روايه ماسه حياتي الفصل الأول بقلم موروو مصطفي
رواية ماسة حياتي البارت الأول
روايه ماسه حياتي الفصل الأول
في شقة صغيرة ولكنها مليئة بالحياة والضحك كانت تعيش فتاة رقيقة وجميلة اسمها مايسة والتي دائما ما تتنمر على نفسها فهي طويلة وعريضة وممتلئة القوام قليلاً ولكن بتناسق تحيا مع والدتها فيروزه بعد وفاة والدها تعمل في أكثر من مجال فهي رسامة محترفة وتعمل في كافية كي تساعد عبدالله وهو جار لهم زوجته مريضة ويجب عليه أن يرعاها فتعمل هي معه حتى يتوفر له مراعاة زوجته وايضا تعمل في محل لبيع الورود حتى تساعد ريهام وهي ارملة تركها زوجها ومعها أطفال صغار لا زالوا في طور الدراسه كانت تعمل في محل الزهور نهارا والكافية مساءً وفي منتصف النهار تذهب إلى اكثر من مكان حتى تقوم برسوماتها ومع كل ذلك ترعي والدتها وجيرانها ف الكل يحبها فهي مرحة للغاية تضحك مع الجميع وتلاعب الصغار ودائما ما تشتري الحلويات وتفرقها على الصغار طوال طريقها ودائما ما تكون في خدمة جيرانها سواء مرض او مشكله او اي شئ تشعر انها تستطيع فعله
استيقظت مايسة من نومها وهي تصيح بمرح
- فيروزه هانم أين انتي أيتها الجوهرة الثمينة يافيرووووووووزه
خرجت والدتها من خلفها وهي تمسك بفرشاة التنظيف وتضرب بها مايسة على رأسها بخفه
- في أيه يا مجنونة على الصبح صاحية عاملة غارة ليه ضحكت مايسة وهي تحتضن والدتها وتدور بها
- فيروزه فيروزه فيروزه
- انتي علقتي يازفته الشريط سف
- بدلعك يا روزه مالك سخنة ليه على الصبح ياست انتي
- اه يا همي الكبير انا سخنة ولا انتي اللي مخك فوت يا بت اعقلي بقى اعقلي بقى عندك ٢٣ سنة ح تعقلي امتى
ضحكت مايسة وهي تجري من أمام امها
- لما اجننك الأول يا فيروزتي ح ابقى اعقل
- اه ياغلبك يافيروز الله يسامحك يا احمد فضلت وراء البت اما لدعت
- بقولك ايه يا فيروز بالمعكوس مالكيش دعوة بالمز بتاعي الله يرحمك يابابتي ياحبيبي روحت وسبتني مع الساحرة الشريرة عايزة تعضني اهئ اهئ اهئ
وقفت فيروز تنظر لأبنتها بذهول قبل أن تحرك رأسها يمين ويسار وتتجه لها فنظرت لها مايسة وهي تتصنع الرعب
- الله الله الله مالك ياروزه شكلك قلب تنين وفاضل يطلع نار من مناخيره
- ده انا ح اطلع نار اشويكي دلوقتي يا جزمه تعالي هنا يازفته
تصنعت مايسة الرقة واتجهت لفيروز بدلال
- مالك يافيروزتي مين مضايقك وانا اطلعلك حبابي عينه من ودانه قولي بس ماتخبيش عليا ده انا زي امك
- زي امي اه ياني ياغلبك يافيروز
فجاءة انقضت مايسة عليها وأخذت تدغدغها وتحتضنها وهي تقبلها واجلستها وجلست بجواره وهي تضع يدها على صدرها
- اه ياني تعبت يافيروزه ياختي باين كده العضمة كبرت عندكيش عكاز اتسند عليه
- عندي ياقلب امك عكاز ح اخبطه في نافوخك ان شاء الله يابت قطعتي نفسي هو كل يوم المناهدة دي هديتي حيلي
وضعت مايسة رأسها على كتف والدتها
- طيب بذمتك يا مامتي ياحبيبتي مش بعملك جو روش كده يخليكي موبتهجة طول النهار
- موبتهجة اه ياختي موبتهجة قوي يابت كل يوم قطعة النفس دي كبرت انا على اللي بتعمليه فيا ده
- كبرتي ايه يامزه بس ده انا لولا الملامة يا اختي كنت جوزتك بس نعمل ايه في الراجل اللي بيحبك ده اينعم هو فلسع بدري شوية بس برضة يعني لازم نحافظ له على مزته
- اه يا مايسة وحشني قوي
- انا كمان يا ماما وحشني قوي يوم الجمعة الجاية نروح له ونقضي معاه النهار عايزة ارغي معاه كتير قوي ثم وقفت تنظر لها وهي تتصنع الغضب بس انتي تديني فرصة اول ما بنروح بتمسكي ودن الراجل مش بتسبيه خلي بالك ح يفرهد منك ويدور على تربه تانيه يروح فيها وساعتها ح تلاقي نفسك قاعدة تكلمي روحك ياعين امك وهو قاعد بعيد يتفرج ويضحك عليكي علشان بتكلمي روحك وفجاءة نظرت لفيروز وتصنعت الرعب وهي تصك أسنانها بعضها ببعض ياختااااااااي لا هو احنا ح نقلبها عفاريت ولا ايه انا بخاف
ظلت فيروز تضحك حتى دمعت عيناها على تلك الفتاة التي تصنع لها البهجة هكذا منذ وفاة والدها واحتضنتها وهي تقبل رأسها
- ربنا مايحرمني منك ياماستي الحلوة ويفرحني بيكي يابنت عمري
- ولا يحرمني منك يا امي الغالية بصي ياستي بقى انا ح ادخل اخد دش في السريع وبعدين ح انزل اعدي على طنط كريمة علشان عرفت انها تعبانة شوية ح اشوفها محتاجة حاجة اعملها لها ولا لا وبعد كده ح اطلع على محل الورد ومنه على النيل عندي لوحة عايزة اخلصها وبعد كده ح اجي على الكافية لو في اي حاجة كلميني ماشي يافيروزه قلبي
- ماشي ياعمري بس ماتنسيش في ميعاد الغداء تيجي
- حاضر يافندم ح اقوم بقى انا
- روحي حبيبتي عقبال ما احضرلك الفطار
- تسلم ايدك ياست الحبايب
🌹🌹🌹🌹🌹
نزلت مايسة بعد أن تناولت الإفطار مع والدتها وفي طريقها للعمل مرت علي كريمة فوجدتها مريضة للغاية ولم تستطيع أن تحضر الطعام لنفسها فقامت مايسة بتحضير الطعام لها وصنعت لها عصير ووضعته بجوارها وهمست لها بحنان
- كركوره ممكن بقى تاكلي وتشربي العصير وح اعدي عليكي وانا جاية اتغدى واوعى تقومي من مكانك تعملي حاجة ماشي
- حاضر يا مايسة تسلمي لي حبيبتي
- ح اسيبك بقى ياكركوره اوعي تتشاقي لغاية مارجع
- مع السلامة حبيبتي خدي بالك من روحك
- حاضر ياقلبي
هبطت مايسة الي الأسفل وركبت سيارتها حتى تتجه لمحل الزهور التي تقف فيه بديلا عن ريهام حتى تأتي لها وصلت إلى المحل وقامت بفتحه والعناية بالورود وتنسيقها وفتحت التلفاز على محطة القراءن وامسكت لوحتها وبدءت في الرسم وبعد قليل استمعت للسلام من شخص فرفعت بصرها فوجدت أمامها شاب وسيم ولكنه طويل للغاية وعريض يضع نظارة سوداء على عينه يرتدي بنطلون جينز اسود يفسر عضلات ساقيه كما يرتدي أيضا قميص اسود يظهر عضلات صدره شعرت مايسة انها اخطئت بالنظر له فأشاحت بنظراتها وظلت تستغفر في سرها وهمست بصوت خافت
- وعليكم السلام ورحمه الله تحت امرك يافندم
- من فضلك عايز بوكيه ورد حلو
- تحت امرك بس ممكن المناسبة علشان اقدر اختار الورد ولا حضرتك ح تختار بنفسك
- لا بصراحة ماليش في معرفة الأنواع ممكن اقولك المناسبة هي مناسبة انها قامت لنا بالسلامة من العمليه
- الف حمدلله على سلامتها تمام كده عرفت المناسبة اقدر اعرف حضرتك عايزة في حدود كام
- مش ح تفرق زي مايطلع المهم حاجة شيك على ذوقك
- تحت امرك اتفضل ارتاح عقبال ما اعمل لحضرتك البوكية
وقفت مايسة تختار من كل الزهور التي راتها تناسب الظرف وكان هو يقف يحدق بها من خلف نظارته حتى انتهت وعادت الي مكتبها حتى تقوم بتنسيق الزهور
- حضرتك تحبها بوكيه تمسكه في ايدك ولا باسكت
- لا بوكيه علشان هما يتصرفوا فيه براحتهم
- تمام
وقفت ترتب الازهار حسب اطولها ونسقتها بشكل راقي، وجذاب بشده وبعدها قامت بتغليف البوكية بالورق السليفان ثم قامت بلفه مره اخرى بورق ملون به قلوب صغيرة وبعد أن انتهت رفعت رأسها ونظرت لذلك الرجل سريعاً وهي تحمل البوكية في يدها
- اتفضل حضرتك لو تحب اعرفك بنوع كل زهره
- ياريت
وقفت مايسة تخبره بكل زهرة وماذا تعني فهي وضعت تشكيلة من الزهور والوانها منها الاوركيدا والسوسن والزنبق والبسنت وال لي لى والقرنفل مع بعض وردات من الورد البلدي وكانت كل الورود ذات رائحة قوية ونفاذه وعندما انتهت أعطته مايسة البوكية
- الف سلامة شفاها الله وعفاها ان شاء الله
- تسلمي يارب الحساب كام
- ٧٠٠ جنية يافندم انا اسفه على المبلغ بس حضرتك قلت مش فارق وانا حطيت انواع غالية بصراحة لكن لو حضرتك عايز اقل من كده اقدر اعمل لحضرتك واحد وح يكون حلو وشيك برضه
ابتسم على تبريرها السريع ونظراتها الخجولة
- لا ابدا انا مش معترض لاني عارف ان الأنواع اللي حضرتك حطتيها غاليه فعلا ذوقك رائع بجد احيكي
- شكرا لحضرتك
- اتفضلي ده الحساب والمبلغ ده لتعبك معايا
نظرت له بخجل ثم وضعت الاثنان في الدرج
- متشكرة جدا لذوق حضرتك
- سلام عليكم
- وعليكم السلام ورحمه الله
انصرف ذلك الشاب وجلست مايسة على كرسيها وهي تشعر ان قلبها ينبض بقوه فهمست لنفسها
- أيه ياهبلة مالك اتهبلتي ولا ايه اجمدي كده ياعبيطة ايه يعني واد مز كده وحليوه انتبهت لنفسها وهي تتحدث فهمست ياختاااااااااااااااااي اتجننتي رسمي يا مايسة يافرحة امك بيكي
عادت لرسماتها مره اخرى فوجدت نفسها تنتقل لرسم صورة جديدة وضعت بها ملامح ذلك الشخص ظلت هكذا بين صنع باقات الورود لمن يأتي لها والرسم حتى أتت لها ريهام فأعطتها مايسة حصيلة اليوم وكان مبلغ اكبر من المعتاد فنظرت لها بذهول
- أيه كل ده يا مايسة
- الحمدلله يا ريري زبون سقع جه خد بوكيه لوحده ب ٧٠٠ جنيه وحط بقشيش ١٠٠ جنيه مبروكين عليكي ياقلبي
- الله يبارك فيكي يا اجمل ماسة في الكون مش عارفة من غيرك اعمل ايه بس وبرضه مش عايزة تاخدي نصيبك
- يا ريري ياحبيبتي انا واقفه مع اختي اساعدها ح اخد منها يالا اسيبك انا احسن لسه ح اروح لفيروزه هانم اخد منها الاكل واروح لطنط كريمة احسن تعبانة قوي وبعدها بقى اتغدى مع فيروزه بدل ماتعلقني وبعدين اروح لعمو عبدالله لو احتاجتي حاجة رنيلي يا رورو ماشي وبوسيلي الاولاد لغاية ما اشوفهم يوم الاجازة اوعي تنسى ح نتغدى مع زوزتي
- لا مش ناسية ماتخافيش الاولاد من دلوقتي بيعدوا الايام علشان يروحوا لتيتا فيروز اتكلي انتي على الله وانا لما اخلص ح اعدي على الست كريمة وعم عبدالله اطمن عليهم
- ماشي ياروحي سلام عليكم
- وعليكم السلام ورحمه الله
🌹🌹🌹🌹🌹
ذهبت مايسة وجلست في مكانها المفضل تلك الحديقة الصغيرة الموجودة على ضفاف النيل وفتحت لوحاتها وجاءت لترسم ولكنها فجاءة وجدت نفسها تعود لتكمل رسمة ذلك الشخص المجهول فملامحه الحاده رغم ابتسامته لم تفارق خيالها ظلت ترسم بها حتى شعرت بدقات هاتفها ووجدت ان المتصل والدتها
- ايوة يا مامتي انا في الطريق حبيبتي ربع ساعة واكون عندك حضري بقى صينية حلوة كدة لكركر علشان اوديها لها قبل ماناكل
- حاضر حبيبتي المهم ماتتاخريش النهاردة ميعاد الدكتور واكيد عم عبدالله مش ح يبقى عايز يتأخر
- لا مش ح اتأخر يا فيروزه ماتخافيش حبيبتي سلام عليكم
- وعليكم السلام ياقلبي
اغلقت مايسة الهاتف مع والدتها وجرت لسيارتها سريعاً منطلقه بها إلى تلك المنطقة الجميلة التي عاشوا عمرهم كله بها رغم امكانيتهم ان ينقلوا الي حي أرقى ولكنها أحبت الصحبة والدفء الموجود مع الجيران وصلت مايسة الي البيت وركنت سيارتها وصعدت سريعاً لوالدتها وأخذت منها الطعام وعادت تهبط لكريمة ودخلت فوجدتها نائمة في الفراش كما طلبت منها مايسة
- كركورتي الحلوة قومي يالا علشان تاكلي
- تسلم ايدك يا مايسة تعبتي نفسك وتعبتي فيروز معاكي
- ياكركر تعب ايه ده الاكل اللي ح ناكل منه يالا بقى كلي معلش مش ح اعرف اقعد معاكي عمو عبدالله ح ياخد مراته للدكتور يادوب اطلع اكل لقمة وانزل جري بس فيروزه ح تنزلك كمان شوية كلي انتي ولما تخلصي بس حطي الصينية على الكومود جانبك وماتنيسش تاخدي الدواء ماشي ح اعدي عليكي بليل وانا طالعة
- مع السلامة ياحبيبتي خدي بالك من روحك
- وانتي كمان يا كركر سلاموز بقي
جرت مايسة الي الأعلى مره اخرى وجلست على مائدة الطعام وهي تلتقط أنفاسها
- ياختاااااااااااااااااي تعبت وربنا نفسي انقطع ياختي
- حبيبتي قومي اغسلي وشك يالا وتعالي الاكل جاهز ح اغرف بس
- حاضر يامامتي
ذهبت مايسة وغسلت يدها ووجهها وتوضئت ودخلت غرفتها ادت فرضها وابدلت ثيابها وخرجت مره اخرى وجلست مع والدتها وهم يتناولون الطعام وكلاً منهما يخبر الاخر بما صنع على مدار اليوم وبعد أن فرغوا من تناول الطعام قامت مايسة بترتيب كل شئ وصنعت القهوة لوالدتها ولها وخرجت لها
- اتفضلي يا ماما قهوتك حبيبتي ومعلش كمان شوية انزلي اطمني على طنط كريمة وانا لما ارجع ح اعدي عليها قبل ما اطلع
- ماشي حبيبتي طيب اقعدي اشربي قهوتك
- لا ياماما ح اخدها معايا علشان الحق عمو عبدالله سلام ياحبيبتي
- مع السلامة يابنتي
🌹🌹🌹🌹🌹
هبطت مايسة وذهبت الي الكافيه الخاص بذلك الرجل الطيب ودخلت وهي تحيى كل من تقابله فالكل يعرفها ويعرف من هي وكل من يأتي الي ذلك الكافية هم من الجيران بالمنطقة الخاصة بهم او مجاورين لهم فالكل يعرف الاخر
- انا جيت ياعبده ازيك
- يابت ياشقية عبده برضه مافيش فايده فيكي
- ياعبده بذمتك في حد يشوف مز زيك كده ومايدلعوش حتى عيب عليه
- اه يابكاشه انتي
- يالا ياعم اتكل على الله روح شوف المزه بتاعتك مش ميعاد الدكتور النهاردة
- اه يابنتي ادعيلها يا مايسة
- بدعيلها والله ياعمو ربنا يشفيها أن شاء الله عارف ندر عليا ان ربنا أراد وخفت من المرض اللعين ده لكون مأكله الحي كله فتاه ولحمة
- يا حبيبة قلبي ربنا يسعدك عارفة يا مايسة في عز الامها اول واحدة بتدعي لها انتي
- ربنا مايحرمني منها ولا منك يالا بقى ياراجل ياطيب روح لها خلاص انا جيت وقاعدة مرابطة هنا طمني اول ما تخرج من عند الدكتور اوع تنسي
- حاضر ياحبيبتي اول مانطلع ح اكلمك على طول يالا سلام عليكم
- وعليكم السلام ياعمو
- سلام عليكم ياشباب خدوا بالكم من مايسة
رد جميع من يعملون
- في عنينا ياحاج عبدالله
وقفت مايسة مع العاملين تساعد هنا وهناك في ترتيب الاماكن وتنسيق الكراسي والطاولات وشعرت بالتعب فنظرت لمن يقف بجوارها
- مسعد الله يكرمك خليهم يعملوا لي كوباية قهوة
- عيني يا انسه مايسة حالاً روحي بقى اقعدي على المكتب تعبتي قوي معانا في التوضيب النهاردة اليوم كان زحمه قوي
- ياسيدي ولا تعبت ولا حاجة ويارب دائما زحمه كده ح اروح انا على المكتب وانت بقى خد بالك وماتنساش القهوة
- حالاً
جلست مايسة على مكتب صغير موجود في جانب من الكافية وعادت برأسها للخلف مغمضه عيناها قليلاً فهي تشعر بالارهاق اليوم وفجاءه استمعت لصوت عالي فوقفت وذهبت لمكان الصوت فوجدت شاب ومعه اخران وثلاث فتيات فاتجهت لهم
- خير يافندم ليه حضرتك الصوت العالي
نظر لها ذلك الشخص من أسفل لأعلى وهو يضحك بقوه
- انتي بقى اللى ح تعلميني اتكلم ازاي ياشاطرة
تنهدت مايسة بأنفعال واغمضت عيناها وفتحتها ونظرت له مره اخرى بهدوء
- يافندم حضرتك داخل مكان محترم وانا سألتك في ايه ياريت حضرتك ترد أو لو مش عجبك المكان تقدر تتفضل
صاح بها
- انتي مش عارفة انا مين انا ممكن اطربق لك المكان ده على دماغك واقفله لك في لحظة انا النقيب اشرف داود اجري ياشاطره العبي بعيد وانت ياحيوان هات الشيشة للهوانم وغور من وشي
كان جميع من بالكافية يعرفون مايسة وكيف انها اذا انفعلت لا ترى من أمامها فاقتربوا منها وكانت مايسة قد أصبحت على حافة الغضب
- انا لغاية دلوقتي بكلمك بأدب والشباب اللي هنا قالولك ان معندناش شيشة يبقى لو انت عايز شيشة تتفضل في مكان تاني
في ذلك الوقت كان أحد أصدقاء ذلك الشاب يعرف مايسة بحكم انه جار لهم في منطقة مجاوره وحاول ان ينهي النزاع باخذ ذلك الضابط ومن معه والانصراف ولكن ذلك الضابط قد شعر باهانة منها حينما طردتهم بالذوق فجلس علي منضدة ورفع ساقة للأعلى ونظر لها
- اجري ياشاطره خليهم يروحوا يجيبوا الشيشة من مكان تاني واعملي لي بايدك الحلوة دي قهوة تعدل دماغي بدل الصداع اللي عملتيه ليا ده والا قسماً بالله اجرجرك انتي وشوية العرر دول وأعمل فيكم محضر تقعدوا فيه كام اسبوع على مايخرجوكم وهناك ح اعرف اضبطك كويس
هنا لم تشعر مايسة سوا وهي تدفع الكرسي بقدمها فيقع ذلك المدعو اشرف أرضا وعندما هب واقفا والغضب يعميه وجد صفعه منها على وجهه وهي تصرخ به
- بص بقى انا احترمتك لآخر وقت لكن قسما بجلال الله لو ما غورت من وشي لكون مكسرة دماغك وانا بقى اللى ح اخلي الدكاتره تتوهه تخيطك منين لما تحب تعمل دكر على حد تعمل دكر على اللي يستاهل مش جي تنفش ريشك في محل اكل عيش علشان شوية الحريم اللي جررهم وراك وفاكر انك عايز تعمل راجل عليا بتهددني بشغلك ولا بيهمني واتفضل بقى من هنا بدل ما أقل منك اكتر من كده والتفتت لجارهم اخص عليك يا معتز عجبك ده خدوا وامشي احسن وكتاب الله شايف الموجودين دول وربنا يكسروكم لم يبان لكم صحاب ولم تحب تهدد يابرنس بلاش تستغل شغلك اللي هو المفروض تحمي بيه الناس مش تهددهم لا وكمان رجاله طالبين شيشة لشوية بنات من منظر أهلهم انهم شمال جتكم القرف غوروا من هنا
حاول اشرف الاقتراب منها ولكن وقف أمامه معتز ونظر له بلوم وعتاب
- كفاية يا اشرف لو سمحت غلط وغلط قوي كمان وقلت لك من الاول المكان ده محترم لكن حبيت ترسم الدور أدام الهوانم اهو احنا كلنا اتمسح بينا الأرض وخليت منظري أدام جيراني زفت وانت كمان ماكنتش اتخيل انك تعمل كده بتهدد بشغلك يا اشرف وعلشان ايه علشان دول ما انت عارف دول مين وبيعملوا ايه اتفضل ادامي لو سمحت وكفاية قوي لغاية كده
نظر لها أشرف بغضب وهو يجز على أسنانه
- مسيرك تقعي تحت ايدي وساعتها ح اهرسك
- لما ابقى أقع تحت ايدك ابقى اعمل اللي عايز تعمله ورغم انك غلط فيا وفي كل الشباب دول لكن لك حق الاعتذار انا اسفة اني مديت ايدي عليك ماكانش يصح اسفة مره تانية
- اسفك مرفوض والقلم ده ح اديهولك عشرة
- تصدق انا غلطانة اتفضلوا بره
خرجوا من المكان وكان اشرف مثل الثور الهائج فقد جرحت كرمته وهانته أمام الجميع وترك الباقيين وانصرف وهو يفكر كيف يكسرها ويذلها ويهينها مثلما فعلت
🌹🌹🌹🌹🌹
جلست مايسة مكانها تحاول أن تلتقط أنفاسها وأصبح المكان في حالة من الصمت الرهيب فالكل يجلس صامت يترقب فقط مايسة وانفاسها حتى رن الهاتف الخاص بها فنظرت به فوجدته عبدالله ففتحت الهاتف وهي تقف
- ايوه ياعمو ايه الاخبار طمني
كان عبدالله يبكي فشعرت مايسة ان قلبها سيتوقف وجلست مكانها
- الله يكرمك ياعمو اهدي وطمني الدكتور قالك ايه
- خفت يا مايسة خفت خالص المرض راح انتهى يابنتي الدكتور كان مذهول
كانت مايسة تبكي وهي تضحك والكل ينظر لها ولا يفهم شيئاً وفجاءة وقفت وظلت تطلق الزغاريط فرحاً بذلك الخبر وصاحت بالجميع
- طنط خفت المرض راح طنط خفت خلاص
فأخذ الجميع يضحك ويصفق ومنهم من يطلق الصفافير فرحاً فهم جميعا في ذلك المكان يد واحده
- تعال بسرعة ياعمو احنا كلنا منتظرينك
اغلقت الهاتف ونظرت لهم
- يالا بسرعة عايزين نذوق الحته كلها يالا ياشباب همتكم وانت يا مسعد عايزاك تجيب شربات وانتم ياشباب عايزة المنطقة كلها تشرب شربات و بقولكم ايه محدش يقول لعمو اي حاجة فاهمين رد مسعد
- ايوة يا آنسة مايسة طيب ماحضرتك عارفة ان في كاميرات وعم الحاج بيبص عليها
- ح اشيل الشريط بتاع النهاردة ولو سأل قوله اني اخدته وانا ح اتفاهم معاه المهم مايعرفش
- تحت امرك يا انسة
تحرك الجميع يعملون على قدم وساق وقامت مايسة بإبلاغ والدتها بشفاء تلك المرأه الصبورة علياء ففرحت فيروز وهبطت لابنتها حتى تساعد معها وعلم اهل المنطقة فتجمعوا جميعا من اول الشارع حتى يهنئونها ويباركون لها الشفاء وامضي الجميع سهرة جميلة فقد وضع الشباب بعض الزينات سريعا ووضعوا الكثير من الكراسي فالكل اخرج ما لديه وقامت السيدات بصنع الساندويتشات مما هو في منزلهم كل شئ حدث في وقت وجيز وكانت مايسة تتحرك هنا وهناك حتى وجدت معتز أمامها وهو يخفض رأسه للأسفل
- اسف يا مايسة حقك عليا
- ليه كده يامعتز ليه تعرف الأشكال دي ليه تخسر نفسك
- والله يا مايسة اشرف كويس بس هي ظروف مر بيها خلته كده والحيوان التاني بيشجعه علشان يهيص على قفاه انا بحاول اكون معاهم علشان اقدر الجمه حقك عليا مره تانيه
نظرت له مايسة
- تمام يامعتز بس ارجوك بلاش عمو عبدالله يعرف
- حاضر يامايسة بس خلاص صافية لبن ضحكت مايسة
- حليب يا قشطة بس مش ح اتنازل عن صينية البسبوسة بتاعة طنط ماشي ضحك معتز وهو يشير بأصبعه على عيونه
- من عيوني يامايسة
- خلي بالك من صاحبك طالما بتقول كويس
- ادعيله ربنا يهديه
- ادعيله ربنا يهديه ده انا ح ادعيله ربنا يهده وهو عامل زي عود الصواري كده وفاكر نفسه الواد التقيل قوله يبطل يتفرج على افلام كتير
ضحك معتز حتى وقع أرضاً
- وكتاب الله انتي ماليكي حل بقولك ايه يا بت يا مايسة ماتيجي تتجوزيني واهو نكسب ثواب في بعض صاحت مايسة به
- اه ايه امشي ياعم امشي الله يسهلك قال اتجوزك ونكسب ثواب ده احنا ح نكسب سيئات وفتكات هو انت مستغني عن روحك عايز منار تعلقك وكتاب الله دي تعلقنا احنا الجوز وتبيعنا امشي ياعم امشي ومش عايزة البسبوسة قال اتجوزه قال
كان معتز مازال يجلس أرضا وهو يضحك حتى نام على ظهره ونظر الي مسعد
- انت واقف تعال ياعم شدني الست دي ح تموتني من الضحك طول عمري اشوف الناس تموت من النكد إنما انتي ح تموتيني من الضحك
وقف معتز وتحرك لينصرف وهو ينظر لها فيعود ليضحك حتى خرج
نظر لها مسعد بعاطفة أخوية
- والله انتي فعلا ماليكي حل بت جادعة بمية راجل وبتعرفي تسيطري على الأمور وتحوليها معرفش ازاي ربنا يديمك في حياتنا يا ست مايسة
- الله يكرمك يامسعد وتحقق كل احلامك يالا بقى شوف عملوا ايه
- حاضر يا أنسة عن اذنك
انقضى اليوم بعد أن امضوا سهرة طويلة في الشارع احتفالاً بشفاء علياء وبعدها صعد كل واحد الي بيته والكل على وجهه ابتسامة
لقراءة أو تحميل رواية ماسه_حياتي الفصل الثاني من هنا 👇
لقراءه وتحميل الرواية كامله هنا 👇👇
للتواصل 👇👇👇😘
يُمكنك الانضمام لقناتنا على التليجرام
تعليقات
إرسال تعليق