روايه موده ورحمه الفصل التاني بقلم موروو مصطفي
روايه موده ورحمه البارت الثاني 🌹
روايه موده ورحمه الفصل التاني بقلم موروو مصطفي 
استيقظ ياسر صباحاً وقامت دنيا بروتينها المعتاد معه حتى انصرف الي عمله تاركاً اياها تغرق بين دموعها على ماصنعه معها وقامت بالاتصال برحيق التي فور ان رأت رقمها قامت بالرد فورا
- اهلا دودو ازيك حبيبتي عامله ايه طمنيني عليكي
- الحمد لله يا قلبي انتي عامله ايه
- سيبك مني دلوقتي صوتك مش حلو ليه يا دنيا
- ابدا يا رحيق مافيش حبيبتي
- لا في هو احنا ح نضحك على بعض
هنا انهارت مقاومة دنيا وظلت تبكي وقصت على رحيق كل ماحدث وشعرت رحيق بالغضب ورغبتها في إلقاء الشتائم على ياسر ولكنها حاولت أن لا تثيرها اكثر وحاولت تهدئتها
- معلش يا دودو هما الرجالة كده وكمان حماتك انتي عارفه طبعها اوعي تزعلي نفسك وان شاء الله كل حاجة تطلع كويسه المهم ماتقلقيش ولا تتوتري ولا تزعلي نفسك
- ح احاول يا رحيق ح احاول معلش حبيبتي ضايقتك بس انا ماليش غيرك
- اوعي تقولي كده انتي اختي يا دودو
- ربنا ما يحرمني منك يارورو
اغلقت دنيا الهاتف مع رحيق وقامت بالاتصال بمعمل التحاليل ومركز الأشعة وعلمت ان النتائج ظهرت فقامت بالاتصال بزوجها الذي رد فورا
- اهلا يا حبيبتي عامله ايه
- الحمدلله بخير كنت عايزة اقولك ان نتائج التحاليل والأشعة طلعوا وانا ح انزل اروح اجيبهم
- لا حبيبتي خليكي مرتاحة انا ح اجيبهم معايا وانا راجع من الشغل
- لا خليك علشان لما ترجع نروح للدكتور
- طيب وماله ح اجيبهم وانتي ارتاحي واجي نتغدى ونبقى ننزل في ميعاد الدكتور صمتت دنيا قليلاً ثم همست له
- ماشي خلاص اللي تشوفه حبيبي
- ماشي حبيبتي لما اجي انزل ح اكلمك
- تمام خلاص متفقين مع السلامة
- لا اله الا الله
- محمد رسول الله
كانت رانيا تستمع لتلك المكالمة دون أن يشعر بها ياسر وفوجئ بها تقترب وتهمس له
- الف سلامه عليك يا ياسر مالك فيك ايه فنظر لها بتعجب
- الله يسلمك يا رانيا تسلمي
- قولي بس تعبان مالك انا ليا معارف دكاتره
- مافيش حاجة يارانيا انا ودنيا بنعمل شيك اب عادي متشكر لسؤالك عن اذنك
انصرف ياسر وهو يتعجب من اهتمامها به بتلك الدرجة رغم تصريحه لها انه يحب زوجته في أكثر من مناسبة
اما رانيا فظلت تهمس بين نفسها
- للدرجة دي بيحبها ياااااااه لو كان الواحد اتجوز واحد حنين زيه كده كنت عشت ملكة يابختها بس ايه المشكلة ما الواحد ممكن يتجوز واحدة واتنين طيب ما يمكن لو سوقت عليه الدلال يتجوزني معاها وادوق الحب والحنان ده كله ويمكن في يوم اقدر ابقى نمره واحد يااااااااه حلم جميل ياريته يتحقق
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
مر الوقت وذهب ياسر الي معمل التحاليل واخذ التحاليل ثم مر علي مركز الأشعة واخذ الأشعة واتخذ طريق العودة إلى زوجته حتى فوجئ بهاتفه يعلن عن اتصال من والدته فتنهد وفتح الخط
- سلام عليكم
- وعليكم السلام ياحبيب امك ازيك ياضنايا عامل ايه
- الحمدلله يا امي عامله ايه وبابا عامل ايه
- احنا تمام حبيبي المهم انت اخدت الست هانم مراتك للدكتور امبارح ولا عملت ايه
- روحنا يا امي روحنا
- وقالك ايه مابتخلفش
- ياأمي.. مش كده يا امي... هو يادوب كشف وطلب حاجات عملناها ولسه ح نبقى نوديها
- طيب امتى مستني ايه شعر ياسر بالضغط من والدته فانفعل
- يا امي مش كده لما نخلص ح ابقى اقولك مش معقول كده مش كفاية ضغط بقى
- انت بتزعق فيا علشانها
- ماقصدش يا امي بس كفاية ضغط الموضوع كله يتعب الأعصاب
- ليه ياحبيبي انت صاغ سليم هي بقى لو معيوبه تشوف غيرها اه مش ح تفضل طول عمرك كده
- لا بجد مش ممكن يا امي ماما انا سايق ولازم اقفل سلمي على بابا
- استنى هنا رايح امتى للدكتور عدوا عليا اجي معاكم هنا صاح ياسر بصوت مرتفع
- لا.. مش ممكن يا امي... كده كتير قوي تيجي معانا فين مع السلامة ياماما مع السلامة
أغلق ياسر الهاتف بغضب والقى الهاتف بجواره بعنف وهو يحدث نفسه بما تفعله معه والدته ولماذا تضع دائما دنيا نصب عيناها رغم كل ماتفعله معها ظل هكذا حتى وصل إلى المنزل وحاول تهدئة حالة قبل أن يصعد للمنزل وبعد قليل صعد فوجد دنيا ترتدي دريس ذو حمالات عريضه من اللون الكحلي يصل إلى ركبتها فهي مازالت حزينة على جدتها ولكن ربتها جدتها ان زوجها يجب أن يراها دائما حسنة المظهر وترفع شعرها الطويل الي الأعلى من الجانبين وتتركه منسدلاً خلف ظهرها فكانت اشبه بالسندريلا الحزينة وعندما راءها ياسر ابتسم لها بخفه فاقتربت منه
- حمدلله على السلامة حبيبي
- الله يسلمك ياقلبي عامله ايه امممممم ايه الروايح الحلوه دي ياحبي
- عجبك يالا عقبال ماتغير هدومك تكون السفرة جهزت المهم جبت التحاليل والأشعة
- اه حبيبتي في العربية تحت
- ماشي يالا ادخل غير هدومك وتعال
وبالفعل ذهب ياسر الي غرفتهم وقام بتغيير ملابسة وخرج مره اخرى وجلسوا سويا كي يتناولوا الطعام ولكن هيهات فكلاً منهما في ملكوته دنيا تفكر في نتيجة التحاليل والأشعة وياسر يفكر في والدته وكلامها له حتى انتهوا ومر الوقت وجاء موعد ذهابهم الي الطبيب فارتدوا ملابسهم وغادروا المنزل متجهين الي الطبيب وجلسوا في انتظار دورهم وشعر ياسر بارتجاف دنيا فأقترب ممسكاً بيدها وهمس لها
- ماتقلقيش حبيبتي ان شاء الله خير
- ان شاء الله ربنا كريم
وبعد قليل استمعوا الي الممرضة تنادي على اسم دنيا فقاموا معا ودخلوا الي الطبيب الذي امسك الأشعة ونظر بها ثم تركها وامسك التحاليل وظل يحدق بها قليلاً ثم أغلق الملف ونظر لهم وهو يرسم ابتسامة خفيفة فشعر بتوتر دنيا
- أيه يامدام دنيا مافيش داعي للقلق ده كله الحمدلله احنا معندناش حاجة قهرية تمنع الخلف كل الموضوع شوية أدوية ح نمشي عليها وان شاء الله خير المهم تلتزمي بالدواء في مواعيده وبلاش توتر او نرفزه كل ده بيأثر على الحالة وبيأخر نتيجة العلاج نظر له ياسر
- انا مش فاهم يادكتور يعني نتيجة الدواء ح تظهر بعد قد ايه شهر شهرين ست شهور افهم التفت له الطبيب
- يا استاذ ياسر الموضوع ده صعب تحديده في ناس مع الأدوية بتحمل بعد شهرين تلاته وفي ناس بعد سنة وفي بعد اكتر كل واحده على حسب استجابة جسمها للعلاج بس زي ماقلت لكم التوتر والتفكير الكتير بيأخر كل حاجة
وقفت دنيا بحزن
- ميرسي يادكتور متشكرة قوي لتعبك عن اذنك
- مدام دنيا كل شهرين عايزك تعملي لي زيارة بعد اذنك
- ان شاء الله يادكتور عن اذن حضرتك
- مع الف سلامة
خرج ياسر ودنيا والصمت يحاوطهم وركبوا السيارة والوضع كما هو وذلك ساهم في وجع دنيا اكثر واكثر فهو لم يشعر بألمها ولم يحتويها هي فقط كانت ترغب به يشعرها بالأمان فتساقطت دموعها في صمت اما ياسر فكان في حالة من الصدمة لا يعرف ماذا يفعل ولم يشعر بدموعها التي تغرق وجهها حتى وصلوا البيت فصعدت سريعا للأعلى ولم تنتظره كعادتها
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
ظلت الهام تدور حول نفسها منذ أغلق ياسر الهاتف معها بتلك الحالة حتى وجدت زوجها يدخل من الباب فاقتربت منه
- بقولك ايه استناني خمس دقائق ح اغير هدومي وتنزل توديني عند ابنك
- لا اله الا الله وده من ايه يا الهام
- لازم اعرف ح يروحوا امتى للدكتور ولازم اروح معاها مش يمكن تضحك عليه هنا انفعل حسين عليها
- بقولك ايه انا الكلام ده مش عجبني لمى نفسك عن ابنك وخليكي في حالك يا الهام بلاش وجع دماغ
- ماشي ياحسين بس انا عايزة اروح اشوف ابني ايه ح تمنع دي كمان
- ماشي يا الهام على ماتلبسي ح اكلمه اقوله
- لا تكلمه ليه هو احنا محتاجين اذن علشان نزوره عجايب
- اه يا الهام محتاجين اذن اه مش يمكن مش موجودين مش يمكن معندهمش استعداد يقابلوا ضيوف
- هو احنا ضيوف احنا صحاب بيت ضحك حسين بسخرية
- صحاب بيت ماشي روحي وانا ح اكلمه الأول
فزفرت بغضب ونظرت له
- خلاص كلمه بدل ما البس ويطلع البيه مش فاضي يقابلنا
قام حسين بالاتصال على ولده وكان لازال بالأسفل فقام بالرد سريعا عليه
- سلام عليكم يابابا
- وعليكم السلام حبيبي عامل ايه ياحبيبي
- الحمدلله يابابا الحمدلله شعر والده بصوته ولكنه تغاضي حتى لا يثير زوجته
- طيب ياحبيبي انتم فاضيين نجيلكم زيارة انا وولدتك
- بابا ارجوك الوضع مش حلو ماتقلش لماما حاجة اتحجج اننا خارجين الوضع مش مستحمل كلام ماما
- ماشي حبيبي خلاص ولا يهمك تتعوض بإذن الله يالا روح علشان تلحقوا وقتكم سلام عليكم
أغلق حسين الهاتف مع ياسر و التفت فوجد زوجته تنظر له شذرا
- وراه ايه البيه؟ مشوار ايه اللي رايحينه
- رايحين فرح واحد صحبه في حاجة محتاج ياخد اذنك مثلا
- ماشي ياحسين لما نشوف اخرتها مع المحروس ابنك
- عارفة يا الهام انا عايز اقولك حاجة احزري ثم احزري ثم احزري انك تكوني سبب في خراب بيت ابنك لانه ح يجي على دماغك ماشي اتفضلي روحي اعملي لي كوباية شاي
انصرفت الهام وهي تزداد حنقاً على دنيا فمنذ تزوجت ولدها وزوجها يدافع عنها دائما والان يهددها أيضا دفاعا عنها ولكن لنري من سيربح بالنهاية
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
صعد ياسر الي المنزل فوجد زوجته تجلس على كرسي الصالون فاقترب منها وعندما حاول امساك يدها رفعت نظرها له فرائ الدموع تغرق وجهها فحاول احتضانها ولكنها لأول مره منذ زواجهم ترفض اقترابه منها بتلك الطريقة ونظرت له بحزن فهمس
- أيه يا دنيا اول مرة حبيبتي تبعديني عنك كده
- حبيبتك انت واثق اني حبيبتك يا ياسر
- دنيا ليه بتقولي كده بس حبيبتي انا اتكلمت ولا قلت حاجة ضايقتك
- ماهو للأسف انت معملتش حاجة ياياسر
- للأسف يعني ايه انا مش فاهم
- انت سبتني في وقت انا كنت في أشد الحاجة انك تتطمني اني احس انك جانبي انك بتساندني لكن انت مافتحتش بقك بكلمة
- سامحيني حبيبتي انا بس كنت مرتبك دنيا انتي عارفة انا بحبك قد ايه ومقدرش استغني عنك ياقلبي سيبك من اي حاجة وخلي بالك الدكتور قالك بلاش نرفزه ولا توتر وان شاء ربك كريم والعلاج يجيب نتيجة على طول ومانتاخرش
- ولو اتأخر يا ياسر
- حبيبتي ممكن تهدي وتنسى الموضوع ده خالص
- يا ياسر ولو انا نسيت مامتك ح تعمل ايه ح تسكت ح تسيبني في حالي هي من غير حاجة مش مستحملاني
- مايهمكيش انا ح اتصرف معاها ممكن بقى ماتقلقيش من حاجة انا مش عايزك ولا تفكري ولا تتضايقي ولا تقلقي واقترب ياسر منها واحتضنها بحب واخذ يقبل وجهها وهو بعتذر عما فعله حتي ذابت بين يديه فحملها ودخل الي مملكتهم وذهبوا الي عالمهم الخاص بهم وبعد فترة طويلة من الوقت ذهب الاثنان في النوم
استيقظ ياسر في الصباح على لمسات زوجته الحانية كعادتها يوميا في ايقاظة فابتسم لها ونهض من الفراش محتضناً ومقبلاً اياها وبعد أن انتهى من حمامه وارتداء ملابسة خرج من غرفتهم ووجدها تضع الإفطار في تلك الفراندة المليئة بالزهور وجلسوا يأكلون معا وهم يشعرون بالسعادة وبعدها اتصرف ياسر الي عمله ونهضت دنيا لعملها اليومي وهي سعيدة ان الهدوء عاد لهم من جديد ولكن هل سيدوم ذلك الهدوء ام انه الهدوء الذي يسبق العاصفة
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
تجلس رحيق على الفراش وهي تشعر بآلام شديدة محاولة الا توقظ زوجها بهاء ولكنه شعر بها فنهض سريعا متوترا
- مالك يا رورو في ايه حبيبتي
- اسفة حبيبي صحيتك بس الألم جامد قوي مش قادرة يابهاء وأخذت تبكي
فقام بهاء سريعا وخرج منادياً جارتهم هناء تلك السيدة الجميلة التي تربوا في احضانها وعادت معه سريعاً وعندما شاهدت رحيق نظرت لـ بهاء
- بهاء يالا حبيبي دي ولاده يالا البس وانا ح احط عليها العباية أسهل واجيب عبايتي واجي بسرعة دي ولادة حبيبي يالا وانتي اجمدي كده ياماما كلها حاجة بسيطة وابنك ينور الدنيا
- ياري ياطنط يارب ادعيلي حبيبتي انا تعبانة قوي
- ان شاء الله ساعة هينه حبيبتي
انصرفت هناء سريعاً لشقتها ارتدت ملابسها وعادت لهم وحملت حقيبة المشفى واسندتها مع بهاء وهبطوا ذاهبين الي المشفى وبالفعل أبلغهم الطبيب انها حالة ولادة واخذها الي غرفة العمليات وقام بهاء بالاتصال بـ والدته ووالده وكذلك والدة ووالد رحيق وحضر الجميع وبعد فترة خرجت رحيق الي غرفتها وكان الكل حولها في منتهى السعادة ونظرت لزوجها الذي اقترب منها مقبلاً يدها ورأسها
- حمدلله على السلامة حبيبتي عاملة ايه حبيبتي
- الحمدلله حبيبي حاسة كأن قطر مشي فوقي رايح جاي
ضحك الجميع على تعبيرها واحتضنها زوجها بقوة وهو يضحك
- قطر رايح جاي ده انتي كده بقيتي هريسة ناكلك بقى ياحلوة
ظل يضحكون معا وهي تحتضن ابنها ويحتضنهم معاً بهاء حتى تكلمت هناء وهي تنظر لهم
- ها ياولاد قررتم اسموا ايه نظر بهاء لرحيق وابتسم
- احنا متفقين يا طنط لو ولد رحيق تسميه ولو بنت انا اسميها ها يا رورو ح تسمي حبيب بابا ايه
- باهر علشان يبقى باهر بهاء ويبقى اسمه قريب من اسمك
- ربنا مايحرمني منك ياحبي
مضى اليوم وعادت رحيق لبيتها مع زوجها وقامت بالاتصال بدنيا حتى تبلغها وسعدت لها دنيا كثيرا كما عزمتها رحيق على سبوع باهر واكدت عليها الحضور ووعدتها دنيا بالحضور واغلقت معها الخط دون أن تقص عليها ما هي فيها فلم ترد ان تضيع فرحتها
اما بهاء فقد كان سعيدا بولده وكان يجلس وهو ينظر له بسعادة وينظر لزوجته
- انا مبسوط قوي يا رورو اخيرا بقى عندنا طفل انا مبسوط علشانك علشان تكوني فرحانة زي ما انا شايف في عيونك
- الحمدلله حبيبي انا كمان مبسوطة قوي علشان بقى عندي ابن منك حبيبي ربنا يحفظه لنا يارب
- يارب حبيبتي يحفظه ويبارك فيه يالا ح اسيبك انا بقى علشان انزل اجيب للباشا حاجة السبوع وارجع على طول عايزة حاجة من بره
- لا حبيبي مانحرمش منك
خرج بهاء وتركها في رعاية هناء التي كانت تحاوطها بالرعاية اكثر من امها فهي حرمت من الإنجاب وتعاملت معها ومع بهاء ودنيا كاولادها فالثلاثة تربوا معا وهي الآن وحيدة بعد أن توفي زوجها بعد رحلة عشق بينهم دامت اكثر من عشرون عاما لم يستطع احد ان يؤثر على زوجها حتى يتركها او يتزوج عليها لأنها لا تنجب
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
يجلس ياسر في العمل وهو يشعر ان رأسه ستنفجر ماذا يفعل ماذا يقول لوالدته فهي لن تصمت وسوف تفعل ما بوسعها حتى تعلم ماحدث فقرر الاتصال بوالده واستشارته وبالفعل قام بالاتصال به والذي رد فور ان وجد اتصال من ولده
- سلام عليكم يا ياسر طمني يابني عليكم ماعرفتش اتكلم امبارح من مامتك
- وعليكم السلام ورحمه الله وبركاته يا بابا ما انا اتصلت علشان احكي لك واخد رايك اعمل ايه وقص على والده كل ما أبلغهم الطبيب
- لا حول ولا قوة الا بالله العلي العظيم ودنيا عاملة ايه
- كانت تعبانة امبارح طبعا بس النهاردة احسن انا اتكلمت معاها وعرفتها اني ماقدرش استغني عنها بس المشكلة في ماما يابابا
- بص يابني امك مش ح تسكت الا اما تعرف واقصر الطرق الصراحة تعال النهاردة بعد الشغل واحكي كانك بتحكي لأول مره ولو فتحت بوقها هددها انها لو عملت حاجة كده ولا كده مش ح تيجي عندنا تاني لازم تلوي دراعها يابني علشان تحافظ على بيتك ومراتك يا ياسر
- حاضر يابابا انا ح امشي بدري شوية علشان مش عايز دنيا تعرف
- عين العقل يابني
انصرف ياسر من العمل قبل موعده بساعة وقام بالذهاب الي بيت والده وكان حسين والهام يجلسون في غرفة المعيشة وفور ان شاهدت ابنها
- اهلا ياحبيبي ازيك طمني عملت ايه وديتها للدكتور قالك ايه انت ساكت كده ليه كان ياسر ينظر لها بذهول وفجاءة اقترب منها
- نفسي اعرف انتي حطه دنيا فوق دماغك ليه بتعامليها كده ليه وهي عمرها ما اتاخرت عنك في اي حاجة لما بنيجي عندك بتشغليها ولا الخدامة ولا عمرها اشتكت ولا وقفت ادامك بتسمعيها كلام ولا بتنطق ماتفتكريش انها حكت لي بالعكس انا اللي عرفت وبسببك كنتي بتكلميني ونسيتي تقفلي الخط وسمعت معاملتك وردها عليكي ليه نفسي افهم بتعملي كده ليه فهميني
شعرت الهام بالارتباك قليلاً ثم تماسكت وصاحت به
- انت بتكلمني انا كده علشانها انت نسيت اني امك وانك المفروض تسمع كلامي وبعدين تحمد ربنا انك راضي بيها وهي لا ليها اهل ولا وقبل ان تكمل صاح بها حسين
- الهاااااااااام نسيتي نفسك ولا ايه صعقت الهام من صريخ حسين بها وشعرت انها تمادت
- انا مش قصدي حاجة زلت لسان ياحسين نظر لها ابنها بسخرية
- بصي يا ماما اسمعي مني وماتقاطعنيش احنا فعلا روحنا للدكتور ودنيا عندها شوية مشاكل وشعر انها ستقاطعه فتحدث بصوت عالي انا قلت لحضرتك ماتقاطعنيش تمام المهم انها بتاخد علاج وح ياخد شوية وقت كل واحدة وعلى حسب استجابة جسمها يعني شهر اتنين سنه اكتر اقل الله اعلم والمهم وقبل العلاج حالتها النفسية يا امي انا قلت لك اهه وياريت بقى لما تيجي لك ماتكلميش معاها في اي حاجة لاني بجد ساعتها ح اخدها وح نمشي ومش ح تشوفيني تاني يا امي
- انت بتهددني علشانها يعني مش كفاية انها معيوبة صاح بها ياسر
- كفاية بقى كفاية تفتكري لو كان طلع فيا العيب كانت هي ح تعمل ايه وانتي ح تعملي ايه
- بص يابني انا ماليش فيه انا عايزة اشوف ولادك ماأجرمتش خلاص خليها على ذمتك واتجوز واحده تانيه
- حرام عليكي انتي عايزة تدمريها عارفة انا غلطان اني جيت وحكيت لك انا ماشي يا امي ولما ابقى اخلف ح ابقى اجي لك
- كده يا ياسر كده يابني انا نفسي افرح بولادك ياحبيبي
- يعني انا وهي اللي مش عايزين يا امي
- ماشي يابني ح اسكت ومش ح اتكلم لما نشوف ح يحصل ايه ح تحمل ولا ح تبقي زي الأرض البور وقف ياسر ونظر لوالده
- انا ماشي يا بابا عن اذنك
واندفع خارجا من البيت مغلقاً خلفه الباب بعنف ونظر حسين لزوجته بغضب
- التحذير ده لتاني مره يا الهام فاهمة حذاري تخربي بيت ابنك وصدقيني ساعتها محدش ح يندم ادك
تركها وانصرف وظلت مكانها ترغي وتزبد وهي بداخلها تفكر ماذا تفعل مع تلك الفتاة التي يحبها الجميع عداها
لقراءة أو تحميل رواية مودة ورحمة الفصل الثالث من هنا
الفصل الثالث
لقراءه وتحميل الرواية كامله هنا 👇👇
للتواصل 👇👇👇😘
يُمكنك الانضمام لقناتنا على التليجرام
تعليقات
إرسال تعليق