطفال وجعلتهم جميعا يخلدون للنوم وجلست هي مع دنيا ووالدة رحيق ورحيق الصغيرة التي كانت تنام علي صدر دنيا وتتشبث بيدها الصغيرة باصبع دنيا وكانت دنيا تنظر فقط لها والثلاثة في حالة صمت
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
مر علي ترك يمني أمير اكثر من شهر وبعد اخر مكالمة بينهم وهي في مطار القاهرة يهددها فيها ان تعود وهي رفضت قام بالاتصال بها مرتان فقط وهي لم ترد عليه وكان هو في ذلك الوقت بيريهان تسيطر علي عقله تماما فتجعله يعيش في عالمها سهر وخروج وشرب وتدهور حاله تماماً وغطى عليه مديره في العمل اكثر من ٣ اسابيع وبعدها أبلغه ان عليه أن يستفيق لان هناك مناقصة يجب عليهم أن يضعوا مبالغها بحذر شديد وان يكون العمل بينهم الاثنان فقط وبالفعل التزم أمير في العمل تلك الفترة و حاولت بيريهان سحبه الي دائرتها
- أمير في ايه انا زهقت بقى وعايزة اخرج داخلين على اسبوعين نظر لها أمير وتذكر كيف كان يترك يمني بالشهر دون أن يخرج معها او مع الاولاد حتى في الإجازات عندما يكون مضغوط في العمل وكان عندما يعتذر منها تقبل وجنته وهي تحتضنه
- حبيبي ولا يهمك المهم شغلك احنا موجودين ح نروح فين
عاد أمير من سرحانه على صوت بيريهان وهي تعيد عليه انها اتخنقت من الجلوس في البيت وترغب في السهر معه نظر لها
- بيري انا مش فاضي سيبيني بقى في شغلي عايز اركز المناقصة دي مهمه جدا ومش عايزة غلطة المنافسين كتير ولازم نكون مفتحين من فضلك يابيري مش كده استحمليني شوية الله يكون في عون يمني بقى كنت ممكن اسيبها بالشهر ماتخرجش نظرت له بيريهان وظهرت وجهها الحقيقي
- بقولك ايه يا أمير انا بيري حبيبي مش يمني بتاعتك دي اللي مش وراها غير البيت والعيال لا ياروحي انا المهم عندي اتفسح وأخرج وانبسط
صعق أمير مما سمع منها فهي كانت تمثل عليه انه هو أهم شئ في الحياة لديها
- بيري الشغل ده اللي بيجيب الفلوس اللي حضرتك بتبعزقيها يمين وشمال دي
- ماليش فيه ياروحي عموما براحتك خليك في شغلك انا خارجة لسهر مع اصحابي صاح بها امير
- انتي بتستهبلي تسهري مع مين متجوزه كيس جوافة حضرتك مافيش خروج ضحكت بيريهان بقوة
- لا ياروحي انت مش فاضي انا ح اخرج عايز تيجي معايا اهلا وسهلا مش عايز اشوفك لما ارجع سلام يا حبيبي
خرجت بيريهان وتركت أمير في حالة من الذهول فهذه اول مره تظهر بتلك الصورة أمامه فهي كانت دائما تتصنع الاهتمام به قبل كل شئ خاصة في وجود يمني اما بعد سفرها وعندما طاوعها في سهراتها وحفلاتها كانت تطير به وعندما أراد أن يعود لعمله مره اخرى ظهرت أمامه بتلك الصورة جلس في مكانه يتذكر يمني وأفعالها معه وكيف كانت تهتم به من الصغيرة للكبيرة ولا تدعه يحمل هم اي شئ وكيف كانت تراعي البيت والأولاد كما تراعيه هو أيضا في عمله وملابسه والاهتمام بصحته فشعر فجاءة بسوء مافعل وكيف انه يفتقدها بقوه ويفتقد اولاده كثيرا يفتقد حنانها ودفئها واهتمامها فتنهد بعمق وامسك هاتفه وقام بالاتصال بها وايضا لم ترد ولكنها جعلت حسين الصغير يتحدث اليه هو وأمل وظل يحدثوهم قرابة الساعة وهو يخبرهم كيف يفتقدهم وانه يحبهم كثيرا وعندما حاول أن يتحدث مع يمني اخبره ولده انها نائمة فعرف انها تتهرب منه فأبلغ ولده ان يخبرها سلامه وان يبلغها انه يحبها كثيرا ويفتقدها بقوة وأغلق معهم الهاتف وهو يشعر بحرب داخله ماذا يفعل فهو يعشق يمني ولكن بيريهان جعلتها يشعر باحساس اخر حتى غلبه النوم على الأريكه وبعد قرابة الساعة وصلت بيريهان الي المنزل ودخلت بخفة واقتربت منه حتى تيقنت انه نائم فدخلت سريعاً الي غرفتهم وبعد قليل انتبه أمير انه في غرفة المعيشة فتوجه لغرفة النوم ووجد الإضاءة ففتح الباب ووجد بيريهان تركع على الأرض وحقيبته مفتوحه واوراقها منثوره جميعا فصرخ بها
- انتي بتعملي ايه ارتبكت بيريهان ولكنها تماسكت سريعا
- أيه ده يا ميرو خضتني يا اخي شفت مقدرتش اسهر بره واسيبك رجعت على طول دخلت لقيتك نايم قلت اغير هدومي واحضر اكله خفيفة كده ناكلها سوا حبيبي بس وانا بشيل القيمص بتاعي شنطتك وقعت والورق وقع في الارض كنت بلمه وانت فزعتني يا وحش
كانت بيريهان تتحدث وهي تمثل الحزن منه فأقترب منها
- معلش يابيري أصل الورق ده مهم قوي اتخضيت لما لقيته واقع في الارض حقك عليا
- لا ياخويا انا زعلانه منك خالص صالحني بقى
ضحك أمير و اكمل وضع الأوراق في الحقيبة واغلقها جيدا وبعدها حمل بيريهان ووضعها على الفراش وهو ينظر لها واخذها في جولة طويلة من جولاتهم التي تشعره فيها انه خارق القوة من حركاتها وضحكاتها وما تفعله وهو معها وبعد أن انتهى استلقي على الفراش محتضنا اياها حتى ذهب في النوم وبعد قليل شعرت به يتكلم فأقتربت منه واستمعت له وهو يهمس
- وحشتيني قوي ياقلبي كلك وحشتيني يا يمني
فنظرت له بيريهان بغيظ وحقد وهمست من بين أسنانها وهي تضغط عليها بقوة
- ماشي يا امير ابقى خليها تنفعك بقى واعطته ظهرها ونامت وهي تبتسم بشر
للتواصل 👇👇👇😘
يُمكنك الانضمام لقناتنا على التليجرام
تعليقات
إرسال تعليق