روايه موده ورحمه البارت الخامس
روايه مودة ورحمة
روايه موده ورحمه الفصل الخامس بقلم موروو مصطفي
اخذ ياسر اسبوع اجازة من عمله فهو لا يرغب في رؤية احد حاولت معه والدته كثيراً ولكنه كان لا ينصت لها كما حاولت رانيا الاتصال به اكثر من مره في اليوم حتى رد عليها مؤخرا بعد مرور ثلاث ايام وعلمت منه أن دنيا تركت المنزل فأخذت قرارها ان تتوجه له في المنزل وبالفعل تحايلت على من معه ملفات العاملين وأخذت منه عنوان ياسر وبعد العمل تحركت لبيته وصعدت له ففتحت لها والدته فأرتبكت قليلاً ولكنها تماسكت ونظرت لها وهي تبتسم برقه
- مساء الخير يا طنط انا رانيا زميلة المهندس ياسر
- مساء النور ياحبيبتي اتفضلي اتفضلي
دخلت رانيا وجلست وذهبت الهام لتنادي ولدها فخرج ياسر وهو مذهول بحضور دينا لمنزله فنظر لها
- خير يا رانيا في حاجة
شعرت رانيا بالإحراج ولكن تحدثت الهام
- أيه يابني حد يقابل ضيوفه بالشكل ده
- انا اسف يا رانيا بس استغربت حضورك لكن اهلا وسهلا اتفضلي اقعدي
نظرت له رانيا وهي تبتسم
- قلقت عليك قصدي قلقنا عليك فقلت اجي اطمن
- الحمدلله يا رانيا بس لغاية دلوقتي مش قادر أصدق ان دنيا سابت البيت سابتني ومشيت
- معلش هي بس ح تلاقيها اتأثرت شوية وح تزعل شويه وبعدها ترجع لك تاني
نظر ياسر لأمه بألم والتفت لرانيا
- بعد اللي سمعته ماعتقدش ربنا يسهل هنا نظرت له امه تتصنع الحزن والتفتت لرانيا
- يابنتي غلط اني عايزة اشوف احفادي ح استنى ايه بقى لنا كام سنه اهو هو مش من حقي يعني
اقتربت رانيا منها وامسكت يدها
- لا طبعا يا طنط حقك اكيد معلش هو ياسر بس متأثر ماهي مراته برضه يا طنط بس حضرتك متزعليش منه هو ليه بركة الا حضرتك
فأحتضنتها الهام وهي تنظر لابنها
- شايف البنات الذوق والأخلاق نظر لها ياسر بغضب وانتفض واقفا
- ماما من فضلك دنيا مافيش في ادبها واخلاقها وأعتقد المفروض تكوني اكتر واحدة عارفة الكلام ده فمن فضلك ماتكلميش عليها كده
- ماشي يابني
اقتربت رانيا من ياسر ووضعت يدها على يده بحنان
- ياسر انت اكيد نفسك تبقى اب مش ذنبك ده وبعدين انت مش ح تسيبها اكيد لكن هي لازم تتفهم حقك وتقدر ده و زي مابقول طالما بتحبك قوي ح تسامح وترجع لك
- ياريت يا رانيا ياريت
ظلت رانيا معهم قليلاً تتحدث معهم حتى أعجبت بها امه وبعدها انصرفت على وعد لوالدته انها ستسئل عنها دائما وقام ياسر وارتدي ثيابه وجاء ليخرج فسألته والدته
- رايح فين يا ياسر
- رايح لدنيا يا ماما لعل تكون هديت
- بقولك ايه بطل الضعف ده سيبها اسبوع ولا اتنين وبعدين روح لها علشان تتعلم الأدب صدقني يابني كل ما تأسي قلبك عليها شوية ح ترضخ لك دي واحدة لا شغله ولا مشغله سيبها اسبوعين تتعلم الأدب علشان لما تروح لها ترضخ لك على طول
- تفتكري يا أمي
- ايوة طبعا حبيبي بس سيبك انت رانيا دي بت جدعه وطيبه وحلوة وشكلها بتعزك قوي فأبتسم ياسر بحزن
- ايوة يا ماما رانيا للأسف بتحبني من زمان
- طيب حلو اهو عروسة وح ترضى شكلها
- عروسة ايه يا ماما اللي بتقولي عليها دلوقتي انا في ايه ولا ايه
- يابني شكلها بتحبك وبما انها عارفة انك متجوز ومن كلامها النهاردة يقول انها راضية
- ربنا يسهل يا ماما ح ابقى اشوف
- يابني انتهز الفرصة واتجوزها واهو الأسبوعين اللي ح تسيب فيهم دنيا اتجوزها واهو الأسبوعين دول تبقى معاك ست وتنبسط وان شاء الله ربنا يرزقك الخلف من رانيا قلت ايه
- سيبيني افكر يا ماما وحتى لو وافقت رانيا ممكن توافق في وقت قليل كده وكمان مش كل ده عايز فلوس
- اهو الحمدلله ابوك بعت العفش وانت عارف انا لسه مغيرة كل حاجة من سنة يعني كل حاجة جديدة ولو على الشبكة ح اديك حاجات دهب من عندي تبعها وتكمل عليها من معاك وتجيب لها شبكة حلوة وماعتقدش انكم ح تعملوا فرح هي مطلقة مش بنت بنوت وسيبني انا ح اكلمها سيب لي رقمها ومالكش دعوة
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
استيقظت دنيا من نومها ونشاطها اليوم اكبر من الايام الثلاثة الماضية قامت بعمل روتينها اليومي قبل أن تخرج من غرفتها وبعد أن انتهت خرجت وذهبت لتحضير الإفطار وقررت أن تدعو هناء ورحيق وبهاء للإفطار معها ومع حسين وبعد أن انتهت واخرجت كل شئ على السفرة قامت بإيقاظ حسين و بعدها ذهبت إلى هناء ورحيق وطلبت منهم الحضور للإفطار معها وبالفعل جلسوا جميعاً يتناولون الإفطار معا وكانت دنيا تجلس وتضع باهر على قدمها تطعمه بيدها وهو يتناول الطعام بسعادة دون اعتراض فنظرت لها رحيق وهي تمثل الضيق
- نفسي افهم الكلب الصغنن ده بياكل معاكي من غير تعب ولا مجهود اشمعني معانا ياكلب
فأحتضنته دنيا وهي تقبله بحب وهو يتمسح بصدرها ويحتضنها بيده ونظرت لرحيق بغضب
- بقولك ايه ماتشتميش حبيبي ده احسن تبقى بزعله وحق عرب ده حبيب خالتو ده مش كده يا روحي انت وظلت تقبله وهي تدغدغه وهو يضحك وينظر لها
- دودو انا غير
- انتي غيري ياقطة خلاثي ياناس على العسل المكرر ده اعمل فيه ايه بس ياختاااااااااااااي
ظلوا هكذا حتى انتهوا وقامت دنيا بعمل القهوة للجميع ماعدا رحيق فصنعت لها عصير جوافة بحليب وبعد أن انتهوا ذهب بهاء وحسين لعملهم وجلس الباقي سويا. ونظرت لهم دنيا
- ماما انا عزماكم على الغداء النهاردة
- ليه ياحبيبتي تتعبي نفسك
- معلش ياماما انا عايزة ده
- خلاص نعمل سوا حبيبتي انتي جزء وانا جزء
- لا ياحبيبتي حضرتك تفضلي مرتاحة خليكي قاعدة مع البت دي فنظرت لها رحيق واخرجت لها لسانها
- احسن يالا ياعثمانه قومي اعملي الغداء عايزة ادلع النهاردة دلع إنما ايه
اقتربت منها دنيا تحتضنها بقوة
- حبيبتي تؤمري نفسك في ايه
- نفسي اكلك ياكلبه انتي
أخذا الاثنان يضحكان وهما يحتضنان بعضهما حتى نظرت لها دنيا وهي تضحك
- أيه يابنتي موضوع الكلاب معاكي انتي قلبتي ولا ايه
- لا بجد يا دنيا خلينا ناكل اي حاجة كل واحد يعمل حاجة
- بس يابت بطلي رخامة وبعدين من هنا ورايح انتي ماتعمليش حاجة كل يوم ح نتغدى مع بعض كفاية التعب اللي انتي فيه وكمان باهر اول مايصحي هاتيه ليا يقعد معايا وبالليل بهاء ياخده وبعدين ادينا طول الوقت مع بعض ولا ايه ياماما
- والله يابنتي قلت لها كده اول ماعرفت انها حملت لكن هي ماردتش كويس انتي بقى اتصرفي معاها
- خلاص هو فرمان طلع من هنا ورايح كل يوم ح نتغدى مع بعض وانا ياستي اللي ح اقول لبهاء اسيبكم شوية اروح اشوف ح اعمل ايه نظرت لها هناء بحنان
- عايزة حاجة اعملها معاكي يا دودو
- لا ياماما تسلمي انا مش ح اتأخر عليكم وح اكلم بهاء اقوله وعايزة اقول لبابا حسين كمان يعمل حسابه يروح يجيب شوية هدوم ليه علشان يقعد معايا بدل ما يقعد وحده مش عادي ياماما
- طبعا يابنتي عادي ده ابو جوزك يعني عادي يبات معاكي
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
يستلقي ياسر علي فراشه وهو يفكر فيما قالته له والدته وانتبه على صوت هاتفه فانتفض متخيلاً ان دنيا من تتحدث معه ولكنه وجدها اخته يمني المتزوجة والتي تقيم مع زوجها أمير وأولادها حسين وأمل في الأمارات ففتح الهاتف
- سلام عليكم اهلا يمني ازيك ياحبيبتي
- وعليك السلام ورحمه الله ازيك يا ياسر انا تمام ياحبيبي انت اخبارك ايه وماما وبابا فين بتصل بالبيت محدش بيرد هما عندك
- واحده واحده يا يمني انا ح اقولك
واخذ يقص عليها ياسر كل ماحدث من البداية منذ إلحاح امه عليه حتي قيامه بالكشف دون دنيا انتهاءً بتطليق ابوهم لوالدتهم مرورا بكلام امه لدنيا وترك دنيا المنزل بعد أن تبرعت بكل اثاث المنزل وذهابها الي منزل جدتها وختم كلامه بطلب امه منه الزواج من زميلته
- يانهار ابيض كل ده يحصل وانا معرفش معقول يا ياسر تضحي بحب دنيا ازاي قدرت تعملها طيب لو فرضا طلع فيك العيب ده تفتكر كانت سابتك اخص عليك يا ياسر عمري ماتوقعت تبيعها بالسهولة دي تصدق عندها حق عارف انا لو مكانها لو عملت ايه مش ممكن ارجع لك خصوصا بعد ما سيبت امك تبهدل فيها لا وكمان تروح تعريها أدام زميلتك وتحكي لها انتم ايه الجبروت ده يا اخي يا ستار عليكم
- خلاص يا يمني انا مش مستحمل استنى ادي امك التليفون
- لا شكرا انا مش ح اقدر اكلمها دلوقتي اكيد ح لخبط في الكلام وانا مش عايزة ده سلام يا ياسر
- يا يمني
- خلاص يا ياسر دلوقتي مع السلامة
- مع السلامة يا يمني
انهي ياسر المكالمة في دخول والدته وهي تستمع لاسم ابنتها فنظرت له
- دي يمني بنتي
- ايوة يا ماما
- طيب ايه ماكلمتنيش ليه انت مش قلت لها اللي ابوك عمله
ضحك ياسر بسخرية وهو ينظر لوالدته
- قلت لها يا امي قلت لها وسمعتني كلام سم وقفلت
- من غير ماتكلمني قالت لك ايه فهمني
قص ياسر لوالدته كل ما حدث بينه وبين اخته فأستشاطت غضباً وظلت تبث أفكارها السامه في رأس ولدها بضرورة الزواج من رانيا
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
تركت دنيا هناء تجلس مع رحيق وامامهم باهر يلعب ودخلت هي الي المطبخ وقامت بالاتصال ببهاء وأخبرته بما أبلغت به رحيق وهناء وعندما حاول الاعتراض ابلغته انه فرمان ولا يمكن التراجع عنه فضحك ورفع الرايا واستسلم لقرارها وبعدها أغلقت معه وقامت بالاتصال بحسين الذي رد فورا
- حبيبة ابوها
- اهلا يا بابا اخبار الشغل ايه كله تمام
- اه يابنتي الحمدلله كله تمام قولي ياشقية وراكي ايه
- دايما كده يابابا كشفني المهم ياسيدي اتفضل حضرتك وانت جي تعدي على الشقه تجيب معاك شوية هدوم حلوه كده
- ليه يابنتي انا يوم ولا اتنين اكون جبت شوية حاجات وارجع بيتي بقي
- كده يابابا وتسبني لوحدي اهون عليك
- يابنتي ماينفعش افضل معاكي كده كابس على نفسك وماتبقيش عارفة تاخدي حريتك
- حرية ايه يابابا بس هو حضرتك ح تحبس حريتي في ايه
- يابنتي تقعدي براحتك تتحركي براحتك وكمان علشان لو جوزك جالك برضه
- بابا لو سمحت انا بقعد ادامك وبتحرك براحتي ماتقلقش من كده اما بقى لو جه المهندس ياسر فامعتقدش انه ح يجي ده اولا وثانيا حتى لو جه ماعتقدش انه ح يبات وبعدين يا بابا ح اقولك اقتراح تاني
- قولي ياستي انا سامعك
- يابابتي شقة نانا تحت مفروشة فرش كده يمشي حضرتك قاعد معايا ولما تزهق مني وتحب تقعد لوحدك اقعد فيها واهو تفضل جانبي وبعدين مش كنت لسه بتقول امبارح ح امشي ازاي واسيب الواد باهر وابوه
ضحك حسين بقوه وبعدها قال لدنيا
- خلاص ياحبيبتي ماشي انا موافق ح اقعد في شقة جدتك ح اعدي اجيب الهدوم وأنا جي عايزة حاجة اجيبها معايا وانا جي
- تسلم لي يا بابا مانحرمش منك حضرتك بس خلص شغلك وهات الهدوم وتعال انا النهاردة عامله لكم اكل ايه روعه
- اممممممممم الست الشيف ح تبدع خلاص ح اجي لك هوا
- في انتظارك يابابا
بعد أن اغلقت دنيا مع حماها وجدت هاتفها يعلن عن اتصال دولي فنظرت وجدتها يمني
- سلام عليكم يمنتي
- وعليكم السلام ورحمه الله دنيتي عامله ايه
- الحمدلله ياقلبي طمنيني عليكي وعلى امير والاولاد
- كلنا بخير يا دنيا انا لسه قافله مع ياسر ايه اللي حصل لكل ده حبيبتي
- هو مش قالك يا يمني
- قالي بس مش قادرة أصدق يا دنيا معقول كل الحب ده تبقى دي النتيجة
- الكلام ده كنتي تقوليه له هو بس خلاص الموضوع انتهى يا يمني ياسر دبحني بسكينة تلمه لما سكت ومامتك بتهني وتجرح فيا وتطردني من شقتي لا وكمان كانت عايزانى اسيب عفشي علشان العروسة تتجوز عليه شفتي الوجع والقهر
- انتي عارفة انا رفضت اكلمها قفلت مع ياسر من غير ما اكلمها
ضحكت دنيا بقوة وهمست ليمني
زمانها دلوقتي بتقلبه عليكي وعليا يالا على البركه ياروحي
ظلوا يتحدثون سوياً و دنيا تصنع الأكل حتى اغلقوا وكانت قد قاربت على الانتهاء من صنع الطعام واغلقت يمني معها على وعد بمعاودة الاتصال بها دائما
انتهت دنيا من عمل الطعام وخرجت على غرفتها وأخذت حمامها وارتدت ثيابها وخرجت فوجدت باهر يحاول الجري عليها وهو ينادي ويفتح ذراعه لها فجرت عليه تحتضنه وترفعه للأعلى وتعود لتحتضنه وهو يضحك بقوة وحملته وجلست بجوار هناء
- عملت لكم شوية حاجات بقى ح تاكلوا صوابعكم وراها وكلمت بهاء ياستي قلت له وكمان بابا حسين بت يارحيق مش عايزة تاخدي دش كده وتغيير هدومك قبل جوزك مايجي
- والله يا دنيا نفسي بس مستنيه بهاء لما يجي مابقاش ينفع ادخل الحمام اخد دش لوحدي
- قومي ياختي انا ح اديكي دش واخليكي فله قال تستنى جوزك قال امسكي ياماما الواد العسل ده ح اروح احمي امه وبعدين اجي احميه هو حبيب قلب خالتو ده ياناس
اخذت دنيا رحيق وذهبوا الي شقتها وبالفعل اعطتها حماما جعلها تشعر برغبة شديدة في النوم وأخذت معها غيار لباهر وعادوا لشقة دنيا وجعلت رحيق تنام علي الاريكة واحضرت لها غطاء ودثرتها جيدا وأخذت باهر واعطته حماما هو الاخر وبعدها جعلته ينام هو أيضا ودثرته جيدا وابدلت ثيابها التي اغرقها باهر بلعبه وعادت تجلس بجوار هناء التي احتضنتها وهي تقبل راسها
- ربنا يسعدك يا دنيا يابنتي دنيا وآخره باللي بتعمليه ده مجمعانا حواليكي وواخده بالك من الكل شايفه رحيق وباهر نايمين ازاي
- ياحبيبتي ياماما ربنا مايحرمني منكم ابدا يارب رحيق دي تؤام روحي يا ماما وبهاء اخويا وسندي طول عمره انا بقى باهر ده بحسه ابني بجد
- ان شاء الله حبيبتي ربنا يهدي لك الحال وترجعي لحياتك وربنا يراضيكي
ابتسمت دنيا بحزن ونظرت لهناء
- خلاص يا ماما الموضوع ده انتهى ياسر دبحني ياماما تفتكري الواحدة بعد ما تدبح بترجع تحيا تاني انا بس ح اعمل زي ما بابا قال مش ح اطلب الطلاق دلوقتي ح اسيبه وانا عارفه ان امه ح تفضل وراه لما يعملها وربنا يصلح له حاله
- بكره يندم ويعض على صوابعه كمان من الندم
- يالا يا ماما المهم صحيح يا هنوءه عايزة حد ينضف شقه نانا تحت علشان بابا حسين كان عايز يمشي قال ايه علشان يسبني براحتي ولما صمم عرضت عليه يقعد في شقه نانا ووافق الحمدلله
- ح اكلم لك البت ازهار تيجي من الصبح بكره تخليها له فله
- تسلمي لي يا امي
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
قامت الهام بالاتصال برانيا وأخذت تتحدث معها واخبرتها برغبتها في الزواج من ابنها واتفقت معها على كل شئ وكانت رانيا تعيش بمفردها فأهلها قد قاطعوها لتصميمها على الطلاق من زوجها بحجة ان لديه مشكلة تؤخر الإنجاب قليلاً ولكنها تركته لأنه كان رجل متدين الي حد ما لا يحب أن تتأخر زوجته بالخارج او ترتدي ملابس كاشفة لا تضحك مع الرجال وهي كانت ترغب في الانطلاق بحرية فتحججت بأنها لا ترغب في انتظار علاجه وعندما اهانته بتلك الطريقة ورغم حبه لها إلا أنه طلقها دون أن يرف له جفن وعندما حاول أهلها معه رفض رفضا قاطع فقاطعوها ولذلك وافقت على كلام الهام فورا واتفقت معها على انهم سوف يذهبون لها في المساء ومعهم المأذون والشهود ليعقدوا قرانهم وتعود معهم للبيت واغلقت معها ودخلت لأبنها
- ياسر اصحى يابني
- نعم يا امي عايزه ايه
- قوم ياواد حضر نفسك كده وضبطها واحلق كده انا كلمت رانيا واتفقت معاها ح نروح لها النهاردة تعقد عليها ونجيبها معانا على هنا يالا قوم انت لسه قاعد
نظر لها ياسر بذهول
- انتي قلتي ايه يا ماما ايه اللي بتقوليه ده ازاي تتصرفي من ورايا بالطريقة دي ايه مقطف انا جرأه وراكي
- انت بتكلمني انا بالطريقة دي ازاي نسيت اني امك ولا ايه
- لا مانسيتش بس يظهر حضرتك اللي نسيتي اني راجل ولا انا علشان ساكت ومش بتكلم يا امي انا لسه بفوق من اللي انا فيه ازاي تعملي كده مش فاهم
- ياواد محدش ح يفوقك غير البت رانيا دي بت كده شكلها ايه ح تروشك مش زي الكوبه اللي كنت متجوزها
انتفض ياسر من على الفراش وهو ينظر لامه
- تعرفي ايه عن حياتنا انا ودنيا علشان تكلمي عليها كده هي علشان محترمه أدام الناس تبقى كوبه هي لازم تبقي روشه بره أدام الناس زي ماهي أدام جوزها لعلمك يا الهام هانم دنيا كانت مخلياني في البيت ملك كانت بتعملي كل حاجة من قبل ما اتكلم كانت غنياني عن كل الستات ماكنتش شايف غيرها الله يسامحك على اللي عملتيه فينا يا امي
- بكره ياخويا لما تشيل ابنك ح تنسي دنيا واللي جابوا دنيا قوم يالا الوقت بيعدي وانا قلت لها خلاص وانا بقى ح اروح اعمل لكم كام اكله كده إنما ايه اكل عرايس بجد
تركته الهام وانصرفت وهو يشعر بالاختناق ولا يعرف ماذا يفعل كم يرغب ان يجري ويلقى بنفسه في أحضان زوجته ولكن هل ستسامحه على مافعل في السابق وماسيفعله الان
لقراءة أو تحميل رواية مودة ورحمة الفصل السادس من هنا 👇
لقراءه وتحميل الرواية كامله هنا 👇👇
للتواصل 👇👇👇😘
يُمكنك الانضمام لقناتنا على التليجرام
تعليقات
إرسال تعليق