عريس في زمن الواتباد بقلم لولو محمد احتفاليه الاقلام الذهبية

 عريس فى زمن الواتباد 

عريس في زمن الواتباد بقلم لولو محمد احتفاليه الاقلام الذهبية 

عريس في زمن الواتباد بقلم لولو محمد 

جروب المجد للقصص والروايات 

#لولو_محمد

فى شقه عروسين 

هيثم ( العريس ) بيتحرك بتوتر فى الصاله و قدامه على السفره صينيه عشا العرسان متغطيه يروح يكشفها و يبص 

هيثم / ايه صينيه فجر الاسلام دى مين هياكل الاكل دا كله ... احم هى اتاخرت كدا ليه لتكون مكسوفه منى و لا حاجه 

هيثم يروح يخبط على باب اوضه 

هيثم / مش محتاجه مساعده 

صمت 

هيثم / طب انتى كويسه طيب .. نامت و لا ايه دى 

هيثم يخبط تانى 

هيثم/ شهد ... شهد انتى تمام و لا ايه ادخل طيب و لا هيبقي ايه الدنيا عندك طيب ... شكلها نامت فعلا هى عين الواد فارس ضربت الليله الليله ليلتك يا عريس دا انت هتتهنى يا عريس دا انت اللى هتتهان لما اشوفك ... شهد 

هيثم يفتح الباب بالراحه يلاقي شهد واقفه فى ركن بفستانها و واضح عليها جدا التوتر 

هيثم / ايه ده انتى لسه ما غيرتيش .. ايه مش عارفه تفكى السوسته و لا ايه ... تحبى اساعدك ؟؟ 

هيثم يلاحظ توترها يروح يقعد على السرير و يفرك و يتفرج على الاوضه و بعدين يبصلها 

هيثم / تحبى تاكلى لقمه انتى اكيد جعانه من بدرى بقي ميك اب و سيشن و فرح و زفه تعبتى انتى جامد النهرده و برده فرصه نتعرف على بعض اكتر و نشيل الحواجز اللى بينا دى و تاخدى عليا كدا و تفكيها 

شهد تبصله 

شهد / هى ايه دى اللى افكها 

هيثم / احنا هنفضل واقفين كدا كتير ... ما تيجي طيب تقعدى جنبى نتكلم بالراحه انتى زانقه نفسك فى الحيطه كدا ليه 

شهد / انت عاوز ايه بالظبط 

هيثم / لا اله الا الله ليه يا ماما التوتر دا كله ..  بس انا مقدر على فكره ... اصل انا برده كنت معترض و الله ... انا قولتلهم الجواز بالطريقه دى بطل بس انا الحقيقه مش ندمان عارفه ليه عشان العلاقه القديمه اللى بين والدى و والدك 

شهد بصوت واطى / لحظه الحقيقه 

هيثم / ايه !! 

شهد / انا كنت متاكده كنت عارفه على فكره بس بابا ما صدقنيش كان بيضحك عليا كل ما كنت بحذره 

هيثم / من ايه و بعدين انتى اتعصبتى كدا ليه على فكره انتوا اللى اخترتوا الطريقه دى من الاول 

شهد / ايوه بس انا ما ليش ذنب انا ما عملتلكش حاجه انا عمرى ما اذيت حد و لا حتى القطط انا اصلا بخاف منهم 

هيثم / قطط ايه قطط ايه انا مالى بالقطط دلوقت انا مش فاهم اصلا انتى بتقولى ايه ايه علاقه القطط بجوازنا اساسا 

شهد / انت بتزعقلى ليه انا بنت ناس على فكره 

هيثم / ما زعقتش انا اتحمست شويه بس ما كانش قصدى ازعق انتى بصراحه كلامك مستفز 

شهد / اتنين ريد فلاج مره واحده تعمل الحاجه و تنكرها و كمان تقلب عليا الترابيزه و تطلعنى انا الغلطانه انا و الله قولتلهم ما حدش صدقنى 

هيثم / قولتى لمين و قولتلهم ايه انتى بتقولى ايه انتى حد مديكي حاجه شافوكى متوتره اوى كدا قالوا يعني يوجبوا معاكى و كدا و لا ايه الدنيا عشان انا بدأت اتوتر هو فى ايه بقي هاه فى ايه 

شهد / قولى الحقيقه انت اتجوزتنى ليه 

هيثم / عشان اكمل نص ديني بنت ناس و متربيه و من عيله متدينه دا غير العلاقه القديمه اللى بين والدى و والدك  

شهد / ايه بقي العلاقه دى حلوه يعني و لا وحشه العلاقه دى 

هيثم / السؤال ده بجد ... انتى مش عارفه ان ابويا و ابوكى شركاء من سنين فى شغلهم 

شهد / يعنى جوازه مصلحه

هيثم/ ليه السكه دى و ليه الكلام ده اصلا انا مقدر ان الجوازه تمت بسرعه بس حضرتك احنا مخطوبين بقالنا تلت شهور ما اتكلمتش معاكى فيهم لوحدنا ولا مره و علاطول العيله قاعده حوالينا و انتى عينك فى الارض ما بتترفعش منها  و الشقه كدا كدا كانت جاهزه من كله فأكيد اول ما هيقولوا يلا اتجوزوا هوافق يعني هقول لا ليه 

شهد / يعني انت مش هتحاول تنتقم منى ؟ 

هيثم/ دا بجد !! السؤال ده حقيقي ؟؟ بجد !! طب ليه يعني مين انسان عاقل ممكن يفكر او فين الانتقام من انى اتجوزك يعني فين الانتقام فى الموضوع 

شهد / عادى كلهم بيعملوا كدا

هيثم / هو انتى عشان شوفتى كام حلقه على كام فيديو لشويه نسوان فيمنست حكمتى على منظومه الجواز كلها انها سايكو و لا انتى تقصدى ايه بموضوع الانتقام ده مش فاهم و بعدين انتقم منك ليه اصلا دا انتى عمرك ما اذيتي قطه هانتقم منك ليه انا 

شهد / يمكن اهلك أجبروك على الجوازه او يمكن حد من اهلى اذاك اخويا مثلا او بابا او يمكن عقد قديمه بتطلعها فيا 

هيثم / اوبااااا هى وصلت لعقد قديمه ... دى مش بركات فارس دى لا دا غلبان على الكلام ده ... الموضوع دا معدى الموضوع كدا معدى معدى خالص هو فى ايه لا بجد انا توهت توهت و صدعت و حاسس ان فى حاجه غلط و بدات اقلق و شكلى جعان ... اهو انا دلوقت بس عرفت ليه صينيه أحفاد ابو لهب دى محطوطه بره ما عشان اليوم طلع محتاجه طاقه و فيه حرق كتير و لازمله غذا ... انا رايح اكل ... لو جعانه الاكل بره يشرفني تشاركينى اللقمه 

هيثم يمشي و هو بيضرب كف على كف شهد تطلع تجرى وراه 

شهد / يعني انت مش متجوزنى عشان تنتقم منى 

هيثم / تانى !! تانى ... لا يا ست البنات انا متجوزك عشان اكون اسره و جو رش الدقيق و المخدات الريش و صينيه الفطار فى السرير عارفه انتى الحاجات دى سمعتى عنها عارفه انتى الافلام اللى البطل فيها يقعد يجرى ورا البطله على البحر و لا يا احمد و كدا و لا انتى الدنيا عندك وقفت عند السايكو بس ... وقفت ... ما انا عارف بختى ... تصدقى و تؤمنى بايه

شهد / لا اله الا الله

هيثم / انا كنت ساكن فى شقه بره انا و تلاته زمايلى فى الجامعه انا الوحيد فينا اللى جالى كرونا مع انى الوحيد اللى كنت ملتزم بالإجراءات الاحترازيه بختى و انا عارفه 

شهد / هو انا ممكن انام 

هيثم / يا ريت... انا شايف انها فكره كويسه 

شهد / لوحدى 

هيثم / ماشي مش مشكله مش لازم حاجه النهرده يعني الدنيا ما طارتش و اهو برده تكونى هديتى كدا و ربنا فتحها عليكى تمام تمام مفيش مشكله تمام 

شهد تبتسم بخجل و تدخل الاوضه 

هيثم/ الله يحرقك يا فارس الكلب انا اول ما شوفت خلقتك فى الفرح عرفت ان اليوم انضرب ... هى ايه الدماغ دى اصلا ادى اخره القفل على البنات دى محتاجه تتفرمط ... لا حول ولا قوه الا بالله ما فيش حاجه بتكمل حلوه للاخر تلاقى بنت منفتحه و دايره و لفه تلاقيها بتقولك المساواة و انا مش ملزمه و رضع انت تجيب بنت بيتوتيه كدا مقفول عليها تطلع لاسعه ... صحيح ما حدش بياخد كل حاجه ... و ايه اللى انا بعمله ده انا كمان بقيت بكلم نفسي فى اول يوم جواز امال بعد خمس ست سنين هعمل ايه هعمل ايه 

هيثم ياكل و يقوم يشيل الاكل و بعدين يروح ناحيه اوضه تانيه يعدى من قدام اوضه شهد يسمع صوت شحتفه

هيثم/ تكون مجبوره على الجوازه و عشان كدا ما كانوش بيخلونا نقعد مع بعض و لا كانت بتتكلم 

هيثم يفتح الباب شهد تتفزع و تصرخ 

شهد / حلفتك بالله لا تضربنى و لا تغتصبنى حلفتك بالله ما تأذيني 

هيثم / لا حول و لا قوه الا بالله و انا هعمل كدا ليه ما انا جوزك اغتصبك ليه اصلا هو فى حد بيغتصب مراته 

شهد / امال بتتهجم عليا كدا ليه 

هيثم/ انا جيت جنبك يا بنتى انا لمستك انا سمعت صوت عياطك قلقت عليكي دخلت اطمن اقسم بالله ما كنت ناوى اعمل اى حاجه من خيلاتك المريضه دى انا ابن ناس 

شهد / ما كلهم ولاد ناس و اغنيا و رجال إعمال و عندهم امبراطوريات و شركات و عمارات 

هيثم / و ترابيزات بلياردو و بينج ... هم مين دول اصلا و ايه علاقتك بيهم

شهد / أبطال الروايات 

هيثم/ حبيب هارتى قولتى ايه يا قمر ... روايات !! روايات ايه ... لحظه لحظه لحظه انا كدا جمعت ... انتى كل ده انتقام و تغتصبنى و الرعب اللى انتى فيه ده بسبب الروايات 

شهد / كلهم بيعملوا كدا 

هيثم / مين كلهم و ليه بيعملوا كدا و مين قالك انهم بيعملوا كدا 

شهد / كل الروايات 

هيثم / كل الروايات الابطال فيها بينتقموا من البطلات و يغتصبوهم و كدا بتجبيها منين الروايات دى

شهد / كل حته دى مغرقه النت و الواتباد 

هيثم / ايه الواتباد ده

شهد / ابليكايشن كلو روايات 

هيثم / طب ممكن اقعد نتكلم طيب احاول افهم انا الواتباد و الروايات و الكلام الجديد الكبير ده ... الاول انتى ليه كنتى بتعيطى اوى كدا خضيتيني عليكي 

شهد / اصل أسد ضرب شفق جامد اوى 

هيثم / اسد و شفق !! دول أبطال المسلسل التركى بتاعك قولى لا ارجوكى قولى لا 

شهد /لا طبعا تركى ايه يا ابنى انا ما بتفرجش على الهبل ده دا هى هى نفس القصه بيعملوها كل سنه مدير الشركه بيعين سكرتيره و يمثلوا انهم بيحبوا بعض و بعدين تقلب بجد و الكوكب كله بيحاربهم و كميه مشاهد محن بالهبل انا ما ليش انا خالص فى الجو ده 

هيثم / الحمد لله طمنتيني امال مين اسد و شفق دول بقي 

شهد / دول أبطال روايتى المفضله 

هيثم يتنح 

شهد / انا هحكيلك أسد درغام دا بقي 

هيثم / لحظه لحظه عرفته مش دا كارتون نتورك السعودى و فلافيلو و البت كان اسمها ايه اسمها ايه ياض يا هيثم اااه يلعنود فاكره انا اه كنت بحبه اوى البتاع ده

شهد / انت بتقول ايه 

هيثم / مش هوه!! بجد ... طب كملى كملى مين اسد درغام ده بقي 

شهد / تخيل انه لمجرد ان فهد و عقاب قالوله انهم شافوا شفق مع صقر بيضحكوا راح ضربها و سقطها 

هيثم / الواطى الدون 

شهد / شوفت .. مش كفايا انها اتجوزته غصب بعد ما خطفها و سوء سمعتها و هددها انها لو ما وافقتش تتجوزه هيغتصبها و يصورها و ينزلها على النت بجد مش قادره اصدق انه عمل كدا 

هيثم / فين الحكومه من كل ده طيب

شهد / على الاقل كان يسالها قبل ما يضربها الضرب دا كله على الاقل ما كانش ابنه مات 

هيثم / ايرور ربعميه و اربعه ايه ده انتى قولتى ايه ... يعني كل اللى عمله ده و كل اللى فارق معاكى انه صدق كلام حديقه الحيوان اللى فتحت فى الروايه دى 

شهد / ما هو اعتزر على الحاجات اللى فاتت دى و خدها على الياخت بتاعه و عملها فايرواركس باسمها فى السما و جابلها فستان فيروزى لون عنيها و هى عاشقه 

هيثم / مش فاهم 

شهد / انا بحب اللون ده اوى 

هيثم / لا بجد مش فاهم ايه علاقه لون عنيها بالعشق 

شهد / اصل انت مش فاهم شفق عنيها لونها بيتغير حسب مشاعرها 

هيثم / دى الدبله ايوه عارفها اصل انا و انا فى امريكا واحد صاحبى كان مصاحب بت انتى عارفه امريكا بقي اااااااايه ما اقولكيش معجنه كلو على كلو و لما تشوفه قوله

شهد / هو مين 

هيثم/ يعنى كل اللى قولتيه ده و جايه على دى و اقفى المهم صاحبته كانت جيباله الدبله دى اللى بتغير المشاعر دى و عجبتنى و روحت جبتلى واحده بس ما اشتغلتش معايا مش عارف كانت بايظه و لا انا اللى متبلد المشاعر و لا ايه الحوار ما علينا المهم ان شفق لما شافت الفستان سامحته على كل القرف اللى عمله مش كدا 

شهد / ايوه انت اصلك مش متخيل أسد ده عامل ازاى و لا قطرات العرق و هى بتتساقط على جسمه و هو بيجرى على التريدميل عنده فى الجيم بتاع القصر بتاعه 

هيثم / ايه القرف ده لا حقيقي ايه المغرى فى واحد بيشر و يهر فى الجيم يعني انا دلوقت فهمت احنا ليه ما كناش بنقعد مع بعض لوحدينا ... اكيد خافوا اطفش حقهم اصل انا دلوقت بحاول اتخيل حياتى معاكى بس على فكره مش وحش ... لما فكرت فيها لثانيه فيها حاجه حلوه كدا مستخبيه ... عارفه انتى الواحد لما بيحب حد بيقبله باسوء حالاته فهمتك انا بس ما تقلقيش خالص من الموضوع ده انا انسان نضيف جدا و بستحمى مرتين فى اليوم و باذن الله مش هتضايقي من حكايه ريحه عرقى دى خالص النضافه عندى رقم واحد الصراحه

شهد / على فكره انت فاهم الموضوع غلط انا بتكلم عليها هى شفق انا بالنسبالى عادى يعني احنا اصلا لا عايشين فى قصر و لا عندنا جيم فى البيت 

هيثم / و الله دى بدايه ممتازه بعد كل الهرى اللى فات حلو السكه دى كملى 

شهد / انا بجد اللى فارق معايا انه عارف ان فهد و عقاب الاتنين بيكرهوه و اكيد قالوا كدا عشان يوقعوا بينه و بين شفق خصوصا ان ايهم بيحبها 

هيثم / هو محمد و محمود و على و حسين و هيثم زعلوكوا فى حاجه احنا فين من كل ده لا بجد ايه ده قصه دى و لا محميه بريه مش فاهم انا و ايه ده بجد يعني انا تعبت 

شهد / خلاص خلاص سيبك من الروايه دى انت ما قريتهاش فطبيعي مش هتفهمها انسي آنسي

هيثم / لا مش هنسي يا شهد عشان الحاجات دى مأثره عليكي جامد اوى شهد انا عشت عمرى بدرس بره و شوفت حاجات بجد خلتنى اقرف من الدنيا كلها مشاكل بجد مش هقولك بقي فساد و كفر و اللحاد و كدا لا دا الموضوع عدى انتى حرفيا ما بتبقيش عارفه البنت اللى بتتكلمى معاها دى اساسا بنت و لا راجل و قلب و لا راجل و لسه راجل بس لابس ست انتى بتتزاولى فى مواقف غريبه و بتشكى فى كل اللى حواليكي و حتى الناس العاديه اللى عارفه نفسها ما فيش حاجه اسمها حدود الصبح مع واحد و بالليل مع واحد و تصحى الصبح تندم انها كانت مع التانى فتقول انه اغتصبها فيتحبس عادى انتى متخيله انا حرفيا كنت بكلم نفسي مش قادر اتعامل مع الناس اول ما خلصت دراسه نزلت مصر و حاولت ارتبط زى اى شاب فى سنى عادى و مع أول محاوله وقعت فى واحده بتؤمن بالفكر النسوى فى حاجات ما ينفعش تؤمن بيها زى ان البنت من حقها تلبس و تقلع زى ما هى عاوزه و انها تخرج و تسهر و ترجع وقت ما تحب و يكون ليها صحاب ولاد عادى و ان مش من حقى كزوج اسألها رايحه فين و جايه منين الموضوع ما كانش بنت واحده انا مع البنت دى شوفت وسط كامل بيؤمن بأفكار يخليكي تضربى عن الجواز خالص و مش بس كدا دا انتى تضربى عن الكوكب باللى فيه ... لحد ما والدتى طلبت منى أروح معاها النادى و شوفتك ... كنتى قاعده ماسكه الموبايل و لابسه حجابك الجميل و قاعده فى هدوء و رزانه كدا خلتنى مستعد اعمل اى حاجه و تكونى حلالى و فى التلت شهور اللى فاتوا و انا بشوف بيتك و اخلاقك و اهلك و تربيتك كل مره كنت بتمسك بيكي اكتر و كل مره كنت ببقي مستعجل على الجواز اكتر

هيثم يبص لشهد بتابعه بابتسامه

هيثم /  ما كنتش اعرف ان الهدوء ده ما كانش رزانه دا كان العاصفه 

شهد / لا دى كانت البر التانى يوميها كنت بقرا قصه البر التانى ...  العاصفه دى بقي بتاعه شيمو دى جميله جدا ابقي اقراها 

هيثم يهرش فى قفاه بفقدان امل 

شهد / حلوه و الله و مش زى القصص اللى حكيت لك عنها و ضايقتك لا دى حاجه تانيه خاااالص 

هيثم / تمام يا شهد رسالتك وصلت شكرا 

شهد / على فكره انا فهمتك و صدقنى كلامك ريحنى مع ان حوار انك ترتبط بيا عشان تعالج تروما سببتهالك واحده تانيه دا اتهرس فى روايات كتير جدا 

هيثم / البطل كان اسمه هيثم 

شهد / لا طبعا 

هيثم / ما اكيد لا مين هيثم ده يعني ... على فكره هيثم يعنى صقر يعني يمشي ... يمشي ايه دا بيطير   

شهد بفرح و حماسه / ايوه 

هيثم يبصلها و يبتسم و هو بيضرب كف على كف 

شهد / اولا انا لازم اعترفلك انك طلعت انسان محترم 

هيثم / الحمد لله 

شهد / و اكيد لازم اشكرك انك احتويتنى و سمعتنى صدقنى كل ما كنت أحاول اتكلم مع حد كان دايما يستهزئ بيا او يضحك انت اصلك مش متخيل انا عايشه على الروايات دى بسرح معاهم و بعيشهم انا ممكن امسك روايه مجلد ما انامش الا اما اخلصها

هيثم / للدرجادى !!

شهد / طب تصدق ان سوء التفاهم اللى حصل بينا ده حصل زيه بالظبط فى روايه قريتها زمان مش فاكره اسمها بس البطل كان اسمه رعد و البطله كان اسمها رهف رهف دى بقي بشرتها كانت حليبيه و شعرها كان اسود بيتحول للدهبى فى الشمس 

هيثم / راخره 

شهد / لا التانيه كان عنيها اللى بتتغير 

هيثم / اه صح دى شعرها التغير مطلوب برده اهم حاجه الإبداع و الابتكار امال تبقي روايه ازاى 

هيثم يبص لشهد بصاله و مبتسمه يضحك تضحك 

شهد / انت طلعت شخص لذيذ 

هيثم / يكرم اصلك يا ستى

شهد / بس انا ليا طلب عندك... او رجاء انا مش هضغط عليك بس فعلا الموضوع ده بالنسبالى حياه او موت 

هيثم / اؤمرى لو اقدر ما اتاخرش

شهد / انا نفسي اسمى ابنى مازن منتصر

هيثم/ نعم !!!

شهد / انت اصلك مش متخيل كان قد ايه رومانسي انت اصلك ما تعرفوش دا كان واد بايظ و بعدين حب بنت غيرتله حياته خالص اما كان عليهم شويه هيييح 

هيثم يسيب الاوضه و يطلع بره شهد تجرى وراه 

شهد / استنى بس دى قصه غيرهم خالص استنى هحكيهالك 

هيثم يلف و يبصلها و يتنهد 

هيثم / انا عندى ليكي اقتراح جميل جدا

شهد تبصله باهتمام

هيثم / خلينا ننسي كل الروايات اللى قريتيها بهيحها بحيواناتها بكل تفاصيلها و نكتب انا و انتى من دلوقت قصه جديده خالص ما اتهرستش فى اى روايه قبل كدا حاجه كدا مغامره على رومانسي على ساسبينس على دراما على كوميدي حاله فريده من نوعها ايه رايك 

شهد / دى فكره حلوه جدا ... بس انا ما عييش حاجه اكتب فيها 

هيثم يسيبها و يمشي على الاوضه و شهد بتجرى وراه و هى بتضحك 

شهد / استنى بهزر بهزر و الله استنى 

شهد تدخل ورا هيثم الاوضه و يقفلوا الباب و هم بيضحكوا 

................................