روايه ماسه حياتي الفصل الرابع بقلم موروو مصطفي
رواية ماسة حياتي البارت الرابع
نام رعد فوراً ولم يتحرك من مكانه الا عندما قامت رنا بالرن عليه ليستيقظ فرد وهو مازال ناعساً
- امممم يارنا
- امممممم ايه ياعم الحاج الساعة ١٠.٣٠ انا بقى لي ساعتين بصحي فيك
انتفض رعد من الفراش
- أيه ١٠.٣٠ معقول طيب القوم تحت
- تحت ومتظبطين اخر تظبيط انزل بقي
- ماشي خمسة ونازل اغسل وشي بس و انزل
هبط رعد بعد أن ارتدي ملابسه فوجد والده ووالدته يجلسون ومعهم رنا فألقي عليهم السلام وجلس وبخبره رجل الشرطة شعر والده ان وراءه شيئا فنظر له وابتسم
- وراك ايه ياحضرة الضابط الهمام
- ورايا خبر حلو
نظرت له والدته وابتسمت
- أيه قررت تتجوز وتفرحني
- فعلا يا أمي
- بجد حبيبي الف نهار ابيض سيدرا مش كده
- لا طبعا يا ماما سيدرا ايه اتجوز واحده في خمسين ألف واحد شافوا جسمها ايه يا امي انتي مش عارفة ابنك ولا ايه
- ياحبيبي ما انت تقدر تغيرها
- اغير ايه يا ماما وبعد ايه ريحي نفسك يا امي انا مختار عروستي
- مين هي بقى ان شاء الله
قص رعد عليهم مقابلته لمايسة من البداية للنهاية وبعد أن انتهى صرخت امه
- انت رايح تجيب واحده بتشتغل بايعه ورد وكمان واقفة في كافية ايه يا حضرة الضابط نسيت مركزك ولا ايه
وقف رعد وهو ينظر لها بغضب
- سلوان هانم اظن انك عارفة ابنك كويس ومن الواضح انك مسمعتيش كلامي لانه طبعا مش جي علي هواكي لكن حضرتك عارفة كويس ابنك ودماغه مش متهيألي يعني أنك عندك شك في اختياري بصي يا امي مايسة اختياري وسعادتي معاها وأعتقد من حقي اختار بنفسي شريكة حياتي ولا ايه رايك
- يا رعد ياحبيبي انا عارفة نظرتك للناس كويس بس انت اللي بتقوله ده يخلي الواحد قلقان ياحبيبي انا كل اللي يهمني سعادتك ولو كنت بتكلم على سيدرا ف علشان احنا عارفينهم لكن عمري ما ح ادور على سعادة بنت اختي قبل ابني ده انت نور عيني يارعد
- ربنا ما يحرمني منكم لا انتي يا امي ولا ابويا وبعدين انا روحت لمامتها النهاردة وبصراحة يا امي انا مستعجل انا بجد عايز مايسة في بيتي النهاردة قبل بكره انا طلبت من مامتها اخر الاسبوع نلبس الدبل والشبكة والاسبوع الجاي نكتب الكتاب واخر الشهر نتجوز
- أيه يابني السربعه دي ليه هو انت غلط وبتصلح غلطتك
نطقت سلوان الجمله ولم تحسب وقعها على رعد الذي انتفض من مكانه وهو ينظر لأمه والشرر يتطاير من عينه وعروق وجهه ظهرت في حالة نفور وقف سريعاً محمد يحتوي ولده وينظر لزوجته بلوم وعتاب
- تعال معايا يارعد في الجنينة شوية رنا خليهم يعملوا لنا اتنين ليمون يابنتي
- حاضر يابابا
سحب محمد رعد الي الحديقة وجرت رنا تبلغهم بعمل الليمون وعادت لوالدتها وجلست بجوارها فوجدت عيونها دامعه
- ليه ياماما كده جملتك في مقتل طيب نفرض انك ماتعرفيش البنت ايه مش عارفة ابنك
نظرت لها سلوان ودموعها تتساقط
- ماقصدتش حاجة كده انا بس استغربت سربعته دي
- بيحبها ياماما بيحبها من فترة من اول مره شافها جه قالي قلبي خرج من مكانه يا رانو كان طاير من السعادة النهاردة حضرتك ضربتيه في مقتل
- يابنتي من حقي اخاف على ابني
- يا ماما يعني انا لو حد شافني ومن اول مره حاس انه بيحبني ح تفتكري ح تقبلي اهله يقولوا كده عليا
- طيب اعمل ايه دلوقتي
- اطلعي خديه في حضنك وباركي له ح ينسى كل اللي حصل
- طيب تعالي معايا
خرجت سلوان مع رنا للخارج فوجدته يجلس على كرسي ويرجع رأسه للخلف ووجهه احمر من شدة انفعاله ومحمد فقط يجلس بجواره في صمت فأقتربت منه وهبطت مقبله رأسه ووجنته وهمست
- حقك عليا حبيبي الجمله خانتني ماكانش قصدي يعني معرفهاش اه بس عارفة ابني كويس قوي
نظر لها رعد بعتاب
- وجعتيني قوي ياماما عارفه النهاردة وانا بقولها انك مرتبطة بيا ونفسك تجوزيني من اختيارك وبقولها رتبي نفسك ح تقابلي أسد عارفة قالت لي ايه
- قالت لك ايه
- قالت لي طيب وعلى ايه يعني بقى ياعم مادام هي ممكن تكون شايفة اني مش مناسبة يبقى خلاص جي ليه ولما مامتها لامتها وقالت لها دي مش تربيتي اعتذرت لي وقالت لي انا اسفة
- شكلها متربي بس بص بقى انا موافقة مبدئياً بس ح احطها في اختبارات
- حطيها زي ماتحبي بس من فضلك من غير ماتيجي على كرامتها ارجوكي يا امي اعتبري كرامتها من كرامتي
- حاضر ياحبيبي ربنا يعمل اللي فيه الخير
- ان شاء الله حبيبتي وانا واثق انك ح تحبيها
- ان شاء الله حبيبي يالا تعالوا ندخل نتعشى بقى انت اخرتنا قوي
- كنت تعبان ومحتاج انام
دخلوا جميعا وتناولوا العشاء وجلسوا قليلاً سويا وبعدها صعد كل واحد الي غرفته
🌹🌹🌹🌹🌹
جاء الصباح واستيقظت مايسة من نومها وهي تشعر بالسعادة وارتدت ثيابها وخرجت تبحث عن والدتها التي وجدتها تجلس في الفراندة تحتسي كوب الشاي بالحليب الخاص بها
- صباح الخير يامامتي الحلوة
- صباح الخير يا ماسة قلبي عامله ايه انتي ح تروحي لريهام
- ايوة طبعا ياماما بس مش ح تأخر ح اكلمها تيجي بدري وانا راجعه ح اعدي على عمو عبدالله واعتذر له وح اعدي على الست سهام علشان تطلع تنضف الشقة على ما ارجع وحضرتك اوعي تعملي حاجة
- حاضر ياستي بس انتي ما تتأخريش
- لا ماتخافيش بعد صلاة الضهر ح اكون هنا أن شاء الله سلام يامزه
- مع السلامة ياقلبي
هيطت مايسة وفعلت ما قالته لأمها واتجهت للمحل فتحته وقامت بالاتصال ب ريهام وابلغتها الاخبار فظلت ريهام تطلق الزغاريط وابلغتها انها ستاتي في خلال ساعة انتهت مايسة من تنسيق كل شئ وكان ظهرها لباب المحل فانتبهت على صوت محبوبها وهو يتحدث بصوت أجش
- نزلتي ليه النهاردة مش كنتي ارتحتي فالتفتت تنظر له وهي تبتسم
- ماكانش ينفع ريهام ماتقدرش تنزل بدري كده المهم انت جي ليه لما انت كنت متخيل اني اجازه ولا انت لسه بتراقبني
ابتسم رعد وهو يقترب منها
- لا طبعا مش براقبك ولا حاجة وجيت لاني كنت واثق انك نازله وقلت اجي اشوف احساسي واهو طلع احساسي صح
- طيب صباح الخير
- صباح الورد والياسمين على ماسة حياتي فهمست بخجل
- رعد
- يخربيت رعد وسنينه على ايدك ح يبقى مالوش علاقه بالاسم المهم ح تمشي امتي
- على صلاة الضهر كده
- ماشي الود ودي اقولك اننا ح نروح لكم دلوقتي بس احنا ح نكون عندكم على سبعه ونص ان شاء الله
- ان شاء الله تنورونا
- ح توحشيني لغاية ما اشوفك اوعي تقولي رعد
- امال اقول ايه يعني
- بعد مانتجوز ح اقولك تقولي ايه سلام دلوقتي ياماستي
- سلام يارعد
جاءت ريهام وظلت تزغرط وهي تحتضن مايسة وبعد قليل انصرفت مايسة وفي الطريق أحضرت بعض الحلويات واتجهت الي عبدالله وابلغته ففرح لها كثيرا وصعدت بعد ذلك الي والدتها فوجدت سهام قد انتهت من تنضيف المنزل فألقت التحية على امها ودخلت المطبخ حتى تقوم بصنع الأشياء وبعد أن انتهت دخلت الي الحمام وأخذت حماماً واستلقت على الفراش تفكر في المساء ودخلت فيروز وجلست جوارها
- مالك يا ماستي
- قلقانه ومتوتره وخايفه ومبسوطة وملخبطه حاجات كتير قوي يا مامتي
- سيبيها على الله حبيبتي
- يارب يامامتي
ظلت فيروز تجلس بجوار ابنتها حتى قرب الموعد فقام الاثنان ليرتدوا ملابسهم فارتدت فيروز فستان من اللون الكحلي فعلي رغم وفاة زوجها منذ سنين الا انها لم ترتدي سوي الأسود والكحلي فقط اما مايسة فارتدت فستان من لون البيبي بلو وحذاء ذو كعب عالي وطرحه من اللون الاوف وايت مختلطة بدرجات من الأزرق ووضعت القليل من المكياج وانتظرت قدوم رعد واسرته وهي تشعر بالقلق من والدته
🌹🌹🌹🌹🌹
وصل رعد ووالده ووالدته واخته الي المنزل وصعدوا وقام رعد بطرق الباب ففتحت له ريهام فنظر لها بذهول
- ست ريهام هو انا مش لسه سيبك في محل الورد
- ايوة ماهو اول ماحضرتك مشيت طيرت على هنا لازم اكون جنب مايسة اتفضلوا اتفضلوا طنط فيروز
- ايوة ياريري
خرجت فيروز فوجدت أمامها رعد وبجواره والده ووالدته واخته وقام بتعريف الكل على بعض وكان قد احضر معه بوكية ورد من الأنواع المفضلة لمايسة كما احضر شيكولاته وتورته وضع كل شئ على المنضدة وجلسوا جميعا وقبل ان يتحدث الاب نظرت سلوان الي فيروز وابتسمت
- معلش مدام فيروز ممكن اقعد مع مايسة لوحدنا شوية
- اه طبعا مدام سلوان اتفضلي معايا
خرجت سلوان تحت نظرات زوجها وابنها وابنتها وأخذتها فيروز الي غرفة ابنتها بعد أن طرقت الباب وسمحت مايسة بالدخول
- مايسة حبيبتي
- نعم يامامتي
- مدام سلوان عايزة تقعد معاكي شوية حبيبتي
- اه طبعا اهلا وسهلا ياطنط اتفضلي حضرتك
- ميرسي حبيبتي
- طيب مايسة حبيبتي لما تخلصوا هاتي مدام سلوان وتعالي علي الصالون
- حاضر ماما
خرجت فيروز واغلقت خلفها الباب وجلست سلوان على كرسي موجود في غرفة مايسة وجلست بجوارها مايسة
- اهلا بحضرتك طنط
- اهلا بيكي حبيبتي ينفع اتكلم معاكي بصراحة ومن غير مايوصل الكلام ده لأي حد
- طبعا ياطنط
- الصراحة شكلك متربي فعلا زي مابيقول رعد وكمان مؤدبه بس انا بصراحة يعني كان في دماغي ليه عروسه تانيه
- تمام ياطنط والمطلوب مني ايه
- تاخدي كام و تطلعي ترفضي الجواز من رعد
وقفت مايسة وهي تشعر بوجع في قلبها ولكنها تماسكت ونظرت لسلوان
- من غير ولا مليم ياطنط يمكن حضرتك متصوره اننا علشان مش قاعدين في فيلا ولا في التجمع او زايد ابقى انا محتاجة فلوس حضرتك غلطانه انا اسفة طبعا لكن انا الحمدلله بابا وماما عندهم كتير احنا بس اللي بنحب جيرانا وعموما بكررها لحضرتك تاني ياطنط من غير ولا مليم وانا بتمنى ان اللي حضرتك اخترتيها لرعد تقدر تسعده اللي بيحب حد بيتمنى له السعادة حتى لو مع غيره
- فكري شويه
- اسفة ياطنط متشكرة لحضرتك قوي واول ما نطلع ويتفتح الموضوع ح ارفض ومن غير مايكون لحضرتك يد ماتقلقيش
- ازاي هو اكيد ح يشك لاني اتكلمت معاكي
- ماتقلقيش ياطنط
- طيب ينفع نطلع بقي
- اتفضلي ياطنط
خرج الاثنان وسلوان مبتسمه وفي قمة السعادة ومايسة تبتسم وهي تشعر انها تموت دخل الاثنان فوقف رعد فورا عند رؤيتها وعيونه تلمع كحبات الماس وراءت امه ذلك اما مايسة فنظرت له بحب وكأنها تودعه وقامت بتحية والده واخته التي احتضنتها بود وهمست لها بجوار اذنها
- ليه حق رعد يحبك كده انا حبيتك من حبه ليكي
- تسلمي لي يا رنا
نظر لها محمد وطلب منها الجلوس بجواره فاتجهت وجلست بجواره كان عيونها تلمع ولكن بالدموع وليس بالفرح وكان رعد يشعر ان هناك خطباً ما فأقترب من امه
- امي في ايه اتكلمتى مع مايسة في ايه
- دلوقتي تعرف
قامت ريهام بتقديم واجب الضيافة وظلت بالخارج وهنا نظر الاب الي مايسة بحب وهو يربت على يدها وبعدها نظر لوالدتها
- مدام فيروز انا يشرفني ويسعدني اطلب ايد بنتك الجميلة مايسة لابني رعد
وقبل ان تتحدث فيروز وقفت مايسة ونظرت لرعد لثواني ثم أنزلت رأسها وهمست
- انا اسفة ياعمو على تعبكم بس انا مش موافقة
وقف رعد في ذهول وتحولت بسمته لحزن ونظرت لها والدتها وهمس رعد
- ليه يا مايسة امي قالت لك ايه جوه
- ماما ماقلتش حاجة خالص بالعكس دي خدتني في حضنها وباركت لي بس انا اسفة يارعد انا مش ح ينفع ارتبط بيك
هنا لم تستطيع أن تصمت سلوان فقامت بإطلاق الزغاريط واقتربت من مايسة واحتضنتها بقوه وهي تقبلها
- دلوقتي اقدر اقول انك انسب واحدة لابني انسب واحدة تدخل بيتنا وابقى مطمنا ان هي دي اللي ح تشيلنا في عينها وح تحافظ على سر بيتها و عيلته مبارك يابنتي واوعى تزعلي مني انا كان لازم اختبرك ده ابني الوحيد وعمره ماحب وده مش حبك لا ده عشقك وانتي تستاهلي ده
هنا تساقطت دموع مايسة فمسحتها يد سلوان واحتضنتها وامسكت يدها واجلستها بجوارها
- انا ح احكي لكم اللي عملته بس بالله عليكي يا فيروز انتي ومايسة ماتزعلوا مني انتي ام وعارفة الضنا وانا رعد ده روحي نظر لها محمد بغضب
- اتكلمي يا سلوان عملتي ايه علشان رد فعلي عليكي مش ح يعجبك
شعرت مايسة ان الموضوع سيتحول فأحتضنت سلوان بحب وابتسمت
- ياعمو داخل حامي كده ليه طنط بس كانت بتعملي اختبار وتشوفني ح اعرف اعدي من الحفرة ولا ح أقع فيها وانا الحمدلله مش بس عديت لا ده انا نطيت بجدارة مش كده ياطنط
- كده ياقلب طنط رعد ليه حق يحبك ويتمسك بيكي كده يالا يامحمد ابدء من الاول بس اسمح لي اطلب طلب من فيروز
ردت فيروز برحابة صدر
- اتفضلي طبعا
- رعد كان قالك ان الشبكة اخر الاسبوع وكتب الكتاب الاسبوع اللي وراه والفرح اخر الشهر
- اه مضبوط بس احنا قلنا ح ناخد كل حاجة خطوة خطوة
- انا بقى بترجاكي نكتب اخر الاسبوع والفرح بعد اسبوعين انا عايزة مايسة تنور بيت جوزها علي طول
- ياجماعة انتم مستعجلين قوي مش معقول كده مش ح الحق اعمل حاجة لمايسة
رد محمد وهو ينظر لولده
- مدام فيروز شقة رعد مش ناقصة حاجة ولا حتى شقة حضرتك وعلى مايرجعوا من شهر العسل تكون كل حاجة جهرت
اكمل رعد
- ماتقلقيش من اي حاجة يا امي قلتي ايه
-ح اقول ايه بس الف مبروك حبايبي واحتضنت مايسة بحب وهي تقبل وجهها كله ومايسة تقبل يدها
اكمل محمد بعد أن قام الجميع بتهنئة العرسان
- نقرء الفاتحه بقى والخميس الجاي ان شاء الله نكتب الكتاب مع الدبل والشبكة
ردت فيروز
- ماشي متفقين
قاموا جميعاً بقراءة الفاتحه وقبل الكل العريس والعروسة وبعدها طلب رعد ان يقف مع مايسة في الفراندة قليلاً وبالفعل دخلوا سوياً وفور ان دخلوا التفت لها رعد ينظر لها وعينه تظهر غضبه
- مايسة لازم تعرفي ان اكتر حاجة بكرهها في حياتي هي الكدب
- وانا كمان يارعد لا بحب الكدب ولا الخيانة
- يبقى كده زي الشاطرة تقولي امي قالت لك ايه
- سامحني يارعد مش ح اقدر اقول وعدتها ماقولش الخلاصة انها كانت بتمتحن حبي ليك ونجحت ده المهم
- لا يا مايسة مش ده المهم وبس هو طبعا مهم لكن لازم مايبقاش بيني وبينك أسرار
- وانا عمري ما وعدت وخلفت وعدي لأي حد
- انا مش اي حد يا مايسة
- مهما كان يا رعد مقدرش
انفعل رعد على مايسة
- يعني ايه ممكن افهم المفروض مافيش بينا أسرار
- ايوة وانا اوعدك عمري ما ح اخبي عليك حاجة تخصني بعد جوازنا
- مش فاهم يعني ايه تخصك يعني لو الموضوع مايخصكيش ح تخبي
رفعت مايسة عيناها لرعد وهي تلمع بالدموع وجرت من أمامه ودخلت غرفتها واغلقت الباب وجلست تبكي ولم تستمع لنداء الكل عليها فوقف محمد وصرخ بأسم رعد الذي كان يقف مكانه وهو يضرب السور بقسوة حتى جرحت يده و عندما استمع لنداء والده دخل وفور ان نظرت له والدته جرت عليه فنظر لها بعتاب
- عملت ايه يارعد ليه كده يابني
- حضرتك السبب حاولت اعرف منها قلتي لها ايه خلاها ترفض كده رفضت وقالت وعدتك ليه يا امي خلتيني احتد عليها ليه ضيعتي فرحتنا
بكت سلوان فأقتربت منها فيروز واحتضنتها واجلستها وجلست بجوارها
- اهدي يا سلوان وانت كمان يا رعد نظرت سلوان لابنها
- والله ما كان قصدي انا بس كنت عايزه اطمن عليك كنت خايفة تتوجع يا رعد انت عمرك ماحبيت ولا ارتبط كنت خايفة عليك والله بس انت طلع عندك حق مايسة ماتتسبش ليه ضايقتها كنت استنى لما نروح وانا كنت ح اقولك
- انا اتنرفزت لما رفضت تقولي والتفت الي فيروز ونظر لها برجاء من فضلك يا أمي ممكن ادخلها
- ادخل يارعد بس عايزة اقولك حاجة مايسة حنينة فوق ماتتخيل وطيبة لأقصى درجة وحساسة فوق ماتتصور بلاش توجعها يا رعد ولو حاسس انك مش ح تقدر يبقى بلاش الارتباط ده لان بنتي ح تيجي على نفسها كتير علشانك وفي الاخر ح تتعب هي
- لا يا امي ارجوكي بلاش تقولي كده مايسة خطفت قلبي لو راحت مني مش ح اقدر اكمل
- ادخلها يابني وبلاش تحاول تضغط عليها لان لو قتلتها مش ح تقولك
- حاضر يا امي عن اذنكم
قام رعد واتجه الي غرفة مايسة وطرق الباب ولم يستمع لشئ سوي بكاءها ففتح الباب سريعاً وتركه مفتوح ودخل فوجدها تجلس أرضاً وتضع وجهها على الفراش وتبكي فجري عليها وجلس أمامها ورفع رأسها وهو يمسك وجهها بين يديه وهي مغمضة العين
- مايسة حبيبتي انا اسف حقك عليا ياعمري انتي... خلاص مش عايز اعرف خلاص بس دموعك دي بتقتلني يا ماستي انتي غاليه عليا قوي حبيبتي ممكن تفتحي عيونك فهزت رأسها بالرفض فأقترب منها هامساً افتحي عيونك احنا قرينا الفاتحة ح ابوسك ففتحت عيونها سريعاً فضحك بقوة ماكنتش ح اعمل كده اكيد انا بتقي ربنا فيكي يا ماستي
نظرت له مايسة وانهمرت دموعها بقوة
- انا زعلانه منك قوي يا رعد
- حقك علي قلب رعد انا اسف
- ماتعملش كده تاني خليك واثق اني عمري ما ح اخبي عليك حاجة لازم تعرفها
- وانا واثق حبيبتي يالا نطلع لهم
- يالا
مد رعد يده لها فشاهدت يده تنزف فنظرت له وهي تبكي
- أيه ده عملت ايه في ايدك
نظر لها رعد وهو يبتسم على قلقها الواضح عليه
- ماتقلقيش ياقلب رعد لما زعلتك ضربت السور
- اخص عليك يارعد ليه كده
وجرت وتركته واحضرت عدة الاسعافات الاوليه وقامت بتطهير يده ووضعت عليها بلاستر طبي و قبلتها بحب فنظر لها رعد ورفع وجهها وهو ينظر لعيونها بعيون تهيم عشقاً وتكلم بصوت هامس أجش من فرط مشاعره
- يالا نخرج حبيبتي بحركتك دي ضربتي جهاز الانذار
ضحكت مايسة ونظرت له
- يالا نطلع
خرج الاثنان معا وكان رعد يمسك بيد مايسة وكأنه خائف ان تهرب منه وعندما رأتهم ريهام قامت بإطلاق الزغاريط
وتلاها بعد ذلك فيروز وسلوان ورنا
اتجه محمد لهم وسحب مايسة تحت جناحه تاركا رعد يقف بذهول وهو ينظر له وهو يحتضنها وهي تسير معه ونظر لأخته
- مش قلت الراجل ده ح يخطفها والتفت لوالدته بقولك ايه ياسلوان هانم روحي كده زي الشاطرة خدي جوزك وخليه يبعد عن ماستي
ضحكت سلوان وفيروز ونظرت له سلوان وهزت رأسها
- وانا مالي روح خد اللي يخصك ياسيدي حاجة غريبة قوي
- بقى كده ماشي ماشي
اتجه رعد لوالده وامسك يد مايسة واوقفها بجانبه
- بقولك ايه حضره الشاب الوسيم دورلك على مزه غير دي ماشي دي ملكية خاصة يا برنس احسن اصورلكم جناية والتفت ينظر لمايسة وانتي ايه ماصدقتي خد ايدك روحتي معاه على طول
نظرت له مايسة وهي تميل برأسها
- الله مش بابا يا رعد هو انا روحت مع حد غريب
- لا ياقلب رعد لا بابا ولا ماما هو رعد وبس
ضحك الجميع على ذلك المجنون الذي كان يضرب به المثل في برود مشاعره وتحدثت سلوان بضحك
- الحمدلله ان فيروز وافقت على كتب الكتاب اخر الاسبوع
وقبل ان تكمل وجدوا موسيقى عاليه جدا وزغاريط و أصوات عاليه
فخرجت ريهام تنظر فوجئت ب عبدالله قد احضر فرقة موسيقى وأهل المنطقة كلهم متجمعين أمام البيت السيدات تطلق الزغاريط والرجال والشباب يرقصون بالعصا وفجاءة وجدت معتز يقفز على السيارة من الأعلى ومعه اشرف وهم يصرخون ياحضرة الضابط يا رعد باشا ياست البنات فخرجوا جميعا وصعق رعد من ذلك التجمهر وذلك التجمع ووجود اشرف وسطهم فور ان خرج رعد ومايسة كانت الصفافير تطلق بقوة وأشرف يشاور لرعد للهبوط فامسك رعد يد مايسة وهبطوا جميعاً للأسفل وفور ان هبطوا وجد رعد عبدالله يحتضن مايسة بقوة ويقبل رأسها وهو يبكي
- اخيرا فرحت بيكي يابنت الغالي ربنا يسعدك يابنتي يارب والتفت لرعد واحتضنه بقوه واكمل ياحضرة الضابط انت اخدت جوهرة الحي كله هي مايسة صحيح بس ماسة غالية قوي يابني حافظ عليها جوه عيونك
- في عيوني ياعمي ماتخافش
اقترب اشرف ومعتز ومجموعه من الشباب وهم يرقصون حول رعد ومايسة وفجاءة حملوا رعد وظلوا يقزفونه للأعلى وهم يضحكون وبعدها انزلوه وكل واحد يهنئه بحفاوه وكأنهم يعرفونه حتى وصل لأشرف
- مبروك ياباشا الف مبروك يا سيادة المقدم
- الله يبارك فيك يا اشرف بره الشغل انا رعد وبس يا اشرف بس انت عرفت ازاي
- معتز بلغني وجيت جري والتفت ينظر لمايسة الف مبروك يا انسه مايسة
- الله يبارك فيك ياسيادة النقيب
امضوا السهرة في فرح وسرور حتى بعد منتصف الليل بأكثر من ساعتان وبعدها انصرفوا جميعاً وصعد رعد مع مايسة وفيروز للأعلى
- ماستي نازلة بكره
- لا يا رعد مش ح اقدر وكمان ريهام مش ح تقدر ح ناخد بكره اجازه
- خلاص يبقى اول ماتصحي كلميني
- حاضر خد بالك من نفسك
- يبقى لازم تاخدي بالك من نفسك كويس علشان انتي نفسي حبيبتي فهمست مايسة بخجل
- رعد بقي
- عيون رعد بقى وقلبه انا ماشي حبيبتي
- طمني لما توصل
- حاضر حبيبتي لا اله الا الله
- محمد رسول الله
انصرف رعد مع أسرته ووصل الي الفيلا وتركهم وصعد سريعاً لغرفته حتى يتصل بحبيبته وظلوا يتحدثون معاً لساعة اخرى حتى شعر بانفاس مايسة فعلم انها نامت فأبتسم وهو يهمس لها
- عقبال ماتنامي في حضني يا ماستي بحبك وكانت مايسة تستمع له وكأنها في حلم فهمست
- وانا كمان بحبك فانتفض رعد
-بجد يا مايسة بجد حبيبتي ولكنه لم يستمع سوي لصوت أنفاسها فعلم انها تهمس في أحلامها فأبتسم وظل يضع السماعه في اذنه يستمع لصوت أنفاسها حتى ذهب في النوم هو أيضاً
لقراءة أو تحميل رواية ماسه_حياتي الفصل الخامس من هنا 👇
لقراءه وتحميل الرواية كامله هنا 👇👇
للتواصل 👇👇👇😘
يُمكنك الانضمام لقناتنا على التليجرام
تعليقات
إرسال تعليق