روايه موده ورحمه الفصل الرابع والعشرين بقلم موروو مصطفي
رواية مودة ورحمة البارت الرابع والعشرين
روايه موده ورحمه الفصل الرابع والعشرين
صعد بهاء مع دنيا للأعلى وساعدها في ابدال ملابسها وابلغها انهم في المساء سيذهبون الي الطبيبة حتى تراها ويطمئنوا على حالتها وبعدها سيذهبون الي امه حتى يضع النقط على الحروف بالنسبة لمنار ووافقته دنيا كما طلبت منه الذهاب أيضا لرضا وفي المساء عندما يعودون يبلغون باهر
هبط الاثنان للأسفل وكان الكل مجتمع بعد حضور أمير ومباركته لهم وتناولوا الطعام وجلسوا جميعا سويا وبدء الكلام بهاء
- دلوقتي كلنا متجمعين لكذا حاجة اولا حمل دنيا ثانيا جواز ياسر من حلا ثالثا بقى وده الأهم واللي فعلا مجمعكم علشانه هو اني عايز حضرتك يابابا لو ترضى يعني تضم شركتك لشركتنا انا ودنيا ونبقى كلنا بنشتغل مع بعض
نظر حسين لبهاء
- ايوة يا بهاء يابني ايش جاب لجاب شركتكم شركة كبيرة إنما أنا ده لا هو مكتب ولا هو شركة ده حاجة صغيرة كده يادوب نبني عمارة نبني مخزن كده يعني
- تمام يابابا حضرتك عندك عمال ومعدات وانا داخل في ٣ مشاريع كبار ومحتاج حد معايا يسندني محتاج حضرتك تتابع معايا العمال بحكم شغلك محتاج أمير في الحسابات حد ثقة ابقى مطمن له محتاج ياسر يكون مع يسري في الشغل الهندسي محتاج نكبر شركتنا ونكون كلنا سوا ح نكون كلنا شركاء بنسب
نظر ياسر له وابتسم
- معلش سامحوني انا موظف معاكم ح اشيل معاكم الشيله برقبتي إنما شركاء دي للأسف مش ح ينفع رد بهاء
- يا ياسر انت ح تكون شريك بمجهودك الكبير اللي بتعمله انت مهندس كفء اه بس محدش بيعمل اللي بتعمله يبقى اكيد لك نسبة بمجهودك وبعدين بابا ليه نسبته بحصة شركته وامير كمان ارجوكم فكروا ووافقوا انا محتاجكم معايا خاصة اني ح احتاج في فترة ابقى مع دنيا ولازم ابقى مطمن ان الشغل في ايد امينه يسري اه اخ وجدع وصاحب صاحبه بس مجهود كبير عليه جدا فكروا بس انا واثق انكم في الاخر ح توافقوا
فضحك الجميع وظلوا يتحدثون سويا حتى اتي موعد الطبيبة فوقف بهاء ومعه دنيا واستئذنوا للانصراف
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
ذهب بهاء ودنيا الي الطبيبة التي أخبرتهم بحمل دنيا في ثلاث شهور وان حملها يسمى حمل غزلاني فهي لم تنقطع دورتها الا في الشهر الرابع كما انها حامل في تؤام واعطتها مجموعة فيتامينات وقامت بعمل بعض التحاليل والاشعه لها وطمئنتهم عليها
خرج الاثنان من عند الطبيبة وهم يشعرون بسعادة طاغيه كان بهاء يحتضن دنيا بحنان وحب فنظرت له بحب
- فرحان بجد يا بهاء
- معقوله بتسالي يا دنيا يااااااااااه انا طاير من الفرحة
- مش قصدي حبيبي بس يعني دي مش اول مره ليك
- عارف حبيبتي عارف بس ده منك يا دنيتي ومش طفل واحد اتنين ياعمري لما نروح ح نتكلم كتير قوي حبيبتي دلوقتي ح نطلع على ماما علشان اخلص من موضوع منار ده نظرت له دنيا بحزن
- انا ماتصورتش انها تروح تفهم مامتك اني غيرانه منها وشرط عليك ياتمشيها يا امشي انا ونفض الشراكة مش قادرة أصدق ان طنط بهيرة تصدق ده
- دنيا مش عايزك تزعلي من ماما وانا اوعدك الحقيقة تظهر وح اخد حقك من الحيوانه دي
- انا مقدرش ازعل منها يابهاء انا صعبان عليا منها بس
- معلش حبيبتي انتي عارفه انها طيبه وبيصعب عليها أي حد
- ماشي حبيبي
وصل بهاء ودنيا الي والدته بهيرة وسعد وكانت منار موجوده أيضا ودخلوا ونظر بهاء لمنار نظرة تكاد تحرقها فأرتبكت قليلاً و لكن حاولت التماسك لتظهر لخالتها صدقها
- ازيك ياأمي عاملة ايه
- الحمدلله حبيبي
- ازيك يابابا صحتك أخبارها ايه دلوقتي
- والله تمام يابني بخير انت عامل ايه ودوندن اخبارك ايه يابنتي نظرت له دنيا بحنان
- الحمدلله يابابا بخير
اغتاظت منار من إهمال بهاء لها فنظرت له
- أيه يابهاء مافيش ازيك يامنار
نظر لها بهاء بغيظ ووقف أمامها وعلامات الغضب تظهر على وجهه
- انتي كمان ليكي عين تكلمي انا ماشفتش في بجاحتك ياشيخه
وقفت امه أمامه ونظرت له بحزن
- يعني مش كفاية اللي حصل في الشغل جي تكمل عليها هنا ايه يا دنيا انتي خايفة منها قوي كده ماتخافيش ما هو بهاء عمره ما ح يسيبك علشان خاطر رحيق ولا نسيتي
صعق بهاء ودنيا من رد بهيرة ونظر لها زوجها بغضب وشعرت هي بما فعلت فجاءت لتتحدث ولكن اوقفها بهاء بيده واوقف دنيا مقبلا رأسها ومحتضنا اياها ثم اخرج هاتفه وقام بتشغيل التسجيل الذي أرسله له يسري ونظر لأمه
- قبل ماتكلمي كلمة كمان يا امي اسمعي
وقام بتشغيل التسجيل فظهر صوت منار واضحا وهي تحدث مدير البنك ونظر لمنار باحتقار
- طول عمري بقول عليكي بت مخك ضارب لكن توصل انك تخسريني شغل وكمان تتبلي على مراتي انها اللي اتكلمت وياريت سكتي على كده رايحه تقولي لامي كلام ماحصلش لا والأمر بقى ان امي تصدق وتجرح في مراتي عارفه يا امي انتي عملتي ايه انتي كسرتيني وجرحتيني وجرحتي مراتي يمكن كلامك صح في حاجة ان رحيق هي اللي جمعت بيني وبين دنيا بس دنيا دلوقتي حبيبتي مراتي ام أولادي دنيا سيد من يتمناها إنما بقى الرك على الهانم اللي جانبك اناجيت اعرفك الحقيقة بعد ماوجعتيني في التليفون بس انتى وجعتي بزيادة ونظر لدنيا يالا حبيبتي بينا
وجاء ليتحرك ولكن وقف والده واتجه الي منار وامسك يدها بقسوة حتى انها صرخت وجاءت بهيرة لتتكلم نظر لها سعد بغضب
- كلمك واحدة منك وح تشوفي مني رد عمرك ما ح تتخيليه وعاد بنظره الي منار حالا تفهميني عملتي كده ليه والا قسما بالله ح اكلم ابوكي حالاَ واحكيله كل ده وهو يشوف حل معاكي ارتبكت منار ونظرت لسعد
- لا ارجوك يا عمو بلاش بابا
- انطقي يابت قلتي اللي قلتيه لخالتك ليه انا معنديش صبر وصاح بصوت عالي بهاء اطلب لي ابوها
فبكت منار وحاولت التحرك من يد سعد ولكنه كان يقبض عليها بقوه
- خلاص ياعمي خلاص بلاش بابا ارجوك ح يرجعني ويجوزني ابن صاحبه
- يبقى تنطقي وحالا
نظرت منار لدنيا بحقد وغل وصرخت بها
- فيها ايه احسن مني فيها ايه ان كانت هي ولا الزفتة التانية اللي ماتت انا قلت خلاص راحت اسيبه شوية وقت واجي اكون جانبه واخد بالي منه ح يحس بيا انا طول عمري بحبك يابهاء بس انت أعمى القلب عمرك مابصيت لي انا اللي كنت أولى اكون مراتك مش دي انا وقبل ان تكمل كان هناك صفعه تتلقاها من خالتها
- يعني كل اللي قلتيه كدب اتبليتي على دنيا وخلتيني زي الهبلة ماشية وراكي يابنت اختي طيب تلاته بالله العظيم ما انتي بايته هنا النهارده وح تسافري النهاردة وتغوري من هنا ومن دلوقتي انسي ان ليكي خالة فاهمة مش عايزة اشوف وشك تاني
نظرت لها منار بذهول وبعدها التفتت لدنيا وهي تصرخ بها
- كله منك كله منك ربنا ياخدك زي ماخدها
عندما استمع بهاء لذلك اقترب منها بغضب ولكن وقفت أمامه دنيا وهمست
- حبيبي علشان خاطري سيبها كفاية اللي حصل المهم الحقيقة اتعرفت
جن جنون منار وجرت على بهاء تتمسك به
- بهاء انا بحبك يابهاء بحبك قوي عجبك فيها ايه دي شوف انا احلى وجسمي احلي التفتت دنيا لها وهي تدفعها بعيدا عن زوجها
- يمكن تكوني احلي وجسمك احلى بس قلبك اسود ودماغك سم تفتكري في حد ممكن يامن لنفسه معاكي عارفة انتي ضيعتي علي الشركة تعاقد بكام عارفة ضيعتي منا ايه لكن كل ده مش مهم المهم قلبك الأسود اللي وقع بين ابن وأمه والتفتت تنظر لبهيرة بحزن انا مش زعلانة من حضرتك انا صعبان عليا منك يا امي حضرتك بتقولي بهاء مش ح يسبني علشان خاطر رحيق بس... طيب وماله يا امي مش ح ازعل لو كده لكن للأسف حضرتك كنتي شايفه حب بهاء ليا زي ماشايفه حبي ليه ورغم كده جرحتي ووجعتي قوي وادى الحقيقة ظهرت كمان والتفتت تنظر لبهاء يالا يابهاء لو سمحت عايزة اروح
اقتربت بهيرة منهم واحتضنت دنيا وهي تبكي
- حقك عليا حبيبتي متزعليش مني يادنيا البت دي لعبت في دماغي خلاص يادودو معقولة تزعلي من بهورتك يابت
ابتسمت دنيا واحتضنتها بقوة مقبلة راسها
- هو حد يزعل من بهورته برضه ونظرت لبهاء فاقترب محتضنا اياها هي وأمه ونظر لامه
- خلاص ياماما وبعدين سيبي حبيبتي بقى كفاية عليكي كده يا شابه روحي لجوزك اللي قرب يطلع دخان وصالحيه
نظرت بهيرة لسعد وشعرت بغضبه منها فالتفتت الي منار التي كانت مازالت تقف مكانها بغضب وصرخت بها
- امشي حضري هدومك النهاردة ح تسافري لابوكي وكرامه لاختي اللي للأسف معرفتش تربى بت زيك مش ح اتكلم بس حسك عينك تقربي منا تاني وصرخت فاهمة غوررررررررري مش قاعدة فيها النهاردة
جرت منار من أمامها واتجهت هي لسعد واقتربت منه ومالت على كتفه تقبله
- حقك عليا يا ابو بهاء ماتزعلش علشان خاطري غلط وانت متعود تسامحني
- غلطك كان جامد يابهيرة ومش فيا في مرات ابنك اللي شايله ابنك وولاده على رأسها
اقتربت دنيا وهي تضع رأسها في صدر بهاء ونظرت لهم وابتسمت وهمس بهاء قبلها
- مش بس كده ياحاج وشايلة ولادي جواها كمان دنيا حامل في تؤام
التفتت بهيرة تنظر لها وعيون تدمع وقامت بإطلاق الزغاريط ابتهاجاً بالخبر وهي تحتضن دنيا وتقبلها وتعتذر لها وتقبل بهاء وتحتضنه ودموعها تتساقط
- الف مبروك ياولادي الف مبروك ربنا يقومك بالسلامة يابنتي يارب
- يارب يا ماما دعواتك بقى
- ح ادعيلك في كل صلاة ياقلب امك سامحيني يابنتي انا اسفة حقك عليا وضعت دنيا يدها أمام فم بهيرة
- مافيش ام بتعتذر من بنتها يا امي وحضرتك امي يعني مش ممكن ازعل منك ابدا
استأذن بهاء في الانصراف هو ودنيا حتى لا يروا منار مره اخرى وانصرفوا ذاهبين الي رضا
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
يجلس أمير مع يمني وحسين ومعهم هناء وياسر يتحدثون فيما قاله بهاء لهم واخذوا يتناقشون جميعا حتى نظر لهم حسين
- بصوا بقى انا موافق وكده كده الشركة دي في يوم ح تبقي بتاعة ياسر ويمني خلاص ندخل بيها بنصيب ياسر لياسر ونصيب يمني لأمير وانا معاكم ونبقى كلنا ايد واحدة نقف جنب بعض وفي ضهر بعض عاهدوني من دلوقتي انت وهو محدش يغدر ولا يهرب ويسيب المركب لو حصل حاجة لازم تقفوا كلكم مع بهاء كلكم في ضهر بعض وايدكم في ايد بعض عايز ولادكم كلكم يكونوا سوا فاهمين ولادك يا أمير وابنك يا ياسر وولاد بهاء كلهم يكونوا تربيه واحدة يكبروا شايفين انكم ايد واحدة والأهم تاخدوا بالكم من هناء لو جرالي حاجة دي امانتي عندك انت وهو وبهاء كمان قلتم ايه وقبل ان يتحدث احد ضمت هناء يده بحب
- بعد الشر عنك ياحبيبي ماتقولش كده انا مقدرش اعيش من غيرك فقبل حسين رأسها
- محدش ضامن عمره حبيبتي ونظر لأولاده ها قلتم ايه
نظر أمير وياسر ويمني لبعضهم البعض وتحدثوا في نفس الوقت كلنا ح نبقى ايد واحدة والتفتت يمني الي والدها
- بابا ربنا يدي حضرتك الصحة حبيبي بس علشان تكون مرتاح ماما هناء في عيونا يا بابا وبعدها استأذن ياسر في الانصراف وحمل ابنه واخذ سيارة والده وانصرف عائدا لأمه وصل إلى منزله وانام ابنه في فراشه بعد أن ابدل ثيابه واطمئن على والدته وجلس يتحدث مع حلا وهو سعيد بموافقتها على زواجهم واخبرها كل ما قاله لدنيا واتفقوا على موعد حتى تأتي مع يمني لترى والدته والشقة التي ستسكن بها و بعد ان أغلق معها ظل يفكر ماذا سيفعل مع أمه فهو لن يعيد تجربة دنيا مره اخرى فتوصل لقرار ان يتحدث مع ابيه ويعيد والدته الي شقتها مره اخرى خاصة انها مغلقه منذ طلاقها وهو سيتابعها كل يوم هو ويمني وسعد لما توصل اليه
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
ذهبت دنيا وبهاء الي رضا ومحمد وفور ان رأتهم رضا ظلت تحتضن دنيا وتقبلها هي وبهاء
- عاملين ايه يا ولادي طمنوني عليكم معرفتش اجي النهاردة الحضانة كنت حاسة اني مكسلة اقوم ضحكت دنيا ونظرت لها بحب
- مكسلة تقومي برضه يا ماما ولا سي بابا مرحش الشغل فقعدتي معاه
ضربتها رضا بخفه على رأسها وهي تضحك
- بس يابت يالمضه انتي على طول كده كشفاني يامجرمة تعالي معايا يالا نعمل عصير
ذهب الاثنان معا وجلس بهاء مع محمد يتحدثون سوياً وابلغه بهاء بحمل دنيا ففرح لهم رغم حزنه على ابنته ونظر لبهاء
- مبروك يا ابني الف مبروك يتربوا في عزك حبيبي وفي حضن امهم يارب شعر بهاء به انه خائف على رضا فابتسم له
- عارف ان حضرتك قلقان على ماما ماتقلقش انا مطمن مش عارف ليه بس حاسس انها ح تتقبل الموضوع كويس
- ربنا يستر يا بهاء بقى لها كام يوم مبسوطة علشان بتحلم برحيق مبسوطة وفرحانه
عادت دنيا وهي تحمل صينية العصير وخلفها رضا وجلسوا سويا وكان بهاء و دنيا لا يعرفون كيف يبداءون الكلام فحاول محمد مساعدتهم فنظر لرضا
- رضا حبيبتي دنيا وبهاء عندهم حاجة عايزين يقولولك عليها بس بالله عليكي مش عايزك تنفعلي متفقين
نظرت لهم رضا بقلق ووضعت يدها على ساق دنيا بحنان
- قولي يابنتي في ايه مالكم شكلكم مش متخانق الحمدلله في حد من الأولاد تعبان ردت دنيا سريعا
- لا ياماما الحمدلله كلهم كويسين
- طيب امال في ايه
نظر بهاء ودنيا لبعضهم البعض ثم اقترب بهاء من رضا وجلس جوارها وامسك يدها وهمس بهدوء
- ماما دنيا حامل
نظرت رضا لهم بذهول وهي تدور بعيناها بين بهاء ودنيا ثم وقفت مره واحدة وظلت تدور حول نفسها والكل مترقبها وبدء القلق يظهر على الجميع فوقفت دنيا واقتربت منها
- ماما لو انتي مضايقة انا مستعدة اني
وقبل ان تكمل كلامها تكلمت رضا والتي من الواضح انها لم تكن تستمع الي كلمات دنيا
- لالالا انا مش ح اعيده تاني فاهمين مش ح اعيده تاني اه انا مش ح اشوف بنتي التانية بتروح مني وأفضل ساكته واعيش التجربة دي تاني لا فاهمين لا مش ح يحصل ومش ح اسمح بيه يحصل
كان الكل يستمع لها بذهول واقتربت دنيا من رضا بحزن وهمست لها
- شايفة ايه ياماما انا ماكنتش اعرف اني حامل والله التفتت لها رضا وامسكت يدها بقوة
- انا مش ح استنى تروحي مني انتي كمان سامعه
- سامعة ياماما قوليلي اعمل ايه وانا اعمله والله
- احنا ح نروح للدكتور كل اسبوع اه وح نتابع مع دكتور قلب كمان كل أسبوع ومافيش مرواح شغل وح تيجي تقعدي معايا هنا لا مش ح ينفع هناء وحسين ح يموتوني انا ح اجي لكم كل يوم الصبح مع محمد وهو نازل وبعدين اروح بالليل المهم ماتعمليش اي مجهود وانت بطل شقاوة اليومين دول ولم نفسك
كان الكل يقف بذهول ودنيا دموعها تتساقط فنظرت لهم رضا وهمست
- هو في ايه مالكم انتم في حاجة انتي كويسة يا دنيا الدكتور طمنك كان بهاء عيونه تلمع بالدموع و دنيا تبكي
- اه ياماما الدكتورة طمنتنا الحمدلله ماما انا حامل في تؤام
- الله اكبر الله اكبر ونظرت لهم وابتسمت حاسة انكم مستغربين رد فعلي نظر لها بهاء وامسك يدها بحنان
- ماما انتي بجد كويسة
- ايوة حبيبي الحمدلله قلبي موجوع على بنتي وده ح يفضل طول العمر عمره ما ح يروح لكن فرحانة لبنتي التانية ولأبني عارفين اللي مصبرني اني شفت رحيق مبسوطة وفرحانة ربنا يسعدكم يا ولاد ويفرح قلبكم يارب يالا من غير مطرود تتفضلوا تروحوا من هنا على السرير ترتاحي وماتقوميش من مكانك سامعه وانت حسك عينك تيجي جانبها دلوقتي فاهم وانا من النجمة ح اكون عندك
ارتمت دنيا في احضانها وهي تبكي ورضا تربت على ظهرها وتقبل رأسها بحنان فهمست دنيا
- انا دلوقتي بس فرحت بجد لما شفت فرحتك وبابا محمد ربنا مايحرمني منكم ابدا
- ولا يحرمنا منك حبيبتي يالا يا بهاء خد مراتك تروح وتطلع السلم بالراحة فاهم اه وسيبوا باهر الصبح نفهمه
- حاضر يا امي تصبحوا على خير
- وانتم من اهل الخير حبايبي
انصرف بهاء ودنيا عائدين الي بيتهم ودنيا تركب السيارة بجوار بهاء وهو يمسك يدها بقوه وكل فترة يرفعها يقبلها حتى وصلوا للبيت فوجدوا الجميع يجلس في انتظارهم بالاعلي عند هناء وابلغوهم بما قاله الطبيب و رد فعل رضا فحمدت هناء ربها ان الامر مر بسلام
أبلغ حسين بهاء باتفاقهم فوافق بهاء وتم الاتفاق ان يذهبوا جميعا سويا لإنهاء كل شئ وبعدها توجه الكل الي شقته حتى ينالوا قسط من الراحة
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
دخل بهاء ودنيا غرفتهم وفور ان أغلق الباب حمل دنيا بين يديه ودار بها وهو يقبلها وهي تضحك وتتعلق في رقبته حتى انامها على الفراش ونام بجوارها وهو ينظر لها بحب
- سألتيني فرحان صح
- ايوة حبيبي انا عارفة انك مبسوط لكن انك تبقى فرحان قوي وده مش اول بيبي يعني استغربت
- صحيح عندي باهر و رحيق وهما نور عيني لكن اللي جاين دول منك انتي دنيتي
دنيا صحيح انا حبيت رحيق قوي ولسه لها مكان في قلبي مقفول عليها فأبتسمت دنيا لكلامه واكمل لكن رحيق كانت حب الصبا زي مابيقولوا.. رحيق شغلت قلبي من صغرنا وشبابنا ورغم اننا انا وانتي كنا متفاهمين اكتر لكن قلبنا دق لبعض انا وهي وبعدها حياتنا كانت حلوة وهاديه لكن لما اتوفت الله يرحمها واتجوزنا انا وانتي وعشنا مع بعض اول فترة زي الأخوات كنت شايف علاقتنا مع بعض عامله ازاي وقد ايه بنفهم بعض من مجرد نظرة ولما قلبنا دق محدش فينا قدر يتحكم فيه دنيا أنا حبيتك قوي بجد انا فجاءة لقتيك بتتوغلي جوايا بقيت مش قادر يعدي وقت وانتي مش جانبي ولما اتجوزنا كل ده زاد قوي بقيتي بتمشي في دمي يا دنيتي
كانت دنيا تنظر له وعيونها تدمع من السعادة والفرح بزواجها من هذا الرجل
- بهاء انا كنت متخيلة اللي بيني وبين ياسر حب لكن بعد جوازنا وحتى من الاول اكتشفت ان اللي كان بيني وبينه يمكن إعجاب انبهار بشخص بيحبني لكن كل ده راح اول مابقيت على اسمك بقى ياسر مالوش وجود وبعد جوازنا وشغل ياسر معانا بقى وجوده بالنسبه لي كأنه شخص معرفتوش قبل كده... معاك عشت كل حاجة حلوة احاسيسي ومشاعري معاك مختلفة كل حاجة معاك كانت جديدة عليا انا كمان حبك اتغلغل جوايا معرفتش اقاومه انا بحبك قوي يا بهاء واحلى حاجة ان يوم ما ربنا اذن لي اكون ام كان منك
شعر بهاء بالسعادة من كلام دنيا ومشاعرها التي افاضت بها فأخذها في جولة من جولاتهم ولكن تلك المرة تختلف فقد كان هادئ للغاية وبعد انتهاءهم استلقي على الفراش وهي بين يديه والسعادة تنطق من عيونهم وذهب الاثنان في النوم
لقراءة أو تحميل رواية مودة ورحمة الفصل الخامس والعشرين من هنا 👇
للتواصل 👇👇👇😘
يُمكنك الانضمام لقناتنا على التليجرام
تعليقات
إرسال تعليق