روايه موده ورحمه الفصل السابع بقلم موروو مصطفي
روايه مودة ورحمة البارت السابع
روايه موده ورحمه الفصل السابع
بعد انهيار دنيا وبكاءها وجدت هناء تدخل عليها بعد أن دقت الجرس ولم تجد إجابة ففزعت فأحضرت المفتاح وفتحت الباب ودخلت فوجدتها تجلس على الكرسي وهي تبكي ودخل خلفها حسين وفور ان وجدها هكذا جري عليها يصرخ بأسمها فأنتبهت لهم ومسحت دموعها ونظرت لهم وأخذت تقص عليهم ماحدث كله فضرب حسين كف بكف
- الواد ده غبي وحمار فعلا طالع لأمه دبش ومغفل سيبك منه يا دنيا واللي انتي عملتيه هو الصح برافو عليكي انك وقفتي في وشه كده ياخوفي ليندم ندم عمره زي ما انا عملت بجوازي من الهام يالا نصيب الحمدلله قومي يالا اغسلي وشك انا اصلا كلمت بهاء وقلت له اننا النهاردة اللي ح نعمل الأكل ح نشوي بقى في الجنينة تحت انا كلمت صديق ليا جزار حضر الحاجة وتبلها وبهاء ح يعدي يجيبها على انا ما انزل احضر الشواية واجهز الدنيا ح تنزلي معايا يابت انتي ولا ح تبعيني
ضحكت دنيا بقوة وقامت وهي تقفز
- ابيعك ايه يا حجوج ده شوي يا حُسحُس يعني انا قتيلتكم النهاردة يالا يالا وانتي يا ماما اعملي لنا سلطة الطحينة وانا عاملة شوية عصير بقى وشوية سلطة خضراء إنما ايه وهاتي البت رورو في ايدك يالا يا حجوج غير هدومك ويالا انا فوريرة ح اغير وتركتهم ودخلت الي غرفتها وهنا نظرت هناء لحسين
- وبعدين في ابنك ده يا حاج كل شوية والتانيه ح يوجع لي البت
- ماتخافيش عليها ياست الكل دنيا قوية وانا لعلمك مبسوط بده خليه كل فترة يجي هي ترفضه وهو يوجعها لغاية ما حبه في قلبها يموت وتبطل تتوجع لاني لايمكن اخليها ترجع له بعد اللي عمله
- عندك حق يا حاج يالا ادخل غير انت وانا ح اروح اعمل الطحينة واعملكم شوية بطاطس محمرة واصحى رحيق واجيبها وانزلكم
- تسلم ايدك مقدماً
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
عاد ياسر الي البيت فوجد رانيا تجلس بجوار والدته يشاهدون التلفاز فألقي عليهم السلام واتجه لغرفته ولكنه توقف على نداء والدته
- تعال هنا يابيه رايح فين كده داخل بوشك على الأوضة ولا كأنك عملت عامله
التفت لها ياسر بغضب
- عملة ايه يا امي وياريت تقصروا انا مش طايق روحي
- ومش طايق روحك ليه يا خويا مش كنت عند البرنسيسة بتاعتك ايه عملت فيك ايه الهانم صاح بها ياسر
- ماعملتش ياريتها عملت بس ادبها واخلاقها وتربيتها منعوها... منعوها تكلم وتجيب سيرة حد بقولك ايه يا امي انا مصدع ومش طايق روحي ولو الهانم اشتكت لك فتحمد ربنا اني سكت وعديت اللي عملته وقالته
- عملت ايه يعني هي مش قالت الحقيقة امال يعني يقولوا عليها خطافة رجالة ضحك ياسر بقوة
- لا صحيح وهي لا تمت بصلة لخطافة رجالة دي بقولك ايه انتي وهي انا قرفان وعلى اخرى بلاش كلام معايا علشان مغلطش في حد سيبوني دلوقتي
- كل ده ليه عملت لك ايه الهانم
- انا اللي عملت انا اللي هنت وجرحت وسكت لك تهنيها وتجرحيها وماستكفتش روحت اتجوز بعد مامشيت بيومين تلاته ومن غير حتى ما اقولها كان ناقص اعمل فيها ايه تاني ماروح اجيب سكينة وادبحها بقى ده اللي فاضل مع ان اللي عملته أقوى من دبحها
- ياخويا بلا هم ما تحمد ربنا انك سايبها على ذمتك لغاية دلوقتي بدل ما كنت طلقتها ورميتها ضحك ياسر بقوة
- نفسك أطلقها صح نفسك متهيألي ح تعملي فرح لو حصل بس ماتمنيش نفسك علشان مش ح يحصل يا امي سامعة مش ح يحصل على الاقل من ناحيتي والتفت ينظر لرانيا وانتي ياست رانيا سيرة دنيا تيجي في الشغل تاني اعتبري نفسك بره حياتي فاهمة حتى لو حامل يا رانيا فاهمة كلامي كويس عن اذنكم انا داخل انام ومش عايز ازعاج ماشي
دخل ياسر الغرفة وأغلق خلفه الباب ونظرت رانيا لـ الهام بحقد وغل
- سامعة كلامه شايفة اتعامل معايا ازاي يا طنط
- سيبك منه يابت احملي انتي بس وهو ح ينشغل عن التانية وينساها خالص وشوية ويرميها زي الكلبة
- الا صحيح يا طنط هو حضرتك بتكرهيها ليه كده
- انا مش بطيقها رغم الحق يتقال بهدلتها وكنت بشغلها في البيت عندي وماتنطقش ولا تشتكي لياسر ولما اتعب انا ولا ابوه كانت تبقى تحت رجلينا بس انا مش بطيقها ياسر كان بيحبها وبيعشقها وهي كانت بتتمنى له الرضا كنت حاسة انها اخدته مني وعلشان كده كان لازم اطيرها بعيد عنه يالا يا بت انتي قاعدة هنا ليه قومي اتلحلحي روحي شوفي جوزك وخليكي جانبه شغليه يابت يالا
- حاضر ياطنط عن اذنك
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
مر شهر والثاني والثالث وكان ياسر يذهب كل أسبوع لدنيا ولكنها تقابله بفتور دائما احيانا يجلس ليأكل معها بمفردهم وأحيانا مع والده وفي أخر مره قررت دنيا ان توافق على بياته معهم وبعد أن ابدل ثيابه وجلس يشاهد التلفاز بجوارها فقط يمسك يدها ووالده يجلس معهم حتى وجد هاتفه يعلن عن اتصال من امه فرد
- ايوة يا امي خير
- قاعد عندك بتعمل ايه ومراتك تعبانة قوم اتحرك تعال خدها وديها للدكتور هي اللي عندك دي ح يفرق معاها لما تبات عندها ح تشيل يعني
كان صوتها عالي لدرجة ان والده استمع لصوتها وكذلك دنيا والتي فورا نفضت يده من يدها فور ان استمعت له يجيب على والدته
- حاضر يا ماما حاضر ح اجي اجهزوا انتم على ما اجي وشعر بيد دنيا وهي تنفض يده بقوة وتنظر له
- قوم البس وانزل روحلهم انا فعلا مش ح يفرق معايا وجودك بس مش علشان كلام مامتك لا يا ياسر علشان انت فعلا مابقتش فارق معايا وقفت ونظرت لحسين بابا انا رايحة اقعد مع رحيق شوية بهاء سهران في الشغل وانا ح اروح اخدها ونروح لماما عن اذنك
- اتفضلي يابنتي وانا شوية وح اجي اسهر معاكم
كان ياسر يرغب في الفتك بوالدته فقد كان يادوب بدء بكسر حاجز البعد بينه وبين دنيا بعد كل تلك المدة وأتت امه ودمرت كل شئ نظر لدنيا وهي تتحرك
- دنيا ارجوكي ماتزعليش ح وديهم للدكتور وارجعهم وارجع لك انا ماصدقت ترضى ابات هنا صدقيني وعد ح ارجع على طول
التفتت له دنيا وابتسمت بسخرية
- بلاش تقول كلام مش ح تقدر عليه يا ياسر عن اذنك وتركته وانصرفت فنظر له والده
- ياخسارة يا ياسر دمرت حياتك ومشيت وراء كلام امك ياترى مبسوط وعايش مرتاح وسعيد زي ما كنت مع دنيا
نظر له ياسر وابتسم بسخرية
- السعادة والراحة سابوني من ساعة دنيا ماسابتني يا بابا بس انا كان نفسي ابقي اب اللي ادي معاهم عيل واتنين قولي كنت أعمل ايه
- كنت رضيت باللي قسمه ربنا ليك لكن انت اتبطرت يابني الواحد بياخد ال ٢٤ قيراط بتوعه كاملين حد بياخدهم في الصحة حد في النجاح حد في راحة البال والسعادة حد في العيال محدش بياخد كل حاجة قوم يابني روح قوم
ارتدي ياسر ثيابه وذهب من منزل دنيا متوجه لمنزله وقام بالاتصال بهم ليهبطوا فنزلوا ورانيا تتصنع التعب واخذهم وذهب للطبيب وهناك علموا ان رانيا حامل في شهر وكانت الهام تطير من السعادة وكذلك ياسر فأحتضن رانيا وعادوا للمنزل بعد أن اخبرهم الطبيب بضرورة الراحة النفسية لرانيا حتى يكتمل حملها على خير فرحمها ضعيف قليلاً وصعد بها وهو يمسك يدها بحنان ونسي تماما وعده لدنيا بالعودة حتى أنه لم يتصل ليعتذر
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
جلست دنيا بجوار رحيق التي أصبحت في شهرها الرابع وهي تحمل على قدمها باهر ويشاهدون معا الكارتون ومعهم هناء وحسين وبعد قليل استمعوا للجرس فتمنت دنيا ان يكون ياسر قد اوفي بوعده وعاد ولكنه كان بهاء فنظرت لحسين وابتسمت بحزن ففهم في ماذا تفكر فاخرج هاتفه ليتصل بأبنه فنظرت له دنيا وهزت راسها له بمعنى لا تفعل فأعاده مره اخرى لجيبه وقامت وهي تعطي بهاء باهر بعد أن نام
- امسكه بقى لغاية ما اروح احضر لك الأكل وبعدين ح اخده يبات معايا النهارده ماشي انا وعدته ممكن فرد بهاء
- يا دنيا انا مش عارف اقولك ايه احنا تعبينك معانا قوي يابنتي قلت لك ح اخد رحيق عند مامتها ترعاها ومعاها امي
التفتت له دنيا ودموعها تهدد بالسقوط
- وتحرمني من وجودها معايا وتحرمني من باهر كمان يا بهاء حرام عليك تعمل فيا كده هو انا ليه غيركم لو انا قصرت قولي
وقف بهاء واتجه لها وهو ينظر لها ويدور حول نفسه بغضب من كلامها
- انتي هبلة يابت مقصرة ايه انا بقول تعبينك تقولي مقصرة طيب اعمل ايه طيب قوم ياحاج امسح دموعها دي انا ماينفعش اعمل كده اوعي تعيطي تاني يا دنيا حرام عليكي بتوجعي قلبنا كلنا بدموعك دي يابنتي انتي مش عارفة انتي غاليه ازاي
نظرت رحيق لها وهي تبكي معها واشارت لها فجرت عليها دنيا وجلست أمامها فأحتضنتها رحيق بقوة وهي تقبل راسها
- عارفة يادنيا اني طول عمري بعتبرك اختي وانا واثقة لو عندي اخت عمرها ما كانت ح تعملي اللي انتي بتعمليه انتي شايله كل حاجة لوحدك بهاء خايف عليكي بس لتتعبي يادودو مسحت دنيا دموعها بظهر يدها كالاطفال ونظرت لهم
- انا مش تعبانة والله وبعدين انتم كلكم غاليين عليا قوي انتم عيلتي وأهلي انا ماليش غيركم انتم الأربعة واولادكم
اقترب بهاء منها وامسكها من ملابسها من الخلف واوقفها وهو ينظر لها بغلاسة
- طيب يا اختي اتفضلي بقى انجزي وحضري لي الاكل جعان يابت يالا بسرعه
نظرت له دنيا واخرجت له لسانها وجرت من امامه
- مش ح احضر لك حاجة وخليك كده من غير اكل بس
- يا سلام ماشي وانا ح اخد باهر ينام معانا وانتي اخلصي منه بكره
- اه ياغلس ماشي ياخويا عموما يعني مش كان ح يهون عليا ابيتك من غير أكل واحنا كلنا اكلنا ح احضر لك الاكل واجيب للماما دي كوباية لبن تشربها
فصرخت رحيق عاااااااااااااا
- ارحميني يابت بعد كده ح تحلبوني انا شربت بتاع جاموسة كده
اخذ الجميع يضحك وانصرفت دنيا لتحضير الطعام لبهاء الذي نظر لحسين
- في أيه يا عمي دنيا مالها
فقص عليهم حسين ماحدث فسب الجميع ياسر بخفوت
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
انشغل ياسر برانيا وحملها ومر اسبوع وتلاه اسبوع واخر دون أن يذهب لدنيا او حتى يحدثها وعندما علمت جارة دنيا ان رانيا حامل قامت بالاتصال بحسين وابلغته حتى يستطيع أن يمهد الأمر لدنيا شكرها حسين وظل يدور حول نفسه لا يعرف ماذا يفعل كيف يخبر دنيا دون أن يؤلمها فقام بالاتصال ببهاء وطلب منه الحضور له بعيد عن البيت وبالفعل ذهب بهاء فورا لحسين
- خير ياعمي في ايه انت كويس شكلك عامل كده ليه انت تعبان نروح المستشفي
- اهدي يا بهاء انا كويس بس انا يابني مش عارف اعمل ايه جارة دنيا كلمتني وبلغتني ان مرات ياسر حامل والبيه من يوم ما كان هنا ومشي ولا كلمها ولا جالها انا مش عارف اعمل ايه ابلغها ازاي يا بهاء
- يا الله ياعمي البت دي مش بتلحق تفوق بس انا عارف ان دنيا قوية وح تستحمل حضرتك تعال نروح وح نقولها واحنا كلنا حواليها
- ماشي بابني يالا بينا
ذهب حسين ومعه بهاء الي المنزل ووجدوا باب هناء مفتوح فعلموا انهم مجتمعون فيه ودخلوا ففوجئوا بوجود والد بهاء ووالدته وأخواته البنات بازواجهم واولادهم كما وجدوا والد رحيق ووالدتها واخوتها الرجال بزوجاتهم واولادهم فكان التجمع رهيب ووجدوا دنيا نجلس أرضا تحمل باهر على قدمها وحولها ٨ أطفال من مختلف الأعمار يضحكون معها وهي تعلمهم بعض الألعاب فنظر حسين لبهاء
- نأجل طبعا الكلام ياعمي لغاية مانبقي احنا بس
- اكيد يابني يالا نسلم
دخل الاثنان وقاموا بالسلام على الجميع وجلس بهاء بجوار زوجته واعطته دنيا باهر حتى تذهب لترى الطعام فنظر لهم بهاء
- ماشاء الله دي صدفه بمليون جنيه تتجمعوا سوا كده
ضحكوا جميعا وتحدث والد رحيق
- يابني مش صدفة دي الست دنيا عملت لنا كارت ارهاب وجمعتنا كلنا كده بربطة المعلم نظر بهاء لرحيق واحتضنها
- الواحد يعمل ايه مع دنيا باللي تعمله ده
- والله يا هيبا انا حاولت كتير انا وماما هناء نرجعها عن قرارها ابدا مافيش فايدة ومن صباحة ربنا وهي من هنا لهنا عاملة زي فرفع لوز بس قولي بقى جي مع عمي حسين وكمان مش في ميعادكم في ايه
- بعدين حبيبتي بعدين
مضى الوقت وامضوا وقتاً جميلاً وانصرف الجميع وتبقي فقط هناء وبها٩َء ورحيق وحسين ودنيا وجلست دنيا أرضا وهي تنظر لهم
- كان يوم حلو صح انبسطي يا رورو
- طبعا يا دودو انبسط قوي قوي ده احنا بنتجمع بس في المناسبات ربنا مايحرمني منك ياحبيبتي
- ولا يحرمني منك ياقلبي
التفتت دنيا لحسين و بهاء ونظرت لهم بابتسامة لم تصل لعيناها
- يالا قروا واعترفوا وراكم ايه رد حسين
- نقر ونعترف بأيه يابت انتي فوتي ولا ايه
- يابابا عيب عليك اولا انتم الاتنين جايين سوا وفي ميعاد غير ميعاد الشغل وطول الوقت تبصوا لبعض ها يالا قصروا وهاتوا من الاخر
هبط حسين يجلس بجوارها وهو يحتضنها بحنان وجلس بهاء أمامها ونظر لها
- بصي يادنيا بصراحة كده انا عايز أسألك حب ياسر جواكي بقى قد ايه نظرت له دنيا بحزن
- أيه اللي جاب السيرة دي يابهاء انا اصلا قربت انسى اني متجوزه
- بصي يادنيا بابا النهاردة في مكتبه جارتك دي كلمته
- خير المره دي في ايه المره اللي فاتت قالت لي اتجوز اكيد المرة دي حامل بقى وأخذت تضحك ولكنها لاحظت صمت بهاء وحسين فعلمت ان تخمينها صحيح فنظرت لوالدها كلامي صح يا بابا مش كده مراته حامل صح علشان كده من ساعة مامشي من هنا يوديها للدكتور نسي خالص ان له زوجه... حتى ولا فكر يتصل عموما احسن خليه يحل عني بقى عقبال ما اخلص منه خالص مبروك عليه ربنا حقق حلمه اهو الحمدلله انتم زعلانين ليه بقى فاكرني ح ازعل واضايق لا خالص انا تمام متقلقوش عليا يالا انا بقى ح اروح شقتي احسن خلاص مش قادره افتح عيني جي يا بابا
- جي ياحبيبة ابوكي
دخلت دنيا شقتها ومعها حسين وفور ان أغلق الباب ارتمت في احضانه تبكي وهو يمسد على ظهرها دون أن يتحدث حتى هداءت فرفعت راسها ونظرت له
- حقك عليا يابابا محبتش انهار هناك خفت على رحيق صدقتي يابابا انا مبسوطة ليه بس اللي تعبني ان كل كلامه طلع فشوش لما قالي في الأول خالص قالي اني مش ح اتأثر واديك شفت حصل فيا ايه وعمل بعدها ايه وبعد كده لما بدءت اقول لنفسي حاولي يابت يمكن تقدري كلمته مامته وقالت كلامها اللي يسم البدن وبعدها نسي كل حاجة يااااااااااه هو انا للدرجة دي رخيصة قوي كده
ضمها حسين بقوة مقبلاً رأسها
- اوعي تقولي كده يا دنيا انتي غاليه قوي بس هو اللي قليل الاصل ومايستهلش منك انك تزعلي عليه
- لا يابابا انا مش زعلانه عليه انا زعلانه على نفسي اني أديت واحد كل حاجة وما اخدتش منه غير الوجع والألم والقهر بس اوعدك يابابا من هنا ورايح مافيش اي وجع ولا ألم ربنا يسعده ويهنيه
- انتي بتدعي له يا دنيا
- ايوة يابابا علشان الوجع اللي حسيت بيه متمنهوش حتى لعدو يالا الحمد لله على كل حال عايز حاجة مني يابابا ح ادخل انام احسن اليوم كان مجهد قوي
- لا حبيبتي عايز سلامتك ادخلي حبيبتي ربنا يهديلك بالك ويصلح حالك يارب
- يارب يابابا تصبح على خير
- وانتي من اهل الخير حبيبتي
🌺🌺🌺🌺🌺🌺🌺🌺🌺🌺🌺🌺🌺🌺🌺🌺
اندمج ياسر في حياته ونسي تماما دنيا فرانيا لا تعطيه فرصة للتفكير بها فهي دائما في تعب حتى اتي يوم أتت زميلة له في العمل
- معلش ياباشمهندس اسفة لازعاجك بس بكلم دنيا كتير تليفونها مابيجمعش هي غيرت الرقم ولا ايه
هنا تدكر ياسر دنيا التي نساها تماما طوال الثلاث اسابيع الماضية ظل في حالة ذهول كيف نساها هكذا أين وعده اها بالحضور لها ظلت تحدثه زميلته حتى انتبه ونظر لها
- يمكن الشبكة بس مش كويسة عندها اما اشوفها ح ابلغها تتصل بيكي
- تمام شكرا ياباشمهندس
انصرفت تلك المرأه واخذ هو يفكر ماذا يفعل كيف سيريها وجه بعد وعده لها بالحضور ولكنه قرر ان يتوجه لها ومثلما يأتي وفي طريقه قام بالاتصال بوالدته
- سلام عليكم ياماما
- وعليكم السلام خلاص جي في الطريق حبيبي
- لا ياماما ح اعدي على دنيا الأول انا من ٣ اسابيع ولا روحت لها ولا حتى اتصلت
- وايه يعني ٣ اسابيع ولا ٣ شهور تعال على هنا مراتك اهم
- ماما دنيا مراتي زيها زي رانيا فاهمة
- ماتقولش زيها زي رانيا دي ارض بور مش زي رانيا شالت اهو صاح بها ياسر
- ماما بقولك ايه مش عايز نقاش انا رايح لها وربنا يستر وترضي تشوفني
- ياخويا بلا خيبه ح تشوف فيها ايه
- ح اشوف الدفا الحضن الحنين اللي اتحرمت منه مع السلامة ياماما
أغلق الهاتف مع والدته واتجه لمنزل دنيا ولا يعرف ماذا سيحدث عندما تراه
لقراءة أو تحميل رواية مودة ورحمة الفصل الثامن من هنا 👇
لقراءه وتحميل الرواية كامله هنا 👇👇
للتواصل 👇👇👇😘
يُمكنك الانضمام لقناتنا على التليجرام
تعليقات
إرسال تعليق