اهلا رمضان مرحبا رمضان للكاتبة شهد شهبو
رمضان أهلاً مرحباً رمضان
أول حاجة اقرأ العنوان بصوت النقشبندي، تانى حاجة هكتب بالعامية زي ما بنتكلم ، تالت حاجة بقي ده مش مقال ده مجرد نقاش، طيب يا شهد مرحباً رمضان اى يا حبيبتي المفروض دلوقت والله لسه بدري والله يا شهر الصيام؟
طيب يا عزيزي القارئ تقريبا على ما تقرأ النقاش ده هنكون 16,15 رمضان كل سنه وانتم طيبين.
فئة كبيرة مننا بدأت رمضان بكل حماس وانتظار، نقرأ قرآن كتير، نصلى فى الوقت، ونذكر ربنا كتير، التراويح والأعمال الخيرية_عارف ما يسمى بحماس البدايات أهو ده_دلوقت وصلنا لنص الشهر_وركز أن هو شهر بس مش سنه_بدأنا نقل فى الحماس، يدوب بنقرأ الجزء المحدد على حسب اليوم، والتراويح بتاخد وقت طويل نكسل النهارده، والسبحه فى صباعنا بنسبح شوية؛ فقدت شغفك وحماسك خلص من نص شهر!
اهلا رمضان مرحبا رمضان للكاتبة شهد شهبو
ملحوظه: مش كلنا الشخص اللى بتكلم عنه، يعنى فى شخص ضعف، وفى أشخاص ربنا يكرمنا ونبقى زيهم.
تخيل انك عارف ان ربنا سبحانه بيعتق ناس كل يوم من النار وتتكاسل، تخيل انك عارف انه شهر عتق ورحمه ومغفرة وبتتاكسل !
بالله عليك هل يصح؟ والله لا يصح يا شهد.
من أجمل الحاجات اللي سمعتها إن أنت دلوقت بتواجه عدوك الرئيسي بتواجه نفسك، أصل الشيطان محبوس فدى أفعالك أنت، تخيل!
رمضان يأتي ليصلح ما أفسده أحد عشر شهرا فلا تجعله كغيره من الشهور، اجعله الباب اللي تخرج منه شخص أفضل يحاول يرضى ربنا في رمضان وغيره، متخرجش منه زي الأول أو أسوأ.
اهلا رمضان مرحبا رمضان للكاتبة شهد شهبو
ابدأ رمضانك دلوقت بنفس الحماس اللي بدأت بيه أول يوم، ارجع حافظ على المصحف والتراويح والأذكار والنوافل، اجعل كل يوم كأنه أول يوم بنفس الحماس بل وأكثر.
ضعفت، تكاسلت، انتكست، ابدأ رمضانك من أول وجديد يا صديقي وأنشد رمضان أهلا مرحبا رمضان ورمضان كريم.
عزيزي القارئ أنا مش عالمة في الدين، مجرد نقاش بسيط دار بيني وبين نفسي فشاركته معك، لعلى أستيقظ وأجاهد ظلم نفسي.
وفي الختام أشكركم على قراءتكم واستغفر الله لذنبي وذنبكم ونسأل الله العفو والعافية وأن نكون ممن عتقت رقابهم في شهر رمضان.اللهم احفظ أهل فلسطين والمسجد الأقصى من كيد الظالمين، وأيدهم بنصرك وقوتك.
بقلم/ شهد وليد شهبو
تعليقات
إرسال تعليق