روايه ماسه حياتي الفصل الثالث بقلم موروو مصطفي
رواية ماسة حياتي البارت الثالث
روايه ماسه حياتي الفصل الثالث
عندما نظر أشرف ناحية مايسة وشاهد يد الرجل الذي تغطيه البسبوسة علم انه رعد فيده مصابة بجرح تارك أثر وكان وقتها اشرف يشرب القهوة فأخذ يسعل بقوة فلفت نظر رعد له وعلم رعد انه عرفه فنظر له وأشار له في الخفاء الا يتكلم
علم اشرف ان رعد قد وقع فأبتسم وهز رأسه في خفاء
عادت مايسة لمكتبها وجلست تنظر لتلك الرسمة في يدها بعيون عاشقة فأبتسم رعد عندما شاهد عيونها تلمع بتلك الطريقة وبعدها وقف واتجه لها معطياً اياها الشاحن
- متشكر جدا يا أنسة على الشاحن وعلى الحلو كمان
- العفو حضرتك على ايه نورتنا يافندم بس ممكن سؤال
- اتفضلي
- هو انا ماشفتش حضرتك قبل كده
- ممكن جايز ليه لا عن اذنك
وانصرف سريعاً تاركاً اياها في حيرتها فأبتسمت وعادت لرسمتها مره اخرى ومضى الوقت وانتهى اليوم وعادت لمنزلها تقص لأمها ماحدث وظلوا يتحدثون حتى ذهبوا للنوم
استيقظت مايسة في الصباح وقامت بأداء روتينها المعتاد حتى وصلت لمحل الزهور وقبل انصرافها من المحل وجدت رعد يقف امام باب المحل بطلته الخاطفة فنظرت له وشعرت بقلبها يكاد يخرج من مكانه
- اهلا ياحضرة الضابط اتفضل
- اهلا بيكي أنسة مايسة
- اوؤمر حضرتك
- عايز بوكية ورد
- زي المره اللي فاتت
- لا المره اللي فاتت البوكية كان لاختي المره دي البوكية لحبيبتي
ارتبكت مايسة وشعرت ان قلبها سيتوقف وعيونها لمعت ولكن تلك المرة مختلفه فالمرة السابقة عيونها لمعت بالعشق اما تلك المرة فدموعها تهدد بالنزول حزنا فشعر رعد انه يرغب باحتضانها ليهمس لها انه عاشق لها ولكن ليصبر قليلاً حاولت مايسة تمالك اعصابها ونظرت له وهي تحاول الابتسام
- تحت امرك حاجة معينة
- عايز حاجة على ذوقك بصي ح اقولك مثلا حطي نفسك مكانها وشوفي الورد اللي لو جالك يخليكي تحسي اللي ادامك ده بيعشقك ازاي أصلها عاشقة للورد
التفتت مايسة فورا وكانها تبحث له عن طلبه حتى لا يرى تلك الدمعة التي فرت من عيناها ولكن هو لاحظها وكور يده بغضب من نفسه
بدءت مايسة بصنع البوكية بحرفية شديدة واختارت زهرات كلها تنم عن الحب والعشق كان على وجهها ابتسامه ولكن قلبها يبكي حتى انتهت وقامت بوضعه بطريقة مميزة وحاوطتة بورق من السوليفان به قلوب صغيرة وأخذت نفس عميق ورفعت نظرها له وابتسمت فشاهد عيونها الحمراء التي تنم على أنها تتماسك كي لا تبكي
- اتفضل حضرتك
نظر رعد للبوكية فشعر انه رائع بالفعل
- واوووووو بجد يا أنسة تحفة دي اكيد ح تنبهر بيه متشكر قوي لتعبك
- لا ابدا مافيش تعب ولا حاجة
- طيب حسابه كام ابتسمت مايسة له
- لا خليه عليا المرة دي
- لا لا يمكن
- معلش ارجوك خليه عليا المرة دي وتعوضها مره تانية ولا حضرتك مش ناوي تيجي تاخد ورد تاني
- لا ازاي دي لو وفقت عليا النهاردة كل يوم ح اجي اخد ورد
- ان شاء الله توافق
- متشكر قوي يا مايسة عن اذنك
- اتفضل موفق ان شاء الله
- متشكر قوي
انصرف رعد وبعدها اغلقت مايسة خلفه باب المحل وجلست على مكتبها وسمحت لدموعها بالنزول كان رعد يراها من بعيد ويرغب ان يعود لها حتى تتوقف عن البكاء ولكن ليتحمل قليلاً ظلت مايسة هكذا قليلاً وبعدها قامت بغسل وجهها وارتدت نظارتها حتى لا تراها ريهام وبالفعل وصلت ريهام ودخلت فوقفت مايسة فورا
- ريري كويس انك جيتي مضطره امشي حالا الفلوس في الدرج ماشي اشوفك بكره سلام يا ريري
- مع السلامة حبيبتي بس انتي كويسة يا مايسة
- اه ياقلبي فله سلام
- مع السلامة حبيبتي
🌹🌹🌹🌹🌹
انصرفت مايسة وخلفها رعد من بعيد ووجدها تتجه لمكانها المفضل فتركها وانصرف متوجهاً للمكان الذي سيذهب له جلست مايسة في الحديقة ودموعها تهبط في هدوء وهي تحدث نفسها
- انتي اللي عبيطة يا مايسة معقولة قلبك اتعلق بيه وانتي هما مرتين اللي شفتيه فيهم اعقلي يامجنونة وادعيله ربنا يوفقه طيب وطلبه انه يشرب الشاي عندنا ده كان ايه
عادي يابنتي عادي يالا قومي اغسلي وشك وروحي لفيروزتك واوعى تحس بحاجة
وبالفعل نهضت مايسة وقامت بغسل وجهها وركبت سيارتها واتجهت لمنزلها وكعادتها دخلت بغارتها ولم تلاحظ ان هناك شخص آخر موجود
- فيروزتي يافيروزه هانم يا مامتي الحلوة يوووووووه فيروزه بالمعكوس
خرجت فيروز من المطبخ وهي تصيح بها
- يازفته انتي بطلي الغارة بتاعتك دي عندنا ضيوف
شهقت مايسة وهي تضع يدها على فمها وتهمس لها بخفوت دون أن تدري ان هناك من يقف وراءها
- بتخونيني يافيروزه اه ياني ياقلبي كده كسرتي قلبي يا روزه اهئ اهئ اهئ ح اشتكيكي لأحمد لما اروح له وح اقوله فيروزه بتخونا ياحماده واستدارت لتجد أمامها رعد وهو مبتسم فصعقت ومن هول الصدمة اغم عليها فتلقاها رعد بين يديه وهو يصيح بأسمها وحملها واضعاً اياها على الاريكه خلفه وظل يربت على وجهها حتى انتبهت وفتحت عيناها فوجدته ينظر لها فأغلقت عيناها فورا وهي تحدث نفسها
- هو الجنان بقى حيسي كده يا مايسة يعني معقول اكون بشوفك وانا في البيت كمان لا كده كتير فوقي يازفته
فوجدت من يهمس في اذنها
- انا ماسمحش لحد يقول لمرات رعد الأسيوطي زفته حتى لو هي نفسها
قفزت فيروز من نومها على الاريكه فأوقعته ونظرت له وهو ينهض وهو يضحك بقوة فالتفت لأمها
- ماما انا صاحية صح ولا نايمة وبمشي ولا اتجننت خلاص
- اه يابنت المجنونة ماتفوقي يامايسة جرالك ايه رعد يقول عليكي ايه دلوقتي
- رعد مين ها واقتربت هامسه لأمها ماما هو انتي شايفاه بجد يعني انا مش بحلم
لم يتمالك رعد وامها أنفسهم فوقع الاثنان على الاريكه خلفهم وهم يضحكون بشده وهنا تيقنت مايسة ان رعد أمامها بالفعل فخجلت بشدة وجرت على غرفتها
بعد قليل ذهبت لها والدتها
- ماستي مالك ياقلب ماما ايه اللي جرالك بس
- ماما هو رعد بره بجد طيب جي ليه
- جي لحبيبته
- هي ساكنه قريب منا ولا ايه
- يابنتي جرالك ايه هو انتي اللي جه عليكي جه بالغباء جي لك ياماسة جي لك انتي ماهو انتي حبيبته وللمره الثانية يغم على مايسة فصاحت فيروز مناديه على رعد الذي دخل سريعاً فهمني يابني هو ايه اللي بيجرالها ده
ابتسم رعد وقبل رأس فيروز
- ممكن بعد اذنك يا أمي تسيبيني معاها عقبال ماتعملي لي فنجان قهوة من ايدك
- حاضر يابني ربنا يستر
انصرفت فيروز الي المطبخ وجلس رعد بجوار مايسة وهمس بجوارها بصوت أجش
- مايسة ماستي الحلوة فوقي يا حبيبتي انا اسف حقك عليا ماتصورتش يحصل كل ده انا بس كنت عايز اعملك مفاجأة حبيبتي حقك علي قلبي كنت ح اموت وانا شايف دموعك كان نفسي اجري واخدك في حضني واقولك انتي حبيبتي
كان يعلم انها مستيقظة ولكن خجلها يمنعها من فتح عيناها
فوقي ياقلب رعد والا وكتاب الله انا مجنون و ح تلاقيني خطفت شفايفك في بوسة ايه
جلست مايسة فور ان استمعت له وهي تضع يدها على شفايفها
- رعد انت قليل الادب
- هو انتي لسه شفتي قله ادب نتجوز بس وح افرجك قله ادب عمرك ماتتخيليها يالا تعالي نطلع مايصحش نقعد هنا قومي حبيبتي نتكلم بره
نظرت له مايسة ووجها يحمر خجلاً وهي تهمس
- هو انا حبيبتك بجد
- طبعا اطلعي ح تلاقي بوكية الورد موجود بره كنت ح اموت واقولك ده ليكي بس حبيت اعملها مفاجأة فاجئتيني انتي بجنانك اللي زي العسل همست مايسة بأسمه
- رعد
- عيون رعد وقلبه اللي خلتيه يدق ليكي بالشكل ده عارفة يا مايسة انا عمري قلبي مادق كده الا ليكي وبس شفت أشكال وألوان ومحدش قدر يهز شعره فيا الا انتي من اول مادخلت محل الورد حسيت قلبي ح يخرج من مكانه
- معقوله يارعد كلامك ده يالهوي لا بقولك ايه تعال نخرج بره
- يالا ياستي قادره تطلعي ولا اشيلك
- انت ح تاخدها حلوانا في سلوانا ولا ايه لاياعم يفتح الله ونهضت سريعاً تجري للخارج وهو يضحك من تصرفاتها تلك
جلسوا الثلاثة سويا وكانت مايسة تشعر انها في عالم أخر من السعادة التي تشعر بها حتى انتبهت لرعد وهو يتحدث
- ح ارجع اعيد اللي قلته لحضرتك يا امي علشان مايسة تعرف بصي يا مايسة انا عايش في فيلا مع اسرتي اللي هي والدتي واسمها سلوان ووالدي واسمه محمد واختي واسمها رنا هي لسه طالبة في كلية الآداب اخر سنة ووالدي ضابط متقاعد ووالدتي مش بتشتغل لكن هي شوية حاسة ان انا كده حاجة ماتتعوضش مافيش زي من الاخر هي ح تتجن وتجوزني بس طبعا على مزاجها وطبعا انا رفضت فخلي بالك ح تواجهي اسد متوحش
- طيب وعلى ايه يعني بقى... ياعم مادام هي ممكن تكون شايفة اني مش مناسبة يبقى خلاص جي ليه
نظر لها رعد بحزن وتحدثت والدتها
- هي دي الأصول اللي علمتها لك يا مايسة دي طريقة كلام برضه يعني هو غلط انه بيتكلم بصراحة
نظرت مايسة له وعيونها دمعت
- انا اسفة يارعد بس انا مش بحب حد يجي على كرامتي
- عمري ما ح اسمح لأي مخلوق يجي على كرامتك يا مايسة لان كرامتك من كرامتي انا قصدي انك تستحملي امي اعتبريها زي مامتك لو انتي شايفة اني ما استهلش انك تعملي كده علشاني يبقى انا فهمت غلط وتصورت انك بتكني لي مشاعر حلوه زي
- رعد انا
- مايسة انا طلبت ايدك من ماما فيروز وح اسيبك تفكري خدي وقتك وانا ح استنى ردك كان نفسي اسمعه النهاردة علشان ابدء اخد خطوات بسرعة لاني عايز يجمعنا بيت واحد قريب بس ممكن اكون انا يعني مشاعري أقوى منك سامحيني يا مايسة لو اني
وهنا لم تتحمل مايسة كلامه فوضعت يدها على فمه
- رعد انا اسفة مش قصدي انا ملخبطة قوي المفاجأة بعد ماشفتك النهاردة في المحل بص اقعد مع الست دي شوية انا محتاجة بس اغسل وشي واصلي ممكن تديني نص ساعة واكون معاك
- اكيد اتفضلي
اختفت مايسة من أمام رعد ووالدتها وقامت بالدخول الي الحمام وتوضئت وخرجت لغرفتها وابدلت ثيابها وقامت بتأدية صلاتها وأخذت تدعو الله في سجودها ان يوفقها للصواب وان يجعل ماهو في صالحها ينطق به لسانها وأخذت تدعو لفترة من الوقت وبعدها انهت صلاتها وخرجت لهم فشعر رعد ان من خرجت اختلفت عن من دخلت فوقف ينظر لها وعيونه تلمع فأبتسمت له وجلست بجوار امها محتضنه اياها ومقبلة يدها
- مامتي رايك ايه فقبلتها فيروز
- حبيبتي مش مهم رأي المهم رايك انتي
- ح اقوله بس انتي رايك ايه
- انتي عارفة اني مش برتاح لأي حد بسهولة ويمكن ده اللي خلاني مانقلش من هنا رغم إلحاح احمد الله يرحمه كتير عليا لكن انا اول ماشفت رعد حسيته ابني اللي اتمنيته
ضحكت فيروز وهي تضع وجهها على صدر امها
- يعني بذمتك دي ايجابه يافيروزه طيب ارد اقول ايه انا دلوقتي هو في واحدة بتتجوز اخوها ثم وقفت فجاءة وهي تضع يدها على فمها وتتصنع الذهول يالهوي يعني لما هو ابنك يبقى انا لقتوني في الشارع ياعيني عليكي يا مايسة
كان رعد ينظر لها بذهول وصعق اكثر من رد فيروز
- لا ياقلبي شارع ايه بس احنا لقناكي جنب الجامع يا آخرة صبري الله يكون في عونك يارعد وهنا انتبه رعد فضحك بقوه
- تصدقي يا مايسة بابا ح يحبك قوي اخ و دي حاجة تقلق
نظرت له مايسة وكأنه كائن من كوكب اخر
- ليه ايه اللي يقلق
- الراجل ده ممكن يخطفك مني وساعتها انا ممكن احبسه ضحكت مايسة وهي تنظر له
- ايوة بقى اقولك انا ح اخده واهرب أصل انا بحب قوي الرجالة الكبار دول بيبقوا زي العسل نظر لها رعد واقترب هامسا بصوت يرعب
- لا بصي ح اعورك فاهمة كلمة احب وبحب وكل ما هو يمت بصلة للكلمة دي ليا انا وبس ماشي يا هانم خجلت مايسة وهمست
- رعد
- يالهوي على رعد وسنينه بقولك ايه يا امي انا ح اجيب اهلي ونيجي بكره نتقدم اخر الاسبوع نقرء الفاتحه و نلبس الدبل والشبكة الاسبوع اللي بعده نكتب الكتاب واخر الشهر نعمل الفرح
- أيه ده يارعد في ايه يابني انت كده مش مديني فرصة اجهزها الجهاز اللي نفسي فيه
- بصي يا امي انا بعد الفرح ح اخدها ونسافر شهر في الوقت ده حضرتك جهزي كل اللي تحبيه رغم ان شقتي مش محتاجة اي حاجة
نظرت له مايسة وتحدثت بهدوء
- ثواني يارعد انت بتحدد كل حاجة بسرعه قوي وده ماينفعش
- ليه يا مايسة
- احنا لسه مانعرفش بعض كويس، يارعد وانت بتكلم في جواز
- مايسة انا عارف مشاعري كويس وواثق من حبي ليكي وفي نفس الوقت انا انسان ملتزم الي حد ما الحمدلله ومش عايز اغضب ربنا فيكي علشان كده عايز نتجوز على طول واوعدك اسيبك تعرفيني واعرفك زي ماتحبي
- تمام يارعد ده كله كويس بس انت بتقول شقتك وانا مقدرش اسيب ماما يارعد ماما كل حياتي مقدرش اسيبها وحدها
احتضنها فيروز بقوه وهي تقبل وجنتها
- حبيبتي دي سنة الحياة وبعدين مين قال اني وحدي انا معايا كل جيرانا وحبايبنا
- لا ياماما بس انا
لم يدعها رعد تكمل
- ومين قالك اني ح اقدر استغني عن العسل ده يابنتي انا ح اتجوزك بس علشان خاطرها بصي ياستي ماما ح تبقى معانا اولا احنا عايشين في فيلا كبيرة انا بنيت لي دور منفصل عنهم تماما الدور ده مقسوم لشقتين واحدة كبيرة وواحده استوديو تقريبا ودي ماما ح تقعد فيها منها تبقى معانا ومنها تبقى براحتها وكمان علشان اما ازهق منك اروح اقعد معاها واسيبك وحدك
- لا ياخويا انا اللي ح اروح اقعد مع مامتي انت روح اقعد مع مامتك
واخرجت له لسانها فضحكت فيروز عليهم
- ياولاد ماتشغلوش نفسكم بيا انا مقدرش ابعد عن الشقة اللي عشت فيها من اول ما اتجوزت ابوكي مقدرش ابعد عن كل ذكرياتي ردت مايسة
- ماما ولكن قاطعها رعد
- استنى يا مايسة
- بصي يا امي اوعدك نيجي هنا خميس وجمعة من كل أسبوع ايه رايك انا كمان حبيت هنا قوي بس خلينا دلوقتي ناخد خطوة خطوة ها موافقة
- ماشي يارعد خلينا ناخدها خطوة خطوة
- خلاص يبقى بكره ح اجيب امي وابويا واختي ونيجي ماشي
- ماشي حبيبي ح نكون في انتظاركم
- ان شاء الله استأذن انا بقي
- لا ازاي تتغذي معانا وبعدين تمشي
- لا يا امي مافيش داعي للتعب
- ياحبيبي مافيش تعب ولا حاجة الاكل جاهز دقائق ويكون جاهز
جاءت مايسة لتتحرك فوضعت فيروز يدها على كتفها
- خليكي يا ماسة اتكلمي مع رعد انتي انا دقائق والاكل يكون جاهز
- خليني اجي اساعدك يا مامتي
- لا حبيبتي
انصرفت فيروز وتركت رعد يجلس أمام مايسة
- شكلك حلو قوي وانتي مكسوفة كده يا ماسة
- لا بقولك ايه مش كل شوية تكسفني انا ممكن اتحول عادي يعني
- مايسة في كلام كتير قوي عايز اقوله بس مش ح ينفع قبل الاسبوع الجاي لما تبقى خلاص على اسمي بس كل اللي اقدر اقوله لك انا عمر ماقلبي دق غير ليكي طول عمري، زي ماشفتيني مع أشرف كده
ضحكت مايسة فنظر لها وابتسم
- على فكرة ضحكتك حلوة بس علشان خاطري بلاش تضحكيها قدام حد ممكن يمكن من عيوبي واللي حستها معاكي بس اني بغير عليكي جدا يعني لما كنتي بتضحكي في الكافية مع معتز وأشرف كان هاين عليا اقوم اشدك ليا
وقفت مايسة وهي تنظر له بذهول
- يعني انت كنت موجود زي ماحسيت انت الشخص اللي خد مني الشاحن صح
- صح يا ماستي انا اللي اخدت منك الشاحن وشفت صورتي من عيونك
احمرت مايسة خجلاً لانه شاهد صورته
- عارفة في الأول كنت مرعوب معقول في يوم وليلة احب بالشكل ده وكنت بسئل نفسي طيب افرض انا مش في دماغها او افرض انها مرتبطة كنت ح اتجنن لغاية ماشفت صورتي اتأكدت ان مشاعرك زي مشاعري
نظرت مايسة له وعيونها تلمع كالقطط
- رعد انا خايفة قوي الموضوع كله بسرعه بسرعه وانا مرعوبة انا عمري ما مريت بكده عمري ماحبيت ولا ارتبطت كنت مقتنعه ان الحب والارتباط لازم يكون لشخص واحد بس وهو اللي ح اكون مراته اول ماشفتك قلبي دق قوي وبعدها بقيت محاصر تفكيري ولما شفتك تاني في القسم ساعتها حسيت احساس غريب قوي افتقدته من ساعة بابتي ما مات
- احساس ايه
- الامان اول ماشفتك عرفت ان ماحدش ح يعرف يعمل لي حاجة وحسيت انك اول ماشفت علامه ايد اشرف على وشي انك كنت ح تموته لولا مسكت نفسك
ضحك رعد وهو ينظر لها ويضع يده على شعره
- هو انا كنت مكشوف قوي كده
- احساسي كان كده وخرجت وانا حاسة احساس جميل قوي لغاية ماشفتك النهاردة
- اسف على وجعك بالشكل ده حقك علي قلبي يا ماستي الغالية
- رعد كفاية بقى انا ح اقوم اشوف ماما
جاءت فيروز وابتسمت لهم
- وماما جت لك بنفسها حبيبتي يالا تعالوا
ذهبوا وتناولوا الطعام سويا وبعدها انصرف رعد على وعد بالعودة غدا مع أهله وجلست مايسة مع والدتها يتحدثون ومايسة تجلس في أحضان فيروز
- مايسة مش ح تنزلي الكافية النهاردة
- لا يا مامتي عمو عبدالله اخد طنط علياء يقعدها معاه في الكافية وبكره طبعا ح اعتذر منه كمان مامتي انا خايفة قوي
- ليه ياقلب ماما خايفة من ايه
- يعني مركز رعد وعيلته تفتكري
- بصي يا مايسة ياحبيبتي رعد فهمني قبل ماتيجي ورجع عاد الكلام ادامك ان مامته نفسها تفرح بيه وفي نفس الوقت شكلها عايزة تبقى عروسته على الفرازه وانتي مافيش زيك ياقلبي من ناحية العائلات فأنا وبابا مش قليلين وانتي وشهرتك اللي شكل رعد مايعرفهاش اوعي تخافي اهم حاجة خليكي واثقه من نفسك ولو بتحبي رعد ح تعرفي تكسبي عيلته
- عندك حق يا ماما
- ان شاء الله خير ياقلب ماما
ظل الاثنان يتحدثان ويضحكون سوياً حتى مر الليل ودخلت كل واحدة منهم غرفتها
🌹🌹🌹🌹🌹
اما رعد فقد خرج من منزل مايسة وهو يشعر بسعادة كبيرة واتجه الي منزله وكان لا يوجد به الا رنا اخته فجلس معها فهي صديقته وهو أيضا صديقها وفور ان نظرت له ابتسمت
- كلمتها صح فهز رأسه وهو يضحك
- لا روحت اتقدمت لها وبكره ح نروح كلنا نتقدم
صرخت رنا من الفرح وهي تحتضن أخيها بحب
- مبارك ياحبيبي مبارك يارب جوازه الهنا والسعاده والعمر كله
-يارب حبيبتي يارب
- بس ربنا يستر من الست سلوان هانم
- رنا ياحبيبتي انا رعد الأسيوطي هي احترامها واجب لكن دي حياتي واختياري
- ربنا يستر يارعد
- هي فين هي والشقي الكبير
- الشقى الكبير ياخويا راح يلعب اسكواش في نادي الشرطة والست سلوان هانم في النادي برضه مع خالتك سلوي هانم وبنتها الكلحه سيدرا بوتجاز
وقع رعد من الضحك على تعليقات اخته وبعدها نظر لها
- عارفة يا رانو انتي وبابا ح تندمجوا تماما مع مايسة لكن بقى سلوان هانم ح نشوف ح نعمل معاها ايه
- انت ح تروح فين دلوقتي
- ح اناااااااااام انا مانمتش امبارح خالص ح انام ولما يتجمعوا بالليل صحيني ماشي يا برنس
- ماشي ياريس يالا اتكل طريقك زراعي ياباشا
- حاسس اني قاعد مع الواد بليه
- سلام بقى يابرنس عايزة أشوف حالي
- ماشي يازفته سلام
- سلام ياحبيبي
ذهب رعد الي جناحة ودخل الحمام واخذ حماماً سريع وخرج مرتدي شورت فقط واستلقي على الفراش وهو مبتسم وهو يتذكر كل ماحدث اليوم في منزل مايسة حتى ذهب في النوم
لقراءة أو تحميل رواية ماسه_حياتي الفصل الرابع من هنا 👇
لقراءه وتحميل الرواية كامله هنا 👇👇
للتواصل 👇👇👇😘
يُمكنك الانضمام لقناتنا على التليجرام
تعليقات
إرسال تعليق